Nso Inam Uwem Fo Enyene Uduak?

KENNY akanam utom ke ọwọrọetop itieutom oro ẹsinamde ediomi mbubehe, awat ọsọn̄urua ubomisọn̄, onyụn̄ odụn̄ ke ufọk oro enyenede ediwak ubet ke akwa obio uforo. Sia enye ekedide ata ke mbre mbuba oro ẹsitode enyọn̄ ubomofụm ẹfrọ ẹdiduọ ke isọn̄, enye ama esikop nduaidem ndifrọ ke ediwak tọsịn mita ke enyọn̄ ndiduọ ke isọn̄. Nte kpukpru emi ama anam enye okop uyụhọ ke uwem? The Wall Street Journal ọdọhọ ke Kenny ọkọdọhọ ete: “Se mi do, owo isua 45, edi nnyeneke ata idotenyịn ndomokiet . . . Uwem mi etie ata ukpọk ukpọk.”

Elyn ama esịn idem ọbọ ukpep man akabade edi ata ke mbuba mbre ice. Enye ama akabade ọwọrọetop owo ke mbre emi. Elyn ama ọwọrọetop nte enye okoyomde. Edi enye ama eseme ete: “Enye ofụri inemesịt oro n̄kpokopde? Mmenen̄ede n̄kop ndobo. Ibịghike mmọn̄ nsọn̄, ndien  okposụkedi nnyenede ediwak okụk, uwem edidi ata ukpọk edieke emi edide n̄kukụre se idude ke uwem.”

Ke ntak emi ẹkenen̄ede ẹdiọn̄ọ Hideo ke n̄wọrọnda usụn̄ oro enye ekesibuakde nsio nsio uduot, enye ama esịn ofụri uwem esie ke ndinam utomusọ. Enye ikesiyamke mme utom usọ esie sia enye ekekere ke ndinam ntre idiyakke utom imọ enen̄ede enyene uku. Ke ekperede utịt uwem esie oro ekedide isua 98, enye ama ayak ediwak utom usọ esie ọnọ ke itie ubon n̄kpọeset. Enye ekesịn ofụri uwem esie ke ndinam utomusọ. Kpa ye oro, enye ikokopke uyụhọ, enye ekekere ke tutu amama imọ idikemeke ndinam utom usọ oro mînyeneke ndudue.

Ndusụk owo ẹnen̄ede ẹsịn ukeme ke ndin̄wam mbon en̄wen. Kam kere ban̄a uwụtn̄kpọ akwa anamutom ke itie usio senima ke Hollywood. Nte udiana adaibuot ke kiet ke otu n̄kponn̄kan itie usio senima ke United States, enye ekesisan̄a ye mme ọwọrọiso owo onyụn̄ odụn̄ ke efak oro mme imọ owo ẹdụn̄de. Ke ini emi enye akakade nduọkodudu ke Cambodia, ekpri n̄kaiferi kiet ama edi ediben̄e enye okụk ke ini enye akadiade udia ke itieudia kiet ke Phnom Penh. Enye ama ọnọ n̄kaiferi oro dollar kiet ye inịn̄înịn̄e mmịn. N̄kaiferi oro ama enem esịt. Nte ededi, ke mbubịteyo edem usen oro, n̄kaiferi oro ama afiak edi ediben̄e okụk. Enye ama okụt ke oyom inen̄ede in̄wam n̄kaiferi oro.

Ke isua kiet ama ekebe, ọbọn̄ emi ama ebiere ndikpụhọde ubọkọkọ esie—enye ikoyomke ndinam aba utom ke usiakifia unọ idem inemesịt, edi okoyom ndin̄wam mme ubuene ke Cambodia. Enye ama asiak ufọkn̄wed oro esinọde mme owo ufọk, udia, ye ukpep ke mfọn. Edi ekikere okosụk etetịmede enye—se enye akanamde ama anam enye okop idatesịt, edi ikpọ mfịna oro enye ekenyenede ẹma ẹnam enye okop mfụhọ ye iduọesịt.

Owo inan̄ oro inemede mi, ẹkekere ke imọfiọk se iyomde ndida uwem mmimọ nnam. Idem ke ẹma ẹkesịm mme utịtmbuba oro mmọ ẹkenen̄erede ẹsịn idem ẹbịne, mmọ ikosụk ikopke uyụhọ ke uwem. Nso ke afo ada uwem fo anam? Nso inen̄ede idi akpan n̄kpọ inọ fi? Nte emetịm ekere ke udutuaha n̄kpọfiọk ke se adade uwem fo anam?