Ndikan Mme N̄kpọ-Ata man Ida Eti Mbụk Isọk Mme Owo

UBOMISỌN̄ MBIOMO nnyịn ama ekpere itie ndụn̄ọde emi n̄kpọ nte iren, iban, ye uyen 60 emi ẹkamade ikan̄ ẹdade. Ndusụk mmọ ẹsịne ọfọn̄ekọn̄, mbon eken ẹsịne ata ọfọn̄. Ediwak mmọ ẹkama otop-idem-ikpọn̄ ikan̄. Etie nte mmọ ẹkedada ẹbet nnyịn. Ndutịme odu ke idụt emi.

Nnyịn imada ata ediwak n̄wed un̄wam ukpep Bible isan̄a usen inan̄. Ke ikere m̀mê ẹyeyak nnyịn ibe. Ndi mmọ ẹyeyom okụk? Edibịghi adan̄a didie mbemiso ikemede ndinam mmọ ẹnịm ke idịghe ekọn̄ ada nnyịn edi?

Eren kiet emi amade nditop ikan̄ otop ikan̄ ke ufụmenyọn̄ man eti nnyịn ke imọ idi etubom. Enye okụt urụk ukopikọ nnyịn oro ẹkamade-kama ẹsan̄a onyụn̄ ọdọhọ inọ imọ. Ke ini imen̄ede ndinọ enye, enye ada ubọk anam idiọn̄ọ ke itọn̄ ndiwụt ke iyesịbe nnyịn itọn̄ edieke nnyịn mînọhọ imọ. Nnyịn ima iyak mme urụk ukopikọ oro inọ enye.

N̄wan kiet emi esịnede ọfọn̄ekọn̄ emen ikan̄ esie wap asan̄a ebịne nnyịn. Enye edi “ewetn̄wed,” ndien oyom nnyịn itiene inọ imọ n̄kpọ n̄ko. N̄kpọ ọsọn̄ etieti, ndien ekpri se mmọ ẹbọde eyenyene ufọn. Owoekọn̄ en̄wen onyụn̄ okụbọde itie udọn̄ aranuwat ke ubomisọn̄ nnyịn osio aranuwat ọdọn̄ ke iko esie ọyọhọ. Nnyịn ikpan enye, edi imaha ndikop, ete ke imọ inam se ẹdọhọde imọ inam. Nnyịn ikemeke ndinyan̄a. Akam nnyịn ekedi yak mbon eken ẹkûnam ntre n̄ko.

Ke akpatre, mmọ ẹmenerede eto ẹfep nnyịn inyụn̄ itọn̄ọ isan̄. Ami ye nsan̄a mi ikot ibifịk iduọk. Ama enyene ndịk, edi mme utọ itie ndụn̄ọde emi ẹkamade editịmede esịt mi ẹmehe nnyịn. Ke ufọt April 2002 ye January 2004, nnyịn ima isan̄a ike 18 ọtọn̄ọde ke esụkmbehe Douala ke Cameroon esịm Bangui, kpa ibuot obio Central African Republic. Isan̄ emi edide kilomita 1,600 mi esiwak ndikama n̄kpọ-ndịk ye mme n̄kpọ n̄kpaidem. *

Joseph ye Emmanuel, mme awat ubomisọn̄  emi ẹsikade isan̄ emi ndien ndien, ẹdọhọ ẹte: “Isan̄ emi emekpep nnyịn ekese n̄kpọ. Ọfọn ndisibọn̄ akam ke esịt ndien ndien nnyụn̄ nnam n̄kpọ sụn̄sụn̄. Andiwet psalm ekewet ete, ‘Mmọbuọt idem mi ke Abasi: ndịk idinamke mi. Nso ke owo ekeme ndinam mi?’ Nnyịn isidomo ndinam ntre n̄ko. Nnyịn imesinen̄ede inịm ke Jehovah ọfiọk ke nnyịn ida etop oro ọnọde idotenyịn, oro ẹyomde ke mbrenyịn, isọk mme owo.”—Psalm 56:11.

Ukeme Ofụri Ererimbot Oro Ẹsịnde Ndinọ Udia Eke Spirit

Ediwak owo ke ikpehe Africa emi ẹsinen̄ede ẹma ndikop eti mbụk Obio Ubọn̄ Abasi. Ẹnam mme n̄wed oro isidade ika man ẹyụhọ udọn̄ mmọ ke n̄kan̄ eke spirit. (Matthew 5:3; 24:14) N̄kọk itieutom Mme Ntiense Jehovah ke Douala ke Cameroon esinọ n̄wed kpukpru ini ẹsọk se ibede mme asuanetop Obio Ubọn̄ 30,000 emi ẹdude ke Cameroon ye idụt inan̄ ke mbọhọ mmọ.

Mme n̄wed emi ẹto ata anyan usụn̄ ẹdi. Ẹkemịn̄ ata ediwak mmọ ke England, Finland, Germany, Italy, ye Spain. Ekem ẹnọ asan̄a ke nsụn̄ikan̄ ke France. Ikpọ ekebe atian n̄wed ẹsiwak ndibehe ke esụkmbehe Douala kpukpru urua iba.

Ẹsidịbede ikpọ ekebe atian emi ẹdori ke ubomisọn̄ mbiomo ẹwat ẹkebehe ke n̄kọk itieutom. Mbonutom ke Itieutom Unọ N̄wed Ọwọrọ ẹsisat n̄wed emi ẹbon ke nde ke nde ẹtiene ebiet emi ẹdinọde mmọ ẹka. Ndida n̄wed n̄kọnọ ke ata esịt esịt obio idịghe ifia ubọk kiet. Edi emi edi usụn̄ kiet emi ẹdade eti mbụk ẹsọk mme owo “tutu esịm ke ata utịt ikpehe isọn̄.” (Utom 1:8) N̄kọk itieutom eberi edem ke mme anamutom unyịmesịt emi ẹsinamde n̄waidem ẹwat ubomisọn̄ mbiomo ke mme enyene-ndịk usụn̄ emi. Ntem ke ata ediwak owo ke ufọt ufọt ikpehe Africa ẹsinyene n̄wed un̄wam ukpep Bible.

Nte Isan̄ Emi Esitiede

Ubomisọn̄ mbiomo esida n̄wed aka Cameroon, Chad, Equatorial Guinea, Gabon, ye Central African Republic. Ẹyak isan̄a ye ubomisọn̄  mbiomo kiet ye mme andiwat. Da nte etie ye mme awat ubomisọn̄ emi, onyụn̄ eben̄e idem ndika isan̄ oro akamade n̄kpọndịk; ndien emi edida usen duop m̀mê akan oro.

Mme awat ubomisọn̄ itiokiet ẹwat uwat emi. Ana idem ọsọn̄ mmọ, ẹnyene ukeme, ẹme ime, ẹnyụn̄ ẹsịne n̄kpọ ọfọn. Mmọ ẹkeme ndisịne n̄kpọ ke ido obio mîdịghe ẹsịne siọt ye tai. Ke ini edem, mme ekpeme n̄kpọmbet ẹma ẹdọhọ ẹte: “Sese nte ubomisọn̄ mbiomo emi asanade ye mme andiwat mmọ emi ẹkamade idem ediye ediye, mmọ ẹtie ukem ukem nte ẹsisiode mmọ ẹsịn ke mme n̄wed mmọ.” Se ikam idide akpan n̄kpọ ikan ukamaidem mme awat ubomisọn̄ emi edi emi mmọ ẹnyịmede ndika ebiet ekededi oro oyomde mmọ ẹka man ẹnam n̄kpọ ẹnọ mbon en̄wen.—Psalm 110:3.

Ẹsidaha ke Douala ke n̄kpọ nte n̄kanika itiokiet usenubọk, esisịt ini ke utịn ama akasiaha, man ẹfep ọkpọsọn̄ uwak ubomisọn̄ ke obio emi. Ke ima ikebe ebọp emi ekperede n̄kọk itieutom inyụn̄ ikanarede obio emi ubomisọn̄ ẹnen̄erede ẹwak mi, nnyịn isịn iso ke edem usiahautịn man ika akpa ebiet oro iyomde ndika—oro edi, Yaoundé, ibuot obio Cameroon.

Kpukpru owo itiokiet emi ẹsiwatde ubomisọn̄ mi ẹtịn̄ ikọ kiet, nte ke imemke utom ndiwat ubomisọn̄ emi emende ata ediwak n̄wed ntem. Okposụkedi oyomde ẹnọ ọyọhọ ntịn̄enyịn, akpa usen ita isinen̄ekede inọ owo mfịna sia ẹwatde ke usụn̄ emi ẹsịnde itai. Nnyịn imosobo akamba edịm ke usụn̄ ke mbuari. Ndien ọtọn̄ọde mi owo isịnke itai ke usụn̄. Owo ikwe aba usụn̄ ọfọn, ọkpọusụn̄ ọfọfiọnọde, ndien inyene ndiwat sụn̄sụn̄ sia usụn̄ etiede n̄kpotụk n̄kpotụk. Eyo ọtọn̄ọ ndikụt. Ekem ini ndituak nda, nyom udia, nnyụn̄ ndomo nditie ke iso ubomisọn̄ nde. Nte isan̄ nnyịn esitiede edi oro!

Tụhi-tụhi usenubọk ndan̄nsiere imafiak itọn̄ọ isan̄. Kiet ke otu mme andiwat owụk enyịn ese nte usụn̄ etiede. Enye ọyọnọ ntọt iwiwa edieke ikperede ebeden̄ mbenusụn̄ ikaha. Mme awat ubomisọn̄ ẹfiọk ke edieke mmimọ iduọde idụk ebeden̄, ke ayada ediwak usen mbemiso iwọrọde. Usụn̄ osụk etie ntre idem ke ini ibede idụk Central African Republic. Iyawat ibe ndiye obio-in̄wan̄ emi ẹtiede awawa awawa ye obot obot ke kilomita 650. Nditọwọn̄, n̄kani owo, mme eka emi ẹkpọde nditọ ke edem ẹfụn̄ nnyịn ubọk nte iwatde sụn̄sụn̄ ibe ke obio mmọ. Ubomisọn̄ iwakke ke usụn̄ ke ntak ndutịme, ntre mme owo ẹsimọnọde enyịn ẹse nnyịn.

Ndinem Ifiọkutom

Janvier, kiet ke otu mme andiwat ubomisọn̄ emi, asian nnyịn ete ke kpa ye oro ini esifahade mmimọ, ke mmimọ imesituak ida ke mme obio-in̄wan̄ iduọk odudu esịt inyụn̄ isuan mme n̄wed un̄wam ukpep Bible. Enye ọdọhọ ete: “Nnyịn imesiwak ndinyene nneme ye ete kiet emi anamde  utom ke ufọkibọk, emi enen̄erede enyene udọn̄ ke etop Obio Ubọn̄ ke Baboua, imesinyụn̄ inịm ibio ibio ukpepn̄kpọ Bible ye enye. Usen kiet nnyịn ima ikam iwụt enye ye ubon esie kaset vidio Noah. Mme ufan ye mme mbọhọidụn̄ esie ẹma ẹdi, ndien ikebịghike mbon oro ẹkekopde nduaidem ndise vidio emi ẹma ẹyọhọ ufọk esie. Idụhe owo mmọ emi mîkokopke mbụk Noah, edi idahaemi mmọ ẹkesese mbụk emi ke ekebe ndise. Ama enen̄ede enem nnyịn nte mmọ ẹkewụtde esịtekọm. Ke oro ebede, mmọ ẹma ẹtem san̄asan̄a udia ndida n̄kọm nnyịn, ẹnyụn̄ ẹkpe ye nnyịn ẹte idan̄ ye mmimọ. Nnyịn ikenyene ndinyọn̄ ye unana ubiatini nnyụn̄ n̄ka iso ke anyan isan̄ nnyịn, edi ima ikop inemesịt ke emi ikabuanade eti mbụk ye mme sụn̄sụn̄ owo emi.”

Israel, owo en̄wen emi edide awat ubomisọn̄, eti n̄kpọ en̄wen emi eketịbede ke isan̄ uka Bangui, ndien do ke nnyịn ika. Enye ọdọhọ ete: “Nte nnyịn ikekperede Bangui, ntre ke itie ndụn̄ọde akawak. Ke mfọniso, ediwak mbonekọn̄ ẹketie ufan ufan ẹnyụn̄ ẹti ke ubomisọn̄ emi ama ebebe isan̄ oko. Mmọ ẹma ẹdọhọ nnyịn iditie ye mmimọ ẹnyụn̄ ẹdat esịt ndibọ mme n̄wed un̄wam ukpep Bible. Mmọ ẹda n̄wed nte ata akpan n̄kpọ, ntre mmọ ẹsiwet enyịn̄ mmọ ye usenọfiọn̄ ye enyịn̄ owo emi ọkọnọde mmọ. Ndusụk mbonekọn̄ emi ẹnyene mme iman emi ẹdide Mme Ntiense, emi edi ntak en̄wen emi mmọ ẹtiede ufan ufan.”

Joseph, emi ọfiọkde uwat akan, obụk se enye amade akan ke isan̄ emi—oro edi, ndika n̄kesịm ebiet emi ẹkade. Enye etịn̄ ntem aban̄a isan̄ kiet emi mmọ ẹkekade: “N̄kpọ nte kilomita ifan̄ mbemiso isịmde Bangui, nnyịn ima ikot nditọete nnyịn ke urụk ukopikọ man isian mmọ ke imọn̄ isọp idisịm. Mmọ ẹma ẹda nnyịn isan̄ ke obio, ẹn̄wam nnyịn ẹsịn ubọk ke n̄wed nte odotde. Ke ima ikedi idibehe, kpukpru owo ke n̄kọk itieutom ẹma ẹwọrọ ẹdifat nnyịn. Nditọete ẹma ẹto mme esop ke n̄kann̄kụk oro ẹdin̄wam, ndien ke ufan̄ hour ifan̄ ẹma ẹsion̄o ata ediwak katọn Bible, n̄wed, n̄kpri n̄wed, ye magazine ẹbon ke nde ke nde ke ebiet mmọ.”

Joseph adian do ete: “Ndusụk ini mbiomo nnyịn esisịne ọfọn̄, ikpaukot, ye mme n̄kpọ nditọwọn̄ emi ẹnọde ẹsọk Democratic Republic of Congo. Ekenem didie ntem ndikụt nte nditọete emi ẹwụtde esịtekọm mi ẹtuakde inua imam!”

Ke ima ikada usen kiet iduọk odudu, ima itịm ubomisọn̄ mbiomo nnyịn idụk usụn̄ unyọn̄ọ. Imọfiọk ke iyosobo mfịna ke usụn̄, edi ndinem ifiọkutom oro ikenyenede ẹkan mfịna ekededi oro ikosobode.

Nnyan usụn̄ isan̄, ọkpọsọn̄ edịm, ndiọi usụn̄, mme ọkpọ ubomisọn̄ ndidịt, ye ubomisọn̄ ndibiara ẹkeme ndinam idem emem owo. Mbonekọn̄ emi ẹnamde n̄kpọ ntịme ntịme ẹdi afanikọn̄ en̄wen. Kpa ye oro, idụhe se inọde mme awat ubomisọn̄ emi inemesịt nte ndida eti mbụk Obio Ubọn̄ n̄ka esịt esịt Africa nnyụn̄ n̄kụt utịp emi n̄wed emi ẹnyenede ke uwem mbon oro ẹbọde mmọ.

Ke uwụtn̄kpọ, ke ntak emi ẹsidade n̄wed emi ẹka ntem, owo kiet ke ata esịt esịt Central African Republic ke mbọhọ adan̄a Sudan edikot edikabade Bible eyomfịn idahaemi. N̄wan esie esikpep nsiondi Enyọn̄-Ukpeme eke ndondo emi, nditọ mmọ ẹnyụn̄ ẹkpep n̄wed oro Kpep N̄kpọ to Akwa Andikpep. * Mmọ ye ata ediwak owo eken ẹbọ udia eke spirit ke mme obio-in̄wan̄ emi ukem nte nditọete mmọ ẹbọde ke ikpọ obio. Ke akpanikọ, emi anam owo enen̄ede okop inemesịt!

[Mme Ikọ idakisọn̄]

[Mme ndise obio/Ndise ke page 9]

(Ama oyom ndikụt nte enye enen̄erede etie, se n̄wed)

CAMEROON

Douala

CENTRAL AFRICAN REPUBLIC

Bangui

[Ndise ke page 9]

Joseph

[Ndise ke page 9]

Emmanuel

[Ndise ke page 10]

N̄kọk itieutom Central African Republic ke Bangui

[Ndise ke page 10]

Ndision̄o mbiomo ke ubomisọn̄ ke Bangui