Obufa Nsiondi Eke Ukpepn̄kpọ Enyọn̄-Ukpeme

MAGAZINE emi afo okotde mi edi akpa nsiondi emi ẹkotde nsiondi eke ukpepn̄kpọ Enyọn̄-Ukpeme. Yak itịn̄ ndusụk n̄kpọ iban̄a nte obufa magazine emi editiede.

Ẹsio nsiondi eke ukpepn̄kpọ emi ẹnọ Mme Ntiense Jehovah ye nditọ ukpepn̄kpọ Bible oro ẹnamde n̄kọri. Ẹdisisio enye ini kiet ke ọfiọn̄ ndien enye edisinyene ibuotikọ ukpepn̄kpọ inan̄ m̀mê ition. Ẹmịn̄ ndutịm edikpep mme ibuotikọ emi ke ikpaedem magazine emi. Nsiondi eke ukpepn̄kpọ Enyọn̄-Ukpeme idinyeneke nsio nsio uduot ikpaedem nte Nsiondi Ofụri Owo sia owo mîdinọhọ enye ke an̄wautom.

Mbio mbio uduak ibuotikọ ukpepn̄kpọ ọkọrọ ye mme ibuotikọ emi owo mîdikpepke, oro ẹsiakde ke page 2 ke magazine emi ẹyenen̄ede ẹn̄wam fi. Ikpehe emi eyenen̄ede an̄wam mme ada Ukpepn̄kpọ Enyọn̄-Ukpeme ke ini mmọ ẹtịmde idem man ẹneme mme ibuotikọ emi uforo uforo ke esop.

Afo oyokụt ke mme ibuotikọ ukpepn̄kpọ iniọn̄ke nte ẹkesiniọn̄de. Emi ayanam ẹnyene ini ndida nneme mme akpan itie N̄wed Abasi ke ini Ukpepn̄kpọ Enyọn̄-Ukpeme. Imenen̄ede isịn udọn̄ inọ fi ite okot kpukpru itie N̄wed Abasi oro ẹsiakde ẹsịn kpukpru urua. Ẹwet “kot” ke ndusụk itie N̄wed Abasi oro ẹsiakde ẹsịn, ndien ẹkpenyene ndikot nnyụn̄ nneme mmọ ke ini Ukpepn̄kpọ Enyọn̄-Ukpeme. Ẹkeme ndikot mme itie N̄wed Abasi eken nte ini ayakde. Afo oyokụt ndusụk itie N̄wed Abasi emi ẹwetde ‘men domo’ ke ndusụk ibuotikọ. Sia mme utọ itie N̄wed Abasi oro mînen̄ekede isọn̄ọ mme akpan n̄kpọ oro ẹnemede ke ikpehe ekikere oro, owo idisikotke mmọ ke mbono esop. Kpa ye oro, mme itie N̄wed Abasi oro ẹwetde ‘men domo’ ẹsịne mme udiana ntọt, mîdịghe, mmọ ẹkeme ndisọn̄ọ se ẹnemede ke usụn̄ en̄wen. Imesịn udọn̄ inọ fi ite okot mmọ ke ini etịmde idem ọnọ Ukpepn̄kpọ Enyọn̄-Ukpeme. Iso-ọfọn, afo emekeme nditịn̄ n̄kpọ mban̄a mmọ ke ibọrọ fo.

Owo idisisịnke aba ibatutom eke isua ke isua ke Enyọn̄-Ukpeme. Ọtọn̄ọde ke 2008, enye edisidi esịne-esịt Utom Obio Ubọn̄ Nnyịn onyụn̄ esịne n̄ko ke Yearbook. Nte ededi, nte ima iketetịn̄, nsiondi eke ukpepn̄kpọ esịne mme ibuotikọ eken oro owo mîdikpepke. Okposụkedi emi owo mîdinemeke ediwak ke otu mmọ ke mbono esop, imesịn udọn̄ inọ fi ite etịn̄ enyịn okot mmọ. Mmọ n̄ko ẹdi udia eke spirit emi “ofụn emi anamde akpanikọ onyụn̄ enyenede ọniọn̄” ọnọde.—Matt. 24:45-47.

Ke ndida n̄keberi, nsiondi eke ukpepn̄kpọ ye nsiondi ofụri owo idịghe nsio nsio Enyọn̄-Ukpeme iba. Mmọ mbiba ẹdi Enyọn̄-Ukpeme Ọnọ Ntọt Obio Ubọn̄ Jehovah. Mbiba ẹnyene ukem ikpehe ekikere ke ọyọhọ page 2 emi etịn̄de uduak Enyọn̄-Ukpeme. Mbiba ẹyesịne ke eboho Enyọn̄-Ukpeme eke isua ke isua. Ndien ẹdisio n̄kpọ ke mbiba ẹnam “Nte Afo Emeti?” emi edisịnede ke nsiondi eke ukpepn̄kpọ.

Toto ke 1879, ke kpukpru ini ekọn̄, ini nsọn̄ọn̄kpọ, ye ini ukọbọ, Enyọn̄-Ukpeme aka iso atan̄a akpanikọ oro aban̄ade Obio Ubọn̄ Abasi. Akam nnyịn edi yak Jehovah an̄wam enye aka iso anam ntre ke obufa usụn̄ oro ẹsiode enye. Imonyụn̄ iben̄e n̄ko ite Jehovah ọdiọn̄ fi emi okotde enye, nte afo adade obufa nsiondi eke ukpepn̄kpọ Enyọn̄-Ukpeme anam n̄kpọ edifọn edifọn.