Ubiere Oro Ọnọde Owo Inemesịt

“N̄KPỌFIỌK n̄kpakanamke oro!” Ndi usutịn̄ke emi ediwak ini? Kpukpru nnyịn iyom ndimek se nnyịn mîdituaha n̄kpọfiọk, akpan akpan edieke se imekde editụkde nte idude uwem. Edi, didie ke ikeme ndinam ubiere oro edinọde nnyịn inemesịt?

Akpa kan̄a, oyom inyene mme edumbet oro ikemede ndiberi edem. Nte mme utọ edumbet oro ẹdu? Ediwak owo ikereke ke ẹdu. Nte ndụn̄ọde kiet oro ẹkenamde ke United States owụtde, ita ke otu owo inan̄ oro ẹkperede ndikụre ufọkn̄wed sekọndri ẹdọhọ ke idụhe se inende ye se mînenke, ẹnyụn̄ ẹdọhọ ke “se owo kiet kiet amade ye ebiet oro enye otode” ke enye ada ebiere ke n̄kpọ edi eti m̀mê idiọk.

Nte enen̄ede owụt ifiọk ndikere ke owo kiet kiet akpada se enye amade m̀mê se ediwak owo ẹmade nte mme edumbet ido uwem? Ke akpanikọ, iwụtke. Edieke mme owo ẹkpesinamde se ededi oro mmọ ẹmade, ọkpọsọn̄ ndutịme okpodu. Idụhe owo oro akpamade ndidụn̄ ke ebiet emi ibet, esopikpe, ye mme bodisi mîdụhe. Ke ẹsiode oro ẹfep, idịghe kpukpru ini ke ekikere idemowo esinen. Nnyịn imekeme ndimek ndinam se ikekerede ke enen ekem idikụt ke ima inam ndudue. Ke akpanikọ, ofụri mbụk ubonowo owụt ke ikọ Bible emi edi akpanikọ: “Owo eke asan̄ade . . . ikemeke ndinen̄ede ikpat esiemmọ.” (Jeremiah 10:23) Nso ndien ikeme ndida nnyịn usụn̄ ke ini iyomde ndibiere mme akpan n̄kpọ oro ikpanamde?

Akparawa oro ekedide andikara, oro iketịn̄de iban̄a ke akpa ibuotikọ, ama anam ọfọn ke ndikaka mbịne Jesus. Nte ima ikokụt, Jesus akada Ibet Abasi ọbọrọ mbụme akparawa oro.  Jesus ama ọfiọk ke Jehovah Abasi edi Akakan Ọnọ ifiọk ye ọniọn̄ ye nte ke Enye ọfiọk se ifọnde ye mme edibotn̄kpọ Esie. Mmọdo, Jesus ọkọdọhọ ete: “Se ami n̄kpepde idịghe okịm, edi enyene enye emi ọkọdọn̄de mi.” (John 7:16) Ke akpanikọ, Ikọ Abasi edi se inọde ndausụn̄ oro ẹkemede ndiberi edem, emi edin̄wamde nnyịn imek se ifọnde. Ẹyak ineme mme edumbet ifan̄ emi ẹdude ke Ikọ Abasi, emi ẹdinamde ikop inemesịt edieke idade isịn ke edinam.

Mfọnmma Ibet

Ke ọwọrọetop Ukwọrọikọ esie Oro ke Obot, Jesus ama ekpep ata akpan edumbet oro ekemede ndin̄wam nnyịn inam nti ubiere ke nte inamde n̄kpọ ye mbon en̄wen. Enye ọkọdọhọ ete: “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.” (Matthew 7:12) Ndusụk owo ẹsikot edumbet emi Mfọnmma Ibet.

Ndusụk owo ẹsitịn̄ edumbet emi ke usụn̄ en̄wen ẹte: “Kûnam mbon en̄wen se mûkpamaha mmọ ẹnam fi.” Man okụt ukpụhọde oro odude ke Mfọnmma Ibet ye usụn̄ en̄wen oro ẹsitịn̄de enye mi, se n̄ke oro Jesus okotopde aban̄a eti owo Samaria. Ẹma ẹmia owo Jew tutu enye ekpere ndikpa ẹnyụn̄ ẹyak ẹnịm ke mbenusụn̄. Oku ye Levi ẹma ẹkụt enye edi ẹbe. Ẹkeme ndidọhọ ke mmọ ẹma ẹnam nte mme owo ẹsitịn̄de Mfọnmma Ibet ke usụn̄ en̄wen, sia mmọ mîketieneke inam ọbọn̄ oro ibak. Edi owo Samaria oro okoyomde ndisan̄a mbe ama atuak ada an̄wam ọbọn̄ oro. Enye ama ọsọbọ enye unan onyụn̄ ada enye aka ufọkisen. Enye akanam ye ọbọn̄ emi se enye akpakamade ẹnam ye imọ. Enye ama anam se Mfọnmma Ibet ọdọhọde—oro edi, ama emek ndinam se inende.—Luke 10:30-37.

Odu ediwak usụn̄ emi ikemede ndinịm edumbet emi nnyụn̄ n̄kop inemesịt. Yak idọhọ ke odu ubon oro ẹwọrọde ẹdidụn̄ ẹkpere mbufo. Ọkpọfọn ọwọrọ aka okosobo onyụn̄ adara mmọ. Emekeme ndin̄wam mmọ ẹfiọk nte efak oro etiede, ọbọrọ mme mbụme mmọ, onyụn̄ ọnọ mmọ se mmọ ẹyomde. Ndinam n̄kpọ ntem nte eti mbọhọidụn̄ ayanam mbufo ẹdi ufan. Eyenem fi n̄ko ndifiọk ke Abasi ama se anamde. Nte oro idịghe eti ubiere?

Ndinam N̄kpọ ke Ntak Emi Imade Mbon En̄wen

Ke adianade ye Mfọnmma Ibet, Jesus ama ọnọ ndausụn̄ en̄wen emi edin̄wamde fi emek se ifọnde. Ke ini ẹkebụpde Jesus se idide n̄kponn̄kan ewụhọ ke Ibet Moses, enye ọkọbọrọ ete: “‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ. Udiana, eke ebietde enye, edi emi, ‘Afo enyene ndima mbọhọidụn̄ fo nte idemfo.’ Ofụri Ibet ye mme Prọfet ẹkọn̄ọ ke ewụhọ mbiba emi.”—Matthew 22:36-40.

Jesus ama ọnọ mbet esie “obufa ibet” ndima kiet eken ke okoneyo oro ekesierede usen n̄kpa esie. (John 13:34) Ntak emi enye ọkọdọhọde ke emi edi obufa ibet? Kamse, nte enye ikebemke iso itịn̄ ke ndima mbọhọidụn̄ mmọ edi kiet ke otu ewụhọ emi ofụri Ibet ọkọn̄ọde? Ke Ibet Moses, ẹma ẹwụk nditọ Israel ẹte: ‘Ma mbọhọ-idụn̄ fo nte idem fo.’ (Leviticus 19:18) Nte ededi, idahaemi Jesus okowụk mme mbet esie ete ẹnam se ikande oro. Ke okoneyo oro, Jesus ama ọdọhọ mbet esie ke imọ imọn̄ iyak uwem imọ inọ ke ibuot mmọ. Ekem ọdọhọ mmọ ete: “Mbet mi edi emi, ete mbufo ẹma kiet eken kpa nte ami mmade mbufo. Idụhe owo emi enyenede ima eke okponde akan emi, owo ndikpayak ukpọn̄ esie nnọ ke ibuot mme ufan esie.” (John 15:12, 13) Ih, ibet emi ekedi obufa sia ama oyom ẹbem iso ẹnam n̄kpọ ke ufọn mbon en̄wen.

Ediwak usụn̄ ẹdu ndima ima oro mîsan̄ake ye mbubịk, oro edi, inamke n̄kpọ ke ufọn idem nnyịn kpọt. Ke uwụtn̄kpọ, yak idọhọ ke oyom ndibre ikwọ ọsọn̄ uyo nte afo amade edi mbọhọidụn̄ fo isimaha ikwọ ọsọn̄ uyo ntre. Nte akpama ndisụhọde uyo ikwọ oro man mbọhọidụn̄ fo enyene ifụre? Ke nditịn̄  ke usụn̄ en̄wen, ndi eyebem iso oyom ufọn mbọhọidụn̄ fo?

Kere ban̄a n̄kpọ en̄wen emi eketịbede. Ke usen etuep kiet ke Canada emi snow ekedepde, owo iba ke otu Mme Ntiense Jehovah ẹma ẹka ndikwọrọ ikọ nnọ akanieren kiet. Nte nneme akakade iso, ọbọn̄ oro ama ọdọhọ ke udọn̄ọ esịt iyakke imọ ikwat snow ifep ke iso ufọk imọ. Ke n̄kpọ nte hour kiet ama ekebe, enye ama okop nte ẹkwatde n̄kpọ ke isọn̄. Mme Ntiense oro ẹkefiak ẹdi ẹdikwat snow ẹfep ke enen ye udịghi ukot oro ẹsisan̄ade ẹdụk ufọk ọbọn̄ oro. Ọbọn̄ oro ama ewet leta ọnọ ẹsọk n̄kọk itieutom Mme Ntiense Jehovah ke Canada ete: “Mfịn ami mmokụt ata ima oro mme Christian ẹnyenede. Emi okpụhọde ekikere oro n̄kesinyenede nte ke ererimbot emi idifọnke, onyụn̄ anam ndọdiọn̄ mma ukeme oro mbufo ẹsịnde ke ofụri ererimbot.” Ke akpanikọ, ndimek ndin̄wam mbon en̄wen, inamke n̄kpọ m̀mê un̄wam oro ekpri adan̄a didie, ekeme ndisịn udọn̄ nnọ mmọ ẹnam se inende. Nso inemesịt odu ntem ke ndinam utọ n̄waidem oro!

Ndinam N̄kpọ ke Ntak Emi Imade Abasi

N̄kpọ en̄wen oro inyenede ndikere mban̄a ke ini imekde ndinam n̄kpọ edi se Jesus ọkọdọhọde ke edi akakan ibet—oro edi, ndima Abasi. Jesus eketịn̄ ikọ ọnọ mme Jew, emi ofụri idụt ẹma ẹkeyayak idem ẹnọ Jehovah. Kpa ye oro, eyen Israel kiet kiet ekenyene ndimek m̀mê iyama inyụn̄ inam n̄kpọ Abasi ke ofụri ukpọn̄ ye ke ofụri esịt m̀mê idinamke.—Deuteronomy 30:15, 16.

Kpasụk ntre, mme n̄kpọ oro afo emekde ndinam ẹwụt nte afo adade Abasi. Ke uwụtn̄kpọ, nte afo ekpepde Bible onyụn̄ amade se ekpepde, oyoyom afo n̄ko emek m̀mê ayanam n̄kpọ Abasi. Nte afo ayama ndikpep Bible man akabade edi anditiene Jesus? Edieke emekde ndinam oro, afo oyokop inemesịt, koro Jesus ọkọdọhọ ete: “Inemesịt edi eke mmọ oro ẹkerede ẹban̄a unana mmọ ke n̄kan̄ eke spirit.”—Matthew 5:3.

Nnyịn ifiọkke m̀mê akparawa oro ekedide andikara do ama atua n̄kpọfiọk aban̄a ubiere esie. Edi, imọfiọk nte eketiede apostle Peter ke idem ke ama eketiene Jesus Christ ke ediwak isua. Ke Peter ama ekekpere utịt uwem esie ke n̄kpọ nte isua 64 E.N., enye ama esịn udọn̄ ọnọ ekemmọ mme andinịm ke akpanikọ, ete: “Ẹsịn ofụri ukeme man ke akpatre [Abasi] okpokụt mbufo nte ẹnanade ntọi ẹnyụn̄ ẹnanade ndo ẹnyụn̄ ẹdude ke emem.” (2 Peter 1:14; 3:14) Nte an̄wan̄ade, Peter ikatuaha n̄kpọfiọk iban̄a ubiere oro enye akanamde ke se ikande isua 30 ẹma ẹkebe, ndien enye ama esịn udọn̄ ọnọ mbon en̄wen ete ẹsọn̄ọ ẹda ke ubiere mmọ.

Nnyịn inam item Peter edieke imekde ndibiom mbiomo oro anade mbet Jesus ẹbiom inyụn̄ inịm ibet Abasi. (Luke 9:23; 1 John 5:3) Emi ekeme nditie nte edi ọkpọsọn̄ n̄kpọ, edi Jesus ọnọ un̄wọn̄ọ oro ọnọde ndọn̄esịt mi ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen  ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde esịt, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.”—Matthew 11:28-30.

Da se iketịbede inọ Arthur ke uwụtn̄kpọ. Arthur ọkọtọn̄ọ ndikpep nte ẹbrede ndido urụk ke ini enye ekedide isua duop, ndien okoyom oro edi ubọkọkọ esie. Enye ama esibre ndido urụk oro ke mbre kọnsat idem mbemiso ekesịmde isua 14. Kpa ye oro, enye ikokopke inemesịt. Ete esie ama esiwak ndibụp se uwem ọwọrọde esinyụn̄ okot mme pastọ ẹdi ẹdibọrọ, edi ibọrọ mmọ ikoyụhọke enye. Kpukpru mmọ ke ubon ẹma ẹsineme ẹban̄a m̀mê Abasi enen̄ede odu ye ntak emi enye ayakde idiọkido odu. Ekem ete Arthur ama ọtọn̄ọ ndisinyene nneme ye Mme Ntiense Jehovah. Nneme oro ama enen̄ede enem ete Arthur, ndien oro ama anam ofụri ubon mmọ ẹkpep Bible.

Nte ini akakade, N̄wed Abasi ama edinam Arthur ọfiọk ntak emi Abasi ayakde ndutụhọ odu, onyụn̄ ọfiọk se idide uduak uwem. Arthur ye owo ita en̄wen ke ubon mmọ ẹma ẹnam ubiere oro mmọ mîkatuaha n̄kpọfiọk iban̄a. Enye ama ayak idemesie ọnọ Jehovah. Enye ọdọhọ ete: “Enen̄ede enem mi nte Jehovah ọnọde mi ifiọk akpanikọ onyụn̄ anyan̄ade mi osio ke utọk oro esiwakde ndidu ke otu mme ọkwọ ikwọ. Mme owo ẹsinam n̄kpọ ekededi man ẹkụt unen.”

Arthur osụk amama ndibre ndido urụk ye mme ufan esie, edi idaha oro nte iso utom. Utu ke oro, enye enen̄ede owụk enyịn ke ndinam n̄kpọ Abasi. Enye ke anam utom ke kiet ke otu n̄kọk itieutom Mme Ntiense Jehovah. Utu ke ndibiet akparawa oro ekedide owo inyene ye andikara, afo n̄ko emekeme ndinam nte Arthur ye ediwak miliọn owo eken ẹnamde ke ndimek se idinọde fi akakan inemesịt—oro edi, ndiyere ikot Jesus n̄kabade ndi anditiene enye.

[Ndise ke page 6]

Ubiere fo ekeme ndikpụhọde uwem mbon en̄wen

[Ndise ke page 7]

Nte afo eyekpep Bible onyụn̄ akabade edi anditiene Jesus?