Editua Owo Mbọm ke Ererimbot Isọn̄esịt

ETE kiet ke Burundi ọdọn̄ọ ata idiọk utoenyịn. Ana ẹsọsọp ẹda enye ẹka ufọkibọk. Edi ẹdisan̄a didie? Ubomisọn̄ idụhe ndida mmen enye. Akpan ufan esie iba ẹn̄wam enye. Mmọ ẹmen enye ke enan̄ukwak ẹkpat ke ofụri hour ition ke ebiet emi etiede obot obot. Ekem ẹsịn enye ke bọs ẹda ẹka ufọkibọk. Idem ọsọn̄ enye ke usen ifan̄ ẹma ẹkebe.

Ke ọkpọsọn̄ oyobio ama ọkọnọmọ Itụn̄ Inyan̄ibom ke United States ke August 2005, otu mme anamutom unyịmesịt ẹma ẹkụt ufọk emi eto ọkọduọde ọtọ owụri. Mme anamutom unyịmesịt oro, emi mîkọfiọkke enyeneufọk oro, ẹma ẹda engine uyọketo ẹda ofụri usen kiet ẹyọk ẹnyụn̄ ẹsion̄o eto oro ẹfep. Enyeneufọk oro ọkọdọhọ ete: “Abasi ọdiọn̄ [mme owo emi].”

Mbụk n̄kpọntịbe emi ẹdemerede owo udọn̄ ẹsiwak nditịn̄ n̄kpọ mban̄a afai ye ibak. Mbụk afai ye ibak emi isiyakke ẹtịn̄ n̄kpọ ẹban̄a mme n̄kpọ oro ẹnamde man ẹtua owo mbọm, ye mme edinam mfọnido. Nte ededi, emi iwọrọke ke mme owo ke kpukpru ebiet inen̄ekede iyom aba ẹma ẹnyụn̄ ẹtua mmimọ mbọm. Nnyịn imenen̄ede iyom ẹtua nnyịn mbọm! Etie nte ẹsinen̄ede ẹnyene ekikere ẹban̄ade editua owo mbọm ke ini Christmas, kpa ini emi ediwak owo ẹsitịn̄de m̀mê ẹkwọde ikwọ emi aban̄ade ‘emem ndidu ye mme owo emi Abasi enyịmede.’—Luke 2:14.

 Ekeme ndisọn̄ nditua owo mbọm ke ererimbot unana ima ye mfọnido emi. Ọsọ edu edi ke unana mbọm ye isọn̄esịt ẹnam owo okụt unen onyụn̄ oforo. Etie nte ediwak owo ẹda edumbet emi ọdọhọde ke isọn̄esịt ọfọn akan editua owo mbọm ẹdu uwem. Idiọkitọn̄ ye edida idem ke n̄kpọ n̄kaha isiyakke mme owo ẹtua owo mbọm.

Emi esinam ediwak owo ẹyom ufọn idemmọ kpọt, ikereke iban̄a mbon en̄wen m̀mê nte etiede mmọ ke idem. Ẹsiwak ndiwụt irenowo emi ẹdide nta mbre mbuba ye eke edinam unọ idem inemesịt nte mbon isọn̄esịt emi mînyeneke ima. Ndusụk mme andikara ẹtie ntre n̄ko.

Mmọdo, ọfọn ibụp ite: Ntak emi nnyịn ikpatuade owo mbọm? Ndi editua owo mbọm ekeme ndinam mme owo ẹnam se ifọnde? Ndien nso ikeme ndinam nnyịn itua owo mbọm? Ibuotikọ oro etienede ọyọbọrọ mme mbụme emi.

[Ekebe ke page 3]

•Ndi editua owo mbọm ọwọrọ ke owo edi mbe?

•Nte editua owo mbọm ekeme ndinam mme owo ẹnam se ifọnde?

•Nso idi mme akpan usụn̄ emi afo ekemede nditua owo mbọm?