Mmọ Ẹma Ẹfori Uwem Mmọ—Nte Emekeme Ndifori Okuommọ?

MARC, eyenete nnyịn kiet ke Canada, akanam utom ke itieutom emi ẹsibotde awak-n̄kukọhọ owo ukwak emi mme itieutom emi ẹsede n̄kpọ ẹban̄a ubomofụm ẹsidade ẹnam utom. Enye akanam utom do ke ibio ini onyụn̄ anam utom usiakusụn̄ ofụri ini. Ekem, kiet ke otu mme eseutom ama ọdọhọ ke imọn̄ imenede Marc itie—oro edi, ndinam enye anam utom uyọhọ ini onyụn̄ ọbọ ata ediwak okụkọfiọn̄. Nso ke Marc akanam?

Amy, eyenete nnyịn an̄wan kiet ke Philippines edi asiakusụn̄ ofụri ini ke ini ekperede ndikụre ufọkn̄wed sekọndri. Ke enye ama okokụre n̄wed, ẹma ẹnọ enye utom uyọhọ ini oro ekenen̄erede ada ini esie, edi oro ẹkekpede enye ata ediwak okụk. Ewe ke Amy ekemek?

Marc ye Amy ẹkemek nsio nsio n̄kpọ, ndien utịp ubiere oro mmọ ẹkenamde owụt ke item oro Paul ọkọnọde mme Christian ke Corinth eset esịne ifiọk. Apostle Paul ekewet ete: “Yak . . . mmọ eke ẹdade ererimbot ẹnam n̄kpọ ẹdu uwem nte mmọ eke mîdaha enye inam n̄kpọ ọyọhọ ọyọhọ.”—1 Cor. 7:29-31.

Kûda Ererimbot Unam N̄kpọ Ọyọhọ Ọyọhọ

Mbemiso inemede se iketịbede inọ Marc ye Amy, ẹyak ineme ibio ibio se idide “ererimbot” (m̀mê koʹsmos ke usem Greek) oro Paul eketịn̄de aban̄a ke leta oro enye ekewetde ọnọ esọk mbon Corinth. Ke ufan̄ikọ oro, koʹsmos ada aban̄a ekondo ererimbot oro nnyịn idụn̄de—oro edi, ofụri ubonowo—ndien emi esịne mme utọ n̄kpọ oro isikụtde kpukpru usen nte ufọk, udia, ye ọfọn̄. * Ata ediwak nnyịn inyene ndinam utom man inyene mme n̄kpọ udu  uwem emi. Nnyịn ikemeke ndinyan̄a, inyene ndida ererimbot nnam n̄kpọ man inam utom oro N̄wed Abasi ọnọde nnyịn ete ise iban̄a idem nnyịn ye ubon nnyịn. (1 Tim. 5:8) Nte ededi, ke ukem ini oro, imọfiọk ke “ererimbot ke ebebe efep.” (1 John 2:17) Ke ntre, nnyịn ida ererimbot inam n̄kpọ ke udomo oro odotde edi idaha inam n̄kpọ “ọyọhọ ọyọhọ.”—1 Cor. 7:31.

Sia ẹnamde item Bible oro ọdọhọde itehede ube ke nte idade ererimbot inam n̄kpọ, ndusụk nditọete ẹmefiak ẹdụn̄ọde mme idaha mmọ, ẹsụhọde ini oro mmọ ẹdade ẹnam utom, ẹnyụn̄ ẹdu mmemmem uwem. Ke ẹma ẹkenam emi, mmọ ẹsọsọp ẹkụt ke mmimọ imenen̄ede ifori uwem mmimọ sia inyenede ekese ini ndibiat ye ubon mmimọ ye ke utom Jehovah. Akan oro, sia mmọ ẹdude mmemmem uwem, emi anam mmọ ẹnen̄ede ẹberi edem ke Jehovah utu ke ererimbot. Nte afo emekeme nditiene nnam ntre—oro edi, odu mmemmem uwem man anam mme n̄kpọ Obio Ubọn̄ Abasi ẹkọri?—Matt. 6:19-24, 33.

“Imenen̄ede Ikpere Jehovah Ikan nte Akanam Ikperede”

Marc emi iketịn̄de iban̄a ke ntọn̄ọ ama anam item Bible emi ọdọhọde ete ikûda ererimbot inam n̄kpọ ọyọhọ ọyọhọ. Enye ikọbọhọ akwa itie oro ẹkenọde enye. Ke usen ifan̄ ẹma ẹkebe, eteutom Marc ama ọdọhọ ke ẹyekpe enye ata ediwak okụkọfiọn̄ man enye ekpenyịme ndibọ akwa itie oro. Marc ọdọhọ ete: “Emi ekedi idomo, edi mma mfiak nsịn.” Enye etịn̄ ntak ete: “Ami ye Paula n̄wan mi ikoyom ndinam n̄kpọ Jehovah ọyọhọ ọyọhọ nte ikekeme. Mmọdo, nnyịn ima ibiere ndidu mmemmem uwem. Nnyịn ima ibọn̄ akam iben̄e Jehovah ọnọ nnyịn ọniọn̄ man isịm utịtmbuba nnyịn inyụn̄ isiak akpan usen oro iyomde nditọn̄ọ ndinam utom Jehovah ọyọhọ ọyọhọ.”

Paula ọdọhọ ete: “N̄kesinam utom usen ita ke urua nte ewetn̄wed ke ufọkibọk nnyụn̄ mbọ eti okụkọfiọn̄. N̄konyụn̄ ndi asiakusụn̄ ofụri ini. Nte ededi, ami n̄koyom ndinam utom Jehovah ke ebiet oro ẹnen̄erede ẹyom mme anditan̄a Obio Ubọn̄ ukem nte ebe mi. Edi ke ini n̄kọnọde ekaufọk mi n̄wed ukpọn̄ utom, enye ama ọdọhọ ke ami mma ndot ndida itie akwa ewetn̄wed oro ẹkeyomde owo oro ẹdinọde. Emi ekedi n̄kponn̄kan itie ewetn̄wed ke ufọkibọk oro, edi mma nsọn̄ọ nda ke ubiere mi ndikpọn̄ utom. Ke ini n̄kasiande ekaufọk mi ntak emi mmenyomke akwa itie oro, enye ama otoro mi kaban̄a mbuọtidem mi.”

Esisịt ini ke oro ebede, ẹma ẹnọ Marc ye Paula ẹkenam utom akpan asiakusụn̄ ke ekpri esop kiet ke nsannsan ebiet ke Canada. Nso ikedi utịp? Marc ọdọhọ ete: “Ke mma n̄kọkpọn̄ utom oro ẹkesikpede mi ediwak okụk, oro n̄kanamde ke se ikperede ndidi mbahade iba ke isua uwem mi, esịt ama etịmede mi, edi Jehovah ama ọdiọn̄ utom ukwọrọikọ nnyịn. Nnyịn ima ikop akwa idatesịt oro otode edinọ mbon en̄wen enọ eke spirit. Utom uyọhọ ini ama anam ndọ nnyịn enen̄ede enem. Nnyịn ikesineme kpukpru ini iban̄a mme n̄kpọ oro ẹdide ata akpan n̄kpọ—oro edi, mme n̄kpọ eke spirit. Imenen̄ede ikpere Jehovah ikan nte akanam ikperede.” (Utom 20:35) Paula adian do ete: “Ama ọkpọn̄ utom fo ye inem ufọk oro  afo etịmde emehe, afo enyene ndikọn̄ ofụri mbuọtidem fo ke Jehovah. Se nnyịn ikanamde edi oro, ndien Jehovah ama ọdiọn̄ nnyịn. Ndima nditọete ke obufa esop nnyịn ẹwụt ke imama inyụn̄ idara nnyịn. Idahaemi nda odudu oro n̄kesidade nnam utom idịbi udia n̄n̄wam mme owo ke n̄kan̄ eke spirit. Ẹsiak mi esịt ẹsio ndom ke ntak emi nnamde utom emi.”

‘Ẹnen̄ede Ẹnyene N̄kpọ, edi Ikopke Inemesịt’

Amy oro iketịn̄de iban̄a ekemek isio isio usụn̄ uwem. Enye ama ọbọ utom oro ẹkpede ediwak okụk. Amy ọdọhọ ete: “Mma n̄ka iso nnyene ifịk ke utom ukwọrọikọ ke akpa isua, edi mma n̄kụt ke ekikere mi ikowụhọke aba ke mme n̄kpọ Obio Ubọn̄ edi ke okowụhọ ke edimenede itie ke itieutom. Ẹma ẹnọ mi ifet ndinam n̄kọri nnyụn̄ nsịn ofụri ukeme man n̄kabade ndi ata akwa owo ke itieutom. Nte utom mi akawakde, n̄kesinen̄ekede mbuana aba ke an̄wautom. Nte ini akakade, mma ntre ukwọrọikọ ofụri ofụri.

Ke ini Amy afiakde eti ini oro, enye ọdọhọ ete: “Mma nnen̄ede nnyene okụk. Mma nsika isan̄ etieti nnyụn̄ nnyene uku oro asan̄ade ye akwa itie ke utom. Edi n̄kokopke inemesịt. Mma nnyene ekese mfịna okposụkedi emi n̄kenyenede okụk. Mma n̄kere m̀mê nso ikanam n̄kpọ etie ntre ye ami. Ekem mma ndikụt ke ndisịn idem mbịne ubọkọkọ ererimbot emi, ke ayak nsịn̄ ‘n̄kpokotụn usụn̄ n̄kpọn̄ mbuọtidem.’ Kpa nte Ikọ Abasi etịn̄de, emi ama anam nnọ idemmi ‘ediwak unan.’”—1 Tim. 6:10.

Nso ke Amy akanam? Enye ọdọhọ ete: “Mma mben̄e mbiowo ẹn̄wam mi mfiak nsọn̄ idem ke n̄kan̄ eke spirit nnyụn̄ mfiak ntọn̄ọ ndidụk mme mbono esop. Mma ntua eyet ke ini ẹkekwọde ikwọ kiet. Mma nti nte n̄kokopde inemesịt ke ufan̄ isua ition oro n̄kabuanade ke utom idọk nte asiakusụn̄, okposụkedi oro n̄kedide ubuene ini oro. Mma mfiọk ke n̄kenyene nditre ndida ini mi mbịne okụk ye nte ke n̄kenyene ndibem iso nyom mme n̄kpọ Obio Ubọn̄. Mma ndọhọ ẹsụhọde mi itie ke itieutom, emi ọkọwọrọde ke ndisibọ mbahade iba ke okụkọfiọn̄ mi, nnyụn̄ mfiak ntọn̄ọ ndikwọrọ ikọ.” Amy etịn̄ ye inemesịt ete: “Mma ndat esịt ndinam utom usiakusụn̄ ke isua ifan̄. Idahaemi mmokop uyụhọ oro akanam mmen̄kopke ke ini oro n̄kadade ata ekese ini mi nnam utom nnọ ererimbot.”

Nte afo emekeme ndikpụhọde mme idaha fo nnyụn̄ ndu mmemmem uwem? Edieke afo adade ini oro odude anam mme n̄kpọ Obio Ubọn̄ ẹkọri, afo n̄ko oyofori uwem fo.—N̄ke 10:22.

[Ikọ Idakisọn̄]

[Se ẹwetde ke ikpọ abisi ke page 19]

Nte afo emekeme ndikpụhọde mme idaha fo nnyụn̄ ndu mmemmem uwem?

[Ekebe/Ndise ke page 19]

“Enye Enenem Mi Idahaemi!”

Ama ọdọn̄ David emi edide ebiowo ke United States nditiene n̄wan ye nditọ esie nnam utom uyọhọ ini. Enye ama anam ndutịm man enyene utom ibio ini ke ebiet oro enye akanamde utom, onyụn̄ ọtọn̄ọ ndinam utom usiakusụn̄ ofụri ini. Ndi ukpụhọde emi ama ofori uwem esie? David ekewet ntem ọnọ ẹsọk ufan esie ke ọfiọn̄ ifan̄ ẹma ẹkebe: “Idụhe n̄kpọ oro ọnọde owo uyụhọ nte enye ndisịn idem ọyọhọ ọyọhọ ke utom Jehovah ye ubon esie. N̄kenen̄ede n̄kere ke ayada ini mbemiso utom usiakusụn̄ emehede mi, edi enye enenem mi idahaemi! Enye enem ọsọn̄!”

[Ndise ke page 18]

Marc ye Paula ke an̄wautom