“Mbon Oro Ẹnyenede Eti Esịt” ke Ẹyere Ikot
“Mbon Oro Ẹnyenede Eti Esịt” ke Ẹyere Ikot
“Kpukpru mbon oro ẹnyenede eti esịt ndinyene nsinsi uwem ẹkabade ẹdi mme andinịm ke akpanikọ.”—UTOM 13:48.
1, 2. Didie ke akpa mme Christian ẹkenam n̄kpọ ẹban̄a se Jesus ekebemde iso etịn̄ ete ke ẹyekwọrọ eti mbụk ke ofụri isọn̄?
ẸWET aduai-owo-idem mbụk ke n̄wed Utom Mme Apostle oro aban̄ade nte akpa mme Christian ẹkenamde n̄kpọ ẹban̄a se Jesus ekebemde iso etịn̄ ete ke ẹyekwọrọ eti mbụk Obio Ubọn̄ ke ofụri isọn̄. (Matt. 24:14) Ifịk ifịk mme ọkwọrọikọ ẹma ẹnịm uwụtn̄kpọ ẹnọ mbon oro ẹditienede mmọ ke edem. Ke ntak ifịk ifịk ikọ ntiense oro mme mbet Jesus ẹkenọde ke Jerusalem, ata ediwak owo, emi esịnede “akwa otu mme oku,” ẹma ẹbụn̄ọ ẹdụk esop ke akpa isua ikie.—Utom 2:41; 4:4; 6:7.
2 Mme isụn̄utom oro ẹkedude ke akpa isua ikie ẹma ẹn̄wam ata ediwak owo ẹdụk Ido Ukpono Christ. Ke uwụtn̄kpọ, Philip ama aka Samaria, ndien ata ediwak owo ẹma ẹkpan̄ utọn̄ ẹnọ enye. (Utom 8:5-8) Paul ama esisan̄a ye nsio nsio owo aka isan̄, ọkwọrọ aban̄a Christ ke Cyprus, ndusụk ikpehe Asia Minor, Macedonia, Greece, ye Italy. Akwa udịm mme Jew ye mbon Greece ẹma ẹkabade ẹdi mme andinịm ke akpanikọ ke mme obio oro enye ọkọkwọrọde ikọ. (Utom 14:1; 16:5; 17:4) Titus ọkọkwọrọ ikọ ke Crete. (Titus 1:5) Peter ọkọkwọrọ ikọ ke Babylon, ndien etisịm ini oro enye ekewetde akpa leta esie, ke n̄kpọ nte isua 62 esịm 64 E.N., mme owo ẹma ẹnen̄ede ẹmehe ye utom mme Christian ke Pontus, Galatia, Cappadocia, Asia, ye Bithynia. (1 Pet. 1:1; 5:13) Nso ini nduaidem ke mme ini emi ẹkedi ntem! Mme Christian akpa isua ikie ẹma ẹnen̄ede ẹsịn ifịk ẹkwọrọ ikọ tutu mme asua mmọ ẹdọhọ ke mme Christian ẹdi mbon oro “ẹtịmerede isọn̄.”—Utom 17:6; 28:22.
3. Nso utịp ke utom mme anditan̄a etop Obio Ubọn̄ enyene mfịn, ndien emi anam etie fi didie ke idem?
3 Esop Christian enen̄ede ọkọri mfịn n̄ko. Nte isinemke fi ndikot ibatutom Mme Ntiense Jehovah eke isua ke isua nnyụn̄ n̄kụt se mmọ ẹnamde ke ofụri ererimbot? Nte inemke fi ndifiọk ke mme anditan̄a Obio Ubọn̄ ẹma ẹnịm se ibede ukpepn̄kpọ Bible miliọn itiokiet ke isua utom 2007? Ke adianade do, ibat mme andikodụk Editi n̄kpa Jesus Christ owụt ke n̄kpọ nte miliọn owo duop emi mîdịghe Mme Ntiense Jehovah ẹma ẹnen̄ede ẹnyene udọn̄ ke eti mbụk ẹnyụn̄ ẹdụk akpan edinam emi. Emi owụt ke ekese ke osụk ododu ndinam.
4. Mmanie ẹnam n̄kpọ ẹban̄a etop Obio Ubọn̄?
4 “Kpukpru mbon oro ẹnyenede eti esịt ndinyene nsinsi uwem” ke ẹnam n̄kpọ ẹban̄a etop akpanikọ mfịn, kpa nte ẹkenamde ke akpa isua ikie. (Utom 13:48) Jehovah ke atan̄ mme owo ọdọn̄ ke esop esie. (Kot Haggai 2:7.) Nso edu ke oyom nnyịn inyene iban̄a utom nnyịn nte mme Christian man ikeme ndidiana kiet nnam utom editan̄ mbok emi mma?
Kwọrọ Ikọ ye Unana Asari
5. Nso orụk owo ke Jehovah ama?
5 Akpa mme Christian ẹma ẹfiọk ke “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.” (Utom 10:34, 35) Man owo enyene eti itie ebuana ye Jehovah, oyom enye ọbuọt idem ke uwa ufak Jesus. (John 3:16, 36) Ndien edi uduak Jehovah nte “kpukpru orụk owo ẹkpenyene edinyan̄a ẹnyụn̄ ẹsịm nnennen ifiọk akpanikọ.”—1 Tim. 2:3, 4.
6. Nso ke ana mme ọkwọrọ Obio Ubọn̄ ẹfep, ndien ntak-a?
6 Ikpọfọnke edieke mme anditan̄a eti mbụk ẹkpebemde iso ẹbiere ikpe ẹnọ mme owo ke ntak orụk, idaha mmọ, nte mmọ ẹtiede, ido ukpono, m̀mê mme n̄kpọ en̄wen oro ẹnamde mmọ ẹkpụhọde ye mbon en̄wen. Kam kere ise: Nte afo unemke esịt ke emi owo oro ekebemde iso ada N̄wed Abasi enyene nneme ye afo mîkebemke iso ibiere ikpe inọ fi? Ntre, ntak mûkpukwọrọke etop unyan̄a uwem emi unọ owo ekededi oro akpamade ndikop?—Kot Matthew 7:12.
7. Ntak emi nnyịn mîkpebiereke ikpe inọ mbon oro ikwọrọde ikọ inọ?
7 Jehovah emek Jesus nte Ebiereikpe; ntem, nnyịn inyeneke unen ndibiere ikpe nnọ owo ekededi. Oro odot, koro sia nnyịn mîtiehe nte Jesus, nnyịn ibiere ikpe itiene nte ‘isede ke enyịn’ m̀mê nte ‘ikopde ke utọn̄,’ ke adan̄aemi Jesus ekemede ndikot ata ndịbe ekikere ye uduak esịt owo.—Isa. 11:1-5; 2 Tim. 4:1.
8, 9. (a) Nso orụk owo ke Saul ekedi mbemiso akakabarede edi Christian? (b) Nso ke ifiọk n̄kpọntịbe apostle Paul ekpekpep nnyịn?
8 Mme owo ke kpukpru idaha ke uwem ẹmekabade ẹdi mme asan̄autom Jehovah. N̄wọrọnda uwụtn̄kpọ kiet edi Saul emi okotode Tarsus, emi ẹkedide ẹdifiọk nte apostle Paul. Saul emi ekedide Pharisee ama enen̄ede ọkọbọ mme Christian. Enye ọkọkọbọ esop Christian sia enye ekenen̄erede enịm ke mmọ ikedịghe ata mme andituak ibuot nnọ Jehovah. (Gal. 1:13) Owo ikpekereke-kere ke enye akpakakabarede edi Christian. Edi Jesus ama okụt eti n̄kpọ ke esịt Saul onyụn̄ emek enye man anam akpan utom. Emi ama anam Saul akabade edi kiet ke otu mbon oro ẹkenen̄ede ẹnyene ifịk ẹkan ke esop akpa isua ikie.
9 Nso ke ifiọk n̄kpọntịbe apostle Paul ekpep nnyịn? Ekeme ndidi odu mme owo ke efakutom nnyịn emi mîmaha etop emi nnyịn itan̄ade. Okposụkedi ekemede nditie nte ke tutu amama idụhe owo mmọ emi edikabarede edi ata Christian, ikpanaha itre ndisikọk ibuot ye mmọ. Ndusụk ini, mbon oro owo mîkodorike enyịn ẹsikpan̄ utọn̄ ẹnọ etop nnyịn. Utom oro ẹdọn̄de nnyịn edi ndika iso n̄kwọrọ ikọ nnọ kpukpru owo “ye unana edikpa mba.”—Kot Utom 5:42.
Ẹyediọn̄ Mbon Oro Ẹkwọrọde Ikọ ye “Unana Edikpa Mba”
10. Ntak emi nnyịn mîkpetreke ndikwọrọ ikọ nnọ idem mbon oro ẹkemede nditie nte ẹnyene ndịk? Nọ ifiọkutom n̄kann̄kụk.
10 Se ẹkụtde ke enyịn ekeme ndibian̄a owo. Ke uwụtn̄kpọ, Ignacio * ọkọtọn̄ọ ndikpep Bible ye Mme Ntiense Jehovah ke ini enye okodude ke ufọk-n̄kpọkọbi ke idụt kiet ke Edem Usụk America. Ẹkesifefehe enye ke ntak afai afai edu esie. Ntre, nsan̄a ufọk-n̄kpọkọbi esie oro ẹkesinamde mme n̄kpọ ẹnyam ẹnọ mbon n̄kpọkọbi eken ẹma ẹsidọhọ Ignacio akpak mbon oro ẹkamade mmọ isọn. Nte ededi, nte Ignacio akanamde n̄kọri ke n̄kan̄ eke spirit onyụn̄ adade se enye ekekpepde esịn ke edinam, enye ikanamke aba n̄kpọ afai afai, edi ama ọtọn̄ọ ndifọn ido. Enye idịghe aba akpak isọn, ndien enye enem esịt nte akpanikọ Bible ye spirit Abasi ẹn̄wamde enye okpụhọde. Enye owụt esịtekọm n̄ko aban̄a in̄wan̄-in̄wan̄ edu mme anditan̄a etop Obio Ubọn̄ oro ẹkesịnde ifịk ẹkpep enye n̄kpọ.
11. Ntak oro isifiakde ika ibịne mbon oro ikọkwọrọde ikọ inọ?
11 Kiet ke otu ntak oro isifiakde ibịne mbon oro ikọkwọrọde eti mbụk inọ edi ke mme idaha ye mme edu mmọ ẹkeme ndikpụhọde. Ekeme ndidi toto ke akpatre ini oro ikakade ikese mmọ, ndusụk mmọ ẹduọ udọn̄ọ, ẹtaba utom, mîdịghe ẹtaba owo oro mmọ ẹmade ke n̄kpa. (Kot Ecclesiastes 9:11.) Mme n̄kpọntịbe ererimbot emi ẹkeme ndinam mme owo ẹnen̄ede ẹkere ẹban̄a ini iso mmọ. Mme n̄kpọntịbe emi ẹkeme ndinam owo oro mîkesimaha ndikpan̄ utọn̄ m̀mê oro ekesibiọn̄ọde-biọn̄ọ, akpan̄ utọn̄. Ntre, nnyịn ikpetreke ndineme eti mbụk nnọ mbon en̄wen ke kpukpru idaha oro ẹdotde.
12. Nnyịn ikpese didie mbon oro ikwọrọde ikọ inọ, ndien ntak-a?
12 Etie nte edi ndammana n̄kpọ ndisisari nnyụn̄ mbiere ikpe nnọ mme owo nte otu. Edi Jehovah esise owo kiet kiet nte enye etiede. Enye ọdiọn̄ọ ke owo ekeme ndikpụhọde. (Kot 1 Samuel 16:7.) Nnyịn ikpodomo ndise mme owo ntre n̄ko ke ini inamde utom ukwọrọikọ. Ediwak ifiọkutom ẹwụt nti utịp oro isinyenede ke ini inyenede in̄wan̄-in̄wan̄ ekikere iban̄a kpukpru mbon oro ikwọrọde ikọ inọ.
13, 14. (a) Ntak emi asiakusụn̄ kiet ekenyenede ukwan̄ ekikere aban̄a owo emi enye okosobode ke an̄wautom? (b) Nso ke nnyịn ikeme ndikpep nto ifiọkutom emi?
13 Sandra, emi edide asiakusụn̄, ọkọkwọrọ ikọ to ke enyịnusụn̄ sịm enyịnusụn̄ ke isuo kiet ke Caribbean ke ini enye okosobode Ruth, emi ekesinen̄erede esịn idem ke mme edinam usion̄o mbre ke n̄ka ke n̄ka. Ẹma ẹyari Ruth ntinya ikaba nte n̄wan emi eyede akan ke edinam usion̄o mbre ofụri idụt. Enye ama enen̄ede enyene udọn̄ ke se Sandra eketịn̄de, ntre, ẹma ẹdiomi nditọn̄ọ ukpepn̄kpọ Bible ye enye. Sandra ọdọhọ ete: “Ke ini n̄kodụkde ufọtufọk esie, mma n̄kụt ata akamba ndise Ruth ke ọyọhọ mbana edinam usion̄o mbre, ọkọrọ ye mme n̄kpọ oro ẹkenọde enye ke ini enye akakande. Mma ndue n̄kere ke owo emi ọwọrọde etop ntre onyụn̄ enen̄erede esịn idem ke edinam usion̄o mbre ikpekemeke ndinyene udọn̄ ke akpanikọ. Ntre, mma ntre ndisika n̄kese enye.”
14 Ke esisịt ini ama ekebe, Ruth ama edi Ufọkmbono Obio Ubọn̄, ndien ke mbono esop ama akasuana, enye ama obụp Sandra ete, “Ntak emi mûsudịghe aba udukpep mi n̄kpọ?” Sandra ama ekpe enye ubọk onyụn̄ anam ndutịm ndifiak ntọn̄ọ ukpepn̄kpọ ye enye. Ruth ama anam usọp usọp n̄kọri, atan̄ ndise edinam usion̄o mbre esie efep, ọtọn̄ọ nditiene mbuana ke kpukpru edinam esop, onyụn̄ ayak uwem esie ọnọ Jehovah. Ih, Sandra ama edi edifiọk ke nte imọ ikanamde n̄kpọ ke akpa ikenenke.
15, 16. (a) Nso ikedi utịp ke ini asuanetop kiet ọkọnọde iman esie ikọ ntiense? (b) Ntak emi idaha iman nnyịn mîkpanamke itre ndinọ enye ikọ ntiense?
15 Mbon oro ẹnọde ikọtufọk mmọ oro mîdịghe mme andinịm ke akpanikọ ikọ ntiense ẹnyene nti utịp n̄ko, idem ke ini eketiede nte mmọ idimaha etop oro. Da Joyce emi edide Christian an̄wan ke United States ke uwụtn̄kpọ. Ukot esie ama esiwak ndika n̄kpọkọbi toto ke ini emi enye ekedide uyen. Joyce ọdọhọ ete: “Mme owo ẹkesidọhọ ke enye odu uwem nditaha sia enye ekesinyamde n̄kpọsọn̄ ibọk, eyịp inọ, esinyụn̄ anam ekese ndiọi n̄kpọ eken. Kpa ye oro, mma n̄ka iso nneme akpanikọ Bible nnọ enye ke isua 37.” Ẹma ẹnen̄ede ẹdiọn̄ ukeme ye ime eyenete an̄wan emi ke akpatre koro ukot esie ama ọtọn̄ọ ndikpep Bible ye Mme Ntiense Jehovah onyụn̄ enen̄ede anam ukpụhọde ke uwem esie. Ke ndondo emi, ukot Joyce ama ana baptism ke ini enye ekedide isua 50, ke mbono district kiet ke California, U.S.A. Joyce ọdọhọ ete: “Mmọn̄eyet idatesịt ama asiaha mi. Esịt enen̄ede enem mi sia mmen̄kesion̄oke idem n̄kpọn̄ enye!”
16 Afo emekeme ndimen̄e ndineme akpanikọ Bible ye ndusụk iman fo ke ntak idaha mmọ. Edi utọ edimen̄e oro ikakpanke Joyce ndinyene nneme ye ukot esie. Mmọn̄ọ, ndi esịt ọfiọk se esịt ekerede? Ekeme ndidi owo oro ke ada ofụri esịt oyom ido ukpono akpanikọ. Mmọdo, kûmen̄e ndinọ utọ owo oro ifet ndikụt emi.—Kot Mme N̄ke 3:27.
Ata Eti Un̄wam Unọ Ukpep Bible
17, 18. (a) Didie ke ntọt oro ẹbọde ke ofụri ererimbot ẹwụt ufọn oro n̄wed Nso ke Bible Enen̄ede Ekpep enyenede? (b) Nso inem inem ifiọkutom ke afo ekenyene ke ini akadade n̄wed emi ekpep owo n̄kpọ?
17 Ntọt emi ibọde ke ofụri ererimbot ẹwụt ke ediwak mbon oro ẹnyenede esịt akpanikọ ke ẹnyịme ndikpep n̄wed un̄wam ukpep Bible oro Nso ke Bible Enen̄ede Ekpep? Eyenete an̄wan kiet emi ekerede Penni, emi edide asiakusụn̄ ke United States ama ada n̄wed emi ọtọn̄ọ ediwak ukpepn̄kpọ. Owo iba ke otu emi ẹkedi n̄kani mbon oro ẹkenen̄erede ẹsịn idem ke ufọkabasi mmọ. Penni ikọfiọkke nte mmọ ẹdinamde n̄kpọ ẹban̄a akpanikọ Bible oro ẹnemede ke n̄wed Bible Ekpep. Edi enye ewet ete: “Mmọ ẹma ẹsọsọp ẹnyịme ke se ẹkpepde mmimọ edi akpanikọ, ye unana mfan̄a m̀mê editịmede esịt, ke ntak emi ẹnemede n̄kpọ in̄wan̄-in̄wan̄ ke usụn̄ oro esịnede ifiọk, ẹnyụn̄ ẹdide mbio mbio.”
18 Pat emi edide asuanetop ke Britain, ọkọtọn̄ọ ndikpep Bible ye n̄wan kiet emi ekefehede itọkekọn̄ ọkpọn̄ idụt kiet ke Asia. Mma emi ekefehe aka idụt en̄wen ke mbon oro ẹn̄wanade ye ukara ẹma ẹkemụm ebe ye nditọiren esie ẹka ebiet oro enye mîdikwe mmọ aba tutu amama. Akayak nsịn̄ ẹkpekewot enye; ẹma ẹfọp ufọk esie, ndien otu mbon ntịme ẹma ẹdan̄ enye ke n̄kanubọk. Kpukpru emi ẹma ẹnam enye ekere ke ufọn uwem imọ idụhe, ndien ediwak ini enye ama esikere ndiwot idem. Nte ededi, ukpepn̄kpọ Bible ama anam enye enyene idotenyịn. Pat ọdọhọ ete: “Nte ẹkenamde mme n̄kpọ ẹn̄wan̄a ke mmemmem usụn̄ ye mme uwụtn̄kpọ oro ẹnọde ke n̄wed Bible Ekpep ẹma ẹnen̄ede ẹtụk enye.” Eyen ukpepn̄kpọ emi ama ọsọsọp anam n̄kọri, odot ndikabade ndi asuanetop oro mînaha baptism, onyụn̄ ọdọhọ ke ikpama ndina baptism ke mbono oro edide. Enem didie ntem ndin̄wam mbon oro ẹnyenede esịt akpanikọ ẹfiọk ẹnyụn̄ ẹwụt esịtekọm ẹban̄a idotenyịn oro N̄wed Abasi ọnọde!
“Ẹyak Nnyịn Ikûkpa Mba ke Edinam Se Ifọnde”
19. Ntak emi oyomde inen̄ede isịn idem ikwọrọ ikọ?
19 Usen kiet kiet oro ebede anam nnyịn ikụt ke oyom inen̄ede isịn idem ikwọrọ ikọ inyụn̄ inam mme mbet. Ata ediwak mbon oro ẹnyenede eti esịt ke ẹnam n̄kpọ ẹban̄a utom ukwọrọikọ oro inamde kpukpru isua. Edi “akwa usen Jehovah emekpere,” ndien emi ọwọrọ ke mbon oro ẹdude ke ekịm eke spirit ‘ẹfụm ẹka ebiet n̄kpa.’—Zeph. 1:14; N̄ke 24:11.
20. Nso ke nnyịn owo kiet kiet ikpebiere ndinam?
20 Imekeme ndisụk n̄wam utọ mbon oro. Edi, man inam oro, oyom ikpebe mme Christian akpa isua ikie emi “[ẹkekade] iso ye unana edikpa mba ndikpep nnyụn̄ ntan̄a eti mbụk aban̄ade Christ, Jesus.” (Utom 5:42) Kpebe uwụtn̄kpọ mmọ ke ndikwọrọ ikọ kpa ye ubiọn̄ọ, ebe ke nditịn̄ enyịn ke “usọ unọ ukpep” fo, ye ke ndikwọrọ ikọ nnọ kpukpru owo ye unana asari! “Ẹyak nnyịn ikûkpa mba ke edinam se ifọnde,” koro edieke ikade iso inam se ifọnde, Abasi eyenen̄ede ọdiọn̄ onyụn̄ ama nnyịn.—2 Tim. 4:2; kot Galatia 6:9.
[Ikọ Idakisọn̄]
^ ikp. 10 Ẹkpụhọ ndusụk enyịn̄.
Didie ke Afo Ọkpọbọrọ?
• Mmanie ẹsinam n̄kpọ ẹban̄a eti mbụk?
• Ntak emi nnyịn mîkpebiereke ikpe inọ mbon oro ikwọrọde ikọ inọ?
• Nso utịp ke ẹnyene ke ndida n̄wed Nso ke Bible Enen̄ede Ekpep n̄kpep owo n̄kpọ?
[Mme Mbụme Ukpepn̄kpọ]
[Ndise ke page 13]
Ediwak mbon oro ẹnyenede esịt akpanikọ ke ẹyere ikot
[Ndise ke page 15]
Nso ke ikpekpep ito mme ukpụhọde oro apostle Paul akanamde?
[Ndise ke page 16]
Mme anditan̄a etop Obio Ubọn̄ isibiereke ikpe inọ mme owo