Mme Mbụme Ẹtode Mme Andikot

Ndi ọfọn kiet ke otu Mme Ntiense Jehovah odụk udianndọ iman m̀mê ọdiọn̄ọ oro mîdịghe Ntiense?

Udianndọ esidi n̄kpọ inemesịt, ndien an̄wan̄a ntak emi Christian akpamade nditiene n̄ka. Nte ededi, mme uyen oro ẹkotde ndọ ẹkpenyene ndisian mme ete ye eka mmọ, m̀mê mbon oro ẹsede mmọ enyịn. (Ephesus 6:1-3) Edi nso ikpetịbe edieke owo oro mîdịghe kiet ke otu Mme Ntiense Jehovah ọdọhọde n̄wan esie emi edide Christian etiene imọ aka udianndọ ke ufọkabasi? Ubieresịt n̄wan esie ekeme ndiyak enye etiene aka, edi itieneke ibuana ke edinam ido ukpono ekededi.

Mmọdo, owo kiet kiet enyene ndibiere m̀mê imọ iyetiene ika ndọ m̀mê idikaha. Nte ededi, Christian kiet kiet ekpenyene ndifiọk ke imọ inyene ndinam ibat nnọ Jehovah, enye okponyụn̄ enyene ndikere mban̄a nsio nsio edumbet N̄wed Abasi ke ini anamde ubiere aban̄a edidụk udianndọ owo oro mîdịghe Ntiense.

Christian ekpenen̄ede ekere nte ikpenemde Abasi esịt. Jesus ọkọdọhọ ete: “Abasi edi Spirit, ndien ana mbon oro ẹtuakde ibuot ẹnọ enye ẹtuak ibuot ke spirit ye ke akpanikọ.” (John 4:24) Mmọdo, Mme Ntiense Jehovah isibuanake ke utuakibuot ido ukpono en̄wen, utọ nte edibọn̄ akam, ye mme edinam utuakibuot eken, m̀mê mme edinam oro ẹtuahade ye se Bible ekpepde.—2 Corinth 6:14-17.

Christian ọfiọk ke se imọ ibierede ndinam ekeme nditụk mbon en̄wen n̄ko. Edieke ebierede ndidụk ndọ ke ufọkabasi, ndi mme iman fo ẹyeyat esịt edieke mûtieneke unam kpukpru se ẹnamde? Afo okponyụn̄ enyene ndikere nte oro editụkde ekemmọ mme andinịm ke akpanikọ. (Rome 14:13) Idem edieke afo m̀mê mbon eken ke ubon mbufo ẹkerede ke mfịna idụhe ndidụk ndọ owo emi mîdịghe Ntiense, nte oro ekeme ndifịna nditọete fo eke spirit? Nte enye ekeme ndinọ ubieresịt mmọ unan?

Udianndọ iman emi mîdịghe Ntiense ekeme ndikama afanikọn̄. Nso ke akpanam edieke ẹsịnde fi ke otu mbet mme ọdọ ndọ? Mîdịghe, nso ke akpanam edieke nsan̄a ndọ fo emi mîdịghe Ntiense oyomde fi etiene anam kpukpru se ẹnamde? Edieke edide ndọ ukara oro ebiereikpe m̀mê owo ukara en̄wen edidiande, ekeme ndidi n̄kukụre se owo oro odụkde edinamde edidi nditiene nse se ẹnamde.

Edi, odu mme n̄kpọ en̄wen oro anade ẹkere ẹban̄a ke ini ẹdiande ndọ ke ufọkabasi m̀mê enye oro oku ufọkabasi adiande. Man etiene ubieresịt fo oro Bible ọnọde ukpep onyụn̄ efep ndinam n̄kpọ oro atuahade ye se enịmde ke akpanikọ, m̀mê ndinam n̄kpọ oro edisuenede mme ọdọ ndọ ye mme ubon mmọ, afo emekeme ndibiere ke imọ idikaha. (Mme N̄ke 22:3) Afo emekeme ndisio idemfo ye ubon mbufo ke ekese afanikọn̄ edieke ebemde iso asian mmọ se enịmde ke akpanikọ, anam mmọ ẹfiọk se afo edikemede ndinam, mîdịghe, etịn̄ usụn̄ efen oro ekerede nte ẹkpenamde n̄kpọ.

Ke ẹma ẹketịm ẹtie ẹkere kpukpru se oro ẹdibuanade, ndusụk Christian ẹkeme ndibiere ke ididiọkke ndidụk ndọ owo oro mîdịghe Ntiense ama akam edi mmimọ itieneke ibuana ke mme edinam ido ukpono. Edi edieke Christian ekerede ke ndidu do ekeme ndinam imọ ibiat mme edumbet Abasi, enye ekeme ndikụt ke ndifiak ayakam ọfọn akan imọ ndika. Edieke enye ebierede ke imọ idikaha udianndọ oro, edi ebiere ndika usọrọ ndọ kpọt sia ẹma ẹkekot imọ ndọ oro, enye ekpenyene ‘ndinam kpukpru n̄kpọ nnọ Abasi ubọn̄.’ (1 Corinth 10:31) Kaban̄a utọ ubiere oro, “owo kiet kiet oyobiom mbiomo idemesie.” (Galatia 6:5) Nte ededi, se ededi oro ebierede ndinam, ti ete ke enen̄ede ọfọn enyene eti ubieresịt ke iso Jehovah Abasi.