Nte Okpodu Uwem Kaban̄a Mfịn Kpọt?

“AKANANAM n̄kereke mban̄a ini iso. Enye esiwara edi.” Ẹdọhọ ke Albert Einstein, ọwọrọetop ataifiọk eketịn̄ ikọ oro. Ediwak owo ẹsitịn̄ ikọ eke etiede ntre. Mmọ ẹkeme ndidọhọ ẹte, “Ufọn nditịmede esịt mban̄a ini iso?” Mîdịghe, ekeme ndidi afo ama okop mme owo ẹtịn̄de n̄kpọ nte: “Nam se anamde.” “Se adiade esịn ke idịbi edi okwommọ.” “Ama akpa, okwo okụre.”

Nte ededi, ọsọ edu emi idịghe obufa n̄kpọ. “Ta n̄kpọ, n̄wọn̄ n̄kpọ, dia uwem. Se idide akpan n̄kpọ edi oro.” Ekikere mbon Epicurus eset ekedi oro. Ndusụk mbon eyo apostle Paul ẹma ẹnyene ukem ekikere oro n̄ko. Ekikere mmọ ekedi: “Ẹyak nnyịn idia inyụn̄ in̄wọn̄, koro nnyịn iyakpa n̄kpọn̄.” (1 Corinth 15:32) Mmọ ẹkenịm ke ibio ibio uwem oro idude idahaemi edi n̄kukụre uwem oro inyenede, ntre mmọ ẹma ẹnam mme owo ẹnịm ke ikpenyene ndinam ofụri se ikekeme ke ibio uwem emi.

Edi odu ata ediwak mme andidụn̄ isọn̄, emi ẹnamde ofụri se ẹkekeme man ẹnyene se ẹdade ẹdu uwem, edi emi idịghe man ẹyom ọkpọsọn̄ inemesịt. Mfịn, ediwak owo ẹdu ke ata ndiọi idaha oro ẹnamde mmọ ẹfọfiọn̄ọ ubọk ẹyom se ẹdade ẹdu uwem. Mmọdo, nso ikpanam utọ mbon oro ẹkere ẹban̄a ini iso, kpa ini iso emi etiede nte edikam ọdọdiọk akan, emi idotenyịn mînyụn̄ idụhe?

Ndi Ikpenyene Ndinam Ndutịm Nnọ Ini Iso?

Idem mbon oro idaha mmọ mîdiọkke ikaha isikwe ufọn edinam ndutịm nnọ ini iso. Mmọ ẹkeme ndidọhọ ke ufọn idụhe ndifịna idem. Ndusụk owo ẹkeme ndidọhọ ke idotenyịn mbon oro ẹsinamde ndutịm ẹnọ ini iso esikpa mfụhọ, mmọ ẹnyụn̄ ẹkụt edikpu. Akamedi idotenyịn Job ke eset ama akpa mfụhọ ke ini ofụri se enye okodiomide ‘ẹkekịbede ẹfep,’ onyụn̄ abiat ofụri se ikpakanamde enye ye ubon esie ẹkop inem uwem ke ini iso.—Job 17:11; Ecclesiastes 9:11.

Robert Burns, ewet uto eyen Scotland, akada idiọk idaha nnyịn odomo ye eke ekpri eku ikọt, emi Burns ekeduede ada udọk ekịm odudu esie. Ekpri eku mbon ama efehe oyom itọn̄ uwem esie sia ẹkebiatde ebietidụn̄ esie. Ewet uto oro ama ekere ete, ‘Ke akpanikọ, ediwak ini nnyịn isinyeneke ukeme ndikara mme n̄kpọ oro ẹtịbede, emi ẹkande ukeme nnyịn, tutu idem n̄kpọ oro iketịn̄de enyịn idiomi ẹsitak ofụri ofụri.’

 Ntre, ndi ikọ ọwọrọ ke ufọn idụhe ndinam ndutịm nnọ ini iso? Se idude edi ke n̄kpọ ekeme ndinen̄ede ndiọk ke ini oyobio m̀mê oto-obot afanikọn̄ en̄wen ẹtịbede edieke owo mîketịmke idem nte odotde. Ke uwụtn̄kpọ, owo ndomokiet ikpekekemeke nditre enyene-ndịk oyobio oro ekefịmede ke United States, emi ẹkotde Oyobio Katrina. Edi edieke ẹkpeketịn̄de enyịn ẹnam ndutịm mbemiso ini oro, ndi emi ikpekenen̄ekede in̄wam obio oro ye mme andidụn̄?

Afo ekere didie? Ndi enen̄ede owụt ifiọk ndidu uwem kaban̄a mfịn kpọt nnyụn̄ mfụmi ini iso? Kere ban̄a se ibuotikọ oro etienede enyenede nditịn̄ ke n̄kpọ emi.

[Mme ndise ke page 3]

“Ta n̄kpọ, n̄wọn̄ n̄kpọ, dia uwem. Se idide akpan n̄kpọ edi oro”

[Ndise ke page 4]

Edieke ẹkpeketịn̄de enyịn ẹnam ndutịm, nte oro ikpekenen̄ekede in̄wam mbon oro ọkpọsọn̄ oyobio ọkọnọmọde ke United States?

[Ebiet Ẹdade N̄kpọ Ẹto]

U.S. Coast Guard Digital