Ndidụn̄ọde “Mme Ntotụn̄ọ N̄kpọ Abasi”
Ndidụn̄ọde “Mme Ntotụn̄ọ N̄kpọ Abasi”
“Spirit [odụn̄ọde] kpukpru n̄kpọ, kpa mme ntotụn̄ọ n̄kpọ Abasi.” —1 CORINTH 2:10.
1. Nso idi ndusụk akpanikọ Bible oro anamde mbufa nditọ ukpepn̄kpọ Bible ẹkop idatesịt?
ATA ediwak nnyịn ke esop Christian imeti nte nnyịn ikokopde idatesịt ke ini ikọtọn̄ọde ndikpep akpanikọ. Nnyịn ima idifiọk se enyịn̄ Jehovah ọwọrọde, ifiọk ntak emi enye ayakde ndutụhọ odu, ntak emi ndusụk owo ẹdikade heaven, ye se inade ibet mbon eken oro ẹnamde akpanikọ. Ekeme ndidi nnyịn ima isikot Bible mbemiso oro, edi nnyịn iketịmke ifiọk mme n̄kpọ emi ukem nte ediwak owo mfịn mîtịmke ifiọk mmọ. Nnyịn iketie nte owo emi ọtọn̄ọde isan̄ tụhi-tụhi usenubọk. Enye idikemeke ndinen̄ede n̄kụt n̄kpọ sia enyọn̄ mîn̄wan̄ake kan̄a. Edi nte utịn ọtọn̄ọde ndisiaha, enye ọtọn̄ọ ndikụt n̄kpọ nsịtnsịt. Ke akpatre, eyo ada nainai, do ke enye ekeme ndinen̄ede n̄kụt kpukpru ndiye n̄kpọ oro ẹkande enye ẹkụk, esịnede mbon oro ẹdude ke anyan ebiet. Ukem ntre, ke ini owo ọtọn̄ọde ndikpep nnyịn N̄wed Abasi, enye akam ọtọtọn̄ọ ndifọi nnyịn n̄wụt “mme ntotụn̄ọ n̄kpọ Abasi.”—1 Corinth 2:8-10.
2. Ntak emi idatesịt oro edikpep Ikọ Abasi ọnọde nnyịn mîditreke?
2 Ndi akpana iyụhọ ye esisịt ifiọk akpanikọ Bible oro ẹkekpepde nnyịn? Ikọ oro “mme ntotụn̄ọ n̄kpọ Abasi” esịne owo ndifiọk ọniọn̄ Abasi emi edisana spirit ayararede ọnọ mme Christian, edi emi mbon eken mîfiọkke. (1 Corinth 2:7) Sia ọniọn̄ Abasi mînyeneke adan̄a, nnyịn iyenen̄ede ikop inem ndidụn̄ọde mme n̄kpọ emi Abasi anamde. Tutu amama, nnyịn idifiọkke kpukpru n̄kpọ iban̄a ọniọn̄ ọniọn̄ usụn̄ oro Abasi esinamde n̄kpọ. Ntre, edieke ikade iso idụn̄ọde “mme ntotụn̄ọ n̄kpọ Abasi,” idatesịt oro ikenyenede ke ini ikọtọn̄ọde ndikpep mme akpan ukpepn̄kpọ Bible iditreke.
3. Ntak emi anade inen̄ede ifiọk se inamde inịm n̄kpọ ke akpanikọ?
3 Ntak anade idụn̄ọde “mme ntotụn̄ọ n̄kpọ” emi-e? Ndifiọk mme n̄kpọ oro inịmde ke akpanikọ nnyụn̄ mfiọk ntak oro inịmde mmọ—oro edi, ata akpan ntak oro anamde inịm mmọ—anam inen̄ede inyene mbuọtidem ye uko. N̄wed Abasi ọdọhọ nnyịn ida “ukeme ukere n̄kpọ” nnyịn ‘idomo ifiọk uduak Abasi eke edide eti onyụn̄ enemde enye esịt onyụn̄ ọfọnde ama.’ (Rome 12:1, 2) Ndidiọn̄ọ ntak emi Jehovah etemede nnyịn nte ikpodude uwem ayanam inen̄ede ikop uyo esie. Ke ntre, ndifiọk “mme ntotụn̄ọ n̄kpọ” Abasi ekeme ndinọ nnyịn odudu ndibiọn̄ọ idomo edinam idiọk onyụn̄ ekeme ndinam nnyịn ‘isịn ifịk inam nti utom.’—Titus 2:14.
4. Nso ke ndikpep Bible abuana?
4 Oyom ikpep n̄kpọ man ifiọk mme ntotụn̄ọ n̄kpọ Abasi. Nte ededi, owo ndikot n̄wed enyọn̄ enyọn̄ idịghe ukpepn̄kpọ. Enye abuana nditịm ndụn̄ọde se ikotde man ikụt nte enye enyenede ebuana ye se ima ikọfọfiọk. (2 Timothy 1:13) Enye esịne edifiọk ntak oro ẹtịn̄de mme ikọ. Ke ini ikpepde Bible, nnyịn ikpenyene nditie n̄kere nte se ikpepde akpan̄wamde nnyịn inam nti ubiere ye nte ikpadade enye in̄wam mbon en̄wen. N̄ko, sia edide “Abasi ọkọnọ odudu ẹda ẹwet ofụri N̄wed Abasi,” nnyịn ikpenyene ndikpep “kpukpru ikọ eke ẹwọrọde Jehovah ke inua.” (2 Timothy 3:16, 17; Matthew 4:4) Ekeme ndiyom inen̄ede isịn ukeme ikpep Bible! Edi enye n̄ko ekeme ndinem, inyụn̄ isọn̄ke ikaha ndifiọk “mme ntotụn̄ọ n̄kpọ Abasi.”
Jehovah Anam Mbon Nsụhọdeidem Ẹfiọk
5. Mmanie ẹkeme ndifiọk “mme ntotụn̄ọ n̄kpọ Abasi”?
5 Idem ọkpọkọm ukenen̄ekede ufiọk n̄wed unyụn̄ unen̄ekede ufiọk nte ekpekpepde n̄kpọ, kûkere ke udufiọkke “mme ntotụn̄ọ n̄kpọ Abasi.” Ke ini Jesus ọkọkwọrọde ikọ ke isọn̄, Jehovah ikayarakede uduak Esie inọ mbon ọniọn̄ ye mbon ikike, edi akayarade ọnọ mbon emi mîfiọkke n̄wed ye mme usụhọde owo oro ẹkenyịmede mme asan̄autom Abasi ẹkpep mmimọ n̄kpọ. Mmọ ẹketie nte nseknditọ ke ẹmende ẹdomo ye mbon oro ẹkekade n̄wed. (Matthew 11:25; Utom 4:13) Kaban̄a “mme n̄kpọ emi Abasi eketịmde ọnọ mmọ eke ẹmade enye,” apostle Paul ekewet ọnọ ekemmọ mme andinịm ke akpanikọ ete: “Edi nnyịn ke Abasi akayarade mmọ ọnọ oto ke spirit esie, koro spirit odụn̄ọrede kpukpru n̄kpọ, kpa mme ntotụn̄ọ n̄kpọ Abasi.”—1 Corinth 2:9, 10.
6. Nso ke 1 Corinth 2:10 ọwọrọ?
6 Didie ke spirit Abasi esidụn̄ọde “kpukpru n̄kpọ, kpa mme ntotụn̄ọ n̄kpọ Abasi”? Utu ke Jehovah ndiyarade n̄kpọ nnọ owo kiet kiet ke otu ikọt esie, enye esida spirit esie ọnọ esop esie ndausụn̄, ndien esop emi esinam Bible an̄wan̄a ikọt Abasi emi ẹdianade kiet. (Utom 20:28; Ephesus 4:3-6) Ke ofụri ererimbot, kpukpru esop ẹnyene ukem ndutịm ukpep Bible. Nte ini akade, mmọ ẹsikpep ofụri ukpepn̄kpọ Bible oro ẹkediomide. Edisana spirit esin̄wam mme owo ke esop ẹnyene edu oro ẹyomde man ẹfiọk “mme ntotụn̄ọ n̄kpọ Abasi.”—Utom 5:32.
Se “Mme Ntotụn̄ọ N̄kpọ Abasi” Ẹsịnede
7. Ntak emi ediwak owo mîfiọkke ‘mme ntotụn̄ọ n̄kpọ Abasi-e’?
7 Inaha nnyịn ikere ke “mme ntotụn̄ọ n̄kpọ” ẹdi sụk mme n̄kpọ oro ẹsọn̄de owo ndifiọk. Se inamde ata ediwak owo mîfiọkke “mme ntotụn̄ọ n̄kpọ Abasi” edi nte ke Satan anam mmọ ẹsịn un̄wam oro Jehovah adade esop Esie ọnọ, idịghe nte ke ọniọn̄ Abasi ọsọsọn̄ akaha.—2 Corinth 4:3, 4.
8. Mme ntotụn̄ọ n̄kpọ ewe ke Paul eketịn̄ aban̄a ke Ephesus ibuot 3?
8 Se Paul ekewetde ke Ephesus ibuot 3 owụt ke “mme ntotụn̄ọ n̄kpọ Abasi” ẹsịne ekese ukpepn̄kpọ oro ata ediwak ikọt Jehovah ẹtịmde ẹfiọk, utọ nte edifiọk enye emi edide Mfri oro ẹken̄wọn̄ọde, edimek ndusụk owo ẹka heaven, ye Obio Ubọn̄ Messiah. Paul ekewet ete: “Owo ikanamke nditọ owo ke mme emana oko ẹfiọk ndịben̄kpọ emi nte emi ẹyararede enye idahaemi ẹnọ ndisana mme apostle ye mme prọfet esie ke spirit, oro edi, nte ke mbon idụt ẹkpedi nsan̄a mme ada udeme nnyene ye ndido idem kiet ye mme anditiene nnyịn mbuana ke un̄wọn̄ọ ke ebuana ye Christ Jesus.” Paul ọkọdọhọ ke ẹma ẹdọn̄ imọ ete ‘inam mme owo ẹkụt nte ẹnamde-nam edisana ndịben̄kpọ emi ekedịbede ke Abasi toto ke nsinsi eyo.’—Ephesus 3:5-9.
9. Ntak emi edide akwa ifet ndifiọk ‘mme ntotụn̄ọ n̄kpọ Abasi-e’?
9 Paul ama aka iso etịn̄ aban̄a uduak Abasi ndinam ‘ẹda esop ẹnam mme itie eke heaven ẹfiọk akwa orụk ọniọn̄ Abasi.’ (Ephesus 3:10) Mme angel ndikụt nnyụn̄ mfiọk nte Jehovah anamde n̄kpọ ye esop Christian ke ọniọn̄, enyene ufọn ọnọ mmọ. Nso akwa ifet ke emi edi ntem ndifiọk mme n̄kpọ oro idem mme angel n̄ko ẹmade ndifiọk! (1 Peter 1:10-12) Ekem, Paul ọdọhọ ke akpana idomo ‘itiene kpukpru ndisana owo ifiọk ọyọhọ ọyọhọ se idide ubom ye uniọn̄ ye ukon̄ ye utụn̄ọ’ ukpepn̄kpọ Christian. (Ephesus 3:11, 18) Ẹyak nnyịn idahaemi ineme mme uwụtn̄kpọ ntotụn̄ọ n̄kpọ emi ekemede ndidi nnyịn ikesikereke ke ẹdi ntotụn̄ọ n̄kpọ.
Mme Uwụtn̄kpọ Ntotụn̄ọ N̄kpọ
10, 11. N̄wed Abasi ọdọhọ ke ini ewe ke Jesus akakabade edi akpan “mfri” “n̄wan” Abasi ke heaven?
10 Nnyịn imọfiọk ke Jesus edi akpan “mfri” “n̄wan” Abasi eke heaven oro ẹtịn̄de ẹban̄a ke Genesis 3:15. Man inyene ekese ifiọk, nnyịn imekeme ndibụp: ‘Ini ewe ke Jesus akakabade edi Mfri oro ẹken̄wọn̄ọde? Ndi ekedi mbemiso enye ekedide isọn̄, m̀mê ke ini enye akamanade ke isọn̄, mîdịghe, ndi ekedi ini enye akanade baptism, m̀mê ke ẹma ẹkenam enye eset?’
11 Abasi ama ọn̄wọn̄ọ ete ke ikpehe esop imọ ke heaven, emi ẹkotde “n̄wan” ke ntịn̄nnịm ikọ oro, ayaman mfri oro edinuakde urụkikọt ibuot. Ediwak isua ẹma ẹbe, edi n̄wan Abasi ikamanke mfri oro ekemede ndisobo Satan ye utom esie mfep. Oro anam ntịn̄nnịm ikọ Isaiah okot enye “ada” ye ‘n̄wan eke esịt ọduọde.’ (Isaiah 54:1, 5, 6) Ke akpatre, Jesus ama amana ke Bethlehem. Edi, ekedi ke enye ama akana baptism, ke ẹma ẹkenyụn̄ ẹda spirit ẹbon enye nte eyen Abasi eke spirit, ke Jehovah ọkọtọt ete: ‘Emi edi Eyen Mi.’ (Matthew 3:17; John 3:3) Akpan “mfri” n̄wan oro ama ọwọrọ ndien edi! Ekem, ẹma ẹda edisana spirit ẹyet mme anditiene Jesus aran ẹnyụn̄ ẹda edisana spirit ẹbon mmọ n̄ko. “N̄wan” Jehovah emi eketiede nte ‘n̄wan emi mîmanke eyen’ ke ata anyan ini, ama ‘ọkwọ’ ikwọ idara do ndien ke akpatre.—Isaiah 54:1; Galatia 3:29.
12, 13. Mme itie N̄wed Abasi ewe ẹwụt ke kpukpru mme Christian oro ẹyetde aran ke isọn̄ ẹnam “ofụn emi anamde akpanikọ onyụn̄ enyenede ọniọn̄”?
12 Udiana uwụtn̄kpọ mme ntotụn̄ọ n̄kpọ oro ẹyararede ẹnọ nnyịn aban̄a uduak Abasi ndimek owo 144,000 nsio ke otu ubonowo nda n̄ka heaven. (Ediyarade 14:1, 4) Nnyịn imenyịme ke kpukpru mbon oro ẹyetde aran, emi ẹdude ke isọn̄ ini kiet ekededi ẹnam “ofụn emi anamde akpanikọ onyụn̄ enyenede ọniọn̄” emi Jesus ọkọdọhọde ke enye edinọ mbonufọk imọ “udia” ke edikem ini. (Matthew 24:45) Mme itie Bible ewe ẹwụt ke ukpepn̄kpọ emi enen? Nte Jesus akakam etịn̄ aban̄a Christian ekededi oro ọsọn̄ọde eyenete esie idem ke n̄kan̄ eke spirit?
13 Abasi ọkọdọhọ idụt Israel ete: “Mbufo ẹdi ntiense mi, ye owo [asan̄autom, NW] emi n̄kemekde.” (Isaiah 43:10) Edi ke Nisan 11 ke isua 33 E.N., Jesus ama ọdọhọ mme adausụn̄ ke Israel ete ke Abasi idaha idụt mmọ aba nte asan̄autom Esie. Enye ọkọdọhọ ete: “Ẹyebọ mbufo obio ubọn̄ Abasi ẹnyụn̄ ẹyak enye ẹnọ idụt oro on̄wụmde mfri esie.” Jesus ama ọdọhọ otuowo oro ẹkedade do ete: “Sese! Ẹmekpọn̄ ufọk mbufo ẹnọ mbufo.” (Matthew 21:43; 23:38) Ufọk Israel emi ekedide ofụn Jehovah ikanamke akpanikọ ikonyụn̄ inyeneke ọniọn̄. (Isaiah 29:13, 14) Ekem, kpa usen oro, Jesus ama obụp ete: “Anie enen̄ede edi ofụn emi anamde akpanikọ onyụn̄ enyenede ọniọn̄?” Ke nditịm ntịn̄, enye okobụp ete, ‘Ewe idụt emi enyenede ọniọn̄ edida itie Israel inyụn̄ ikabade idi ofụn emi anamde akpanikọ ọnọ Abasi?’ Apostle Peter ama ọbọrọ mbụme emi ke ini enye ọkọdọhọde esop mme Christian oro ẹyetde aran ete: “Mbufo ẹdi . . . ‘edisana idụt, mbon emi ẹdide akpan inyene.’” (1 Peter 1:4; 2:9) Idụt eke spirit oro, kpa “Israel Abasi,” ama akabade edi obufa ofụn Jehovah. (Galatia 6:16) Kpa nte ẹkebatde kpukpru nditọ Israel eset nte “asan̄autom” kiet, ntre n̄ko ke kpukpru mme Christian oro ẹyetde aran emi ẹdude ini kiet ekededi ke isọn̄ ẹnam “ofụn emi anamde akpanikọ onyụn̄ enyenede ọniọn̄.” Nso akwa ifet ke edi ntem ọnọ nnyịn ndinyene “udia” nto ofụn Abasi!
Ọkpọkpọ Ukpepn̄kpọ Ekeme Ndinem
14. Ntak emi edikpep Bible esinọde owo inemesịt akan ikpîkpu edikokot?
14 Ke ini ẹnamde mme itie N̄wed Abasi oro nnyịn mîketịmke ifiọk ẹn̄wan̄a nnyịn, nte esịt isinemke nnyịn ke ini un̄wana oro ẹsịnde ke Ikọ Abasi ọsọn̄ọde mbuọtidem nnyịn? Ntak edi oro edikpep Bible esinọde owo inemesịt akan ikpîkpu edikokot. Mmọdo, ke ini okotde mme n̄wed Christian, bụp idemfo ete: ‘Nso ebuana ke emi enyene ye se mma n̄kọfọfiọk mban̄a se ẹnemede emi? Ewe itie N̄wed Abasi, mîdịghe nso n̄kpọ en̄wen ẹkeme ndisụk nsọn̄ọ se ẹtịn̄de ke ibuotikọ emi?’ Edieke anade anam ndụn̄ọde efen efen, wet mbụme oro afo edidụn̄ọrede, nyụn̄ da enye nte se edikpepde ke ini iso.
15. Nso ke afo edikpep emi ekemede ndinọ fi inemesịt, ndien didie ke mmọ ẹkeme ndika iso nnyene ufọn?
15 Nso ke afo edikpep man ọfiọk mbufa n̄kpọ? Afo ọyọfiọk ekese n̄kpọ edieke odụn̄ọrede nsio nsio ediomi oro Abasi anamde ke ufọn ubonowo. Ndidụn̄ọde mme ntịn̄nnịm ikọ oro ẹban̄ade Jesus Christ m̀mê ndikpep mme n̄wed oro ẹtatde ufan̄ikọ kiet kiet ke kiet ke otu ntịn̄nnịm ikọ Bible ekeme ndisọn̄ọ mbuọtidem fo. Ndidụn̄ọde mbụk Mme Ntiense Jehovah eke eyomfịn ke n̄wed Jehovah’s Witnesses—Proclaimers of God’s Kingdom, ekeme n̄ko ndisọn̄ọ mbuọtidem fo. * Ndifiak n̄kokot “Mme Mbụme Ẹtode Mme Andikot” oro ẹkewetde ke n̄kani Enyọn̄-Ukpeme ayanam ndusụk itie N̄wed Abasi ẹnen̄ede ẹn̄wan̄a fi. Tịm fiọk nte ẹdade N̄wed Abasi ẹkọk ibuot ye nte emi adade ekesịm ekikere oro ẹnọde. Emi ayanam ọnọ “ukeme ufiọk n̄kpọ” fo ukpep onyụn̄ enyene mbufiọk. (Mme Hebrew 5:14) Nte ekpepde n̄kpọ, wet mme n̄kpọ ke Bible fo mîdịghe ke babru man se ekpepde akpaka iso enyene ufọn ọnọ fi ye mbon oro afo ekemede ndin̄wam.
Ẹn̄wam Mme Uyen Ẹkop Inem Ukpepn̄kpọ Bible
16. Didie ke ẹkeme ndin̄wam mme uyen ẹkop inem ukpepn̄kpọ Bible?
16 Mme ete ye eka ẹkeme ndinam ekese man nditọ mmọ ẹnyene udọn̄ ke n̄kpọ eke spirit. Ẹkûkere ke mme uyen idifiọkke mme ntotụn̄ọ n̄kpọ. Edieke ẹnọde nditọ mbufo ibuotikọ oro ẹyomde mmọ ẹdụn̄ọde man ẹben̄e idem ẹnọ ukpepn̄kpọ ubon, ẹmekeme ndibụp mmọ se mmọ ẹkekpepde. Ukpepn̄kpọ ubon ekeme n̄ko ndisịne edinam ndomonse oro edin̄wamde mme uyen ẹkpep nte ẹkemede ndibọrọ mme mbụme oro ẹban̄ade se mmọ ẹnịmde ke akpanikọ ẹnyụn̄ ẹwụt ke se ẹkpepde mmimọ edi akpanikọ. Ke adianade do, mbufo ẹmekeme ndida ediye uduot ekpri n̄wed oro “Kụt Eti Isọn̄” * n̄kpep mmọ mme ikpehe isọn̄ oro ẹtịn̄de ẹban̄a ke Bible ẹnyụn̄ ẹwụt mmọ mme itie oro ẹtịn̄de ẹban̄a ke edikot Bible eke urua ke urua mbufo.
17. Ntak emi oyomde ida ukem ukem ke ini inamde ukpepn̄kpọ idemowo?
17 Ukpepn̄kpọ idemowo ekeme ndinen̄ede nnem onyụn̄ ọsọn̄ọ mbuọtidem fo, edi oyom ekpeme mbak enye edida ini oro akpadade etịm idem ọnọ mme mbono esop. Mbono esop edi usụn̄ en̄wen oro Jehovah adade “ofụn emi anamde akpanikọ onyụn̄ enyenede ọniọn̄” ọnọ nnyịn ukpep. Nte ededi, mme ndụn̄ọde efen efen ẹkeme ndinam afo ọnọ mme ibọrọ oro ẹnyenede ufọn ke mme mbono esop—utọ nte ke Ukpepn̄kpọ N̄wed Esop m̀mê ke ini ẹnemede mme akpan n̄kpọ oro ẹtode edikot Bible eke urua ke urua ke Ufọkn̄wed Utom Ukara Abasi.
18. Ntak emi ukeme oro isịnde ikpep “mme ntotụn̄ọ n̄kpọ Abasi” mîtakke-tak?
18 Ndinen̄ede n̄kpep Ikọ Abasi ekeme ndin̄wam fi asan̄a ekpere Jehovah. Bible owụt ufọn utọ ukpepn̄kpọ oro ke ini enye ọdọhọde ete: “Koro eti ibuot edide se ikpemede, inyene onyụn̄ edi se ikpemede, edi ata ifiọk ye eti ibuot ẹyenam mme andinyene enye ẹdu uwem.” (Ecclesiastes 7:12) Ke ntre, ukeme oro isịnde man inen̄ede inyene ifiọk Abasi itakke-tak. Bible ọn̄wọn̄ọ ọnọ mbon oro ẹkade iso ẹdụn̄ọde n̄kpọ eke spirit ete ke mmọ ‘ẹyesịme ifiọk Abasi.’—Mme N̄ke 2:4, 5.
[Mme Ikọ idakisọn̄]
^ ikp. 15 Mme Ntiense Jehovah ẹsio.
^ ikp. 16 Mme Ntiense Jehovah ẹsio.
Nte Afo Emekeme Ndinam An̄wan̄a?
• Nso idi “mme ntotụn̄ọ n̄kpọ Abasi”?
• Ntak emi nnyịn mîkpetreke ndikpep mme ntotụn̄ọ n̄kpọ Abasi-e?
• Ntak emi kpukpru Christian ẹkemede ndikop idatesịt edifiọk ‘mme ntotụn̄ọ n̄kpọ Abasi-e’?
• Didie ke afo ekeme ndibọ ufọn ọyọhọ ọyọhọ nto “mme ntotụn̄ọ n̄kpọ Abasi”?
[Mme Mbụme Ukpepn̄kpọ]
[Ndise ke page 28]
Ini ewe ke Jesus akakabade edi Mfri oro ẹken̄wọn̄ọde?
[Ndise ke page 31]
Mme ete ye eka ẹkeme ndinọ nditọ mmọ ibuotikọ oro anade mmọ ẹdụn̄ọde man ẹben̄e idem ẹnọ ukpepn̄kpọ ubon