“Silver Edi Okịmmọ, Gold Onyụn̄ Edi Okịmmọ”

KE ỌYỌHỌ isua ikie itiokiet M.E.N., Cyrus edidem Persia ama ayak ikọt Abasi ẹwọn̄ọ ke ntan̄mfep ke Babylon. Ata ediwak owo ke otu mmọ ẹma ẹfiak ẹnyọn̄ọ Jerusalem man ẹfiak ẹkebọp temple Jehovah oro ẹma ẹkewụri. N̄kpọ ama enen̄ede ọsọn̄ ye mmọ, ndiọi mbọhọidụn̄ ẹma ẹnyụn̄ ẹdomo nditre utom edibọp temple oro. Ntem, ndusụk mme ọbọpufọk oro ẹma ẹkere m̀mê tutu amama mmimọ iyokụre akaka utom oro.

Jehovah ama ada prọfet Haggai ọdọhọ mme ọbọpufọk oro ete ke Imọ idodu ye mmọ. Abasi ọkọdọhọ ete: “Nyonyụn̄ nnyen̄e kpukpru mme idụt, ndien se mme idụt ẹyomde ẹyedi: ndien nyesịn ubọn̄ ke ufọk emi nyọhọ.” Unana mme ọbọpufọk oro ama anam Haggai otobo mmọ etop emi: “Silver edi okịmmọ, gold onyụn̄ edi okịmmọ, ke edi uyo Jehovah mme udịm.” (Haggai 2:7-9) Ke ufan̄ isua ition ke Haggai ama eketịn̄ ikọ nsịnudọn̄ emi, ẹma ẹbọp ufọk oro ẹma.—Ezra 6:13-15.

Ikọ Haggai esisịn udọn̄ n̄ko ọnọ mme asan̄autom Abasi ke eyomfịn ke ini ẹyomde ndinam ikpọ utom oro ẹban̄ade utuakibuot Jehovah. Ke ini ofụn emi anamde akpanikọ onyụn̄ enyenede ọniọn̄ ọkọtọn̄ọde ndimịn̄ magazine emi ke 1879, emi ẹkesikotde Zion’s Watch Tower and Herald of Christ’s Presence, magazine oro ọkọdọhọ ete: “Nnyịn imenịm ke JEHOVAH ọnọ ‘Zion’s Watch Tower’ ibetedem, ntem tutu amama enye idiben̄eke idinyụn̄ ikpehe owo ubọk iyom un̄wam. Ke ini Enye emi ọdọhọde ete: ‘Kpukpru gold ye silver ke ikpọ obot ẹnyene mi,’ etrede ndinọ okụk oro ẹyomde, nnyịn iyọfiọk adan̄aoro ite ke ini ekem nditre ndimịn̄ n̄wed emi.”

Owo itreke ndimịn̄ Enyọn̄-Ukpeme. Ẹkemịn̄ akpa nsiondi esie idem 6,000 ke Ikọmbakara kpọt. Mfịn, ẹmịn̄ nsiondi Enyọn̄-Ukpeme kiet kiet n̄kpọ nte idem 28,578,000 ke usem 161. * Ẹmịn̄ Awake!, emi esisan̄ade ye Enyọn̄-Ukpeme, n̄kpọ nte idem 34,267,000 ke usem 80.

Mme Ntiense Jehovah ẹnam ediwak utom emi ẹnyenede ukem uduak oro Enyọn̄-Ukpeme enyenede—oro edi, ndinam ẹdiọn̄ọ Jehovah nte Ọbọn̄ Andikara ekondo nnyụn̄ ntọt eti mbụk Obio Ubọn̄ esie. (Matthew 24:14; Ediyarade 4:11) Mfịn, Mme Ntiense ẹnịm ikọ oro ẹkewetde ke magazine emi ke 1879 ke akpanikọ. Mmọ ẹnịm ke Abasi ọnọ utom mmimọ ibetedem ye nte ke okụk oyodu ndida nnam utom emi Abasi amade. Edi, Mme Ntiense Jehovah ẹsida m̀mọ̀n̄ okụk ẹnam utom mmọ? Nso ke mmọ ẹnam man ẹkeme ndikwọrọ eti mbụk ke ofụri ererimbot?

M̀mọ̀n̄ ke Ẹsida Okụk Ẹnam Utom Emi?

Nte Mme Ntiense Jehovah ẹkwọrọde ikọ an̄wan̄wa, ẹsiwak ndibụp mmọ ẹte: “Ndi ẹsikpe mbufo okụk?” Baba, owo isikpehe. Mmọ ẹda ini mmọ ẹkwọrọ ikọ ke mfọn. Esịtekọm oro mme ọkwọrọ eti mbụk ẹnyenede esinam mmọ ẹbiat ediwak hour ẹkwọrọ ikọ ẹnọ mbon en̄wen ẹban̄a Jehovah ẹnyụn̄ ẹnam mmọ ẹfiọk nti n̄kpọ oro Bible ọn̄wọn̄ọde aban̄a ini iso. Mmọ ẹwụt esịtekọm ẹban̄a se Abasi anamde ọnọ mmọ ye adan̄a nte etop eti mbụk emi an̄wamde mmọ ẹkop inem uwem ẹnyụn̄ ẹnyene eti ini iso. Ke ntre, mmọ ẹyom ndibuana nti n̄kpọ emi ye mbon en̄wen. Ke ndinam ntre, mmọ ẹnam se Jesus ọkọdọhọde ete: “Mbufo ẹkebọ ke mfọn, ẹnọ ke mfọn.” (Matthew 10:8) Ke akpanikọ, udọn̄ mmọ ndidi ntiense nnọ Jehovah ye Jesus anam mmọ ẹbiat okụk mmọ man ẹbuana se mmọ  ẹnịmde ke akpanikọ ye mbon en̄wen, idem ye mbon oro ẹdụn̄de ke ata anyan ebiet.—Isaiah 43:10; Utom 1:8.

Udomo oro ẹnamde utom ukwọrọikọ emi ye mme n̄kpọ oro ẹkamade ẹnam enye—mme itie umịn̄n̄wed, mme ọfis, mme Ufọk Mbono, mme ufọk isụn̄utom, ye ntre ntre eken—ẹsiyom ata ediwak okụk. Ẹsida m̀mọ̀n̄ okụk emi? Ẹda etịbe imaesịt ẹnam kpukpru n̄kpọ emi. Mme Ntiense Jehovah isikpakke-kpak mme andibuana ke esop ndinọ okụk man ẹda ẹnam n̄kpọ ke esop, mmọ n̄ko isidọhọke mme owo ẹkpe okụk ke n̄wed oro mmọ ẹbọde. Edi edieke owo ekededi amade nditịp n̄kpọ nnọ Mme Ntiense man ẹda ẹnam utom unọ ukpep, mmọ ẹsinem esịt ndibọ etịbe oro. Ẹyak ikere iban̄a se ẹsinamde ke ikpehe kiet kpọt ke utom edikwọrọ eti mbụk ke ofụri ererimbot—edikabade n̄wed.

Ndikabade N̄wed ke Usem 437

Ke ediwak isua, n̄wed Mme Ntiense Jehovah ẹsịne ke otu mme n̄wed oro ẹkabarede ẹwak ẹkan ke ererimbot. Ẹkabade mme tract, ndiye uduot n̄kpri n̄wed, mme magazine, ye mme n̄wed ẹsịn ke usem 437. Nte ededi, ukem nte mme n̄kpọ eken oro ẹnamde man ẹkwọrọ eti mbụk, edikabade n̄wed oyom ata ediwak okụk. Edi nso ke edikabade n̄wed abuana?

Ke mme andiwet n̄wed Mme Ntiense Jehovah ẹma ẹkewet se ẹyomde ndiwet ke Ikọmbakara ẹma, ẹyenọ se ẹwetde oro ke Intanet ẹsọk mme akabade n̄wed oro ẹma ẹkenọ ukpep ke ofụri ererimbot. Otu mme akabade n̄wed kiet ẹsikabade usem kiet ke otu kpukpru usem oro ẹkabarede mme n̄wed nnyịn ẹsịn. Otu kiet ekeme ndisịne n̄kpọ nte mme akabade n̄wed 5 esịm 25, etienede ibat n̄wed oro ẹkabarede ye utọ usem oro mmọ ẹkabarede.

Ẹma ẹkabade n̄wed ẹma, ẹsidụn̄ọde ẹnyụn̄ ẹfiak ẹkot man ẹkụt ete ke se ẹkabarede enen onyụn̄ an̄wan̄a  owo. Emi isimemke utom. Ke ini ẹkabarede n̄wed emi ẹdọn̄de ikpọ ikọ, mme akabade n̄wed ye mme okotn̄wed nnen̄ede ndudue ẹkeme ndinam ekese ndụn̄ọde ke Ikọmbakara ye usem oro ẹkabarede n̄wed ẹsịn man ẹkụt ẹte ke ẹkabade enye nnennen nnennen. (Ẹsikabade ndusụk n̄wed ẹto usem French, Russian, m̀mê Spanish.) Ke uwụtn̄kpọ, edieke ibuotikọ ke Awake! enemede n̄kpọ aban̄a eset m̀mê n̄kpọ emi awakde n̄kukọhọ, esiyom ẹnen̄ede ẹnam ndụn̄ọde.

Ediwak mme akabade n̄wed ẹnam utom emi kpukpru ini m̀mê ke ibio ini ke mme n̄kọk itieutom Mme Ntiense Jehovah. Mbon eken ẹnam utom ke ebiet oro ẹsemde usem emi mmọ ẹkabarede n̄wed ẹsịn. Owo ikpehe mme akabade n̄wed okụk ke utom mmọ. Ẹsinọ mbon oro ẹnamde utom ukabade n̄wed kpukpru ini ufọk ye udia ye ekpri okụk ekpatọfọn̄ ndida nse mban̄a idem mmọ. N̄kpọ nte Mme Ntiense 2,800 ẹnam utom nte mme akabade n̄wed ke ofụri ererimbot. Idahaemi, n̄kọk itieutom Mme Ntiense Jehovah oro ẹwakde ẹsịm 98 ẹnyene otu mme akabade n̄wed m̀mê ẹse enyịn ke utom mme akabade n̄wed oro mîdụn̄ke ke n̄kọk itieutom. Ke uwụtn̄kpọ, n̄kọk itieutom Russia ese aban̄a se ibede mme akabade n̄wed 230, emi ẹkabarede n̄wed ẹsịn ke se ibede usem 30, esịnede mme usem oro owo mîtịmke idiọn̄ọ ke mme ebiet en̄wen, utọ nte mme usem Chuvash, Ossetian, ye Uighur.

Ndinam Ukabade N̄wed Amana Ọfọn

Edieke edide akanam omodomo ndikpep usem efen, afo eyetịm ọfiọk ke isimemke utom ndikabade n̄kpọsọn̄ ikọ nnennen nnennen. Uduak mme akabade n̄wed edi ndikabade se ẹwetde ke Ikọmbakara nnennen nnennen nnyụn̄ n̄wet enye nte ẹsisemde usem oro, ẹnamde etie nte ẹkekam ẹwet enye ke usem oro ẹkabarede enye ẹsịn. Oyom usọ man ẹkeme ndinam emi. Esida mbufa mme akabade n̄wed ediwak isua nditịm mfiọk ndikabade n̄wed, ndien Mme Ntiense Jehovah ẹsika iso ẹnọ mmọ  ukpep. Ndusụk ini, ẹsinọ nditọete oro ẹnyenede mbufiọk ẹkekpep mme akabade n̄wed nte ẹkpekabarede n̄wed enen̄ede ọfọn ye nte ẹkpedade kọmputa ẹnam n̄kpọ.

Ukpep emi ada nti utịp edi. Ke uwụtn̄kpọ, n̄kọk itieutom Mme Ntiense Jehovah ke Nicaragua ọdọhọ ẹte: “Akpa ini edi emi owo ndito n̄kọk itieutom Mexico ndikpep mme akabade n̄wed usem Miskito nnyịn nte ẹkpekabarede n̄wed. Emi anam ata akamba ukpụhọde odu ke nte mme akabade n̄wed nnyịn ẹnamde utom mmọ. Se ẹkabarede idahaemi enen̄ede ọfọn akan nte ekedide ke akpa.”

Ikọ Oro Odụkde Owo Esịt

Ẹsịn ukeme ẹsion̄o Bible ye n̄wed un̄wam ukpep Bible ke usem emana mme owo man se ẹkotde osụhọde odụk mmọ esịt, ndien se itịbede edi oro. Ke 2006, Mme Ntiense Jehovah ke Bulgaria ẹma ẹnen̄ede ẹkop inemesịt ke ini ẹkesiode N̄wed Abasi Christian Usem Greek—Edikabade eke Obufa Ererimbot ke usem Bulgarian. N̄kọk itieutom Bulgaria ọdọhọ ke imọbọ ediwak ekọm iban̄a obufa Bible emi. Mme owo ke esop ẹdọhọ ke “idahaemi, se Bible etịn̄de osụhọde odụk mmimọ esịt ye ekikere.” Akanieren kiet emi otode Sofia ọkọdọhọ ete: “Mmokot Bible ke ediwak isua, edi akananam n̄kwe edikabade emi ọsọpde an̄wan̄a owo onyụn̄ odụkde owo esịt ntem.” Kpasụk ntre ke Albania, eyenete an̄wan kiet emi ọkọbọde ofụri New World Translation ke usem Albanian ọkọdọhọ ete: “Ikọ Abasi enem didie ntem ke usem Albanian! Nso akwa ifet ke emi  edi ntem ndikop Jehovah etịn̄de ikọ ye nnyịn ke usem emana nnyịn!”

Ndikabade ofụri Bible ekeme ndida otu mme akabade n̄wed ediwak isua. Edi ke ẹma ẹkenam emi ẹma, Ikọ Abasi esinen̄ede an̄wan̄a ata ediwak owo akan nte akanam edide. Nte ukereke ke eti utịp emi odot ye ukeme oro ẹsịnde?

“Nnyịn Idi Nsan̄autom Abasi”

Nte ededi, ukabade n̄wed edi sụk kiet ke otu ediwak utom oro ẹnamde man ẹkwọrọ eti mbụk uforo uforo. Ediwet, edimịn̄, ye edinọ mme n̄wed ukpepn̄kpọ Bible ọwọrọ ọkọrọ ye mme utom eken oro ẹnamde ke mme n̄kọk itieutom, mme circuit, ye ke mme esop Mme Ntiense Jehovah ẹsiyom ọkpọsọn̄ ukeme ye ediwak okụk. Kpa ye oro, ikọt Abasi ẹnọ idemmọ ke imaesịt ndinam utom emi. (Psalm 110:3) Mmọ ẹbat ke edi akwa ifet nditiene ntịp n̄kpọ nsịn, ẹnyụn̄ ẹda enye nte n̄kpọ ukpono emi anamde Jehovah ada mmimọ nte “nsan̄autom” esie.—1 Corinth 3:5-9.

Edi akpanikọ ke idịghe okụk nnyịn anam enye emi ọdọhọde ke ‘silver edi eke imọ, gold onyụn̄ edi eke imọ’ ekeme ndinam utom esie. Edi, Jehovah ọnọ mme asan̄autom esie ukpono ke ndiyak mmọ ẹtiene ẹnam enyịn̄ esie asana ebe ke nditịp n̄kpọ nsịn man ẹda ẹkwọrọ akpanikọ emi anyan̄ade owo ẹnọ “kpukpru mme idụt.” (Matthew 24:14; 28:19, 20) Nte idọn̄ke fi ndinam ofụri se ekemede ndin̄wam ke utom emi owo mîdifiakke inam aba mi?

[Ikọ idakisọn̄]

[Ekebe ke page 18]

“MMỌ ẸNAM NNYỊN INEN̄EDE IKERE N̄KPỌ”

Eyenan̄wan isua 14 ekewet leta ọnọ ẹsọk n̄kọk itieutom Mme Ntiense Jehovah ke Cameroon ete: “Ke mma n̄kedep mme n̄kpọ ufọkn̄wed mi eke isua emi, mma nnyam iba ke otu n̄wed ufọkn̄wed mi eke isua oko ke franc 2,500 [₦635.00]. Mmada okụk emi ndian ye franc 910 [₦250.00] oro mma n̄kenyenyene nnọ ẹsọk mbufo. N̄kpama ndisịn udọn̄ nnọ mbufo nte ẹka iso ke eti utom oro mbufo ẹnamde. Ẹsọsọn̄ọ ke ndisinọ nnyịn Enyọn̄-Ukpeme ye Awake! Mmọ ẹnam nnyịn inen̄ede ikere n̄kpọ.”

[Ekebe/Ndise ke page 18]

N̄WỌRỌNDA ETỊBE

Manuel emi odụn̄de ke Chiapas State, kpa eyeneren isua itiokiet emi owụtde esịtekọm aban̄a utom oro inamde, ọkọnọ leta emi ẹsọk n̄kọk itieutom Mme Ntiense Jehovah ke Mexico. Sia enye mîfiọkke kan̄a ndiwet n̄kpọ, ufan esie akan̄wam enye ewet leta emi. Manuel ọdọhọ ete: “Eka eka mi ama ọnọ mi uman edi kiet. Ke edi oro ama akaman nditọ, mma nsio eyen edi kiet oro eyede akan nnịm, ndien nditọete ẹma ẹn̄wam mi ẹbọk enye. Esịt enen̄ede enem mi ndinọ okụk oro n̄kanyamde edi oro ẹsọk mbufo. Udobi esie ekedi kilogram 100, ndien n̄kanyam enye ke peso 1,250 [₦13,970.00]. Mbọk ẹda okụk emi ẹnam utom Jehovah.”

[Ekebe ke page 19]

‘ẸDA EMI ẸKABADE BIBLE’

Ke mbono district Mme Ntiense Jehovah eke 2005, oro ẹkenịmde ke Ukraine, ẹma ẹsio N̄wed Abasi Christian Usem Greek—Edikabade eke Obufa Ererimbot ke usem Ukrainian. Ẹma ẹkụt leta emi ke esịt ekebe etịbe ke ndan̄nsiere: “Ami ndi isua usụkkiet. Ẹsọsọn̄ọ etieti ke ndisio N̄wed Abasi Usem Greek. Eka nnyịn ọkọnọ mi ye ekpri eyeneka mi okụk emi ete ida ikpe usụn̄ ika ufọkn̄wed. Edi sia edịm mîkedepke, ima isasan̄a ika ufọkn̄wed inyụn̄ ifam hryvnia 50 [₦1,270.00] inịm. Ami ye eyeneka mi iyama mbufo ẹda okụk emi ẹkabade ofụri Bible ẹsịn ke usem Ukrainian.”

[Ekebe ke page 20, 21]

MME USỤN̄ EMI NDUSỤK OWO ẸMEKDE NDINỌ ENỌ

MME ETỊBE KABAN̄A UTOM OFỤRI ERERIMBOT

Ediwak owo ẹsinịm, mîdịghe ẹnam ndutịm ẹban̄a okụk oro mmọ ẹdisịnde ke mme ekebe etịbe oro ẹdiande idiọn̄ọ emi: “Contributions for the Worldwide Work—Matthew 24:14.”

Ke ọfiọn̄ kiet kiet, mme esop ẹsinọ okụk emi aka n̄kọk itieutom Mme Ntiense Jehovah emi esede aban̄a idụt mmọ. Emekeme ndinọ okụk imaesịt nnennen ẹsọk n̄kọk itieutom Mme Ntiense Jehovah oro esede aban̄a idụt mbufo. Ẹkpenyene ndiwet “Watch Tower” ke babru okụk ban̄k oro ẹnọde. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.

ENỌ EMI ẸDIOMIDE-DIOMI

Ke adianade ye edinọ okụk nte enọ, mme usụn̄ enọ efen ẹdu oro ẹkemede ndinyene ufọn nnọ utom Obio Ubọn̄ oro ẹnamde ke ofụri ererimbot. Mmọ emi ẹsịne:

Insurance: Ẹkeme ndiwet enyịn̄ Watch Tower nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower, mîdịghe ẹnam ẹkpe enye ẹnọ Watch Tower ke ini andinyene akpade, nte ekemde ye ndutịm itie unịm okụk n̄kann̄kụk.

Inyene ye Mbubehe: Ẹkeme ndinọ Watch Tower inyene ye mbubehe nte ata enọ.

Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide nte ata enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie. Tọt n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ Watch Tower.

Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower nte adia-ufọn ke n̄wed ebuọt.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.

Kaban̄a ntọt efen efen, afo emekeme ndinyene nneme ye N̄kọk Itieutom Mme Ntiense Jehovah ke Nigeria, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi mîdịghe emekeme ndinyene nneme ye n̄kọk itieutom Mme Ntiense Jehovah emi esede aban̄a idụt mbufo.

Treasurer’s Office

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: (052) 202020

[Mme ndise ke page 19]

Mme akabade n̄wed Miskito ke n̄kọk itieutom Nicaragua