Nte Emenyene Ọnọitem Eke Spirit?

EKPRI Uzziah emi ekedide isua 16 ama akabade edi edidem obio ubọn̄ edem usụk ke Judah. Enye ama akara ke se ibede isua 50, ọtọn̄ọde ke utịt utịt ọyọhọ isua ikie usụkkiet tutu esịm ntọn̄ọ ntọn̄ọ ọyọhọ isua ikie itiaita M.E.N. Uzziah ama “anam se inende ke iso Jehovah” toto ke uyen. Nso ikan̄wam enye anam se inende? Bible ọdọhọ ete: “[Uzziah] etiene Abasi ke eyo Zechariah, [“kpa anditeme nte ẹbakde ata,” NW] Abasi: ndien adan̄a ini nte enye etienede Jehovah, Abasi ofori enye.”—2 Chronicles 26:1, 4, 5.

Ke ẹsiode se ẹtịn̄de emi ke Bible ẹfep, nnyịn inen̄ekede ifiọk n̄kpọ iban̄a Zechariah, kpa owo emi ekesinọde edidem item. Edi sia Zechariah ekedide “anditeme nte ẹbakde ata Abasi,” enye ama esịn udọn̄ ọnọ akparawa emi ekedide andikara mi anam se inende. The Expositor’s Bible ọdọhọ ke Zechariah “ama enen̄ede ọfiọk N̄wed Abasi, enyene ifiọk aban̄a nte ẹnamde n̄kpọ Abasi, onyụn̄ ekeme ndikpep mbon en̄wen se enye ọfiọkde.” Eyen ukpepn̄kpọ Bible kiet eketịn̄ ntem aban̄a Zechariah: “Enye ama enen̄ede ọfiọk ntịn̄nnịm ikọ onyụn̄ . . . edi owo ọniọn̄, andisịn ifịk nnam n̄kpọ Abasi, ye ata eti owo; ndien etie nte enye ama esinen̄ede esịn udọn̄ ọnọ Uzziah.”

Ẹma ẹnen̄ede ẹdiọn̄ Uzziah ke ntak emi enye akanamde akpanikọ, ndien enye ama ‘ọsọn̄ ubọk etieti’ koro ‘Abasi ama an̄wam enye.’ Ke akpanikọ, Uzziah ndikanam mme n̄kpọ eke spirit akanam enye oforo “ke eyo Zechariah.” (2 Chronicles 26:6-8) Ke Uzziah ama okoforo, enye ama ọkpọn̄ se Zechariah, kpa owo emi ekesinọde enye item, ekekpepde enye. “Esịt [Uzziah] akabade okpon, esịn enye ọdiọk, ndien enye edue Jehovah.” Ke ntak akpan idiọk edinam oro Uzziah akanamde, ẹma ẹtọ enye odoro-owo-ndidien udọn̄ọ, ndien emi ikayakke enye anam kpukpru se edidem akpanamde.—2 Chronicles 26:16-21.

Ndi emenyene owo oro ekemede ndikot andikpep m̀mê ọnọitem oro esisịnde udọn̄ ọnọ fi “etiene Abasi”? Edide afo edi eyenọwọn̄ m̀mê akwa owo, eren m̀mê n̄wan, afo emekeme ndinyene ọnọitem. Da utọ ọnọitem oro nte ata akpan owo, koro item esie ekeme ndinam fi aka iso anam se inende ke enyịn Jehovah. Kpan̄ utọn̄ nọ Christian oro ọkọride esịm ọyọhọ idaha mi nyụn̄ nen̄ede nam item oro enye ọnọde fi. Kûdedei ukpọn̄ nti item oro “anditeme nte ẹbakde ata Abasi” ọnọde.—Mme N̄ke 1:5; 12:15; 19:20.