Nte Emesida Mme Ifet Oro Ẹbererede Eneme Se Afo Enịmde ke Akpanikọ?

“NDI ata akpanikọ odu?” Ẹma ẹdọhọ nditọ ufọkn̄wed ke Poland ẹwet n̄kpọ ẹban̄a ibuotikọ emi. Ẹkedọhọ mme andibuana ke mbuba oro ete: “Nnyịn iyomke ata akpanikọ. Owo ndomokiet iyomke. Ata akpanikọ ikam idụhe.” Agata, eyen ufọkn̄wed sekọndri emi edide isua 15 onyụn̄ edide kiet ke otu Mme Ntiense Jehovah, ama ebiere ndida ifet emi nneme se enye enịmde ke akpanikọ nnọ mbon en̄wen.

Mbemiso Agata ọtọn̄ọde ndiwet n̄kpọ ekededi, enye ama ọbọn̄ akam ọnọ Jehovah eben̄e ndausụn̄, ekem enye ama ọtọn̄ọ ndiyom n̄wed oro enemede n̄kpọ emi. Enye ama okụt ke Enyọn̄-Ukpeme eke July 1, 1995 etịn̄ n̄kpọ aban̄a se enye okoyomde ndiwet. Enye ama ewet mbụme oro Pontius Pilate okobụpde Jesus, ete: “Nso idi akpanikọ?” (John 18:38) Agata ekewet ete ke Pilate okobụp mbụme emi ke ido nsahi, nte n̄kpọ eke ọkpọdọhọde ete: ‘Akpanikọ? Nso idi oro? Utọ n̄kpọ oro idụhe!’ Agata ama ewet ete: “Mbụme Pilate eti mi ntọt oro ẹkenọde ẹban̄a mbuba oro.”

Ekem, enye ama etịn̄ nte ẹketọn̄ọde ndinịm nte ke akpanikọ edi n̄kpọ idemowo—oro edi, nte ke se idide akpanikọ inọ owo kiet ekeme nditre ndidi akpanikọ nnọ owo en̄wen, ntre mmọ mbiba ẹkeme “ndinen.” Agata ama obụp utọ mbụme nte, “Anie ke otu nnyịn ekpededei anam isan̄ ke ubomofụm edieke nnyịn mîkpekereke ke mme ibet ẹban̄ade mme n̄kpọ ndisan̄a ke ofụm edi ọyọhọ akpanikọ?” Ekem enye ama etịn̄ aban̄a Bible, ete: “Ndiberi edem ke Ikọ Abasi edi ndiberi edem ke mme ikọ akpanikọ emi ẹkemede ndisọn̄ọ.” Agata ama ewet ete ke imodori enyịn ke mbon oro ẹnen̄erede ẹyom ata akpanikọ ẹyenyene ime man ẹkụt enye.

Agata ama ọbọ san̄asan̄a n̄weditoro, ẹma ẹnyụn̄ ẹdọhọ enye okot se enye ekewetde ọnọ otu nditọ ubet ukpepn̄kpọ esie. Ediwak nsan̄a ufọkn̄wed esie ẹma ẹnyịme enye esikpep Bible ye mmimọ. Agata enen̄ede okop inemesịt ndikada ifet emi nneme se enye enịmde ke akpanikọ nnọ ediwak owo. Ke akpanikọ, ndida mme ifet oro ẹbererede nneme se afo enịmde ke akpanikọ ekeme ndin̄wụm mfri. Mme ifet ewe ẹberede ẹnọ fi ndineme se afo enịmde ke akpanikọ?