Kere Ban̄a Ini Iso ke nte Odude Uwem

JESUS CHRIST ọkọdọhọ ke ọwọrọetop Ukwọrọikọ esie Oro ke Obot Galilee ete: “Ẹkûtịmede esịt ẹban̄a n̄kpọn̄.” Ndien nte The New English Bible akabarede, ekem Jesus ama adian do ete: “N̄kpọn̄ eyese aban̄a idemesie.”—Matthew 6:34.

Afo ekere ke ikọ oro, “N̄kpọn̄ eyese aban̄a idemesie” ọwọrọ nso? Ndi ọwọrọ ke afo ekpenyene ndidu uwem kaban̄a mfịn kpọt onyụn̄ efre enyịn aban̄a ini iso? Ndi se Jesus ye mme mbet esie ẹkenịmde ke akpanikọ enen̄ede edi oro?

“Ẹtre Nditịmede Esịt”

Kot ofụri se Jesus eketịn̄de ke Matthew 6:25-32. Ndusụk se enye eketịn̄de edi emi: “Ẹtre nditịmede esịt mban̄a ukpọn̄ mbufo ẹte ididia nso m̀mê idin̄wọn̄ nso, m̀mê ẹban̄a ikpọkidem mbufo ẹte idisịne nso. . . . Ẹtịm ẹse mme inuen enyọn̄, koro mmọ isuanke n̄kpasịp inyụn̄ idọkke-dọk inyụn̄ itan̄ke ibon ke ubet ubonn̄kpọ; edi Ete mbufo eke heaven ọbọk mmọ. . . . Anie ke otu mbufo ekeme ndidian n̄kpọ ke isua uwem esie ke ntak emi okopde editịmede esịt? N̄ko, ke se iban̄ade edisịnen̄kpọ, ntak emi mbufo ẹtịmerede esịt? Ẹkpep n̄kpọ ẹto ekpon̄idịm ke ikọt, nte mmọ ẹkọride; mmọ ikpaha utom, inyụn̄ ifiakke ndidi . . . Mmọdo ẹkûtịmede esịt ẹnyụn̄ ẹdọhọ ẹte, ‘Nnyịn ididia nso?’ m̀mê, ‘Nnyịn idin̄wọn̄ nso?’ m̀mê, ‘Nnyịn idisịne nso?’ Sia kpukpru emi ẹdi mme n̄kpọ emi mme idụt ẹbịnede ye ọkpọsọn̄ udọn̄. Koro Ete mbufo eke heaven ọfiọk ke mbufo ẹmeyom kpukpru n̄kpọ emi.”

Jesus akada item iba ada ikpehe ukwọrọikọ esie enye emi ekeberi. Akpa item edi: “Ẹka iso, ndien, ndibem iso nyom obio ubọn̄ ye edinen ido [Abasi], ndien ẹyedian kpukpru n̄kpọ eken ẹnọ mbufo.” Udiana item edi: “Mmọdo, ẹkûtịmede esịt ẹban̄a n̄kpọn̄, koro n̄kpọn̄ eyenyene  editịmede esịt esie. Afanikọn̄ usen ekem ye usen.”—Matthew 6:33, 34.

Ete Mbufo Ọfiọk Se Mbufo Ẹyomde

Ndi etie fi nte Jesus ọkọdọhọ mme mbet esie, esịnede mme ọtọin̄wan̄, ete ‘ẹkûtọ n̄kpọ, ẹkûdọk, m̀mê ẹkûtan̄ mfri mmọ ẹkebon ke ubet ubonn̄kpọ’? Mîdịghe, ndi etie fi nte enye ọkọdọhọ mmọ ‘ẹkûnam utom ẹnyụn̄ ẹfiak ndidi’ man ẹnyene edisịnen̄kpọ? (Mme N̄ke 21:5; 24:30-34; Ecclesiastes 11:4) Ke akpanikọ, ikọdọhọke. Edieke mmọ ẹkpetrede ndinam utom, ke akpatre mmọ ‘ẹkpekeyoyom n̄kpọ ke ini ukpen̄e,’ edi ikwe se ẹdiade m̀mê se ẹsịnede.—Mme N̄ke 20:4.

Nso kaban̄a editịmede esịt? Ndi Jesus ọkọdọhọ ke mme mbet esie idikopke editịmede esịt ke baba usụn̄ kiet? Oro ọkpọwọrọ abian̄a. Jesus ke idem esiemmọ ama enen̄ede okop mfụhọ ye editịmede esịt ke okoneyo oro ẹkemụmde ẹnyụn̄ ẹwotde enye.—Luke 22:44.

Jesus akakam etịn̄ se idide ata akpanikọ. Tutu amama nditịmede esịt n̄kaha ikemeke ndin̄wam fi ọkọk mfịna ekededi oro osobode. Ke uwụtn̄kpọ, enye ikemeke ndinam fi odu uwem ebịghi. Jesus ọkọdọhọ ke enye ikemeke “ndidian n̄kpọ ke isua uwem [fo].” (Matthew 6:27) Ke akpanikọ, etie nte ọkpọsọn̄ editịmede esịt mbịghi edikam ososụhọde isua uwem fo.

Item esie ama enen̄ede esịne ifiọk. Ediwak n̄kpọ oro nnyịn isitịmerede esịt iban̄a isikam itịbeke-tịbe. Winston Churchill, akwa owo ukara Britain, ama ọfiọk emi ke ini udiana ekọn̄ ererimbot. Enye ekewet ntem aban̄a ndusụk n̄kpọ oro enye eketịmerede esịt aban̄a: “Ke ini ntiede n̄kere kpukpru editịmede esịt emi, mmesiti mbụk emi akanieren kiet okobụkde ke nna n̄kpa esie ete ke imọ ima isitịmerede esịt iban̄a ekese afanikọn̄ ke eyouwem imọ, edi ke ata ediwak afanikọn̄ oro iketịbeke.” Ke akpanikọ, esịne ifiọk nditre nditịmede esịt mban̄a n̄kpọn̄, akpan akpan ke ini mfịghe ye mme mfịna oro isobode ẹkemede ndinam nnyịn inen̄ede ikop editịmede esịt.

‘Ẹka Iso Ndibem Iso Nyom Obio Ubọn̄ Abasi’

Ke nditịm ntịn̄, se Jesus eketịn̄de ama akan se iban̄ade nsọn̄ọidem mbon oro enye  eketịn̄de ikọ ọnọ. Enye ama ọfiọk ke editịmede esịt mban̄a edinyene mme n̄kpọ udu uwem, ọkọrọ ye ọkpọsọn̄ udọn̄ ndinyene inyene nnyụn̄ n̄kop inemesịt, ẹkeme ndibiọn̄ọ fi ndinam se idide akpan n̄kpọ ikan. (Philippi 1:10) Afo emekeme ndikere ete, ‘Nso idi ata akpan n̄kpọ ikan mme n̄kpọ udu uwem?’ Ibọrọ edi, mme n̄kpọ eke spirit, oro ẹnyenede ebuana ye edituak ibuot nnọ Abasi. Jesus ọkọsọn̄ọ etịn̄ ke se ikpedide ata akpan n̄kpọ ke uwem nnyịn ekpedi ‘ndika iso mbem iso nyom obio ubọn̄ Abasi ye edinen ido esie.’—Matthew 6:33.

Ediwak owo ẹkesịn ifịk ẹbịne mme n̄kpọ obụkidem ke eyo Jesus. Ndikọ inyene ekedi ata akpan n̄kpọ ọnọ mmọ. Edi Jesus ọkọdọhọ mbon oro ẹkekpan̄de utọn̄ ẹnọ enye ete ẹkûtie ntre. Sia mmọ ẹkedide mbon oro ẹkeyakde idem ẹnọ Abasi, ofụri se mmọ ẹkenyenede ndinam ekedi ‘ndibak Abasi, nnyụn̄ nnịm mbet esie.’—Ecclesiastes 12:13.

Edieke mme andikpan̄ utọn̄ nnọ Jesus ekpekesịnde esịt ke n̄kpọ obụkidem—oro edi, “editịmede esịt eke editịm n̄kpọ emi ye abian̄a abian̄a odudu inyene”—oro okpokowot mmọ ke n̄kan̄ eke spirit. (Matthew 13:22) Apostle Paul ekewet ete: “Mbon oro ẹbierede ndinyene inyene ẹduọ ẹdụk idomo ye ekpọ ye ediwak ndisịme ye idiọk udọn̄, emi ẹdụride mme owo ẹsịn ke nsobo ye nditaha.” (1 Timothy 6:9) Man an̄wam mme mbet esie ẹfep “ekpọ” emi, Jesus ama eti mmọ ete ke Ete mmọ eke heaven ama ọfiọk ke mmọ ẹyom mme n̄kpọ emi. Abasi eyese aban̄a mmọ kpa nte esede aban̄a “mme inuen enyọn̄.” (Matthew 6:26, 32) Utu ke ndiyak editịmede esịt emen mmọ emen, mmọ ẹkenyene ndinam se mmọ ẹkekemede man ẹnyene se ẹdiade, ẹnyụn̄ ẹnyene mbuọtidem ẹyak se isụhọde ẹsịn Jehovah ke ubọk.—Philippi 4:6, 7.

Ke ini Jesus ọkọdọhọde ke “n̄kpọn̄ eyese aban̄a idemesie,” enye ọkọdọhọ ke nnyịn ikpayakke editịmede esịt nte mîdotke mban̄a se iditịbede n̄kpọn̄ ọkọrọ mfịna ke mme mfịna oro isobode mfịn. Edikabade Bible en̄wen akabarede ikọ esie ntem: “Ẹkûtịmede esịt ẹban̄a n̄kpọn̄; enye eyenyene ekese editịmede esịt esiemmọ. Ufọn idụhe ndikọrọ afanikọn̄ ke afanikọn̄ oro usen kiet kiet adade edi.”—Matthew 6:34, Today’s English Version.

“Yak Obio Ubọn̄ Fo Edi”

Nte ededi, akwa ukpụhọde odu ke nditre nditịmede esịt n̄kaha mban̄a ini iso ye edifre enyịn mban̄a ini iso ofụri ofụri. Akananam Jesus idọhọke mme mbet esie ẹfre enyịn ẹban̄a ini iso. Utu ke oro, enye ekesịn udọn̄ ọnọ mmọ ete ẹnen̄ede ẹnyene udọn̄ ẹban̄a ini iso. Mmọ ẹkpenyene ndibọn̄ akam nte odotde mben̄e se mmọ ẹyomde idahaemi—oro edi, udia eke usen ke usen. Edi akpa kan̄a, mmọ ẹkpenyene ndibọn̄ akam mben̄e mme n̄kpọ oro ẹditịbede ke ini iso—oro edi, yak Obio Ubọn̄ Abasi edi ẹnyụn̄ ẹnam uduak Esie ke isọn̄.—Matthew 6:9-11.

Nnyịn ikpebietke mbon eyo Noah. Mmọ ẹma ẹsịn idem “ẹdia ẹnyụn̄ ẹn̄wọn̄, irenowo ẹdọ ndọ ẹnyụn̄ ẹda iban ẹnọ ke ndọ” tutu mmọ “ifiọkke” se ikoyomde nditịbe. Nso ikedi utịp? “Ukwọ [ama] edi edikpọri mmọ kpukpru efep.” (Matthew 24:36-42) Apostle Peter ama ada n̄kpọntịbe emi eti nnyịn ufọn edikere mban̄a ini iso ke nte idude uwem. Enye ekewet ete: “Sia kpukpru n̄kpọ emi ẹdibiarade ntem, nso orụk owo ke mbufo ẹkpedi ke edisana ido uwem ye ke mme edinam uten̄e Abasi, nte ẹtiede ẹbet ẹnyụn̄ ẹsọn̄ọde ẹnyene edidu usen Jehovah ke ekikere!”—2 Peter 3:5-7, 11, 12.

Ẹbon N̄kpọuto ke Heaven

Ih, ẹyak ‘isọn̄ọ inyene’ usen Jehovah ke “ekikere.” Ndinam ntre eyenen̄ede otụk nte idade ini, odudu, ndammana ukeme, ye inyene nnyịn inam n̄kpọ. Nnyịn ikpesịnke ibuot isịn itọn̄ iyom n̄kpọ obụkidem—edide n̄kpọ udu uwem m̀mê inemesịt—tutu inyeneke ini inọ mme edinam emi ẹwụtde ke imenyene “uten̄e Abasi.” Ndidu uwem kaban̄a mfịn kpọt ekeme nditie nte ada ufọn edi iwiwa, edi ufọn ekededi oro enye adade edi edi ke ibio ini. Jesus ọkọdọhọ ke akam enen̄ede owụt eti ibuot ‘ndibon n̄kpọuto nnọ idem nnyịn ke heaven’ utu ke ndibon ke isọn̄.—Matthew 6:19, 20.

 Jesus ama ọsọn̄ọ etịn̄ ọkpọikọ emi ke uwụtn̄kpọ oro enye ọkọnọde aban̄a eren emi akanamde ikpọ ndutịm aban̄a ini iso. Enye ikesịnke Abasi ke ndutịm emi. In̄wan̄ eren emi ama ọfọn n̄kpọ etieti. Enye ama ọdọhọ ke imọn̄ iwụri ubet ubonn̄kpọ imọ inyụn̄ ibọp ikpọ ubet ubonn̄kpọ man imọ ikpodu uwem ifụre, idia, in̄wọn̄, inyụn̄ ikop inem uwem. Nso ikọdiọk do? Enye ikodụhe uwem idia ufọn utom esie. Se ikakam idiọkde ikan edi emi enye mîkenyeneke eti itie ebuana ye Abasi. Jesus akada ikọ esie ekeberi ntem ete: “Ntem ke etie ye owo eke ọkọde n̄kpọuto obon ọnọ idemesie edi mînyeneke inyene ke n̄kan̄ Abasi.”—Luke 12:15-21; Mme N̄ke 19:21.

Nso ke Afo Ekeme Ndinam?

Kûnam ukem ndudue eren oro Jesus eketịn̄de aban̄a. Kpep fiọk se Abasi aduakde aban̄a ini iso, nyụn̄ yak oro akara uwem fo. Abasi asian mme owo se enye edinamde. Amos emi ekedide prọfet Abasi ke eset ekewet ete: “Koro Ọbọn̄ Jehovah mîdinamke baba n̄kpọ kiet, ke mîbọhọke ini enye ayarade uduak esie ọnọ ikọt esie mme prophet.” (Amos 3:7) Afo emekeme ndikot idahaemi se Jehovah akayararede ọnọ mme prọfet esie ke Ikọ esie oro ẹkedade odudu spirit ẹwet, kpa Bible.—2 Timothy 3:16, 17.

N̄kpọ kiet oro Bible ayararede edi se iditịbede ke n̄kpet n̄kpet ini iso, oro editụkde ofụri isọn̄ ke usụn̄ oro akanam mîtịbeke. Jesus ọkọdọhọ ete: “Akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matthew 24:21) Baba owo kiet ikemeke ndikpan emi nditịbe. Ke akpanikọ, idụhe ntak ndomokiet oro ata mme andituak ibuot ẹkpeyomde ndikpan enye. Ntak-a? Koro emi eyetre kpukpru idiọkido ke isọn̄, onyụn̄ ọtọn̄ọ “obufa enyọn̄ ye obufa isọn̄,” emi edide obufa ukara eke heaven ye obufa n̄kaowo ke isọn̄. Ke obufa ererimbot oro, Abasi “ọyọkwọhọde kpukpru mmọn̄eyet ke enyịn [owo] efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—Ediyarade 21:1-4.

Mmọn̄ọ, ndi iwụtke ifiọk ndida ini n̄kpep se Bible etịn̄de aban̄a n̄kpọ emi? Nte afo omoyom ẹn̄wam fi man anam oro? Dọhọ Mme Ntiense Jehovah ẹn̄wam fi. Mîdịghe wet n̄wed nọ ẹsọk mme andisio magazine emi. Sịn ofụri ukeme kụt ete ke udụhe uwem kaban̄a mfịn kpọt edi ke emekere n̄ko aban̄a utịbe utịbe ini iso.

[Mme ndise ke page 7]

“Ẹtre nditịmede esịt . . . N̄kpọn̄ eyenyene editịmede esịt esie”