Mme Mbụme Ẹtode Mme Andikot

Ndi ama ọfọn Jacob ndinam nte idi Esau nte ẹwetde ke Genesis 27:18, 19?

Ekeme ndidi ọmọfiọk mbụk emi. Ke Isaac ama ọkọsọn̄, enye ama ọdọhọ Esau okotop unam etem udia ọsọk imọ ‘man ikpata, ukpọn̄ imọ okponyụn̄ ọdiọn̄ enye mbemiso imọ idikpa.’ Ke Rebekah ama okokop se ebe esie eketịn̄de, enye ama etem edinem udia onyụn̄ ọdọhọ Jacob ete: ‘Men udia emi nọ usọ adia, man enye ọdiọn̄ fi, ke mîka-ikpaha kan̄a.’ Ekem Jacob ama esịne ọfọn̄ Esau onyụn̄ ada ikpa nditọ ebot esịne ke ubọk ye ke itọn̄ esie, ada edinem udia oro ọsọk ete esie. Ke ini Isaac okobụpde enye ete, “Afo edi anie eyen mi?” Jacob ọkọbọrọ ete: “Ami ndi Esau akpan fo.” Isaac ama enịm onyụn̄ ọdiọn̄ enye.—Genesis 27:1-29.

Bible itịn̄ke kpukpru se ikanamde Rebekah ye Jacob ẹnam se mmọ ẹkenamde, edi owụt ke n̄kpọ oro eketịbe ke mbuari. Nnyịn ikpenyene ndifiọk ke Ikọ Abasi idọhọke ke se Rebekah ye Jacob ẹkenamde ama enen inyụn̄ idọhọke ke ama akwan̄a, mbak owo ekededi edidọhọ ke Bible esịn udọn̄ ọnọ nsu ye abian̄a. Nte ededi, Bible esịn un̄wana ke se iketịbede.

Akpa kan̄a, mbụk oro anam ifiọk ke Jacob ekenyene unen ndibọ edidiọn̄ ete esie, idịghe Esau. Mbemiso emi, Esau emi mîkamaha n̄kpọ Abasi ama anyam itie-akpan ọnọ Jacob udọeka ọbọ udia. “Esau [ama] esịn itie-akpan esie ke ndek.” (Genesis 25:29-34) Mmọdọ, ke ini Jacob akakade ebịne ete esie, enye okoyom se ikenyenede enye.

Ọyọhọ iba, ke ini Isaac ekedide edifiọk ke Jacob ke imọ ikọdiọn̄, enye ikọbọhọ edidiọn̄ oro inọ Esau. Ekeme ndidi enye ama eti se Jehovah eketịn̄de ọnọ Rebekah ke ini amana-mba emi ẹkemanade, ete: “Ebiowo oyonyụn̄ etie nte ofụn eyenọwọn̄.” (Genesis 25:23) Odot itịm ifiọk ke ini Jacob okoyomde ndikpọn̄ Haran, Isaac ama etetịm ọdiọn̄ enye.—Genesis 28:1-4.

Ke akpatre, nnyịn ikpenyene ndifiọk ke Jehovah ama ọfiọk onyụn̄ enyene udọn̄ ke kpukpru se iketịbede. Edidiọn̄ oro Isaac ọkọdiọn̄de Jacob ama enyene ebuana ye un̄wọn̄ọ oro Abasi ọkọn̄wọn̄ọde ọnọ Abraham. (Genesis 12:2, 3) Edieke Abasi mîkpokoyomke ẹdiọn̄ Jacob, enye akpakanam n̄kpọ mbak Jacob edibọ edidiọn̄ oro. Utu ke ndinam oro, Jehovah akakam ọsọsọn̄ọ edidiọn̄ oro ọnọ Jacob, ete: “Edito fi ye ubon fo kpukpru orụk ke ererimbot ẹkụt ufọn.”—Genesis 28:10-15.