Baba N̄kpọekọn̄ Kiet Eke Ẹbotde Ẹban̄a Fi Idikwe Unen

“Baba n̄kpọ ekọn̄ kiet eke ẹbotde ẹban̄a fi idikwe unen.”—ISAIAH 54:17.

1, 2. Didie ke se ikọwọrọde Mme Ntiense Jehovah ke Albania ẹwụt nte Isaiah 54:17 edide akpanikọ?

 EKPRI otu mme Christian emi mîfeheke ndịk ẹma ẹdu ke ekpri obot obot idụt ke usụk n̄kan̄ usiahautịn Europe ke ediwak isua emi ẹbede. Ukara Communist emi mînịmke ke Abasi odu ama esịn ofụri ukeme ndisọhi mmọ mfep. Kpa ye oro, ndutụhọ, itienna ọkpọsọn̄ utom, ye edori ikọ ndutịm usuanetop ikekemeke ndisọhi mmọ mfep. Mmanie ke mmọ ẹkedi? Mme Ntiense Jehovah ke Albania. Okposụkedi ọkọsọn̄de etieti ndisisop idem ọtọkiet nnyụn̄ n̄kwọrọ ikọ, nsịnifịk mmọ ke mme isua oro ama emenede Ido Ukpono Christ itie onyụn̄ otoro enyịn̄ Jehovah. Ke 2006, ke ini ẹkeyakde obufa n̄kọk itieutom mmọ ẹnọ, Ntiense kiet emi ama akanam utom ke anyan ini ọkọdọhọ ete: “Satan ekpesịn ifịk nte esesịn, enye isikanke, edi Jehovah aka iso ndikakan!”

² Kpukpru emi ẹsọn̄ọ nte un̄wọn̄ọ Abasi emi ẹwetde mi ke Isaiah 54:17 ẹban̄a ikọt esie edide akpanikọ: “Baba n̄kpọ ekọn̄ kiet eke ẹbotde ẹban̄a fi idikwe unen; afo oyonyụn̄ anam ikọ etịp kpukpru edeme eke ẹdahade ẹda ẹnam ikọ ye afo.” Se isitịbede owụt ke idụhe n̄kpọ oro ererimbot Satan ekemede ndinam emi editrede mme asan̄autom Jehovah Abasi emi ẹyakde idem ẹnọ Enye ndituak ibuot nnọ Enye.

Ukeme Oro Satan Esịnde Ikpîkpu

3, 4. (a) Nso idi ndusụk n̄kpọekọn̄ Satan? (b) Didie ke n̄kpọekọn̄ Devil mîkwe unen?

³ N̄kpọekọn̄ oro ẹdade ẹn̄wana ye mme andituak ibuot nnọ ata Abasi esịne ukọbọ, afai mbon ntịme, n̄kpọkọbi, ye ‘edibot ibak ke ewụhọ.’ (Psalm 94:20) Ke nditịm ntịn̄, ke ndusụk idụt, idem nte isụk ikpepde ibuotikọ emi, ke ‘ẹdomo’ ata mme Christian emi m̀mê mmọ ẹyesọn̄ọ ẹda ye Abasi.—Ediyarade 2:10.

⁴ Ke uwụtn̄kpọ, n̄kọk itieutom Mme Ntiense Jehovah kiet ama ọtọt ete ke ufan̄ isua kiet kpọt, ke ẹma ẹfiomo mme asan̄autom Abasi utịm ike 32 ke adan̄aemi ẹnamde utom  ukwọrọikọ. Ke adianade do, utịm ike 59, mme bodisi ẹma ẹkọbi Mme Ntiense—n̄kpri ye ikpọ, iren ye iban—emi ẹkekwọrọde ikọ an̄wan̄wa. Ẹma ẹmịn̄ n̄wed nnuenubọk ndusụk owo, ẹsio ndise, ẹnyụn̄ ẹkọbi mmọ nte n̄kpọ eke mmọ ẹdide mme abiatibet. Ẹma ẹdọhọ ke ẹmọn̄ ẹnọ mbon eken unan. Ke idụt en̄wen, idahaemi ibat n̄kpọ oro ẹfiọkde emi ẹnamde Mme Ntiense Jehovah awak ebe 1,100, ndien emi esịne edimụm, edidia isop, m̀mê edimia. Se ibede 200 ke otu emi ẹketịbe ke usen emi mmọ ẹketide n̄kpa Jesus. Edi spirit Jehovah an̄wam ikọt esie ẹka iso kpa ye ekese ndiọi idaha emi, ke mme idụt emi ye ke mme idụt en̄wen. (Zechariah 4:6) Ọkpọsọn̄ iyatesịt mme asua idikpanke mbon oro ẹtorode Jehovah. Ih, nnyịn imenen̄ede inịm ke baba n̄kpọekọn̄ kiet ikemeke ndikpan uduak Abasi ndisu.

Ikọ Eyetịp Edeme Nsu

5. Nso ikọ ke ẹkedori mme asan̄autom Jehovah ke akpa isua ikie?

⁵ Isaiah ama ebem iso etịn̄ ke ikọt Abasi ẹyetịp kpukpru edeme eke ẹdahade ẹda ẹnam ikọ ye mmọ. Ke akpa isua ikie, ẹma ẹsiwak ndisu nsu ndori mme Christian ẹte ke mmọ ẹdi mme anamidiọk. Ikọ oro ikụtde ke Utom 16:20, 21 edi uwụtn̄kpọ utọ edori ikọ oro: “Mmọ emi ẹtịmede obio nnyịn etieti, . . . mmọ ẹnyụn̄ ẹkwọrọ ido oro ibet mînyịmeke nnyịn inịm m̀mê inam, sia nnyịn idide mbon Rome.” Isan̄ en̄wen, mme andikọbọ emi ẹdide mbon ido ukpono ẹma ẹdomo ndinam mme andikara obio ẹbiọn̄ọ mme anditiene Christ, ẹte: “Mmọ emi ẹtịmerede isọn̄ ẹmedi mi n̄ko, [mmọ] ẹnyụn̄ ẹnam n̄kpọ ẹbiọn̄ọ mme ewụhọ Caesar.” (Utom 17:6, 7) Ẹkekot apostle Paul “owo ntịme” ye ebeiso owo ke n̄ka emi edemerede ndutịme “ke ofụri isọn̄.”—Utom 24:2-5.

6, 7. Nso idi usụn̄ kiet emi ata mme Christian ẹsidade ẹwụt ke ikọ emi ẹdoride mmọ ẹdi nsu?

⁶ Mmọdo, ikpaha nnyịn idem ke ini ẹnen̄erede ẹdori ata mme Christian ikọ mfịn, ẹdọkde mmọ edidọk, ẹnyụn̄ ẹsịnde ofụri ukeme ndibiat mmọ enyịn̄. Nnyịn isisan̄a didie iwụt ke mme utọ edori ikọ oro ẹdi nsu?—Isaiah 54:17.

⁷ Mme Ntiense Jehovah ẹsiwak ndida eti edu uwem mmọ n̄wụt ke mme utọ edori ikọ oro ẹdi nsu. (1 Peter 2:12) Ke ini mme Christian ẹnịmde ibet obio ẹnyụn̄ ẹnyenede eti edu uwem emi owụtde ke mmọ ẹnen̄ede ẹkere ẹban̄a mfọnọn̄kpọ ekemmọ owo, mme owo ẹsikụt ke mme ikọ oro ẹdoride mmọ ẹdi nsu. Eti edu uwem nnyịn esiwụt ke nnyịn inamke se mme owo ẹdoride nnyịn. Ke ini mme owo ẹkụtde nte nnyịn isọn̄ọde iyịre inam nti utom, emi esiwak ndinam mmọ ẹnọ Ete nnyịn eke heaven ubọn̄ ẹnyụn̄ ẹnyịme ke usụn̄ uwem mme asan̄autom esie ọfọn akan.—Isaiah 60:14; Matthew 5:14-16.

8. (a) Nso ke esiyom ndusụk ini man iwụt ke se nnyịn inịmde ẹkọn̄ọ ke N̄wed Abasi? (b) Ukem nte Christ, didie ke nnyịn isiwụt ke edori ikọ mme andibiọn̄ọ edi nsu?

⁸ Ke adianade ye eti ido uwem nnyịn, ndusụk ini, ekeme ndiyom ida uko in̄wana iban̄a se inịmde oro ẹkọn̄ọde ke N̄wed Abasi. Usụn̄ kiet edi ndiyom ukpeme ukara ye esop. (Esther 8:3; Utom 22:25-29; 25:10-12) Ke ini Jesus okodude ke isọn̄, isan̄ kiet, enye ama eneni eneni ke eferife ye mme andikụt ndudue nnọ enye, ọsọn̄ọ owụt ke edori ikọ mmọ idịghe akpanikọ. (Matthew 12:34-37; 15:1-11) Ukem nte Jesus, esinen̄ede enem nnyịn ke ini inyenede ifet ndinen̄ede nnam mbon en̄wen ẹfiọk se nnyịn inịmde ke akpanikọ. (1 Peter 3:15) Akpakam nnyịn idehedei iyak nsahi ke ufọkn̄wed, ke itieutom, m̀mê eke iman nnyịn oro mînịmke ke akpanikọ ẹkpan nnyịn ndinam mme owo ẹfiọk akpanikọ Bible.—2 Peter 3:3, 4.

Jerusalem—“Edidobi Itiat”

9. “Edidobi itiat” oro ẹtịn̄de ẹban̄a ke Zechariah 12:3 ada aban̄a ewe Jerusalem, ndien mmanie ẹda ke ibuot esie ke isọn̄?

⁹ Ntịn̄nnịm ikọ Zechariah enen̄ede anam  ifiọk ntak emi mme idụt ẹbiọn̄ọde ata mme Christian. Zechariah 12:3 ọdọhọ ete: “Ama ekem ke usen oro, nyenịm Jerusalem ke edidobi itiat nnọ kpukpru mme idụt.” Ewe Jerusalem ke ntịn̄nnịm ikọ Zechariah emi aban̄a? Enye aban̄a “Jerusalem eke heaven,” kpa Obio Ubọn̄ heaven oro enyenede mme Christian oro ẹyetde aran. (Mme Hebrew 12:22) Ekpri nsụhọ mme anditiene n̄kara ke Obio Ubọn̄ Messiah emi ke ẹdodu ke isọn̄. Mmọ ye mme nsan̄a mmọ emi ẹdide “mme erọn̄ en̄wen” ẹdiana kiet ẹsịn udọn̄ ẹnọ mme owo ẹte ẹmek ndidu ke idak Obio Ubọn̄ Abasi ke adan̄aemi ini osụk odude. (John 10:16; Ediyarade 11:15) Mme idụt ẹnam n̄kpọ didie ẹban̄a emi? Ndien nso orụk ibetedem ke Jehovah ọnọ ata mme andituak ibuot nnọ enye mfịn? Ẹyak ineme emi nte ikade iso ndidụn̄ọde se Zechariah ibuot 12 ọwọrọde. Ke ini inamde oro, nnyịn iyetịm inịm ke “baba n̄kpọ-ekọn̄ kiet” oro ẹbotde ẹban̄a ikọt Abasi oro ẹyetde aran ye mme nsan̄a mmọ oro ẹyakde idem ẹnọ Abasi “idikwe unen.”

10. (a) Ntak emi ẹn̄wanade ye ikọt Abasi? (b) N̄kpọ etie didie ye mbon oro ẹdomode ndimenede “edidobi itiat” nsio ke usụn̄?

¹⁰ Zechariah 12:3 ọdọhọ ke mme idụt ‘ẹwaha mbak-mbak.’ Didie? Abasi ọdọhọ ke ana ẹkwọrọ eti mbụk Obio Ubọn̄. Mme Ntiense Jehovah ẹda mbiomo emi mmọ ẹnyenede ndikwọrọ ikọ nte ata akpan n̄kpọ. Edi editan̄a Obio Ubọn̄ nte n̄kukụre idotenyịn ubonowo amakabade “edidobi itiat” ọnọ mme idụt. Mmọ ẹdomo ndimenede enye mfep ke usụn̄ ebe ke ndibiọn̄ọ mme andikwọrọ Obio Ubọn̄. Mme idụt oro ẹdomode ndibiọn̄ọ utom ukwọrọikọ ‘ẹwaha mbak-mbak.’ Mmọ ẹkam ẹbiat enyịn̄ mmọ ke ntak emi ẹkpude idiọk idiọk. Mmọ ikemeke ndikụbi ata mme andituak ibuot nnọ Abasi inua, emi ẹnen̄erede ẹma akwa ifet emi mmọ ẹnyenede nditan̄a “nsinsi eti mbụk” Obio Ubọn̄ Messiah Abasi mbemiso utịt editịm n̄kpọ emi. (Ediyarade 14:6) Ke ini ekpeme ufọk-n̄kpọkọbi okokụtde nte ẹtụhọrede mme asan̄autom Jehovah ke idụt kiet ke Africa, ke nditịm ntịn̄, enye ama ọdọhọ ete: ‘Ẹbiat idem mbufo ini ndikọbọ mme owo emi. Tutu amama mmọ idikan̄ke mbuọtidem. Mmọ ẹkam ẹka iso ndiwawak.’

11. Didie ke Abasi anam se enye ọkọn̄wọn̄ọde ke Zechariah 12:4?

¹¹ Kot Zechariah 12:4. Jehovah ọn̄wọn̄ọ ke imọ iyetịbi mbon oro ẹn̄wanade ye uko uko mme anditan̄a Obio ubọn̄ imọ enyịn, inyụn̄ ida “n̄kpa-idem” imia mmọ ke ndamban̄a usụn̄. Enye anam se enye ọkọn̄wọn̄ọde. Ke uwụtn̄kpọ, ke mme idụt emi ẹkekpande utuakibuot akpanikọ, mme andibiọn̄ọ ikekemeke nditre ikọt Abasi ndidia udia eke spirit. N̄wedmbụk n̄kpọntịbe ama akam ọdọhọ ke Mme Ntiense Jehovah ẹkeda bloblo ẹda mme n̄wed Bible ẹdụk ẹdi idụt oro! Un̄wọn̄ọ emi Abasi ọn̄wọn̄ọde ọnọ mme asan̄autom esie mi edi akpanikọ: “Nyatat enyịn mi nse . . . nnyụn̄ ntịbi kpukpru mme horse mme idụt enyịn.” Sia ifụtesịt ekịmde mme asua Obio  Ubọn̄ enyịn, mmọ ifiọkke ebiet emi mmọ ẹkpedụkde. Edi nnyịn imenen̄ede inịm ke Jehovah eyekpeme ikọt esie nte otu onyụn̄ ese aban̄a mmọ.—2 Ndidem 6:15-19.

12. (a) Didie ke Jesus okobụberede ikan̄ ke ini enye okodude ke isọn̄? (b) Didie ke nsụhọ mbon oro ẹyetde aran ẹnam ikan̄ asak ke n̄kan̄ eke spirit, ndien nso idi utịp?

¹² Kot Zechariah 12:5, 6. “Mme etubom Judah” ẹda ẹban̄a mme esenyịn ke otu ikọt Abasi. Jehovah anam ikọt esie ẹnyene ikan̄-ikan̄ ifịk man se iban̄ade Obio Ubọn̄ esie mi ke isọn̄ aka iso. Jesus ama asian mme mbet esie isan̄ kiet ete: “N̄kedi ndisịn ikan̄ ke isọn̄.” (Luke 12:49) Ke akpanikọ, enye ama anam ndamban̄a ikan̄ obụberede. Jesus ama ada ifịk ifịk ukwọrọikọ esie anam mme owo ẹfiọk ke Obio Ubọn̄ Abasi edi ata akpan n̄kpọ. Ndamban̄a ebuaikan̄ emi ama edemerede eneni ke ofụri idụt mme Jew. (Matthew 4:17, 25; 10:5-7, 17-20) Kpasụk ntre, mme anditiene nde ikpat Christ ke eyo nnyịn ẹbụberede ikan̄ ke n̄kan̄ eke spirit ukem nte “eso ikan̄ ke otu ifia, ye . . . nsadan̄-ikan̄ ke ebek” ibokpot oro ẹsịbede obufa. N̄wed oro The Finished Mystery * emi ẹkesiode ke 1917 ama enen̄erede ayarade mbubịk Christendom. Emi ama anam mme ọkwọrọ ederi ẹyat esịt etieti. Ke ata ndondo emi, Mbụk Obio Ubọn̄ Nọ. 37, “Utịt Nsunsu Ido Ukpono Emekpere!” amanam ediwak owo ẹmek ndida m̀mê nditre ndida nnọ Obio Ubọn̄ Abasi.

 “Mme Tent Judah” Ẹma Ẹnyan̄a Mme Owo

13. Nso ke ikọ oro “mme tent Judah” owụt, ndien ntak emi Jehovah anyan̄ade mbon oro ẹdude do?

¹³ Kot Zechariah 12:7, 8. Ke Israel eset, n̄kpọ kiet oro ẹkesidade ẹdiọn̄ọ mmọ ekedi tent, emi mme ekpemerọn̄ ye mme ọtọin̄wan̄ ẹkesidụn̄de ndusụk ini. Sia utọ ufọk oro mîsọn̄ke idem, esinen̄ede emem utom ndinyene mmọ edieke mme idụt usua ẹdide en̄wan ke obio Jerusalem. Ikọ oro “mme tent Judah” owụt ke nsụhọ mbon oro ẹyetde aran ke eyo nnyịn ẹdu ke an̄wa ke ndamban̄a usụn̄, idụhe ke mme obio ibibene. Mmọ ẹdu ke an̄wa emi ẹn̄wana uko uko ẹban̄a mme ufọn n̄kpọ Obio Ubọn̄ Messiah. Jehovah mme udịm “eyebem iso anyan̄a mme tent Judah” koro mmọ ẹnen̄erede ẹdu ke iso en̄wan Satan.

14. Didie ke Jehovah an̄wana ọnọ mbon oro ẹdude ke “mme tent Judah,” ndien nso ke enye anam mbak mmeme-mmeme owo edidu ke otu mmọ?

¹⁴ Ke akpanikọ, n̄wetnnịm n̄kpọ eset owụt ke Jehovah ke an̄wana ọnọ mme isụn̄utom Obio Ubọn̄ oro ẹyetde aran ke “mme tent” oro ẹdude ke an̄wa. * Kpa nte Jehovah ekesinamde Edidem David emi ekesin̄wanade ekọn̄ okop odudu onyụn̄ enyene uko, Enye ke anam ntre n̄ko ye mmọ, “mmeme-mmeme” owo inyụn̄ idụhe ke otu mmọ.

15. Ntak emi Jehovah “[oyomde] ndisobo kpukpru mme idụt,” ndien ini ewe ke enye edinam emi?

¹⁵ Kot Zechariah 12:9. Ntak emi Jehovah “[oyomde] ndisobo kpukpru mme idụt”? Koro mmọ ẹyịrede ẹkọbọ Obio Ubọn̄ Messiah. Ẹbiom mmọ ikpe ke ntak emi mmọ ẹfịnade ẹnyụn̄ ẹkọbọde ikọt Abasi. Mme isụn̄utom Satan mi ke isọn̄ ẹyesọp ndin̄wana akpatre en̄wan ye ata mme andituak ibuot nnọ Abasi, ndien emi ayada ekesịm idaha ererimbot emi ẹkotde Har–Magedon ke Bible. (Ediyarade 16:13-16) Akwa Ebiereikpe ayanam n̄kpọ aban̄a en̄wan emi man anyan̄a mme asan̄autom esie onyụn̄ anam enyịn̄ esie asana ke otu mme idụt.—Ezekiel 38:14-18, 22, 23.

16, 17. (a) Nso idi “udeme ikọt Jehovah”? (b) Nnyịn ndiyọ en̄wan Satan edi uyarade nso?

¹⁶ Satan inyeneke n̄kpọekọn̄ oro ekemede ndibiat mbuọtidem m̀mê nditehede ifịk ikọt Abasi ke ofụri ererimbot. Emem oro nnyịn inyenede, emi otode odudu edinyan̄a Jehovah, edi “udeme ikọt Jehovah.” (Isaiah 54:17) Baba owo kiet ikemeke ndifịk nnyịn mbọ emem ye uforo eke spirit nnyịn. (Psalm 118:6) Satan ayaka iso esịn nsọk ọnọ ubiọn̄ọ ye ukụt. Nnyịn ndisọn̄ọ nda nyọ esuene edi uyarade ke nnyịn imenyene spirit Abasi. (1 Peter 4:14) Ke ofụri ererimbot, ke ẹtan̄a eti mbụk Obio Ubọn̄ Jehovah oro ama ọkọtọn̄ọ ndikara. Ẹtop ediwak ndamban̄a “itiat-utop” ubiọn̄ọ ukem nte n̄kpọekọn̄ ẹtọ ikọt Abasi. Edi mme asan̄autom Jehovah ẹda odudu esie ẹkan mme utọ itiat oro, iyakke mmọ ẹnyene odudu. (Zechariah 9:15) Owo idikemeke nditre utom nsụhọ mbon oro ẹyetde aran ye mme nsan̄a mmọ oro ẹnamde akpanikọ!

¹⁷ Nnyịn itie ibet ini emi ẹdinyan̄ade nnyịn ofụri ofụri ẹsio ke en̄wan Devil. Nnyịn ikop ndọn̄esịt didie ntem ke un̄wọn̄ọ Abasi oro nte ke ‘baba n̄kpọ ekọn̄ kiet eke ẹbotde ẹban̄a nnyịn idikwe unen, ye nte ke ikọ eyetịp kpukpru edeme eke ẹdahade ẹda ẹnam ikọ ye nnyịn’!

[Mme Ikọ idakisọn̄]

Didie ke Afo Ọkpọbọrọ?

• Nso iwụt ke mme n̄kpọekọn̄ Satan ikwe unen?

• Didie ke Jerusalem eke heaven akabarede “edidobi itiat”?

• Didie ke Jehovah anyan̄a “mme tent Judah”?

• Nso ke nnyịn inen̄ede inịm ke akpanikọ nte Armageddon asan̄ade ekpere?

[Mme Mbụme Ukpepn̄kpọ]

[Mme ndise ke page 21]

Ikọt Jehovah ke Albania ẹma ẹsọn̄ọ ẹda ẹyọ mfiomo Satan

[Ndise ke page 23]

Jesus ama owụt ke edori ikọ edi nsu

[Mme ndise ke page 24]

Baba n̄kpọ ekọn̄ kiet eke ẹbotde ẹban̄a mme anditan̄a eti mbụk idikwe unen