“Nso Idi Akpanikọ?”

PONTIUS PILATE emi ekedide andikara oro Rome ẹkemekde okobụp Jesus mbụme oro isa isa. Enye ikoyomke ibọrọ, ndien Jesus ikonyụn̄ inọhọ enye ibọrọ. Eyedi Pilate ekekere ke owo ikemeke ndifiọk akpanikọ.—John 18:38.

Ediwak owo mfịn—esịnede mme ada iso ido ukpono, mme andikpep, ye mbon mbre ukara—ẹtiene ẹnyene utọ ntaha ekikere oro ẹban̄a akpanikọ. Mmọ ẹdọhọ ke akpanikọ—akpan akpan ke se iban̄ade ido uwem ye n̄kpọ eke spirit—enyene adan̄a onyụn̄ okpokpụhọde ke ini ke ini. Ke ntre, emi ọwọrọ ke mme owo ẹkeme ndibiere nnọ idemmọ se ifọnde ye se idiọkde. (Isaiah 5:20, 21) Emi ọwọrọ n̄ko ke mme owo ẹkeme ndifụmi ido ye mbet ido uwem oro mmọ ẹdade nte n̄kpọeset, emi mbon eyo oko ẹkedade ẹdu uwem.

Ọfọn ikere iban̄a se ikanamde Pilate obụp mbụme oro. Jesus ọkọdọhọ ete: “Koro n̄kamana kaban̄a emi, n̄konyụn̄ ndi ke ererimbot kaban̄a emi, man n̄kpetie ntiense nnọ akpanikọ emi.” (John 18:37) Jesus ikenịmke ke owo ikemeke ndifiọk akpanikọ. Enye ama ọn̄wọn̄ọ ọnọ mme mbet esie ete: “Mbufo ẹyefiọk akpanikọ, akpanikọ oyonyụn̄ anam mbufo ẹwọrọ ufụn.”—John 8:32.

M̀mọ̀n̄ ke ẹkeme ndikụt utọ akpanikọ oro? Ini kiet Jesus ama ọbọn̄ akam ọnọ Abasi ete: “Ikọ fo edi akpanikọ.” (John 17:17) Sia edide Abasi akada mme andiwet Bible usụn̄, Bible anam ẹfiọk akpanikọ oro ẹkemede ndiberi edem oro onyụn̄ ọnọde owo idotenyịn—oro edi, nsinsi uwem ke ini iso.—2 Timothy 3:15-17.

Pilate ama ataba ifet edikpep utọ akpanikọ oro sia mîkenyeneke udọn̄. Nso kaban̄a fi? Ntak mûdọhọke Mme Ntiense Jehovah ẹkpep fi “akpanikọ” oro Jesus eketịn̄de aban̄a? Mmọ ẹyedara ndikpep fi akpanikọ oro.