Edinyan̄a Nsio ke Mme Afia Ata-Ikọt

“[Jehovah] oyosio fi ke afia ata-ikọt.”—PSALM 91:3.

1. Anie edi “ata-ikọt” emi, ndien ntak emi enye enyenede ndịk?

KPUKPRU mme ata Christian ke ẹn̄wana en̄wan ye owotowo emi enyenede ifiọk ye n̄kari akan owo. Ẹkot enye “ata-ikọt” ke Psalm 91:3. Anie edi asua emi? Toto ke ini oro ẹkesiode Enyọn̄-Ukpeme (Ikọmbakara) eke June 1, 1883, magazine emi ama owụt ke Satan kpa Devil edi ata-ikọt emi. Okopodudu asua emi ada n̄kari odomo ndibian̄a nnyụn̄ mmụm ikọt Jehovah nte emi ata-ikọt m̀mê ọkọk afia, odomode ndimụm inuen ke afia.

2. Ntak emi ẹmende Satan ẹdomo ye ata-ikọt?

² Ke eset, ẹkesimụm inuen man ẹkop ndinem ikwọ mmọ, ẹse nte mmọ ẹyede, ẹta, ẹnyụn̄ ẹda ẹnam uwa. Edi inuen esitie ufep ufep, inyụn̄ isọpke idụk afia. Mmọdo, ata-ikọt oro okodude ini oro ẹkewetde Bible ekenyene ndikpep nte inuen oro enye oyomde ndimụm etiede, ye nte enye esinamde n̄kpọ. Ekem enye eyetịbi n̄kari man omụm inuen oro. Bible ndikot Satan ata-ikọt anam nnyịn ifiọk nte enye esinamde n̄kpọ. Devil enen̄ede ekpep nte nnyịn owo kiet kiet isinamde n̄kpọ. Enye okụt nte nnyịn isinamde n̄kpọ, ye nte nnyịn itiede, onyụn̄ ọkọk ndedịbe afia man omụm nnyịn. (2 Timothy 2:26) Edieke Satan omụmde nnyịn, ọwọrọ ke enye abiat itie ebuana nnyịn ye Abasi ndien emi ekeme ndida nsịm nsobo. Mmọdo, ana ifiọk nsio nsio n̄kari “ata-ikọt” emi mbak enye edimụm nnyịn.

3, 4. Didie ke n̄kari Satan ebiet eke lion? ye eke urụkikọt?

³ Andiwet psalm emen n̄kari Satan odomo n̄ko ye n̄kari akparawa lion m̀mê eke ibọm. (Psalm 91:13) Ndusụk ini, Satan esin̄wana ata en̄wan nte lion, ke ndinam mme owo m̀mê ukara ẹkọbọ ikọt Jehovah. (Psalm 94:20) Utọ ibak ibak en̄wan oro ekeme ndinam ndusụk owo ẹtuak ukot ẹduọn̄ọ. Nte ededi, ediwak ini, utọ en̄wan emi esikam edi ke ufọn ikọt Abasi sia esinam mmọ ẹdiana kiet. Edi didie ke Satan esida n̄kari an̄wana ye nnyịn nte ibọm?

⁴ Devil esida ifiọk esie oro akande eke owo abian̄a mme owo onyụn̄ ọkọn̄ mmọ nte idiọk urụkikọt oro esidịbede ke mbiet ọkọn̄ owo. Ntre ke enye asan̄a abian̄a ndusụk ikọt Abasi ẹnam uduak imọ utu ke ndinam uduak Jehovah, ndien emi esida ekesịm n̄kpọ mmọn̄eyet. Nnyịn imokop inemesịt koro nnyịn mînanake ifiọk iban̄a mme n̄kukan esie. (2 Corinth 2:11) Ẹyak ineme idahaemi iban̄a afia n̄kpa inan̄ oro “ata-ikọt” emi esikọkde.

Editen̄e Owo Enyịn

5. Ntak emi afia ‘editen̄e owo enyịn’ enen̄erede okop odudu?

⁵ “Ata-ikọt” emi ọfiọk ke edi ndammana n̄kpọ owo ndiyom ẹma ẹnyụn̄ ẹbat imọ ẹsịn ke otu. Mme Christian ẹsikere ẹban̄a nte mme owo ẹsede mmimọ. Sia Devil ọfiọkde emi, enye akpama ndida emi n̄kọk afia nnọ mmọ. Ke uwụtn̄kpọ, enye esida “uten̄e owo” ọkọk afia omụm ndusụk ikọt Abasi. (Mme N̄ke 29:25) Edieke uten̄e owo anamde mme asan̄autom Abasi ẹtiene mbon en̄wen ẹnam se Jehovah akpande m̀mê ẹtre ndinam se Ikọ Abasi ọdọhọde ẹnam, ọwọrọ ke mmọ ẹdụk afia “ata-ikọt.”—Ezekiel 33:8; James 4:17.

6. Ewe uwụtn̄kpọ anam ifiọk nte eyenọwọn̄ ekemede ndiduọ ndụk afia “ata-ikọt”?

⁶ Ke uwụtn̄kpọ, mme nsan̄a ufọkn̄wed ẹkeme ndikpak eyenọwọn̄ etiene ọn̄wọn̄ sika.  Ekeme ndidi enye ikekereke-kere ke ikpada sika ikpere inua ke ini enye ọkọwọrọde ke ufọk aka n̄wed usen oro. Edi idahaemi-e, enye ọtọn̄ọ ndinam se idinọde enye udọn̄ọ inyụn̄ ibiak Abasi. (2 Corinth 7:1) Didie ke ẹketap enye ẹsịn? Ekeme ndidi enye ọkọtọn̄ọ ndidụk ndụk ye ndiọi nsan̄a inyụn̄ iyomke ndiyat mmọ esịt. Mme uyen, mbọk ẹkpeme mbak ẹdiduọ ẹdụk afia “ata-ikọt.” Ẹkpeme idem, idem ke n̄kpri n̄kpọ mbak ẹdiduọ ẹdụk afia emi. Ẹfep ndiọi nsan̄a nte Bible etemede.—1 Corinth 15:33.

7. Didie ke Satan ekeme ndinam ndusụk ete ye eka ẹduọ ke n̄kan̄ eke spirit?

⁷ Nti Christian oro ẹnyenede nditọ idaha mbiomo oro N̄wed Abasi ọnọde mmọ ndinọ ubon mmọ n̄kpọ obụkidem ibre mbre. (1 Timothy 5:8) Nte ededi, Satan odomo ndinam mme Christian ẹnam n̄kpọ ẹbe ubọk ke afan̄ emi. Ekeme ndidi mmọ ẹsitaba mme mbono esop kpukpru ini koro ẹfiakde ẹtie ẹnam utom ke utom ama akasuana nte eteutom mmọ ọdọhọde. Mmọ ẹkeme ndikop ndịk ndidọhọ ẹnọ mmimọ ini ida idụk ofụri ikpehe mbono district man ẹtiene nditọete mmọ ẹtuak ibuot ẹnọ Jehovah. ‘Edibuọt idem ye Jehovah’ idiyakke owo ọduọ odụk utọ afia emi. (Mme N̄ke 3:5, 6) Ke adianade do, nditi ke kpukpru nnyịn idi ikọtufọk Jehovah ndien nte ke enye enyịme ndikpeme nnyịn ayanam isọn̄ọ ida. Mme ete ye eka, nte mbufo ẹmenyene mbuọtidem ke Jehovah eyese aban̄a mbufo ye ubon mbufo ke usụn̄ kiet m̀mê eken, edieke ẹnamde uduak esie? Mîdịghe, nte Devil ayanam mbufo ẹten̄e owo enyịn ẹnam uduak imọ? Nnyịn imesịn udọn̄ inọ mbufo ite ẹbọn̄ akam ẹban̄a ẹnyụn̄ ẹnen̄ede ẹtie ẹkere mbụme emi.

Afia Uma-Inyene

8. Didie ke Satan esida etabi uma-inyene ọkọk afia?

⁸ Satan n̄ko esida etabi uma-inyene ọkọk afia ọnọ nnyịn. Mme anyamurua ererimbot ẹsiwak ndisịn udọn̄ nnọ mme owo ẹtiene ẹbuana ke ndutịm usọp usọp uforo emi ekemede ndida ndusụk ikọt Abasi ntụn usụn̄. Ndusụk ini, eyenete ekeme ndidọhọ fi ete: “Sịn idem nam utom. Ama enen̄ede enyene okụk, do, ndien, afo emekeme ndisụhọde ntetie nnọ uwem se uwem oyomde. Amakam ekeme ndidụk utom usiakusụn̄ n̄ko.” Ndusụk mbon oro ẹsimade ndiforo nto okụk nditọete mmọ ke esop ẹkeme ndinyene utọ ndisịme ekikere emi. Nen̄ede tie kere ban̄a utọ uwem oro ẹdọhọde ke oyodu. Nte enye ibietke ekikere “anana-ibuot” owo inyene oro ke n̄ke Jesus?—Luke 12:16-21.

9. Nso ikpanam ndusụk Christian ẹduọ ẹdụk afia uma-inyene?

⁹ Satan akara idiọk ererimbot esie ke usụn̄ oro ọdọn̄de owo itọn̄ ndiyom mme n̄kpọ. Christian ekeme nditọn̄ọ ndinyene utọ udọn̄ oro, emi onyụn̄ ekeme ndibaba ikọ Abasi ke esịt esie, ‘iyakke enye on̄wụm mfri.’ (Mark 4:19) Bible esịn udọn̄ ọnọ nnyịn ete iyụhọ ye n̄kpọ udu uwem ye edisịnen̄kpọ. (1 Timothy 6:8) Edi ediwak owo ẹduọ ẹdụk afia “ata-ikọt” emi sia mmọ mîdaha mme edumbet emi isịn ke edinam. Ndi n̄kohodeidem anam  mmọ ẹkere ke akpana ika iso idu n̄kokon̄ uwem oro ikesidude? Nso kaban̄a nnyịn owo kiet kiet? Ndi udọn̄ edinyene mme n̄kpọ anam nnyịn idaha aba utuakibuot akpanikọ ke akpan n̄kpọ? (Haggai 1:2-8) Edi n̄kpọ mfụhọ nditịn̄ nte ke ini n̄kpọ ọsọn̄de, ndusụk owo ẹsikpọnọde mme n̄kpọ eke spirit ẹnịm n̄kan̄ kiet man ẹka iso ẹdu orụk uwem oro mmọ ẹkesidude. Utọ uwem uma-inyene oro esidat “ata-ikọt” esịt!

Afia Unọ Idem Inemesịt Oro Mîfọnke

10. Nso orụk ndụn̄ọde ke Christian kiet kiet akpanam?

¹⁰ Usụn̄ efen oro “ata-ikọt” emi adade omụm mme owo edi ndinam mmọ ẹtre ndida se idiọkde ke idiọk nnyụn̄ nda eti ke eti. Orụk uwem oro mbon Sodom ye Gomorrah ẹkedude ẹyọyọhọ mme edinam ekebe ndise, mme vidio, mme ndise senima, ye mme n̄wed. Idem mbụk n̄kpọntịbe ekebe ndise ye mme magazine ẹsiwak ndiwụt afai ẹnyụn̄ ẹwụt mme ndise idan̄ oro mme owo ẹmade ndise. Ekese n̄kpọ oro ẹsisiode ke ekebe ndise, mme vidio, ye mme ndise senima nte unọ idem inemesịt, iyakke mme owo “ẹdiọn̄ọ se inende ye se idiọkde.” (Mme Hebrew 5:14) Nte ededi, ti se Jehovah akadade prọfet Isaiah etịn̄ ete: “Ifọnke fọn inọ mmọ eke ẹdọhọde ẹban̄a idiọk, ẹte, Eti, ẹban̄a eti, ẹte, Idiọk.” (Isaiah 5:20) Ndi “ata-ikọt” ke ada mme utọ ndiọi unọ idem inemesịt oro adia odụk fi idem n̄kari n̄kari? Ọfọn owo odụn̄ọde idemesie-o.—2 Corinth 13:5.

11. Nso ntọt ke magazine emi ọkọnọ aban̄a mbre TV?

¹¹ Ke n̄kpọ nte isua 25 oro ẹkebede, Enyọn̄-Ukpeme ama odụri ikọt Abasi utọn̄ aban̄a mme edinam TV. * Kop se ẹketịn̄de ẹban̄a n̄kari n̄kari odudu oro ọwọrọetop mbre TV enyenede: “Owo ekeme ndinam se enye amama man erenowo m̀mê n̄wan ama enye. Ke uwụtn̄kpọ, uyen kiet oro emende idịbi ọdọhọ ufan esie ete, ‘Mmama Victor. Se iyomde nditịbe yak etịbe. . . . Mmenen̄ede nyom ndiman eyen nnọ enye!’ Inem inem ikwọ oro ẹbrede sụn̄sụn̄ nte edinam emi akade iso iyakke owo okụt ke se enye anamde oro ọdiọk. Afo n̄ko amama Victor. Mbọm eyenan̄wan oro anam fi n̄ko. ‘An̄wan̄a’ fi ntak emi enye oyomde ndiman eyen nnọ Victor. Owo kiet emi esisede mbre emi ekedi edidọhọ ke enyịn ama akan̄wan̄a enye ete: ‘Edi n̄kpọ n̄kpaidem ndikụt idemfo nte etienede ekere ke se eyenan̄wan emi anamde idiọkke. Nnyịn imọfiọk ke oburobụt ido ọdiọk. . . . Edi mma ndifiọk ke n̄kodụk ndụk ye mme oburobụt owo.’”

12. Nso iwụt ke ntọt oro ẹkenọde ẹban̄a ndusụk edinam TV enen̄ede odot ye ini nnyịn?

¹² Toto ke ini oro ẹkesiode mme ibuotikọ Enyọn̄-Ukpeme oro, mme utọ ndiọi mbre oro ẹyọyọhọ kpukpru ebiet. Ke ediwak ebiet, ẹsisio utọ ndise emi kpukpru ini. Iren, iban, ye  ekese uyen ẹsiwak ndise nnyụn̄ ntie n̄kere mme utọ edinam emi. Ikpanaha nnyịn ibian̄a idem nnyịn. Idinenke ndikere ke ndiọi edinam emi idiọkke nte mbon oro ẹnamde-nam ke ererimbot. Ndi odu se ikpanamde Christian emek nditie nse utọ mbon oro enye mîkpekereke-kere ndikot ufọk?

13, 14. Didie ke ndusụk owo ẹketịn̄ ufọn oro ikọbọde ito ntọt oro ẹkenọde ẹban̄a mbre TV?

¹³ Ekese owo ẹbọ ufọn ke ini ẹnamde item oro “ofụn emi anamde akpanikọ onyụn̄ enyenede ọniọn̄” ọnọde. (Matthew 24:45-47) Ke ẹma ẹkekot nnennen item Bible oro, ndusụk owo ẹma ẹwet nditịn̄ nte mme ibuotikọ oro ẹketụkde mmimọ ọkpọkpọ. * Owo kiet ọkọdọhọ ete: “Mma ndụk ufụn nnọ mbre TV ke ofụri isua 13. N̄kekere ke n̄kpọ idinamke mi sia mma nsidụk mme mbono esop Christian nnyụn̄ nsiwọrọ an̄wautom ndusụk ini. Edi n̄kedi ndikere n̄kpọ nte mbon ererimbot, kpa nte ẹkewụtde ke mbre TV oro, ẹte ke edieke ebe fo ọdiọkde fi ndikama m̀mê edieke etiede nte enye imaha fi, ke emekeme ndisịn efịbe—n̄kọm enye anam idemesie. Ntre, ke ini n̄kekerede ke ebe mi itịmke mi ikama, mma nsịn efịbe nnyụn̄ nnam idiọkn̄kpọ ndian Jehovah ye nsan̄a mi.” Ẹma ẹsio n̄wan emi ẹfep ke esop. Nte ini akakade, enyịn ama edin̄wan̄a enye, enye akabade esịt ẹnyụn̄ ẹfiak ẹda enye. Mme ibuotikọ oro ẹkedụride owo utọn̄ ẹban̄a mbre TV ama ọnọ enye odudu ndifep unọ idem inemesịt oro Jehovah asuade.—Amos 5:14, 15.

¹⁴ Owo en̄wen emi mme ibuotikọ Enyọn̄-Ukpeme emi ẹketụkde ọkọdọhọ ete: “Mma ntua eyet ke ini n̄kokotde mme ibuotikọ emi, koro mma ndifiọk ke n̄kokponoke aba Jehovah ke ofụri esịt. Mma n̄n̄wọn̄ọ nnọ Abasi mi nte ke ndidụkke aba ufụn nnọ mme mbre TV oro.” Ke ama okowụt esịtekọm aban̄a mme ibuotikọ Enyọn̄-Ukpeme oro, eyenete an̄wan kiet ama enyịme ke ima idụk ufụn inọ mbre TV, onyụn̄ ewet ete: “Mma n̄kere . . . m̀mê enye ekeme nditụk itie ebuana mi ye Jehovah. Didie ke n̄keme ndinam ufan ye mme ebre mbre TV emi nnyụn̄ ndi ufan Jehovah?” Edieke utọ mbre TV oro akabiatde owo ke isua 25 emi ẹkebede, nso kaban̄a mfịn? (2 Timothy 3:13) Akpana ifiọk ke kpukpru ndiọi edinam unọ idem inemesịt, edide ke mbre TV, mme afai afai mbre vidio, m̀mê mme oburobụt ikwọ vidio, ẹdi afia Satan.

Afia Ndutan̄uyo

15. Didie ke Devil omụm ndusụk owo?

¹⁵ Afia oro Satan adade ọtọ ubahade ke otu ikọt Jehovah edi ndutan̄uyo. Nnyịn imekeme ndidụk afia emi, inamke n̄kpọ m̀mê nso ifetutom ke ikama. Ndusụk owo ẹduọ ẹdụk afia Devil emi koro mmọ ẹyak ndutan̄uyo oro mmọ ẹnyenede ye eyenete anam mmọ idụhe ke emem inyụn̄ idianake kiet, emi n̄ko abiat inem inem idaha eke spirit oro Jehovah ọnọde ikọt esie.—Psalm 133:1-3.

16. Didie ke Satan ada n̄kari odomo nditọ ubahade ke esop?

 ¹⁶ Ke ini akpa ekọn̄ ererimbot, Satan ama ada ata en̄wan odomo ndisobo ikpehe esop Jehovah ke isọn̄, edi ikekemeke. (Ediyarade 11:7-13) Toto ke ini oro, enye ke ada n̄kari n̄kari usụn̄ ọtọ ubahade ke mme esop. Ke ini iyakde ndutan̄uyo ọtọ ubahade ke esop, ọwọrọ ke imọnọ “ata-ikọt” emi ifet. Emi ekeme ndinam edisana spirit ọkpọn̄ nnyịn ye esop. Edieke emi etịbede, Satan oyokop inemesịt koro edieke emem ye edidianakiet mîdụhe ke esop, utom ukwọrọikọ idikaha aba iso edifọn edifọn.—Ephesus 4:27, 30-32.

17. Nso ikeme ndin̄wam mbon oro ẹnyenede ndutan̄uyo ẹkọk mfịna mmọ?

¹⁷ Nso ke akpanam edieke enyenede ndutan̄uyo ye ekemmọ Christian? Edi akpanikọ ke kpukpru idaha iditiehe ukem ukem. Nte ededi, okposụkedi ekese ntak ẹkemede ndidemede ndutan̄uyo, idụhe ntak oro owo mîkpebiereke ndutan̄uyo. (Matthew 5:23, 24; 18:15-17) Ẹkeda odudu spirit Abasi ẹwet mme item oro ẹdude ke Ikọ Abasi, ndien mme item emi ẹfọn ẹma. Ke ini ẹdade mme edumbet Bible ẹsịn ke edinam, enye isikpụhu owo. Mmọ ẹsinyene ufọn kpukpru ini!

18. Ntak emi ndikpebe Jehovah edin̄wamde nnyịn ibiere ndutan̄uyo?

¹⁸ Jehovah “ama ndidahado,” ndien enye esinen̄ede adahado ọnọ owo. (Psalm 86:5; 130:4) Edieke ikpebede Jehovah, oro owụt ke idi ndima nditọ esie. (Ephesus 5:1) Kpukpru nnyịn idi mme anamidiọk oro inen̄erede iyom Jehovah efen ọnọ nnyịn. Mmọdo, ana inen̄ede ikpeme idem mbak editie nnyịn mba mba ndifen nnọ ekemmọ owo. Oro edinam nnyịn itie nte ofụn oro ke uwụtn̄kpọ Jesus, emi mîkamaha ndidahado nnọ ekemmọ ofụn oro akakamade enye ekpri isọn ke ẹmende ẹdomo ye akaka isọn oro enye akakamade eteufọk esie, edi eteufọk enyịme ndibiat mfep. Ke ini ẹkesiande eteufọk esie se enye akanamde, eteufọk esie ama ọdọhọ ẹtop ofụn emi mîkamaha ndidahado nnọ owo mi ẹsịn ke ufọk-n̄kpọkọbi. Jesus akada uwụtn̄kpọ oro ekeberi ke ndidọhọ ete: “Kpasụk ntre ke Ete mi eke heaven edinam ye mbufo edieke mbufo mîfenke eyenete mbufo ito esịt.” (Matthew 18:21-35) Edieke itiede ikere uwụtn̄kpọ emi inyụn̄ itiede ikere adan̄a ediwak ini oro Jehovah efende ọnọ nnyịn, oro eyenen̄ede an̄wam nnyịn ke ini idomode ndibiere ndutan̄uyo ye eyenete nnyịn!—Psalm 19:14.

Ndibọ Edinyan̄a ke “Ndịbe Ebiet Ata Edikon̄”

19, 20. Didie ke nnyịn ikpese “ndịbe ebiet” ye “mfụt” Jehovah ke ndiọkeyo emi?

¹⁹ Nnyịn idu uwem ke ata ndiọkeyo. Mîkpedịghe emi Jehovah ekpemede nnyịn ke ima ima usụn̄, Satan okpowot nnyịn ama. Mmọdo, edieke nnyịn mîyomke ndiduọ ndụk afia “ata-ikọt” emi, ana ika iso isịne ke ndamban̄a ebiet ukpeme emi, kpa “ndịbe ebiet Ata Edikon̄,” inyụn̄ ika iso idụn̄ “ke mfụt Ata Ọkpọsọn̄.”—Psalm 91:1.

²⁰ Nnyịn ikpakam ika iso ida mme item oro Jehovah ọnọde ye mme n̄kpọ oro enye etide nnyịn nte ukpeme, utu ke ukpan. Kpukpru nnyịn in̄wana ye owotowo oro enyenede ifiọk akan owo. Edieke Jehovah mîkpan̄wamke nnyịn, idụhe owo nnyịn ndomokiet oro mîkpodụkke afia emi. (Psalm 124:7, 8) Mmọdo, ẹyak ibọn̄ akam iben̄e Jehovah ite anyan̄a nnyịn osio ke mme afia “ata-ikọt.”—Matthew 6:13.

[Mme Ikọ idakisọn̄]

Nte Afo Emeti?

• Ntak emi ‘editen̄e owo enyịn’ edide afia n̄kpa?

• Didie ke Devil ada etabi uma-inyene ọkọk afia?

• Didie ke Satan ada ndiọi unọ idem inemesịt omụm ndusụk owo?

• Ewe afia ke Devil esida ọtọ ubahade ke otu nnyịn?

[Mme Mbụme Ukpepn̄kpọ]

[Ndise ke page 27]

Ndusụk owo ẹduọ ẹdụk afia ‘editen̄e owo enyịn’

[Ndise ke page 28]

Ndi esinem fi ndise se Jehovah asuade?

[Ndise ke page 29]

Nso ke akpanam edieke enyenede ndutan̄uyo ye eyenete?