Ẹsisak Mme Christian nte Wheat

ESISỊT ini mbemiso Jesus akakpade, enye ama odụri mme mbet esie utọn̄ ete: “Sese! Satan ekeben̄e oyom mbufo man asak mbufo nte wheat.” (Luke 22:31) Nso ke ikọ esie ọkọwọrọ?

Edikpen̄e wheat ama esinen̄ede ada ini ye ukeme ke eyo Jesus. Akpa, mbon ukpen̄e ẹtan̄ esan̄ wheat oro mmọ ẹkekpen̄ede ke in̄wan̄ ẹbok ọtọkiet. Ekem, mmọ ẹtịm wheat oro mîdịghe ẹda ndodobi ukwak emi unam oro ẹsidade ẹnam utom ke in̄wan̄ oyụtde, ẹdịghi mmọ. Ndinam ntem esinuak mme wheat emi osion̄o ke esan̄ ye ke ikpọk mmọ. Ekem, mme ọtọin̄wan̄ ẹsak wheat ke ndiwobi kpukpru n̄kpọ ntomo ke ofụm. Ata idem wheat ẹfiak ẹdiduọn̄ọ ke isọn̄ itie udịghi n̄kpasịp, edi ofụm emen mbio efep. Ke akpatre, ẹyenen̄ede ẹsak wheat emi man ẹsion̄o mbio ekededi ẹfep.

Nte Jesus eketịn̄de, Satan ama enen̄ede an̄wana ye akpa mme mbet Jesus, ndien enye ke an̄wana ye nnyịn mfịn. (Eph. 6:11) Edi akpanikọ, idịghe Satan enen̄ede edi ntak kpukpru mfịna oro nnyịn isobode. (Eccl. 9:11) Edi Satan etetie ebet ndida usụn̄ ekededi oro enye enyenede mbiat nsọn̄ọnda nnyịn. Ke uwụtn̄kpọ, enye ekeme ndida uma-inyene, mme edinam unọ idem inemesịt oro mîfọnke, m̀mê oburobụt ido idan̄, ndomo nnyịn. Enye ekeme n̄ko ndida mme nsan̄a ke ufọkn̄wed m̀mê ke itieutom ye iman nnyịn oro mînịmke ke akpanikọ nnyịk nnyịn iyom ndika kpukpru ufọkn̄wed m̀mê ndikpep kpukpru ubọkọkọ oro ẹdude ke ererimbot emi. Ke adianade do, Satan ekeme ndida ata ata ukọbọ ndomo ndibiat nsọn̄ọnda nnyịn ye Abasi. Nte ededi, odu ediwak usụn̄ en̄wen oro Satan esidade asak nnyịn.

Didie ke nnyịn ikeme ndisọn̄ọ nda n̄n̄wana ye okopodudu asua emi? Nnyịn ikemeke ndinam oro ke odudu idem nnyịn. Satan okop odudu akan nnyịn; edi nnyịn imọfiọk ke Jehovah enen̄ede okop odudu akan Satan. Edieke inen̄erede ibuọt idem ye Jehovah, ibọn̄de akam ke ofụri esịt iyom ọniọn̄ ye uko man iyọ, inyụn̄ inen̄erede iberi edem ke ndausụn̄ esie, enye ayan̄wam nnyịn isọn̄ọ ida in̄wana ye Satan.—Ps. 25:4, 5.

Ke ini idomo, oyom inyene ukeme ndifiọk “se inende ye se idiọkde,” ndien oro idiyakke Satan ada mme n̄kukan esie otụn nnyịn usụn̄. (Heb. 5:13, 14) Jehovah ekeme ndin̄wam nnyịn inyene orụk ukeme oro. Onyụn̄ oyom ika iso inam se inende inamke n̄kpọ m̀mê nso itịbe. Edieke ikade iso itiene ndausụn̄ Jehovah, enye ayaka iso an̄wam onyụn̄ anam nnyịn inyene uko man inam se inende.—Eph. 6:10.

Satan ekeme ndidomo ndisak nnyịn nte wheat. Edi Jehovah ekeme ndin̄wam nnyịn isọn̄ọ ida in̄wana ye enye, inyụn̄ isọn̄ọ ida ke mbuọtidem. (1 Pet. 5:9) Ih, Ikọ Jehovah ọn̄wọn̄ọ ọnọ nnyịn ete: “Ẹbiọn̄ọ Devil, ndien enye eyefehe ọkpọn̄ mbufo.”—Jas. 4:7.