Mme Akpan N̄kpọ Oro Ẹtode N̄wed Malachi
Ikọ Jehovah Enyene Uwem
Mme Akpan N̄kpọ Oro Ẹtode N̄wed Malachi
ISUA 70 ẹmebe tọn̄ọ ẹkebọp temple Jerusalem ẹkụre. Nte ededi, idaha eke spirit mme Jew ọmọdiọk etieti ke ofụri ini emi ebede mi. Mme oku ẹkam ẹbiara n̄ko. Anie edisian mmọ nte idaha mmọ etiede onyụn̄ odomo ndinam mmọ ẹfiak ẹsọn̄ idem ke n̄kan̄ eke spirit? Jehovah ọnọ prọfet Malachi utom emi.
Malachi ekewet akpatre n̄wed ke N̄wed Abasi Usem Hebrew emi ọdọn̄ọde ntịn̄nnịm ikọ eke odudu spirit mi, ndien enye ekewet ke usụn̄ oro enyenede iwụk. Nditịn̄ enyịn ke ntịn̄nnịm ikọ Malachi ekeme ndin̄wam nnyịn iben̄e idem ibet “akwa ye ndịk-ndịk usen Jehovah,” emi editrede idiọk editịm n̄kpọ emi.—Malachi 4:5.
MME OKU “ẸMENAM EDIWAK OWO ẸDUỌN̄Ọ”
Jehovah etịn̄ nte enye adade Israel ete: “Mmama mbufo.” Edi mme oku ẹse enyịn̄ Abasi ke ndek. Didie? “Ke [ndidiọk] edidehe uyo ke itie-uwa [esie],” ye ke ndiwa unam eke edide “mbụn̄ọ ye eke ọdọn̄ọde udọn̄ọ.”—Malachi 1:2, 6-8.
Mme oku “ẹmenam ediwak owo ẹduọn̄ọ ke mbet.” Mme owo ‘ẹbian̄a kiet eken.’ Ndusụk owo ẹdọ iban isenidụt. Mbon eken ẹbian̄a “n̄wan uyen [mmọ].”—Malachi 2:8, 10, 11, 14-16.
Mme Mbụme N̄wed Abasi Oro Ẹbọrọde:
2:2—Didie ke Jehovah ‘akanam nti n̄kpọ,’ m̀mê edidiọn̄, mme otụtutọn̄ oku “ẹkabade ẹdi isụn̄i”? Abasi akanam emi ke ini mme oku emi ẹben̄ede edidiọn̄, edidiọn̄ oro ayakabade edi isụn̄i.
2:3—Nso ke ‘nditiam ifuọ nduọk’ mme oku ke iso ọkọwọrọ? Ibet ọkọdọhọ ẹsida ifuọ unam oro ẹwade ẹwọrọ ẹka edem nna ẹkefọp ke ikan̄. (Leviticus 16:27) Nditiam mme oku ifuọ ke iso ọkọwọrọ ke Jehovah ikọbọhọ mme uwa oro ye nte ke mbon oro ẹkefọpde uwa oro ẹkedi n̄kpọ ndek ke iso esie.
2:13—Mmọn̄eyet mmanie ẹkefụk itieuwa Jehovah? Mmọn̄eyet ibanndọ emi ẹkedide temple ẹdin̄wan̄a esịt mmọ ẹnọ Jehovah. Nso ikanam mmọ ẹfụhọ ntre? Mme ebe mmọ, emi ẹkedide mme Jew ẹma ẹsio mmọ ndọ nte mîdotke ẹnyụn̄ ẹkpọn̄ mmọ, eyedi man ẹkpedọ mme n̄kaiferi isenidụt.
Se Nnyịn Ikpepde:
1:10. Jehovah ikọbọhọ uwa mme ọdiọkitọn̄ oku, emi ẹkebọde okụk idem ke utọ n̄kpri utom nte ediberi itịm m̀mê edibara ikan̄ ke itieuwa. Mmọdo, enen̄ede oyom ima unana ibụk emi imade Abasi ye mbọhọidụn̄, idịghe ntak okụk, anam nnyịn inam mme edinam utuakibuot nnyịn, esịnede se inamde ke utom ukwọrọikọ!—Matthew 22:37-39; 2 Corinth 11:7.
1:14; 2:17. Jehovah isiyọhọ mbubịk.
2:7-9. Mbon oro ẹnyenede ifet ndikpep esop n̄kpọ ẹkpenyene ndikụt ke se mmimọ ikpepde ekem ye Ikọ Abasi, kpa Edisana N̄wed Abasi, ye mme n̄wed Bible emi “akama-ukpọhọde emi anamde akpanikọ” osiode.—Luke 12:42; James 3:11.
2:10, 11. Jehovah oyom mme andituak ibuot nnọ imọ ẹda item oro aban̄ade edidọ owo “ke Ọbọn̄ ikpọn̄-ikpọn̄” ke ata akpan n̄kpọ.—1 Corinth 7:39.
2:15, 16. Ata mme andituak ibuot nnọ Abasi ẹnyene ndikpono ediomi ndọ oro mmọ ẹkenamde ye n̄wan uyen mmọ.
‘ATA ỌBỌN̄ EYEDI TEMPLE ESIE’
“Ata Ọbọn̄ [oro edi, Jehovah Abasi]” (NW) ye “angel [m̀mê isụn̄utom] ediomi [oro edi, Jesus Christ],” ‘ẹyebuat mbufo ke temple Esie ke idaha kiet.’ Abasi ‘ayasan̄a ekpere ikọt esie ke ikpe’ onyụn̄ enịm owowo ntiense aban̄a kpukpru orụk mme anamidiọk. Akan oro, ẹyewet “n̄wed editi” ẹnọ mme abak Jehovah.—Malachi 3:1, 3, 5, 16.
Usen eke ‘asakde nte usan̄-uyo’ eyedi onyụn̄ ata ndiọi owo. Mbemiso usen oro edide, ẹyedọn̄ prọfet man “[akabarede] esịt mme ete ọnọ nditọ, [akabarede] esịt nditọ ọnọ mme ete mmọ.”—Malachi 4:1, 5, 6.
Mme Mbụme N̄wed Abasi Oro Ẹbọrọde:
3:1-3—Ini ewe ke “ata Ọbọn̄” ye “angel ediomi” ẹkedi temple, ndien anie ekebem mmọ iso? Andida ke ibuot Jehovah ekedi edinam temple asana ke Nisan 10, 33 E.N. Ekedi ini oro Jesus okodụkde temple ekebịn mbon oro ẹkenyamde ẹnyụn̄ ẹdepde n̄kpọ do. (Mark 11:15) Emi eketịbe isua ita ye ubak tọn̄ọ ẹkeyet Jesus aran nte Edidem Oro Ẹmekde. Onyụn̄ etie nte ke isua ita ye ubak ẹma ẹkebe tọn̄ọ enye akada ubọn̄ nte Edidem ke heaven, enye ama asan̄a ye Jehovah aka temple eke spirit, mmọ ẹnyụn̄ ẹkụt ke oyom ẹnam ikọt Abasi ẹsana. Ẹma ẹdọn̄ John Andinịm Owo Baptism ekeben̄e mme Jew ebet Jesus Christ ke akpa isua ikie. Ẹma ẹdọn̄ isụn̄utom ebem iso ọkọdiọn̄ usụn̄ ọnọ ini emi Jehovah edidide temple esie eke spirit ke eyomfịn. Idem ko ke edem ke iduọk isua 1880, otu nditọ ukpepn̄kpọ Bible ẹma ẹtọn̄ọ utom edikpep mbon oro ẹnyenede esịt akpanikọ mme akpan ukpepn̄kpọ Bible.
3:10—Ndi edinọ “ọyọhọ mbak duop” ada aban̄a edinọ Jehovah ofụri inyene nnyịn? N̄kpa Jesus ama abiat Ibet Moses efep, ntre iyomke ẹsinọ aba ọyọhọ mbak duop. Kpa ye oro, ọyọhọ mbak duop enyene se ọwọrọde. (Ephesus 2:15) Enye idaha iban̄a edinọ ofụri inyene nnyịn. Ke adan̄aemi ẹkesinọde ọyọhọ mbak duop kpukpru isua, nnyịn isinọ Jehovah ofụri inyene nnyịn ini kiet kpọt—ke ini iyakde idem nnyịn inọ enye inyụn̄ iyararede uyakidem nnyịn ke baptism mmọn̄. Ọtọn̄ọde ke ini oro, kpukpru se inyenede enyene Jehovah. Edi enye ayak nnyịn imek ndida ndusụk se inyenede—ndamban̄a ọyọhọ mbak duop—nnam utom esie. Enye edi se ededi oro mme idaha nnyịn ẹyakde, esịt nnyịn onyụn̄ ọdọhọde ida inam utom esie. Mme n̄kpọ oro nnyịn inọde Jehovah esịne ini, odudu, ye inyene nnyịn oro idade inam utom edikwọrọ Obio Ubọn̄ ye edinam mbet. Enye esịne n̄ko edidụk mme mbono esop, edika n̄kese nditọete emi ẹdọn̄ọde ye n̄kani owo, ye editịp okụk ẹda ẹnam utom utuakibuot akpanikọ.
4:3—Didie ke mme andituak ibuot nnọ Jehovah ‘ẹdidịghi mme idiọk owo’? Ikọt Abasi ‘ididịghike mme idiọk owo’ ke ata ata usụn̄, oro edi, nditiene nsobo mmọ. Utu ke oro, etie nte emi ọwọrọ ke mme asan̄autom Jehovah emi ẹdude ke isọn̄ ẹdidịghi mmọ ke ndamban̄a usụn̄ ke nditiene mbuana ke ofụri esịt ke idara edikan oro ẹdidarade ke ini ererimbot Satan esịmde utịt.—Psalm 145:20; Ediyarade 20:1-3.
4:4—Ntak emi nnyịn ‘ikpetide mbet Moses’? Mbet oro ibọpke mme Christian, edi enye ekedi “mbukpọn̄ nti n̄kpọ eke ẹdidide.” (Mme Hebrew 10:1) Ntem, ndinọ ntịn̄enyịn ke Ibet Moses ekeme ndin̄wam nnyịn ikụt nte mme n̄kpọ oro ẹkewetde ẹsude. (Luke 24:44, 45) Akan oro, Ibet oro ọdọn̄ọ “ndamban̄a mbiet n̄kpọ eke ẹdude ke heaven.” Oyom ikpep enye edieke iyomde ndifiọk mme ukpepn̄kpọ ye edu uwem Christian.—Mme Hebrew 9:23.
4:5, 6—“Prọfet Elijah” ada aban̄a anie? Ẹma ẹbem iso ẹtịn̄ ke “Elijah” emi ayanam utom edinen̄ede n̄kpọ mbon, oro edi, editịm esịt mme owo. Ke akpa isua ikie E.N., Jesus Christ ọkọdọhọ ke John Andinịm Owo Baptism ekedi “Elijah” emi. (Matthew 11:12-14; Mark 9:11-13) Ẹdọn̄ owo emi enye adade aban̄a mfịn utom “ke akwa ye ndịk-ndịk usen Jehovah mîka-idịghe kan̄a.” Elijah mfịn edi “ofụn emi anamde akpanikọ onyụn̄ enyenede ọniọn̄.” (Matthew 24:45) Otu mme Christian emi ẹyetde aran mi ke ẹsịn ifịk ẹnam utom mmọ ndin̄wam mme owo ẹfiak ẹnyene eti itie ebuana ye Abasi.
Se Nnyịn Ikpepde:
3:10. Nditre ndinọ Jehovah ofụri ukeme nnyịn idiyakke inyene edidiọn̄ esie.
3:14, 15. Mme Jew ẹma ẹtọn̄ọ ndise edinam n̄kpọ Abasi ke usụhọde ke ntak ndiọi uwụtn̄kpọ mme oku. Mbon oro ẹkamade ifetutom ke esop ẹkpenyene ndinịm nti uwụtn̄kpọ.—1 Peter 5:1-3.
3:16. Jehovah enyene enyịn̄ mbon oro ẹbakde enye ẹnyụn̄ ẹnamde akpanikọ ẹnọ enye. Enye eti mmọ, oyonyụn̄ enịm mmọ uwem ke ini enye edisobode idiọk ererimbot Satan. Mmọdo, ẹyak nnyịn ikûdedei itehede ube ke ubiere nnyịn ndisọn̄ọ nda ye Abasi.—Job 27:5.
4:1. Ke usen oro idinamde ibat inọ Jehovah, ukem n̄kpọ ediwọrọ “n̄kọk” ye “orụn̄”—oro edi ke n̄kpri nditọ ẹdibọ ukem ubiomikpe oro mme ete ye eka ẹbọde. Nso akwa ubiere ke mme ete ye eka ẹnyene ntem ndinam nnọ n̄kpri nditọ mmọ! Ana mme ete ye eka emi ẹdide Christian ẹsịn ifịk etieti ẹyom ndinem Abasi esịt nnyụn̄ n̄ka iso nnyene eti enyịn̄ ye enye.—1 Corinth 7:14.
“Bak Abasi”
Anie ke ẹdinyan̄a ke “akwa ye ndịk-ndịk usen Jehovah”? (Malachi 4:5) Jehovah ọdọhọ ete: “Utịn edinen ido asiaha ọnọ mmọ [eke ẹbakde enyịn̄ mi]: se inamde itọn̄ uwem ọsọn̄ọ onyụn̄ odu enye ke mba; ndien mbufo ẹyewọn̄ọ ẹkefrọ nte nditọ-enan̄ n̄kụhọ.”—Malachi 4:2.
“Utịn edinen ido,” kpa Jesus Christ, asiaha ọnọ mbon oro ẹbakde enyịn̄ Abasi ke ntak ukpono, mmọ ẹnyụn̄ ẹnyene mfọn Jehovah. (John 8:12) Mmọ ẹnyene “se inamde itọn̄ uwem ọsọn̄ọ [emi odude] enye ke mba”—oro edi, ukọkudọn̄ọ eke spirit idahaemi ye edikọk ata udọn̄ọ ofụri ofụri ke obufa ererimbot Abasi. (Ediyarade 22:1, 2) Mmọ ẹfrọ “nte nditọ-enan̄ n̄kụhọ” sia ẹkopde nduaidem ye idatesịt. Sia itiede ibet mme utọ edidiọn̄ oro, ẹyak inam item Edidem Solomon emi: “Bak Abasi, nyụn̄ nịm mbet esie: koro emi edi eke kpukpru owo.”—Ecclesiastes 12:13.
[Ndise ke page 26]
Prọfet Malachi ekedi asan̄autom Abasi emi akayakde idem ọnọ onyụn̄ enyenede ifịk
[Ndise ke page 29]
Se nnyịn ikpepde ekpenyene ndikem ye Bible
[Ndise ke page 29]
Mme asan̄autom Jehovah ẹkpono ediomi ndọ mmọ