Mme Mbụme Ẹtode Mme Andikot

Didie ke Christian ekpese utop ye ukọiyak?

Bible idọhọke ke utop m̀mê ukọiyak ọdiọk. (Deuteronomy 14:4, 5, 9, 20; Matthew 17:27; John 21:6) Edi enyene mme edumbet N̄wed Abasi oro akpanade Christian oro otopde utop m̀mê ọkọde n̄kpọ ekere aban̄a.

Abasi ama enyịme Noah ye nditọ esie ẹwot unam ẹta, ama akam edi ẹduọk iyịp mbemiso ẹta. (Genesis 9:3, 4) Item emi ama owụt ke owo ikpenyeneke ndida uwem unam nnam mbubru sia edide Abasi okobot mmọ. Ntre, mme Christian isiwotke unam ida ibre mbre sia emi okpowụt ke mmọ inyeneke ukpono inọ uwem.—Mme N̄ke 12:10.

Oyom ikere n̄ko iban̄a edu nnyịn. Etie nte ke mme apostle oro ẹkesikọde iyak ẹma ẹnem esịt ke ini ẹmụmde ediwak iyak. Edi idụhe itie Bible oro ọdọhọde ke mmọ ẹma ẹsinam inua ẹban̄a se mmọ ẹkemụmde, m̀mê mmọ ndika ọkọ man ẹda ẹmia mbuba ye mbon en̄wen, ẹwụt ke idi irenowo, m̀mê ẹda ẹtan̄ ase.—Psalm 11:5; Galatia 5:26.

Ntem, imekeme ndibụp idem nnyịn ite: ‘Ndi mmenịm eti uwụtn̄kpọ ke ndise uwem nte Jehovah esede? Nte nsikere nnyụn̄ nneme mban̄a utop ye ọkọ kpukpru ini? Nte usụn̄ oro ndude uwem owụt ke nnen̄ede mma utop m̀mê owụt ke ndi asan̄autom Abasi? Ndi utop m̀mê ọkọ anam ntetịm ndụk nsan̄a ye mbon oro mînịmke ke akpanikọ, mîdịghe ndi isiyakke ndu ye ubon mi?’—Luke 6:45.

Ndusụk owo oro ẹsikade utop m̀mê ọkọ man ẹnyene n̄kpọ udu uwem ẹkeme ndikere ke idiọkke nditre mme edinam eke spirit ke ini ọkọ m̀mê ini utop. Nte ededi, nnyịn ndibem iso nyom mme n̄kpọ eke spirit owụt ke imenyene mbuọtidem inyụn̄ iberi edem ke Abasi. (Matthew 6:33) Ke adianade do, ana mme Christian ẹnịm kpukpru ibet “Caesar” emi ẹban̄ade utop ye ọkọ, edide ẹsimia mme andibiat ibet emi ufen m̀mê owo isimiaha.—Matthew 22:21; Rome 13:1.

Ekeme ndiyom ndusụk owo ẹnam ukpụhọde ke nte mmọ ẹkerede ẹban̄a se Abasi oyomde man mmọ ẹse utop ye ọkọ nte Jehovah esede. (Ephesus 4:22-24) Ke n̄kan̄ eken, oyom ikpono se ubieresịt mbon en̄wen etemede mmọ. Apostle Paul ama ọnọ eti item ke n̄kpọ emi; enye ọkọdọhọ ete: “Ẹyak nnyịn ikûkpe aba ikpe inọ kiet eken, edi utu ke oro ẹnam emi edi ubiere mbufo, ẹkûnịm n̄kpọ iduọ ke iso eyenete m̀mê n̄kpọ ndinam owo atuak ukot ọduọ.” (Rome 14:13) Edieke inen̄erede ima inyụn̄ ikpono ubieresịt mbon en̄wen, emi ayanam emem odu ke esop onyụn̄ enem Andibot nnyịn, kpa Andinọ uwem, esịt.—1 Corinth 8:13. *

[Ikọ idakisọn̄]