Ẹkpebe Akakan Isụn̄utom
Ẹkpebe Akakan Isụn̄utom
“Ẹkabade ẹdi mme andikpebe mi, kpa nte ami n̄kpebede Christ.”—1 COR. 11:1.
1. Ntak emi ikpekpebede Jesus Christ?
APOSTLE PAUL ama ekpebe Jesus Christ, kpa Akakan Isụn̄utom. Enye ama esịn udọn̄ ọnọ ekemmọ mme Christian ete: “Ẹkabade ẹdi mme andikpebe mi, kpa nte ami n̄kpebede Christ.” (1 Cor. 11:1) Ke Jesus ama okowụt mme apostle esie nte ẹkpesụhọrede idem ke ndiyet mmọ ukot, enye ama ọdọhọ mmọ ete: “N̄kenịm uwụtn̄kpọ nnọ mbufo, nte, kpa nte n̄kanamde ye mbufo, mbufo ẹkpenam kpa ntre.” (John 13:12-15) Sia idide mme Christian mfịn, oyom nnyịn ikpebe Jesus Christ ke ikọ, ke edinam, ye ke edu uwem nnyịn.—1 Pet. 2:21.
2. Nso edu ke afo ekpenyene idem ọkpọkọm Otu Ukara imekke fi nte isụn̄utom?
2 Ke ibuotikọ oro ekebemde enye emi iso, nnyịn ima ikpep nte ke isụn̄utom edi owo emi ẹsiode ẹdọn̄ nte ọkwọrọikọ—oro edi, owo oro adade eti mbụk ọsọk mbon en̄wen. Emi ekedi ntak oro Paul okobụpde mme ẹdemede-owo-udọn̄ mbụme. (Kot Rome 10:11-15.) Apostle oro okobụp ete: “Didie . . . ke mmọ ẹdikop ke owo mîkwọrọke?” Ekem enye ama okot se Isaiah ekebemde iso etịn̄ ete: “Ikpat mmọ oro ẹtan̄ade eti mbụk nti n̄kpọ ẹye adan̄a didie!” (Isa. 52:7) Idem ọkpọkọm owo imekke fi inyụn̄ idọn̄ke fi akanam utom isụn̄utom ke esenidụt, afo emekeme ndinyene edu owo emi amade ukwọrọikọ, onyụn̄ ekpebe Jesus nte ifịk ifịk anditan̄a eti mbụk. Isua oko, mme asuanetop Obio Ubọn̄ 6,957,852 ẹma ‘ẹkwọrọ eti mbụk’ ke idụt 236.—2 Tim. 4:5.
“Nnyịn Ima Ikpọn̄ Kpukpru N̄kpọ Inyụn̄ Itiene Fi”
3, 4. Nso ke Jesus ọkọkpọn̄ ke heaven, ndien nso ke ana nnyịn inam man idi mme anditiene Christ?
3 Man Jesus anam se ẹkedọn̄de enye ke isọn̄, enye “ama asana [ofụri se enye ekenyenede] ayak onyụn̄ emen mbiet ofụn esịne,” ọkpọn̄ uwem eke heaven ye ubọn̄ esie. (Phil. 2:7) Owo ikemeke-keme ndimen n̄kpọ ekededi oro nnyịn inamde nte mme andikpebe Christ ndomo ye se enye akanamde ke ini enye ekedide isọn̄. Edi nnyịn imekeme ndisọn̄ọ nda nte mme anditiene Christ, inyụn̄ ituaha n̄kpọfiọk ifiak ise mme n̄kpọ oro nnyịn ikenyenede ke ererimbot Satan.—1 John 5:19.
4 Isan̄ kiet, apostle Peter ama ọdọhọ Jesus ete: “Sese! Nnyịn ima ikpọn̄ kpukpru n̄kpọ inyụn̄ itiene fi.” (Matt. 19:27) Peter, Andrew, James, ye John ẹma ẹsọsọp ẹkpọn̄ iyịre mmọ ke ini Jesus okokotde mmọ. Mmọ ẹma ẹkpọn̄ utom ukọiyak mmọ ẹnyụn̄ ẹnam utom ukwọrọikọ edi ubọkọkọ mmọ. Nte ẹtịn̄de ke Gospel Luke, Peter ọkọdọhọ ete: “Sese! Nnyịn ima ikpọn̄ se nnyịn inyenede inyụn̄ itiene fi.” (Luke 18:28) Ata ediwak nnyịn ikenyeneke ndikpọn̄ kpukpru “se nnyịn inyenede” man itiene Jesus. Edi, ikenyene ‘ndikan̄ idem nnyịn’ man ikabade idi mbet Christ ye ata mme asan̄autom Jehovah. (Matt. 16:24) Nnyịn iyenyene ekese edidiọn̄ edieke inamde ntre. (Kot Matthew 19:29.) Ndinyene edu owo emi amade ukwọrọikọ ukem nte Christ anam nnyịn ikop idatesịt, akpan akpan edieke edide ima inam idem ọkpọkọm esisịt ke ndin̄wam owo asan̄a ekpere Abasi ye edima Eyen esie.
5. Bụk ifiọkutom oro owụtde se ododụn̄ ekemede ndinam ke ama ekekpep akpanikọ Bible.
5 Valmir, owo Brazil emi odụn̄de ke esịt esịt Suriname, ekesidọk gold. Enye ekedi owo mmịn emi esidude oburobụt uwem. Isan̄ kiet, ke ini enye okodude ke akwa obio kiet, Mme Ntiense Jehovah ẹma ẹtọn̄ọ ndikpep enye Bible. Enye ama esikpep Bible kpukpru usen, onyụn̄ anam ediwak ukpụhọde, ndien ikebịghike enye ama ana baptism. Ke ama okokụt ke utom imọ iyakke imọ inam se Bible ekpepde, enye ama anyam mbubehe oro ekesinọde enye ekese okụk onyụn̄ afiak ọnyọn̄ Brazil man akan̄wam ubon esie ẹkụt mme n̄kpọuto eke spirit. Ke ẹma ẹkekpep akpanikọ Bible, ediwak isenowo ẹsinyịme ndikpọn̄ utom mmọ ke mme obio uforo mfiak nnyọn̄ obio emana mmọ man ẹken̄wam ikọtufọk mmọ ye mbon en̄wen ẹkpep n̄kpọ ẹban̄a Jehovah. Mme utọ asuanetop Obio Ubọn̄ oro ẹnen̄ede ẹnyene edu owo emi amade ukwọrọikọ.
6. Nso ke ikpanam edieke nnyịn mîkemeke ndika ebiet oro ẹnen̄erede ẹyom mme ọkwọrọ Obio Ubọn̄?
6 Ediwak Mme Ntiense ẹsika ebiet oro ẹnen̄erede ẹyom mme ọkwọrọ Obio Ubọn̄. Ndusụk mmọ ẹsikam ẹka esenidụt man ẹkekwọrọ ikọ. Ekeme ndidi nnyịn idikemeke ndinam nte mmọ, edi imekeme ndikpebe Jesus ke ndinam ofụri ukeme nnyịn ke utom ukwọrọikọ.
Jehovah Esinọ Ukpep Oro Iyomde
7. Mme ufọkn̄wed ewe ke ẹtịm man ẹn̄wam mbon oro ẹyomde ndinen̄ede nnyene usọ nte mme anditan̄a Obio Ubọn̄?
7 Ukem nte Jesus ọkọbọde ukpep oto Ete esie, nnyịn n̄ko imekeme ndibọ ukpep oro Jehovah ọnọde mfịn. Jesus ke idemesie ọkọdọhọ ete: “Ẹwet ke mme Prọfet ẹte, ‘Jehovah oyonyụn̄ ekpep kpukpru mmọ.’” (John 6:45; Isa. 54:13) Mfịn, imenyene mme ufọkn̄wed oro ẹtịmde san̄a san̄a man ẹnam nnyịn idot nte mme anditan̄a Obio Ubọn̄. Ke akpanikọ, kpukpru nnyịn imọbọ ufọn ito Ufọkn̄wed Utom Ukara Abasi oro ẹsinịmde ke mme esop nnyịn. Mme asiakusụn̄ ẹsika Ufọkn̄wed Utom Usiakusụn̄. Ediwak n̄kani asiakusụn̄ ẹkop inemesịt ndifiak n̄ka ufọkn̄wed emi ọyọhọ ikaba. Mbiowo ye mme asan̄autom unamutom ẹsidụk Ufọkn̄wed Utom Obio Ubọn̄ man an̄wam mmọ ẹnen̄ede ẹnyene usọ nte mme andikpep, onyụn̄ anam mmọ ẹnen̄ede ẹn̄wam ekemmọ mme andinịm ke akpanikọ. Ediwak mbiowo ye mme asan̄autom unamutom oro mîdọhọ ndọ ẹsidụk Ufọkn̄wed Unọ Mme Asan̄autom Ukpep, man ẹkpep mmọ nte ẹkpen̄wamde mbon en̄wen ke utom ukwọrọikọ. Ndien ediwak nditọete iren ye iban oro ẹnọde ẹka utom isụn̄utom ke esenidụt ẹbọ ukpep ke Ufọkn̄wed Enyọn̄-Ukpeme Ukpep Bible eke Gilead.
8. Didie ke ndusụk nditọete ẹse ukpep oro Jehovah ọnọde?
8 Ediwak Mme Ntiense Jehovah ẹnam ndutịm man ẹkeme ndidụk mme ufọkn̄wed emi. Yugu ama ọkpọn̄ utom idịbi udia esie sia eteutom esie mîkenyịmeke ndinọ enye ini man okodụk Ufọkn̄wed Unọ Mme Asan̄autom Ukpep ke Canada. Yugu ọkọdọhọ ete: “Ntuaha n̄kpọfiọk ke baba usụn̄ kiet. Ke nditịm ntịn̄, edieke ẹkpekenyịmede ndinọ mi ini oro n̄koyomde, ekeme ndidi mmọ ẹkpekekere ke nyaka iso nnam utom ke itieutom oro nte n̄kpọ ndida n̄wụt esịtekọm. Edi idahaemi, ami mmeben̄e idem ndinam utom ekededi oro Jehovah edinọde mi.” Ediwak owo ẹnyịme ndiyak mme n̄kpọ oro mmọ ẹkedade nte ọsọn̄urua n̄kpọ ke akpa ẹtak mmọ man ẹbọ ukpep oro Abasi ọnọde.—Luke 5:28.
9. Nọ uwụtn̄kpọ kiet ndiwụt nte ukpepn̄kpọ N̄wed Abasi ọkọrọ ye ọkpọsọn̄ ukeme ẹkemede ndinyene ufọn.
9 Ukpepn̄kpọ N̄wed Abasi ọkọrọ ye ọkpọsọn̄ ukeme ẹsinen̄ede ẹnyene ufọn. (2 Tim. 3:16, 17) Da Saulo emi otode Guatemala ke uwụtn̄kpọ. Enye ama enyene esisịt mfịna ibuot ke ini enye akamanade, ndien kiet ke otu mme andikpep esie ama ọdọhọ eka Saulo ete okûnyịk enye ekpep ndikot n̄wed sia enye mîdikemeke ndinam emi. Saulo ama ọkpọn̄ ufọkn̄wed ikonyụn̄ ikemeke ndikot n̄wed. Edi Ntiense kiet ama ekpep Saulo nte ẹkotde n̄wed. Nte ini akakade, Saulo ama esịn idem ekpep n̄wed tutu ekeme ndinọ utịn̄ikọ ke Ufọkn̄wed Utom Ukara Abasi. Ekem, eka Saulo ama osobo ye andikpep emi ke ini enye ọkọkwọrọde ikọ ke ufọk ke ufọk. Ke andikpep emi ama okokop ke Saulo ekeme ndikot n̄wed, enye ama ọdọhọ eka esie asan̄a ye enye edi ufọk imọ urua en̄wen. Ke mmọ ẹma ẹkeka ufọk andikpep emi, enye ama obụp Saulo ete, “Nso ke afo edikpep mi?” Saulo ama ọtọn̄ọ ndikot ikpehe ekikere kiet ke n̄wed Nso ke Bible Enen̄ede Ekpep? Do ke andikpep oro ọkọdọhọ ete: “Idem akpa mi ndifiọk ke emekeme ndikpep mi n̄kpọ!” Mmọn̄eyet idatesịt ama asiaha enye ke enyịn, ndien enye ama afat Saulo.
Ukpepn̄kpọ Oro Otụkde Owo
10. Ewe eti n̄wed ke ẹnọ nnyịn ida ikpep mme owo akpanikọ Bible?
10 Jesus ekekpep mme owo se Jehovah ekekpepde enye ye se idude ke Ikọ Abasi. (Luke 4:16-21; John 8:28) Ndinam se Jesus eketemede nnyịn, nnyụn̄ nda se idude ke N̄wed Abasi nsịn ke edinam ẹwụt ke imekpebe Jesus. Oro anam kpukpru nnyịn ikere ekikere kiet inyụn̄ inyene ikọ inua kiet, ndien ke ntre idiana kiet. (1 Cor. 1:10) Nnyịn ikop inemesịt didie ntem ke emi “ofụn emi anamde akpanikọ onyụn̄ enyenede ọniọn̄” adade mme n̄wed un̄wam ukpep Bible an̄wam nnyịn ikpep mme owo ukem n̄kpọ inyụn̄ inam utom nnyịn nte mme ọkwọrọikọ! (Matt. 24:45; 28:19, 20) Kiet ke otu mme n̄wed emi edi n̄wed Bible Ekpep oro odude idahaemi ke usem 179.
11. Didie ke eyenete an̄wan kiet ke Ethiopia akada n̄wed Bible Ekpep akan ubiọn̄ọ?
11 Ndida n̄wed Bible Ekpep n̄kpep mme owo Bible ekeme ndinam mme andibiọn̄ọ ẹkpụhọde ekikere. Isan̄ kiet, ke ini Lula, eyenete an̄wan emi edide asiakusụn̄ ke Ethiopia, ekekpepde owo n̄kpọ, iman owo oro ama odụk edidọhọ mmọ ẹtre utọ ntaha ukpepn̄kpọ oro. Lula ama osụhọde idem ada uwụtn̄kpọ oro ẹnọde ẹban̄a ndiọi okụk ke ọyọhọ ibuot 15 ke n̄wed Bible Ekpep ọkọk ibuot ye enye. Mma oro ikesịnke aba ntịme edi ama ayak mmọ ẹka iso ke ukpepn̄kpọ oro. Kamse, enye ama odu ke ini en̄wen oro ẹkekpepde n̄kpọ onyụn̄ ọdọhọ ẹtiene ẹkpep imọ Bible, akam ọdọhọde ke ikpama ndikpe okụk ke ukpepn̄kpọ oro! Ikebịghike, enye ama ọtọn̄ọ ndisikpep n̄kpọ ikata ke urua onyụn̄ enen̄ede anam n̄kọri ke n̄kan̄ eke spirit.
12. Nọ uwụtn̄kpọ kiet oro owụtde ke mme uyen ẹkeme ndikpep mbon en̄wen akpanikọ Bible uforo uforo.
12 Mme uyen ẹkeme ndida n̄wed Bible Ekpep n̄n̄wam mbon en̄wen. Ke ini Keanu, eyen isua 11 ke Hawaii okokotde n̄wed emi ke ufọkn̄wed, kiet ke otu nsan̄a ubet ukpepn̄kpọ esie ama obụp enye ete, “Ntak emi mbufo mîsinịmke usọrọ usen nduọkodudu?” Keanu ama okot ibọrọ nnennen nnennen ke ibuotikọ oro, “Nte Nnyịn Ikpenyene Ndinịm Mme Usọrọ Usen Nduọkodudu?” emi odude ke se ẹwetde ẹdian. Ekem enye ama okụbọde aka page oro ẹwetde “Se Isịnede” ke n̄wed oro onyụn̄ ọdọhọ eyen oro emek ibuotikọ oro enye amade akan. Mmọ ẹma ẹtọn̄ọ ukpepn̄kpọ Bible. Isua oko, Mme Ntiense Jehovah ẹma ẹnịm ukpepn̄kpọ Bible 6,561,426 ndien n̄wed Bible Ekpep ke ẹkeda ẹnịm ediwak ke otu ukpepn̄kpọ emi. Ndi ke ada n̄wed emi ekpep mme owo Bible?
13. Didie ke ukpepn̄kpọ Bible ekeme ndinen̄ede nsịn udọn̄ nnọ mme owo?
13 Ndida n̄wed Bible Ekpep n̄kpep mme owo Bible ekeme ndinen̄ede nsịn udọn̄ nnọ mbon oro ẹyomde ndinam uduak Abasi. Ebe ye n̄wan emi ẹdide akpan asiakusụn̄ ke Norway ẹma ẹtọn̄ọ ukpepn̄kpọ Bible ye ubon kiet emi ẹtode Zambia. Ebe ye n̄wan emi ẹketode Zambia mi ẹma ẹnyenyene nditọ ita, ntre mmọ ikoyomke aba eyen en̄wen. Ntem, ke ini n̄wan emi okoyomode idịbi, mmọ ẹma ẹbiere ndikosion̄o idịbi oro. Usen ifan̄ mbemiso mmọ ẹkade ẹkekụt abiausọbọ, mmọ ẹma ẹkpep ibuotikọ oro, “Nte Abasi Esede Uwem.” Ndise eyen oro mîmanake kan̄a emi odude ke ibuotikọ oro ama enen̄ede otụk ebe ye n̄wan emi tutu mmọ ẹdọhọ ke mmimọ idision̄oke aba idịbi oro. Mmọ ẹma ẹka iso ẹnam n̄kọri ke n̄kan̄ eke spirit ẹnyụn̄ ẹda enyịn̄ owo oro ekekpepde mmọ Bible ẹsio nsekeyen mmọ.
14. Nọ uwụtn̄kpọ emi owụtde ke ndinam se nnyịn ikpepde mbon en̄wen ekeme ndida nti utịp ndi.
14 Ata akpan usụn̄ oro Jesus ekesikpepde n̄kpọ ekedi ndinanam se enye ekekpepde mme owo. Mme Ntiense Jehovah ndikpebe Jesus esinam mme owo ẹma nti edu uwem mmọ. Inọ ama abiat usụn̄ ubomisọn̄ anam-mbubehe kiet ke New Zealand ebe odụk ekeyịp ekpat esie. Enye ama eketịn̄ n̄kpọ emi ọnọ bodisi, ndien bodisi ẹma ẹdọhọ enye ete: “N̄kukụre n̄kpọ oro akpanamde afiak okụt ekpat fo oro ekpedi edieke kiet ke otu Mme Ntiense Jehovah ọfiọhọde enye.” Ntiense kiet oro esinyamde n̄wedmbụk n̄kpọntịbe ama ọfiọhọ ekpat oro. Ke andinyene ekpat emi ama okokop ke eyenete nnyịn an̄wan ọkọfiọhọ ekpat imọ, enye ama aka ufọk esie. Enye ama enem esịt ndifiọk ke ata akpan n̄wed kiet okosụk ododu ke esịt ekpat oro. Eyenete an̄wan emi ama ọdọhọ enye ete, “Sia ndide kiet ke otu Mme Ntiense Jehovah, mma mfiọk ke nnennen n̄kpọ edi ndikpọn̄ ekpat emi nnọ andinyene.” Ke ini anam mbubehe emi etide se bodisi oro ọkọdọhọde enye usenubọk oro, idem ama enen̄ede akpa enye. Nte an̄wan̄ade, ata mme Christian ẹsida se Bible etịn̄de ẹsịn ke edinam ẹnyụn̄ ẹkpebe Jesus.—Heb. 13:18.
Kpebe nte Jesus Akanamde N̄kpọ ye Mme Owo
15, 16. Didie ke nnyịn ikeme ndinam mme owo ẹkop etop oro nnyịn ikwọrọde?
15 Nte Jesus akanamde n̄kpọ ye mme owo ama anam mmọ ẹkop etop esie. Ke uwụtn̄kpọ, ima ye nsụhọdeidem esie ẹma ẹnam mme ubuene ẹsan̄a ẹkpere enye. Enye ama atua mbon oro ẹkedide ẹbịne enye mbọm, ada nti ikọ ọdọn̄ mmọ esịt, onyụn̄ ọkọk ediwak owo udọn̄ọ. (Kot Mark 2:1-5.) Nnyịn ikemeke ndinam mme utịben̄kpọ, edi imekeme ndima mme owo, isụhọde idem, inyụn̄ itua mmọ mbọm—ndien mme edu emi ẹsinam mme owo ẹkpep akpanikọ.
16 Mbọm akanam akpan asiakusụn̄ kiet oro ẹkotde Tariua aka ufọk Beere, kpa akanieren kiet emi okodụn̄de ke kiet ke otu ata nsannsan isuo Kiribati ke Edem Usụk Pacific. Okposụkedi emi ọbọn̄ oro mîkenyịmeke ndikpan̄ utọn̄, Tariua ama okụt ke enye ekedi akpauben̄, ndien mbọm ọbọn̄ emi ama anam enye. Enye ama obụp ọbọn̄ oro ete: “Ndi omokop se Abasi ọn̄wọn̄ọde ndinam nnọ mbon udọn̄ọ ye n̄kani owo?” Ekem enye ama okot itie kiet ke n̄wed Isaiah. (kot Isaiah 35:5, 6.) Ikọ emi ama enem ọbọn̄ emi tutu enye ọdọhọ ete, “Mmokot Bible ke ediwak isua idahaemi, ndien isụn̄utom kiet ke ufọkabasi nnyịn esidi edise mi ke ediwak isua emi ẹbede, edi akananam n̄kwe itie oro ke Bible.” Ẹma ẹtọn̄ọ ukpepn̄kpọ Bible ye Beere, enye ama onyụn̄ enen̄ede anam n̄kọri ke n̄kan̄ eke spirit. Edi akpanikọ ke enye ekedi mbụn̄ọ, edi idahaemi enye ana baptism. Enye akam edi andise n̄kpọ mban̄a otu oro odude ke nsannsan isuo oro, esinyụn̄ asan̄a ke ofụri isuo oro ọkwọrọ eti mbụk.
Ẹka Iso Ẹkpebe Christ
17, 18. (a) Didie ke afo ekeme ndidi ọkwọrọ eti mbụk oro okụtde unen? (b) Nso ke en̄wọn̄ọ ẹnọ mbon oro ẹdade utom ukwọrọikọ mmọ ke akpan n̄kpọ?
17 Inem inem ifiọkutom oro isiwakde ndikop owụt ke imekeme ndikụt unen nte mme ọkwọrọ eti mbụk edieke nnyịn inyenede mme edu oro Jesus ekenyenede. Odot didie ntem ndien nnyịn ndikpebe Christ nte ifịk ifịk mme ọkwọrọ eti mbụk!
18 Ke ini ndusụk owo ẹkekabarede ẹdi mbet Jesus ke akpa isua ikie, Peter ama obụp ete: “Nso ke nnyịn idinen̄ede inyene?” Jesus ama ọbọrọ ete: “Owo ekededi emi ọkọkpọn̄de ufọk m̀mê nditọeka iren m̀mê nditọeka iban m̀mê ete m̀mê eka m̀mê nditọ m̀mê isọn̄ ke ntak enyịn̄ mi ọyọbọ se iwakde ikan oro, oyonyụn̄ enyene nsinsi uwem.” (Matt. 19:27-29) Nnyịn n̄ko iyenyene ukem utịp oro edieke ikade iso ikpebe akakan Isụn̄utom oro, Jesus Christ.
Didie ke Afo Ọkpọbọrọ?
• Didie ke Jehovah ekpep nnyịn ndikabade ndi mme ọkwọrọ eti mbụk?
• Ntak emi n̄wed Bible Ekpep enen̄erede ọfọn ke utom ukwọrọikọ nnyịn?
• Didie ke ikeme ndikpebe usụn̄ oro Jesus akanamde n̄kpọ ye mme owo?
[Mme Mbụme Ukpepn̄kpọ]
[Ndise ke page 17]
Ke ini Jesus okokotde Peter, Andrew, James, ye John, mmọ ẹma ẹsọsọp ẹtiene enye
[Ndise ke page 19]
Mme utọ n̄wed nnyịn nte “Bible Ekpep” ẹnam nnyịn ikpep mme owo ukem n̄kpọ