Nte Ekpekpepde Nditọ Fo Ẹma Abasi

MFỊN, idịghe mmemmem n̄kpọ owo ndinyene eti itie ebuana ye Jehovah Abasi. (Psalm 16:8) Kpa nte ẹkebemde iso ẹtịn̄, nnyịn idu ke “ndiọkeyo.” Ndien ata ediwak owo “ẹma inemesịt utu ke ndima Abasi.” (2 Timothy 3:1-5) Ih, mme owo inen̄ekede ima Abasi ke ererimbot mfịn.

Nditọwọn̄ ikemeke ndinen̄ede mma Abasi ntre ke idemmọ. Ana ete ye eka ẹkpep mmọ ẹma Jehovah Abasi. Didie ke ikeme ndinam emi?

Nneme Ofụri Esịt

Nnyịn imekeme ndikpep nditọ nnyịn ẹma Abasi edieke nnyịn ke idem nnyịn imade Abasi. (Luke 6:40) Se Bible etịn̄de edi oro ke ini enye ọdọhọde ete: “Ma ndien Abasi fo ke ofụri esịt fo, ye ke ofụri ukpọn̄ fo, ye ke ofụri odudu fo. Ndien yak mme ikọ emi ami ntemede fi mfịn emi, ẹdu fi ke esịt: nyụn̄ dọdiọn̄ siak mmọ nọ nditọ fo.”—Deuteronomy 6:4-7.

Didie ke ikeme ndikpep nditọ nnyịn ẹnen̄ede ẹma Abasi? Akpa, ana ifiọk se idude ke esịt nditọ nnyịn. Udiana, ana itịn̄ se idude nnyịn ke esịt.

Ke ini Jesus Christ akasan̄ade ye mbet esie iba aka Emmaus, enye ama ọdọhọ mmọ ẹtịn̄ se mmọ ẹyomde ye se idide mfịna mmọ. Edi ke Jesus ama okokop se mmọ ẹketịn̄de ke enye ekenen̄ede ukwan̄ ekikere mmọ ke ndinam N̄wed Abasi an̄wan̄a mmọ. Ekem mmọ ẹma ẹdọhọ ẹte: “Nte esịt ikofiopke nnyịn ke ini enye ekenemede nneme ye nnyịn?” Nneme oro ekedi uwụtn̄kpọ nneme ofụri esịt. (Luke 24:15-32) Nnyịn ikeme ndisan̄a didie mfiọk ekikere nditọ nnyịn?

Ke ndondo emi, ẹma ẹbụp mme ete ye eka ẹban̄a nte mmọ ẹkesinemede nneme ofụri esịt ye nditọ mmọ, ndien mme ete ye eka emi ẹdi mbon oro nditọ mmọ ẹdide ikpọ owo idahaemi m̀mê oro ẹkperede ndidi ikpọ owo, emi ẹnyụn̄ ẹnịmde nti uwụtn̄kpọ. Ke uwụtn̄kpọ, Glen ke Mexico enyene ikpọ nditọ inan̄. * Enye ọdọhọ ete: “Oyom ukeme man ete ye eka ye nditọ ẹsinyene nneme ofụri ini. Ami ye n̄wan mi ima isitre mme n̄kpọ oro mînen̄ekede inyene ufọn man ibiat ini ye nditọ nnyịn. Ke ini mmọ ẹkedide uyen, nnyịn ima isida ofụri mbubịteyo itie ye mmọ ineme n̄kpọ ekededi oro okodụkde mmọ ekikere. Kpasụk ntre, ke ini udia, ima isikpan̄ utọn̄ ikop nneme mmọ inyụn̄ ikụt ndiọi edu inyụn̄ inen̄ede edu oro mbre mbre, ndien ediwak ini mmọ ikesifiọkke oro.”

Nneme ofụri esịt abuana n̄ko ndisio se isịnede nnyịn ke esịt ntịn̄. Jesus ọkọdọhọ ete: “Eti owo osion̄o se ifọnde ke nti n̄kpọuto eke ẹdude ke esịt esie, . . . koro oto ke uyọhọ esịt inua etịn̄ ikọ.” (Luke 6:45) Toshiki emi nditọ esie mbita ẹdide mme asan̄autom uyọhọ ini ke Japan, ọdọhọ ete: “Mma nsian mmọ ediwak ini se ikanamde mi ndinyene mbuọtidem ke Jehovah—oro edi, se ikanamde mi ndi ndinịm ke ofụri esịt mi ke enye odu ye nte mme n̄kpọ oro ẹtịbede ẹnọ mi ọkpọkpọ ẹnamde mi nnịm ke Bible enen̄ede edi n̄wed oro ọnọde mfọnn̄kan ndausụn̄.” Cindy ke Mexico ọdọhọ ete: “Ebe mi ama esibọn̄ akam kpukpru ini ye nditọ nnyịn. Ke ini mmọ ẹkopde akam ofụri esịt esie, emi ama anam mmọ ẹfiọk ke Jehovah idịghe owo n̄ke.”

Odudu Oro Uwụtn̄kpọ Nnyịn Enyenede

Nte nnyịn idude uwem akam ọsọn̄ odudu akan ikọ nnyịn, sia nte nnyịn idude uwem owụt nditọ nnyịn nte imade Abasi. Mme owo ẹkeme ndifiọk adan̄a nte Jesus Christ amade  Jehovah ke ndikụt nte enye osụkde ibuot ọnọ Jehovah. Jesus ọkọdọhọ ete: “Man ererimbot ọfiọk ete ke ami mmama Ete, idem kpa nte Ete ọkọnọde mi ibet ete nnam, kpa ntre ke ami nnam.”—John 14:31.

Gareth emi edide kiet otu Mme Ntiense Jehovah ke Wales, ọdọhọ ete: “Ana nditọ nnyịn ẹkụt ke nnyịn ke idem nnyịn imama Jehovah ye nte ke nnyịn ke idomo ndinam n̄kpọ nte Jehovah amade. Ke uwụtn̄kpọ, nditọ mi ẹsikụt ke mmanam se Abasi asiande nnyịn ebe ke ndinyịme ndudue mi. Idahaemi nditọ mi ẹsidomo ndinam kpa ntre n̄ko.”

Greg emi otode Australia ọdọhọ ete: “Ami ye n̄wan mi ikoyom nditọ nnyịn ẹkụt ke akpanikọ akara uwem nnyịn. Ke ini inamde ubiere iban̄a utom m̀mê unọ idem inemesịt, nnyịn isibem iso ise nte oro editụkde mme edinam esop Abasi. Enem nnyịn esịt ndikụt ke eyenan̄wan nnyịn oro edide isua 19 enyene ukem edu oro ke utom usiakusụn̄ unọ un̄wam oro enye anamde.”

Ndin̄wam Nditọ Nnyịn Ẹfiọk Abasi

Nnyịn ikemeke ndima nnyụn̄ mbuọt idem ye owo emi nnyịn mîfiọkke. Ke ini apostle Paul okoyomde mme Christian ke Philippi ẹnen̄ede ẹma Jehovah, enye ekewet ete: “Emi edi se n̄kade iso mbọn̄ akam, nte ima mbufo akpakam ọdọdiọn̄ awak ke nnennen ifiọk ye ọyọhọ mbufiọk.” (Philippi 1:9) Falconerio emi ọbọkde nditọ inan̄ ke Peru, ọdọhọ ete: “Ndisikot nnyụn̄ n̄kpep Bible kpukpru ini ye mmọ anam mbuọtidem mmọ ọsọn̄. Ke ini mmen̄kekpepke Bible ye mmọ, mma n̄kụt ke ima oro mmọ ẹkemade Abasi ama osụhọde.” Gary emi otode Australia ọdọhọ ete: “Mmesiwụt nditọ mi uyarade ke mme ntịn̄nnịm ikọ Bible ke ẹsu. Mmesiwụt mmọ ufọn edida mme edumbet Bible nsịn ke edinam. Ndinịm ukpepn̄kpọ ubon kpukpru ini edi akpan n̄kpọ oro anamde mbuọtidem mmọ ọkọri.”

Se ẹkpepde eyenen̄ede osụhọde odụk nditọwọn̄ esịt edieke ẹkpepde ke idaha oro etiede ifụre ifụre ye ukpono ukpono, emi esinamde ukpepn̄kpọ enenem. (James 3:18) Shawn ye Pauline emi ẹnyenede nditọ inan̄ ke Britain ẹdọhọ ẹte: “Nnyịn imesisịn ofụri ukeme mbak ididuari nditọ nnyịn ke ini  ukpepn̄kpọ ubon, idem edieke mmọ ẹsịnde editịm. Nnyịn isinịm ukpepn̄kpọ emi ke nsio nsio usụn̄. Ndusụk ini ikesidọhọ nditọ nnyịn ẹmek se idikpepde. Ima isida mme vidio oro esop Jehovah ẹsiode. Ndusụk ini ima isifiak ibre ikpehe kiet ke vidio oro mîdịghe itre ke usụn̄ man ida ifet oro ineme enye.” Mma kiet emi ekerede Kim, emi otode Britain n̄ko ọdọhọ ete: “Mmesida ini ntịm idem nnọ ukpepn̄kpọ ubon man n̄kpekeme ndibụp mme mbụme oro ẹdinamde nditọ mi ẹkere n̄kpọ. Ukpepn̄kpọ esinenem nnyịn. Nnyịn imesisak imam etieti.”

Ndimek Mme Nsan̄a

Nditọ nnyịn ẹdinen̄ede ẹma Jehovah ye utuakibuot akpanikọ edieke mmọ ẹdụkde ndụk ye mbon oro ẹdide mme ufan Abasi. Ndiyom nti nsan̄a emi nditọ nnyịn ẹkemede ndida nneme nneme nnyụn̄ nda mbre mbre oyom ukeme. Edi ukeme ekededi oro isịnde odot! Akan oro, odot idiomi man nditọ nnyịn ẹsisobo ye Mme Ntiense Jehovah oro ẹmekde utom uyọhọ ini nte ubọkọkọ. Ndidụk nsan̄a ye mme asan̄autom Abasi oro ẹnyenede ifịk akanam ediwak owo ẹdụk utom uyọhọ ini. Eyenete an̄wan kiet emi akakabarede edi isụn̄utom ọdọhọ ete: “Ete ye eka mi ẹma ẹsiwak ndikot mme asiakusụn̄ ufọk. Mme asiakusụn̄ emi ẹma ẹsikop inemesịt etieti ke utom mmọ tutu nyom nditiene nnam n̄kpọ Abasi nte mmọ.”

Edi akpanikọ ke nditọ nnyịn ẹkeme ndikpebe nti ye ndiọi edu. Ke ntem, ndiọi nsan̄a ayanam ẹfiọk m̀mê nnyịn imenyene usọ oro akpanade ete ye eka ẹnyene. (1 Corinth 15:33) Oyom owo enyene usọ man ekeme ndikpep nditọ ẹtre ndidụk ndụk ye mbon oro mîmaha m̀mê oro mîfiọkke Jehovah. (Mme N̄ke 13:20) Shawn, oro ima iketetịn̄ se enye eketịn̄de, ọdọhọ ete: “Nnyịn ima ikpep nditọ nnyịn ite ẹfọn ido ye nditọ ufọkn̄wed mmọ, inyụn̄ ikpep mmọ ite ndụk oro etre do ke ufọkn̄wed kpọt. Nditọ nnyịn ẹma ẹfiọk ntak emi mmimọ mîkpesitieneke ibuana ke mbre mbuba ufọkn̄wed.”

Ufọn Ukpep

Ke ini ikpepde nditọ nnyịn ẹfiọk nditịn̄ se mmọ ẹnịmde nnọ mbon en̄wen, nnyịn ikpep mmọ ẹma ndiwụt ke imama Abasi. Mark emi odụn̄de ke United States ọdọhọ ete: “Nnyịn ikoyom nditọ nnyịn ẹfiọk ke mmimọ imekeme ndikop inem nditịn̄ se mmimọ inịmde ke akpanikọ nnọ mbon en̄wen ini ekededi, idịghe ke ini ẹkade an̄wan̄wa utom ukwọrọikọ kpọt. Ntre ke ini ikade mme utọ itie unọ idem nduọkodudu nte an̄wa mbre, esụk, . . . , nnyịn imesikama Bible ye mme n̄wed Bible, imesinyụn̄ inyene nneme ye mme owo do iban̄a se nnyịn inịmde ke akpanikọ. Esinen̄ede enem nditọ nnyịn nditiene nnọ ikọ ntiense ido nneme ntem. Mmọ ẹsitiene ẹbuana ke nneme emi ẹnyụn̄ ẹtịn̄ se mmọ ẹnịmde ke akpanikọ.”

Apostle John emi ekedide akani owo ama an̄wam ediwak owo ẹnen̄ede ẹma Abasi. Enye ekewet ntem aban̄a mmọ: “Nnyeneke ntak eke okponde akan emi ndiwụt esịtekọm, nte ndikop ke nditọ mi [eke spirit] ke ẹsasan̄a ke akpanikọ.” (3 John 4) Edieke ikpepde nditọ nnyịn ẹnen̄ede ẹma Abasi, nnyịn iyokop ukem idatesịt oro.

[Ikọ idakisọn̄]

[Mme ndise ke page 9]

Oyom ukeme man ẹkeme ndinyene nneme ofụri esịt mban̄a se ẹnịmde ke akpanikọ

[Ndise ke page 10]

Kpep nditọ fo ẹwụt ke imama Abasi

[Ebiet Ẹdade N̄kpọ Ẹto]

Courtesy of Green Chimneys Farm