Ẹbat ke Ẹdot Se Ẹdade Ẹka Obube Mmọn̄ Uwem
Ẹbat ke Ẹdot Se Ẹdade Ẹka Obube Mmọn̄ Uwem
“Eyenerọn̄ . . . eyekpeme mmọ, oyonyụn̄ ada mmọ usụn̄ aka ke obube mmọn̄ uwem.”—EDI. 7:17.
1. Didie ke Ikọ Abasi anam ẹfiọk mme Christian oro ẹyetde aran, ndien nso utom ke Jesus ọkọnọ mmọ?
IKỌ ABASI ọdọhọ ke mme Christian oro ẹyetde aran, emi ẹsede ẹban̄a inyene Christ ke isọn̄ ẹdi “ofụn oro anamde akpanikọ onyụn̄ enyenede ọniọn̄.” Ke ini Christ ekedide edise “ofụn” emi ke 1918, enye ama okụt ke mmọ ke ẹnọ “udia [eke spirit] ke edikem ini.” Ntre, Jesus, kpa Eteufọk mmọ, ama enem esịt ndimek mmọ “ẹse ẹban̄a kpukpru inyene esie.” (Kot Matthew 24:45-47.) Ntem ke mbon oro ẹyetde aran ẹnam n̄kpọ ẹnọ nditọete mmọ mi ke isọn̄ mbemiso ẹbọde udeme mmọ ke heaven.
2. Nso idi inyene Jesus?
2 Eteufọk enyene odudu ndida inyene esie nnam nte enye amade. Inyene Jesus Christ, emi edide Edidem emi Jehovah ayaride ntinya, esịne kpukpru n̄kpọ oro ẹban̄ade Obio Ubọn̄ mi ke isọn̄. Oro esịne “akwa otuowo” emi apostle John okokụtde ke n̄kukụt. John eketịn̄ ntem aban̄a akwa otuowo: “Sese! akwa otuowo, emi baba owo kiet mîkemeke ndibat, eke ẹtode ke kpukpru idụt ye esien ye obio ye usem, ẹdade ke iso ebekpo ye ke iso Eyenerọn̄, ẹsịne mfia ekụra; mmọ ẹnyụn̄ ẹkama ndakeyop ke ubọk.”—Edi. 7:9.
3, 4. Nso akwa ifet ke akwa otuowo ẹnyene?
3 Akwa otuowo ẹsịne ke otu mbon oro Jesus ọkọdọhọde ke ẹdi “mme erọn̄ en̄wen” oro imọ inyenede. (John 10:16) Mmọ ẹnyene idotenyịn ndidu uwem ke nsinsi ke Paradise isọn̄. Mmọ ẹnen̄ede ẹnịm ke Jesus “[ayada] mmọ usụn̄ aka ke obube mmọn̄ uwem” ye nte ke “Abasi ọyọkwọhọde kpukpru mmọn̄eyet ke enyịn mmọ efep.” Emi anam mmọ “[ẹyet] ekụra mmọ ẹnam afia ke iyịp Eyenerọn̄.” (Edi. 7:14, 17) Mmọ ẹbuọt idem ke uwa Jesus, ndien ke ntem Abasi ada ke mmọ ẹsịne ‘afia ekụra.’ Ẹbat mmọ ke edinen nte ufan Abasi, ukem nte ẹkebatde Abraham.
4 Akan oro, sia Abasi abatde akwa otuowo emi ẹdide ubak mme erọn̄ en̄wen emi ẹkade-ka iso nditọt nte ndinen, mmọ ẹdori enyịn ndibọhọ nsobo editịm n̄kpọ emi ke akwa ukụt. (Jas. 2:23-26) Mmọ ẹkeme ndisan̄a n̄kpere Jehovah, ndien nte otu, mmọ ẹnyene utịbe utịbe idotenyịn ndibọhọ Armageddon. (Jas. 4:8; Edi. 7:15) Mmọ idaha ke idem edi ẹnyịme ndinam utom ke ndausụn̄ Edidem eke heaven ye eke nditọete esie oro ẹyetde aran, emi ẹdude ke isọn̄.
5. Didie ke akwa otuowo ẹn̄wam nditọete Christ oro ẹyetde aran?
5 Mme Christian oro ẹyetde aran ẹmesobo, ẹyenyụn̄ ẹka iso ẹsobo ọkpọsọn̄ ubiọn̄ọ ke ererimbot Satan. Edi mmọ ẹkeme ndiberi edem ke akwa otuowo emi ẹdide nsan̄a mmọ. Ke adan̄aemi mme Christian oro ẹyetde aran mîwakke, kpukpru isua ediwak tọsịn owo ẹsidiana ye akwa otuowo. Mbon oro ẹyetde aran ikemeke ndise enyịn ke idemmọ mban̄a kiet kiet ke n̄kpọ nte esop 100,000 oro ẹdude ke ofụri ererimbot. Ntem, irenowo oro ẹdotde emi ẹdude ke otu akwa otuowo ndidi mbiowo esop edi un̄wam kiet oro mme erọn̄ en̄wen ẹnọde mbon oro ẹyetde aran. Mmọ ẹn̄wam ẹse ẹban̄a ediwak miliọn nditọete oro ẹyakde ẹsịn “ofụn emi anamde akpanikọ onyụn̄ enyenede ọniọn̄,” ke ubọk.
6. Didie ke ẹkebem iso ẹtịn̄ ke mme erọn̄ en̄wen ẹyen̄wam mme Christian oro ẹyetde aran?
6 Prọfet Isaiah ama ebem iso etịn̄ ke mme erọn̄ en̄wen ẹyen̄wam nsan̄a mmọ oro ẹdide mme Christian oro ẹyetde aran. Enye ekewet ete: “Ntem ke Jehovah ọdọhọ, ete, [Mbonutom Egypt oro owo mîkpehe-kpe ye mbonurua Ethiopia], ye eke mme Sebean, nyan owo, ẹyebe ẹtiene fi, ẹnyụn̄ ẹnyene fi: ẹyetiene fi ẹka.” (Isa. 45:14) Ke ndamban̄a usụn̄, mme Christian mfịn oro ẹnyenede idotenyịn ndidu ke isọn̄ ke ẹtiene otu ofụn oro ẹyetde aran ye Otu Ukara esie ẹka, oro edi ẹtiene ndausụn̄ mmọ. Mme erọn̄ en̄wen emi ẹdide ‘mbonutom oro owo mîkpehe-kpe’ ẹda ofụri odudu ye inyene mmọ ke ofụri esịt ẹn̄wam ke utom ukwọrọikọ ofụri ererimbot emi Christ ọkọnọde mme anditiene enye oro ẹyetde aran, emi ẹdude ke isọn̄.—Utom 1:8; Edi. 12:17.
7. Ẹnọ akwa otuowo ukpep ẹben̄e nso?
7 Nte akwa otuowo ẹkade iso ẹn̄wam nditọete mmọ oro ẹyetde aran, mmọ ke ẹbọ ukpep man ẹkpeda mmọ ẹtọn̄ọ obufa n̄kaowo oro ẹdidude ke Armageddon ama ekebe. Ana mmọ ẹnyene iwụk, ẹnyụn̄ ẹnyịme ndinam se Eteufọk mmọ ọdọhọde. Ẹnọ Christian kiet kiet ifet ndiwụt ke imọ imenyịme ndinam se Edidem Jesus Christ etemede. Edieke enye enyenede mbuọtidem onyụn̄ anamde akpanikọ idahaemi, enye owụt ke imọ iyenyịme ndinam se ẹdidọhọde imọ inam ke ini Edidem ọnọde ndausụn̄ ke obufa ererimbot.
Akwa Otuowo Ẹwụt ke Imenyene Mbuọtidem
8, 9. Didie ke akwa otuowo ẹwụt ke imenyene mbuọtidem?
8 Mme erọn̄ en̄wen emi ẹdide nsan̄a mme andidu ke esop mme Christian oro ẹyetde aran ẹwụt ke imenyene mbuọtidem ke nsio nsio usụn̄. Akpa, mmọ ẹn̄wam mbon oro ẹyetde aran ke nditan̄a eti mbụk Obio Ubọn̄ Abasi. (Matt. 24:14; 28:19, 20) Ọyọhọ iba, mmọ ẹnyịme ndisụhọde idem ntiene ndausụn̄ oro Otu Ukara ọnọde.—Heb. 13:17; Kot Zechariah 8:23.
9 Ọyọhọ ita, akwa otuowo ẹn̄wam nditọete mmọ oro ẹyetde aran ke ndida ndinen edumbet Jehovah nsịn ke edinam. Mmọ ẹdomo ndinyene “ima, idatesịt, emem, anyanime, mfọnido, eti ido, mbuọtidem, ifụre ifụre ido, mfara ke idem.” (Gal. 5:22, 23) Mfịn, mme owo isinyeneke mme utọ edu emi, utu ke oro, mmọ ẹsinam “mme utom obụkidem.” Edi akwa otuowo ẹbiere ndifep “use, mbubiam ido, obukpo ido, ukpono ndem, ubụpekpo, usua, utọk, ufụp, obom obom iyatesịt, ndomoidem, ubahade, isio n̄ka, isịnenyịn, mbun̄wọn̄i, uyom uyom usọrọ, ye mme n̄kpọ eke ẹbietde mmọ emi.”—Gal. 5:19-21.
10. Nso ke akwa otuowo ẹbiere ndinam?
10 Sia nnyịn idide mme anana-mfọnmma owo, ekeme ndisọn̄ nnyịn ndision̄o mbun̄wụm spirit, ndifep mme utom obụkidem, ndinyụn̄ n̄n̄wana ye ererimbot Satan. Edi, nnyịn imebiere ke nnyịn idiyakke mmemidem, ndudue, m̀mê udọn̄ọ anam mbuọtidem nnyịn emem m̀mê anam ima oro imade Jehovah ebịt. Nnyịn imọfiọk ke Jehovah ayanam kpa nte enye ọkọn̄wọn̄ọde—oro edi, ndinịm akwa otuowo uwem mbe akwa ukụt.
11. Didie ke Satan esidomo ndinam mbuọtidem mme Christian emem?
11 Nte ededi, oyom nnyịn ika iso idu ke ukpeme koro imọfiọk ke Satan emi edide ata asua nnyịn isision̄oke idem ikpọn̄ owo ntre ntre. (Kot 1 Peter 5:8.) Enye odomo ndida mbon mfiakedem ye mbon en̄wen nnam nnyịn inịm ke se ẹkpepde nnyịn idịghe akpanikọ. Edi emi esikpu kpukpru ini. Kpasụk ntre, okposụkedi emi ukọbọ esinamde ẹtehede ube ndusụk ini ke utom ukwọrọikọ, ediwak ini enye esikam ọsọsọn̄ọ mbuọtidem mbon oro ẹkọbọde. Ntre, Satan esinen̄ede ama ndida usụn̄ oro enye ekerede ke ayanam mbuọtidem nnyịn emem. Enye esidomo nnyịn ke ini idem ememde nnyịn. Ẹma ẹdụri mme Christian utọn̄ ke akpa isua ikie ẹban̄a emi ke ini ẹkedọhọde mmọ ẹte: “Ẹtịm ẹkere ẹban̄a [Christ] emi ọkọyọde utọ isa isa ikọ oro mme anamidiọk ẹketịn̄de ẹbiọn̄ọ ufọn idemmọ.” Ntak-a? “Mbak mbufo ẹdikpa mba ẹnyụn̄ ẹkop mmemidem ke ukpọn̄ mbufo.”—Heb. 12:3.
12. Didie ke item Bible esịn udọn̄ ọnọ mbon oro idem ememde?
12 Ndi akanam emekere ke akpana etre ndinam n̄kpọ Jehovah? Ndi akanam emekere ke imọ inamke ọfọn? Edieke edide ntre, kûyak Satan ada mme utọ ekikere emi akpan fi ndinam n̄kpọ Jehovah. Edinen̄ede nsịn idem n̄kpep Bible, edibọn̄ akam ofụri esịt, editiene ndụk mme mbono esop kpukpru ini ọkọrọ ye edidụk nsan̄a ye ekemmọ mme Christian ẹyesọn̄ọ mbuọtidem fo; idinyụn̄ iyakke ‘okop mmemidem ke ukpọn̄ fo.’ Jehovah ọn̄wọn̄ọ ndin̄wam mbon oro ẹnamde n̄kpọ ẹnọ imọ ẹfiak ẹkop nsọn̄idem, ndien un̄wọn̄ọ esie enyene ndisu. (Kot Isaiah 40:30, 31.) Ka iso nam utom Obio Ubọn̄. Fep mme edinam oro ẹsibiatde owo ini ẹnyụn̄ ẹwọn̄ọrede ntịn̄enyịn owo, nyụn̄ ka iso n̄wam mbon en̄wen. Oro ọyọsọn̄ọ fi idem man ekeme ndiyọ unana udọn̄.—Gal. 6:1, 2.
Ẹnyan̄a Ẹsio ke Ukụt Ẹsịn ke Obufa Ererimbot
13. Nso utom ke mbon oro ẹbọhọde Armageddon ẹdinam?
13 Ke Armageddon ama ekebe, oyoyom ẹkpep akwa udịm mme anam ukwan̄n̄kpọ oro ẹdinamde ẹset mme usụn̄ Jehovah. (Utom 24:15) Oyoyom ẹkpep mmọ n̄kpọ ẹban̄a uwa ufak Jesus; ndien ke akam akande oro, ana ẹkpep mmọ ndibuọt idem ke uwa ufak oro man ẹbọ mme ufọn esie. Oyoyom mmọ ẹsịn mme ekikere nsunsu ido ukpono oro mmọ ẹkenyenede ẹnyụn̄ ẹkpọn̄ akani usụn̄ uwem mmọ. Mmọ ẹnyene ndikpep ndimen obufa owo nsịne emi ediwụtde ke mmọ ẹdi ata mme Christian. (Eph. 4:22-24; Col. 3:9, 10) Mme erọn̄ en̄wen oro ẹdibọhọde ẹyenyene ekese utom ndinam. Nso idatesịt ke edidi ntem ndinam mme n̄kpọ emi nnọ Jehovah, ndinyụn̄ mbọhọ mfịghe ye mme n̄kpọ oro ẹwọn̄ọrede owo ntịn̄enyịn ke idiọk ererimbot emi!
14, 15. Nso ke mme andibọhọ akwa ukụt ye ndinen owo oro ẹnamde ẹset ẹdineme?
14 Mme anam-akpanikọ asan̄autom Jehovah oro ẹkekpan̄ade mbemiso ini utom ukwọrọikọ Jesus mi ke isọn̄ ẹyenyene ekese ndikpep. Mmọ ẹyediọn̄ọ enye emi ekedide Messiah oro ẹken̄wọn̄ọde, emi mmọ ẹkedoride enyịn ndikụt, edi mîkekwe. Mbemiso mmọ ẹkpade, mmọ ẹma ewowụt ke iyenyịme Jehovah ekpep mmimọ. Ke uwụtn̄kpọ, kam kere ban̄a akwa idatesịt ye ifet oro edinyenede ndin̄wam mmọ ẹsian Daniel nte mme ntịn̄nnịm ikọ oro enye ekewetde, edi oro enye mîkọfiọkke se ọwọrọde, ẹkesude!—Dan. 12:8, 9.
15 Edi akpanikọ ke okposụkedi emi mbon oro ẹdinamde ẹset ke n̄kpa ẹdinyenede ekese ndikpep nto nnyịn, nnyịn iyenyene ediwak mbụme ndibụp mmọ. Mmọ ẹkeme ndinọ nnyịn ọyọhọ mbụk mban̄a mme n̄kpọ oro ẹtịn̄de ibio ibio ke Bible. Edinem didie ntem ndikop John Andinịm Owo Baptism, kpa eyen eyeneka eka Jesus, obụkde mme ọkpọkpọ n̄kpọ oro ẹban̄ade Jesus! Anaedi se mme anam-akpanikọ ntiense emi ẹdikpepde nnyịn ẹyenam N̄wed Abasi enen̄ede an̄wan̄a nnyịn akan nte an̄wan̄ade idahaemi. Ediset ke n̄kpa mme anam-akpanikọ asan̄autom Jehovah—esịnede akwa otuowo oro ẹkpan̄ade ke utịt ini emi—edidi “ediset ke n̄kpa oro ọfọnde akan.” Mmọ ẹketọn̄ọ ndinam n̄kpọ Jehovah ke ererimbot emi Satan akakarade. Nso n̄kpọ idatesịt ke edidi ntem ọnọ mmọ ndika iso ke utom mmọ ke obufa ererimbot emi n̄kpọ ẹdifọnde ẹkan idahaemi!—Heb. 11:35; 1 John 5:19.
16. Nte ẹkebemde iso ẹtịn̄ ke ntịn̄nnịm ikọ, didie ke ẹdibiere ikpe ke Usen Ikpe?
16 Ẹyekụbọde mme n̄wed nte ini akade ke Usen Ikpe. Ẹdida mme n̄wed oro ye Bible ẹbiere m̀mê owo odot ndinyene nsinsi uwem. (Kot Ediyarade 20:12, 13.) Etisịm utịt Usen Ikpe, anaedi owo kiet kiet eyenyene ini oro ekemde ndiwụt m̀mê anie ke imọ inyịme ite edi andikara ofụri ekondo. Ndi enye oyosụk idem ọnọ ndutịm Obio Ubọn̄ onyụn̄ ayak Eyenerọn̄ ada enye aka “obube mmọn̄ uwem”? Mîdịghe nte enye ọyọbiọn̄ọ onyụn̄ etre ndisụk ibuot nnọ Obio Ubọn̄ Abasi? (Edi. 7:17; Isa. 65:20) Adan̄a oro, anaedi kpukpru owo ẹyenam ubiere idemmọ, ndien idiọkn̄kpọ oro ikadade-da imana m̀mê idiọk ererimbot emi idikpanke ubiere emi. Owo ndomokiet idikemeke ndidọhọ ke akpatre ubiereikpe Jehovah inenke. Mme idiọkowo kpọt ke ẹdisobo ke nsinsi.—Edi. 20:14, 15.
17, 18. Nso idotenyịn oro adatde owo esịt ke mme Christian oro ẹyetde aran ye mme erọn̄ en̄wen ẹnyene ẹban̄a Usen Ikpe?
17 Mfịn, mme Christian oro ẹyetde aran, emi ẹbatde nte mbon oro ẹdotde ndida Obio Ubọn̄ nnyene ẹtetie ẹbet ini oro mmọ ẹdikarade ke Usen Ikpe. Nso akwa ifet ke mmọ ẹdinyene ntem! Idotenyịn emi anam mmọ ẹnam item oro apostle Peter ọkọnọde nditọete esie ke akpa isua ikie ete: “Ẹsịn ofụri ukeme mbufo ndinam ikot ye edimek eke ẹkemekde mbufo ẹnyene nsọn̄ọ; koro edieke mbufo ẹkade iso ndinam mme n̄kpọ emi mbufo idituakke ukot iduọn̄ọ. Ke akpanikọ, ntem ke ẹdiberede usụn̄ ẹnịm ata in̄wan̄ ẹnọ mbufo ndibe ndụk ke nsinsi obio ubọn̄ Ọbọn̄ ye Andinyan̄a nnyịn Jesus Christ.”—2 Pet. 1:10, 11.
18 Mme erọn̄ en̄wen ẹdat esịt ye nditọete mmọ oro ẹyetde aran ẹnyụn̄ ẹbiere ndin̄wam mmọ. Sia mmọ ẹdide ufan Abasi mfịn, mmọ ẹma ndisịn ofụri ukeme mmọ ke utom Abasi. Ke Usen Ikpe oro, mmọ ẹyedat esịt ndinọ ndutịm Abasi ibetedem ke ofụri esịt ke ini Jesus edidade mmọ aka obube mmọn̄ uwem. Do—ke akpatre—ẹyenen̄ede ẹbat mmọ nte mbon oro ẹdotde ndidi mme asan̄autom Jehovah ke nsinsi nsinsi!—Rome 8:20, 21; Edi. 21:1-7.
Nte Afo Emeti?
• Nso idi inyene Jesus?
• Didie ke akwa otuowo ẹn̄wam nditọete mmọ oro ẹyetde aran?
• Nso ifet ye idotenyịn ke akwa otuowo ẹnyene?
• Afo ese didie Usen Ikpe?
[Mme Mbụme Ukpepn̄kpọ]
[Ndise ke page 25]
Akwa otuowo ẹmeyet ekụra mmọ ẹnam afia ke iyịp Eyenerọn̄
[Ndise ke page 27]
Nso ke ediyom mme anam-akpanikọ oro ẹdinamde ẹset ẹsian fi?