Nte Emeben̄e Idem Ọnọ Usen Jehovah?
Nte Emeben̄e Idem Ọnọ Usen Jehovah?
“Akwa usen Jehovah emekpere, emekpere, oyonyụn̄ ọsọp eti-eti.” —ZEPHANIAH 1:14.
1-3. (a) Nso ke Bible etịn̄ aban̄a usen Jehovah? (b) Ewe “usen Jehovah” ke nnyịn itie ibet?
AKWA usen Jehovah idịghe hour 24. Enye edi anyan ini oro ẹdinamde se Abasi ekebierede ọnọ mme anamidiọk. Odot mme anamidiọk ẹkop ndịk ẹban̄a usen emi koro enye edi usen ekịm, usen ikpahesịt, usen iyatesịt emi asakde nte ikan̄, usen ukụt ye nsobo. (Isaiah 13:9; Amos 5:18-20; Zephaniah 1:15) Ntịn̄nnịm ikọ Joel ọdọhọ ete: “Mbọm usen oro! koro usen Jehovah emekpere, enye oyonyụn̄ edi nte nsobo eke otode Ata Ọkpọsọn̄.” (Joel 1:15) Edi, Abasi ayanyan̄a “mbon esịt akpanikọ” ke akwa usen oro.—Psalm 7:10.
2 Ikọ oro “usen Jehovah” ada aban̄a nsio nsio ini oro Abasi osobode mme anamidiọk. Ke uwụtn̄kpọ, “usen Jehovah” ama esịm mme andidụn̄ Jerusalem ke isua 607 M.E.N. ke ini Jehovah akadade Babylon osobo mmọ. (Zephaniah 1:4-7) Kpasụk ntre ke Abasi akada mbon Rome osobo idụt mme Jew oro ẹkesịnde Eyen esie ke isua 70 E.N. (Daniel 9:24-27; John 19:15) Bible n̄ko ama ebem iso etịn̄ aban̄a “usen Jehovah” emi enye ‘edin̄wanade ekọn̄ ye ofụri idụt.’ (Zechariah 14:1-3) Apostle Paul emi ẹkenọde odudu spirit Abasi, ama ada usen emi akabuan ye ini edidu Christ, emi ọkọtọn̄ọde ke ini emi ẹkeyaride Jesus ntinya nte Edidem ke heaven ke 1914. (2 Thessalonica 2:1, 2) Sia usen Jehovah enen̄erede ekpere, ibuotikọ isua Mme Ntiense Jehovah ke 2007 ama enen̄ede odot. Ẹkeda enye ẹto Zephaniah 1:14 emi ọdọhọde ete: “Akwa usen Jehovah emekpere.”
3 Sia akwa usen Abasi ekperede, oyom eben̄e idem idahaemi. Didie ke ekeme ndiben̄e idem nnọ usen Jehovah? Ndi oyom anam mme n̄kpọ efen efen man eben̄e idem ọnọ usen Jehovah?
Ẹdu ke Mben̄eidem
4. Ewe akwa idomo ke Jesus ekeben̄e idem ọnọ?
4 Ke ini Jesus Christ eketịn̄de ntịn̄nnịm ikọ aban̄a utịt editịm n̄kpọ emi, enye ama ọdọhọ mme mbet esie ete: “Ẹdu ke mben̄eidem.” (Matthew 24:44) Ke ini Jesus eketịn̄de ikọ emi, enye ke idemesie ama eben̄e idem ọnọ akwa idomo—kpa n̄kpa esie nte uwa ufak. (Matthew 20:28) Nso ke ikeme ndikpep nto usụn̄ oro Jesus ekeben̄ede idem?
5, 6. (a) Didie ke ima oro imade Abasi ye mme owo an̄wam nnyịn iben̄e idem inọ usen Jehovah? (b) Didie ke Jesus ekenịm uwụtn̄kpọ ọnọ nnyịn ke nte ikpamade mbọhọidụn̄ nnyịn?
5 Jesus ama ama Jehovah ye ndinen ibet Esie ke ofụri esịt. Mme Hebrew 1:9 etịn̄ aban̄a Jesus ete: “Afo amama edinen ido, onyụn̄ asua ubiatibet. Ntak edi oro Abasi, kpa Abasi fo, adade aran idatesịt eyet fi akan mme nsan̄a fo.” Ima oro Jesus akamade Ete esie eke heaven akanam enye ọsọn̄ọ ada ye Ete esie. Edieke nnyịn inyenede orụk ima oro inọ Abasi, inyụn̄ inamde se enye oyomde oto nnyịn, enye eyekpeme nnyịn. (Psalm 31:23) Orụk ima oro ye nsụkibuot ẹyenam nnyịn iben̄e idem inọ akwa usen Jehovah.
6 Ẹma ẹnen̄ede ẹfiọk ke Jesus ama ama mme owo. Ke akpanikọ, “enye [ama] atua mmọ mbọm, koro ẹfiomode ẹnyụn̄ ẹsuande mmọ nte erọn̄ eke mînyeneke andikpeme.” (Matthew 9:36) Ntre, Jesus ama ọkwọrọ eti mbụk ọnọ mme owo, kpa nte ima anamde nnyịn itan̄a etop Obio Ubọn̄ inọ mbọhọidụn̄ nnyịn. Ima oro imade Abasi ye mbọhọidụn̄ nnyịn anam nnyịn ika iso inam utom nnyịn nte mme asan̄autom Christian, ndien ke ntre iben̄e idem inọ akwa usen Jehovah.—Matthew 22:37-39.
7. Ntak emi ikpadatde esịt nte itiede ibet usen Jehovah?
7 Jesus ama ama ndinam uduak Jehovah. (Psalm 40:8) Edieke nnyịn imade ndinam uduak Jehovah nte Jesus akamade, nnyịn iyama ndinam edisana utom nnọ Abasi. Ukem nte Jesus, nnyịn iyama ndinọ mme owo n̄kpọ ke ofụri esịt, ndien emi ayanam inen̄ede ikop inemesịt. (Utom 20:35) Ke akpanikọ, ‘idatesịt Jehovah edi odudu nnyịn.’ Idatesịt emi ayanam nnyịn inen̄ede iben̄e idem inọ akwa usen Abasi.—Nehemiah 8:10.
8. Ntak emi nnyịn ikpenen̄ede isan̄a ikpere Jehovah ke akam?
8 Ndibọn̄ akam ke ofụri esịt ama an̄wam Jesus eben̄e idem ọnọ mme idomo. Enye ama ọbọn̄ akam ke ini John ekenịmde enye baptism. Jesus ama ada ofụri okoneyo kiet ọbọn̄ akam ke ini enye ekemekde mme apostle esie. (Luke 6:12-16) Inyụn̄ idụhe owo ekededi emi esikotde Bible, oro mîkpamaha ndikot mban̄a nte Jesus ọkọbọn̄de akam ke ofụri esịt ke akpatre okoneyo oro enye okodude ke isọn̄. (Mark 14:32-42; John 17:1-26) Nte emesima ndibọn̄ akam ukem nte Jesus? Bọn̄ akam nọ Jehovah ediwak ini, da ini bọn̄ akam, yom ndausụn̄ edisana spirit, nyụn̄ sọp nditiene ndausụn̄ oro ke ini ẹnọde fi. Enen̄ede oyom inyene ata eti itie ebuana ye Ete nnyịn eke heaven ke ndiọkeyo emi koro akwa usen Abasi enen̄ede ekpere. Ntre, sịn ọkpọsọn̄ ukeme, nen̄ede san̄a kpere Jehovah ke akam.—James 4:8.
9. Edikere mban̄a nte ẹkpenamde enyịn̄ Jehovah asana edi akpan n̄kpọ adan̄a didie?
9 Ndikere n̄ko mban̄a nte akpanamde enyịn̄ Jehovah asana ama an̄wam Jesus eben̄e idem ọnọ mme idomo oro ẹkesịmde enye. Ke akpanikọ, Jesus ama ekpep mme mbet esie ete ẹben̄e Abasi ẹte: “Yak ẹnam enyịn̄ fo asana.” (Matthew 6:9) Edieke nnyịn inen̄erede ikere iban̄a edinam enyịn̄ Jehovah asana, nnyịn idinamke n̄kpọ ekededi oro ekemede ndida esuene nsọk enyịn̄ esie. Emi ayanam inen̄ede iben̄e idem inọ akwa usen Jehovah.
Ndi Akpana Anam Mme Ukpụhọde?
10. Ntak emi ọfọnde idụn̄ọde idem nnyịn?
10 Edieke usen Jehovah okpoyomde ndidi n̄kpọn̄, ndi ekpesịm fi nte eben̄ede idem? Oyom nnyịn owo kiet kiet idụn̄ọde idem nnyịn man ise m̀mê oyom ikpụhọ ndusụk edu ye edinam nnyịn. Sia uwem owo mîniọn̄ke, owo mînyụn̄ ifiọkke se n̄kpọn̄ edidade edi, oyom kpukpru nnyịn idu ke edidemede ke n̄kan̄ eke spirit kpukpru usen. (Ecclesiastes 9:11, 12; James 4:13-15) Ntre, ẹyak ineme ndusụk n̄kpọ oro ẹkemede ndiyom ikere iban̄a ke uwem nnyịn.
11. Nso utịtmbuba ke enịm ọnọ edikot Bible?
11 Akpan n̄kpọ kiet edi item oro ‘ofụn anam akpanikọ’ ọnọde nnyịn ete ikot Bible kpukpru usen. (Matthew 24:45) Emekeme ndinam edi utịtmbuba fo ndikot nnyụn̄ ntie n̄kere se okotde ke N̄wed Abasi ọtọn̄ọde ke Genesis esịm Ediyarade ini kiet kpukpru isua. Edieke okotde ibuot inan̄ kpukpru usen, afo emekeme ndikot ofụri Bible emi enyenede ibuot 1,189 n̄kụre ke isua kiet. Akana edidem kiet kiet ke Israel esikot Ibet Jehovah “kpukpru usen uwem esie.” Etie nte Joshua ama esikot Ibet Jehovah kpukpru usen. (Deuteronomy 17:14-20; Joshua 1:7, 8) Edi akpan n̄kpọ didie ntem nte mme ekpemerọn̄ eke spirit ẹsikot Ikọ Abasi kpukpru usen, koro emi ayan̄wam mmọ ẹnọ ‘eti ukpep’!—Titus 2:1.
12. Usen Jehovah ndikpere okponụk fi anam nso?
12 Usen Jehovah ndikpere akpana anam esidụk mme mbono esop Christian kpukpru ini onyụn̄ abuana adan̄a nte ekekeme. (Mme Hebrew 10:24, 25) Ndinam ntre ayanam ofori usọ fo nte anditan̄a Obio Ubọn̄ oro oyomde onyụn̄ an̄wamde mbon oro ẹnyenede eti esịt ndinyene nsinsi uwem. (Utom 13:48) Ekeme ndiyom enen̄ede esịn idem n̄ko ke mme edinam esop ke mme usụn̄ en̄wen, utọ nte edin̄wam n̄kani owo ye edisịn udọn̄ nnọ mme uyen. Utọ nsịnifịk oro ekeme ndinam enen̄ede okop inemesịt.
Nte Anamde N̄kpọ ye Mbon En̄wen
13. Mme mbụme ewe ke nnyịn ikpobụp idem nnyịn ke se iban̄ade edimen obufa owo nsịne?
13 Sia usen Jehovah ekperede, nte oyom enen̄ede esịn ukeme man “[emen obufa owo esịne] emi ẹkebotde nte ekemde ye uduak Abasi ke ata edinen ido ye akpanikọ”? (Ephesus 4:20-24) Nte enyenede mme edu Abasi, mbon en̄wen ẹyekụt ke afo ke ‘asan̄a ke spirit Abasi,’ ke omonyụn̄ osion̄o mbun̄wụm spirit emi. (Galatia 5:16, 22-25) Ndi emekeme ndisiak mme akpan edinam oro ẹwụtde ke afo ye ubon fo ẹmemen obufa owo ẹsịne? (Colossae 3:9, 10) Ke uwụtn̄kpọ, ndi ẹdiọn̄ọ fi nte owo oro esifọnde ido ye ekemmọ mme andinịm ke akpanikọ m̀mê ye mbon en̄wen? (Galatia 6:10) Ndisikpep N̄wed Abasi kpukpru ini ayanam enyene nti edu oro ẹdinamde eben̄e idem ọnọ usen Jehovah.
14. Ntak emi owo oro odomode ndinyene mfara ke idem ekpeben̄ede Abasi edisana spirit?
14 Nso ke akpanam edieke edide owo oro esisọpde iyatesịt ndien ọdiọn̄ọ ke oyom ekpep ndinen̄ede mfara ke idem? Edisana spirit Abasi ekeme ndin̄wam fi enyene mfara ke idem. Ntre, bọn̄ akam ben̄e edisana spirit kpa nte Jesus eketemede ete: “Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹkọn̄, ndien ẹyeberede ẹnọ mbufo. . . . Edieke mbufo, emi ẹdiọkde, ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!”—Luke 11:9-13.
15. Nso ke akpanam edieke enyenede mfịna ye ekemmọ andinịm ke akpanikọ?
15 Nso ke akpanam edieke enyenede mfịna ye ekemmọ andinịm ke akpanikọ? Edieke mfịna odude, nam kpukpru se ekekeme man ọkọk mfịna oro, man emem ye edidianakiet ẹka iso ẹdu ke esop. (Psalm 133:1-3) Nam item Jesus oro ẹwetde ke Matthew 5:23, 24 m̀mê Matthew 18:15-17. Edieke esiyakde utịn osụhọde edisịm fi ke idaha iyatesịt, nam n̄kpọ usọp usọp man ọkọk mfịna oro. Ediwak ini, esiyom ẹnyịme ndifen nnọ owo. Paul ekewet ete: “Ẹfọn ido ye kiet eken, ẹtua owo mbọm, ẹfen kiet eken ke ofụri esịt kpa nte Abasi n̄ko ekefende mbufo ke ofụri esịt ebe ke Christ.”—Ephesus 4:25, 26, 32.
16. Ke mme usụn̄ ewe ke oyom ẹtua owo mbọm ke ndọ?
16 Oyom n̄wan ye ebe ẹnyene esịtmbọm, ndien ndusụk ini esiyom ẹfen kiet eken. Edieke oyomde enen̄ede ama onyụn̄ atua nsan̄a ndọ fo mbọm, yak Abasi ye Ikọ esie ẹn̄wam fi enen̄ede esịn ofụri ukeme anam emi. Ndi enyene se anade anam man ada 1 Corinth 7:1-5 esịn ke edinam, man otodo ekpetehede ube mfịghe onyụn̄ ọsọn̄ọ ada anam akpanikọ? Ke akpanikọ, emi edi ikpehe kiet emi oyomde ebe m̀mê n̄wan enen̄ede ‘atua owo mbọm.’
17. Nso ke owo akpanam edieke enye anamde akwa idiọkn̄kpọ?
17 Nso ke akpanam edieke anamde akwa idiọkn̄kpọ? Yom usụn̄ nen̄ede n̄kpọ usọp usọp nte ekekeme. Sịn ofụri ukeme yom un̄wam mbiowo. Akam ye item mmọ ẹyenam fi afiak okop nsọn̄idem ke n̄kan̄ eke spirit. (James 5:13-16) Bọn̄ akam nọ Jehovah nyụn̄ kabade esịt. Edieke etrede ndinam emi, esịt ayaka iso obiom fi. Emi ama etịbe ọnọ David, edi esịt ama enen̄ede efere enye ke ini enye akayararede idiọkn̄kpọ esie ọnọ Jehovah. Enye ekewet ete: “Ọfọfọn ọnọ owo eke ẹfende mme idiọk ido esie, ẹnyụn̄ ẹfụkde ndudue esie. Ọfọfọn ọnọ owo eke Jehovah mîbatke mme ukwan̄-n̄kpọ inọ enye, baba abian̄a mînyụn̄ idụhe ke spirit esie.” (Psalm 32:1-5) Jehovah esifen mbon oro ẹnamde idiọkn̄kpọ, emi ẹnen̄erede ẹkabade esịt.—Psalm 103:8-14; Mme N̄ke 28:13.
Ẹka Iso Ẹtre Ndidi Ubak Ererimbot
18. Afo ekpese ererimbot didie?
18 Eyịghe idụhe ke afo etetie ebet utịbe utịbe obufa ererimbot oro Ete nnyịn eke heaven ọn̄wọn̄ọde. Do, didie ke afo ese ererimbot ndiọi owo emi adianarede ọkpọn̄ Abasi mi? Satan, kpa “andikara ererimbot emi” ikenyeneke odudu ke idem Jesus Christ. (John 12:31; 14:30) Ke akpanikọ, afo uyomke Devil ye ererimbot esie ẹnyene odudu ke idem fo, ke ntre, nam item apostle John emi: “Ẹkûma ererimbot m̀mê se idude ke ererimbot.” Ọfọn anam oro, koro “ererimbot ke ebebe efep kpasụk ntre n̄ko ye mbumek esie, edi owo eke anamde uduak Abasi ododu ke nsinsi.”—1 John 2:15-17.
19. Ẹsịn udọn̄ ẹnọ mme uyen Christian ẹnyene nso orụk utịtmbuba?
19 Ndi ke an̄wam nditọ fo ‘ẹkpeme idem ẹnana ntọi ke ererimbot’? (James 1:27) Satan akpama ndifiọp nditọ fo nte emi owo ọfiọpde iyak ke uwam. Ẹtịm nsio nsio n̄ka ye otu man ẹnam mme uyen ẹbiet ererimbot Satan. Edi ikọt Jehovah ẹdodu ke esop kierakiet emi edibọhọde utịt idiọk editịm n̄kpọ emi. Ke ntre ẹkpenyene ndisịn udọn̄ nnọ mme uyen Christian ẹnyene “ekese ndinam ke utom Ọbọn̄.” (1 Corinth 15:58) Oyom mme ete ye eka oro ẹten̄ede Abasi ẹn̄wam nditọ mmọ ẹnịm mme utịtmbuba oro ẹdinamde mmọ ẹdu uwem oro ọnọde inemesịt onyụn̄ akamade utịp, ọnọde Abasi ubọn̄, onyụn̄ an̄wamde mmọ ẹben̄e idem ẹbet usen Jehovah.
Kûbet Akwa Usen Jehovah Kpọt
20. Ntak emi nnyịn ikpetiede ibet nsinsi uwem?
20 Afo eyenyene ifụre ekikere etie ebet usen Jehovah edieke etiede ebet nsinsi uwem. (Jude 20, 21) Afo odori enyịn ndidu nsinsi uwem ke Paradise, ndien ke ntem afo enyene idotenyịn ndifiak n̄kop odudu ini uyen ye nsinsi ini ndibịne nti utịtmbuba nnyụn̄ n̄kpep n̄kpọ mban̄a Jehovah. Afo emekeme ndinen̄ede n̄kpep n̄kpọ mban̄a Abasi ke nsinsi koro mme owo ẹfiọk “esisịt usụn̄ esie” kpọt. (Job 26:14, NW) Nso aduai-owo-idem idotenyịn ke emi edi ntem!
21, 22. Nso ke afo ye mbon oro ẹnamde ẹset ẹkeme ndineme mban̄a?
21 Ke Paradise, mbon oro ẹnamde ẹset ẹyesian nnyịn mme n̄kpọ oro nnyịn mîfiọkke iban̄a eset. Enoch ayasian nnyịn nte enye ekenyenede uko nditan̄a etop Jehovah nnọ mbon oro mîketen̄eke Abasi. (Jude 14, 15) Noah eyeneme nte mmọ ẹkesan̄ade ẹkọn̄ ubom. Abraham ye Sarah ẹyetịn̄ nte eketiede mmọ ke idem ndikpọn̄ inem uwem ke Ur n̄kodụn̄ ke tent. Kere nte Esther obụkde nte enye akadade ọnọ ikọt mmọ onyụn̄ abiat odu emi Haman okodụkde ndisobo mmọ. (Esther 7:1-6) Kere nte Jonah etịn̄de nte enye ekesịnede usen ita ke idịbi akamba iyak m̀mê nte John Andinịm Owo Baptism etịn̄de nte eketiede enye ke idem ke ini enye ekenịmde Jesus baptism. (Luke 3:21, 22; 7:28) Nso inem inem n̄kpọ ke idikpep ntem!
22 Ke Tọsịn Isua Ukara Christ, afo emekeme ndinyene ifet ndin̄wam mbon oro ẹnamde ẹset ẹnyene “ifiọk Abasi.” (Mme N̄ke 2:1-6) Nso n̄kpọ idatesịt ke edi ntem mfịn ndikụt nte mme owo ẹkọde ifiọk Jehovah Abasi ẹnyụn̄ ẹdade enye ẹsịn ke edinam! Nyụn̄ kere ban̄a idatesịt emi edinyenede ke ini oro, ke ini Jehovah edidiọn̄de ofụri ukeme oro esịnde ndikpep mbon oro ẹkedude uwem toto ke eset n̄kpọ, ye nte mmọ ẹdinyịmede ukpepn̄kpọ oro ye idatesịt!
23. Nso ke ikpebiere ndinam?
23 Sia nnyịn idide mme anana-mfọnmma owo, nnyịn ikemeke ndibat m̀mê ndifiọk kpukpru edidiọn̄ oro inyenede idahaemi ke ntak emi idide ikọt Jehovah. (Psalm 40:5) Edi nnyịn imenen̄ede ikop inemesịt iban̄a nti n̄kpọ eke spirit oro Abasi ọnọde nnyịn. (Isaiah 48:17, 18) Inamke n̄kpọ m̀mê nso idi idaha nnyịn, ẹyak ida ofụri esịt inam edisana utom inọ Abasi nte itiede ibet akwa usen Jehovah.
Didie ke Afo Ọkpọbọrọ?
• Nso idi “usen Jehovah”?
• Didie ke ekeme ndiben̄e idem nnọ usen Jehovah?
• Sia akwa usen Jehovah ekperede ntem, mme ukpụhọde ewe ke oyom inam?
• Nso ke odori enyịn aban̄a ke usen Jehovah ama ekebe?
[Mme Mbụme Ukpepn̄kpọ]
[Ndise ke page 12]
Jesus ama eben̄e idem ọnọ mme idomo
[Ndise ke page 15]
Nso ifet ke edidi ntem ndin̄wam mbon oro ẹnamde ẹset ẹnyene ifiọk ẹban̄a Jehovah!