Nte Ererimbot Ekeme Ndidiana Kiet?

NTE emem oyodu ke ererimbot emi m̀mê afanikọn̄ edidu? Ndusụk owo ẹkeme ndidọhọ ke emem oyodu, ke ini mbon eken ẹdọhọde ke afanikọn̄ edidu.

Ndusụk mme andikara ererimbot ẹsitịn̄ uko uko ẹte ke emem oyodu ke ofụri ererimbot—eyedi sia idem enyekde mmọ aban̄a enyene-ndịk n̄kpọ oro ekemede nditịbe edieke emem mîdụhe. Edi, ediwak owo ẹsikop ndịk ẹban̄a mme utọ mbụme nte: Ewe idụt ye ewe idụt ẹnyene n̄kpọekọn̄ oro ẹkemede ndida nsobo ediwak owo? Ndi mmọ ẹyededei ẹda mme n̄kpọekọn̄ emi ẹn̄wana ekọn̄? Nso iditịbe edieke ẹdade ẹn̄wana?

Se itịbede ke mbụk ẹwụt ke ndomoidem ye asari iyakke ererimbot adiana kiet ke anyan ini idahaemi, ndien ido ukpono ẹsikam ẹsesịn udọn̄ ẹnọ edu mbiba emi, utu ke nditre mmọ. James A. Haught, emi esiwetde mbụk n̄kpọntịbe ewet ete: ‘N̄kpọ ekededi oro ọtọde ubahade ke otu mme owo ekeme ndida usua ndi, ndien idụhe se itọde ubahade ke otu mme owo nte ido ukpono. Okposụkedi ẹsiwakde ndinịm ke ido ukpono ẹsinam mme owo “ẹfọn,” ana in̄wan̄-in̄wan̄ ke enye akam ananam mme owo ẹdu ata mbuka uwem.’ Steven Weinberg emi edide ewet n̄wed esịn ke uyo oro ete: “Ido ukpono kpọt ekeme ndinam nti owo ẹnam ndiọi n̄kpọ.”

Nte ererimbot emi ayadiana kiet tutu amama? Ih! Edi idịghe owo m̀mê ido ukpono oro mme owo ẹsiakde edinam ererimbot adiana kiet nte idikụtde ke ibuotikọ oro etienede.

[Se Ẹwetde ke Ikpọ Abisi ke page 3]

Nte ererimbot emi etie nte bọmb oro oyomde nditop?