Ẹsịn Udọn̄ Ẹnọ Mme Andikụre Ukpep ke Gilead Ẹte “Ẹtọn̄ọ Nditịbi Isọn̄”
Ọyọhọ Otu 123 Ẹkụre Ukpep Ke Gilead
Ẹsịn Udọn̄ Ẹnọ Mme Andikụre Ukpep ke Gilead Ẹte “Ẹtọn̄ọ Nditịbi Isọn̄”
KE Saturday, September 8, 2007, owo 6,352 emi ẹtode idụt 41 ẹma ẹdụk edinam ukụre ukpep ọyọhọ otu 123 eke Ufọkn̄wed Enyọn̄-Ukpeme Ukpep Bible eke Gilead. Ke n̄kanika duop usenubọk, etieibuot okpokoro ndutịm, Anthony Morris, owo Otu Ukara, ama ọkọm otuowo ete “ẹmedi-o.” Ke ama eketịn̄ ntọn̄ọikọ, enye ama okot akpa etịn̄ikọ, Gary Breaux, andibuana ke Kọmiti N̄kọk Itieutom United States.
Brọda Breaux ama asian nditọ ufọkn̄wed oro ete ke inamke n̄kpọ m̀mê mmọ ẹtie didie ke enyọn̄ idem, ke mbon oro ẹnamde uduak Jehovah ẹnen̄ede “ẹye” Enye ke enyịn. (Jer. 13:11, NW) Enye ama esịn udọn̄ ọnọ mme andikụre ukpep ete ẹka iso ẹye ntre. Ekem, Gerrit Lösch, owo Otu Ukara, ama ọsọn̄ọ etịn̄ ke ọfọn idori enyịn ndibọ utịp ke ini inamde n̄kpọ Jehovah. (Heb. 11:6) Nte ededi, ima unana ibụk ekpedi ntak emi inamde n̄kpọ Abasi.
Ekem, William Samuelson, esenyịn Itieutom Emi Esede Aban̄a Mme Ufọkn̄wed Ukara Abasi, ama esịn udọn̄ ọnọ mme andikụre ukpep oro ete ẹka iso ẹnam uku uku utom—emi edide editan̄a Edidem emi akarade, ẹnyụn̄ ẹnyene uku ebe ke ndinyene eti edu uwem. * Sam Roberson, udiana esenyịn ke itieutom emi, ama esịn udọn̄ ọnọ mme andikụre ukpep ete ẹyom eti n̄kpọ ke idem mbon en̄wen kpukpru ini. Emi ayanam mmọ “ẹnyene ima ẹnọ ofụri otu nditọete.”—1 Pet. 2:17.
Ke ẹma ẹkekụre mme edemede-owo-udọn̄ utịn̄ikọ oro, Mark Noumair andikpep ke Gilead ama anam ndụn̄ọde ye ndusụk mme andikụre ukpep, ndien mmọ ẹma ẹnọ mme ifiọkutom oro mmọ ẹkenyenede ke an̄wautom ke ini ufọkn̄wed oro. Otuowo ẹma ẹnen̄ede ẹkụt ke mme andikụre ukpep emi ẹma utom ukwọrọikọ ẹnyụn̄ ẹma ndin̄wam mbon en̄wen. Ekem, Kent Fischer, emi okotode Itieutom Bethel ke Patterson edi, ama anam ndụn̄ọde ye mbon Kọmiti N̄kọk Itieutom oro ẹtode idụt ita emi ẹkenọde mme isụn̄utom ẹka. Se ndima nditọete emi ẹketịn̄de ama anam otuowo, esịnede ediwak ete ye eka mme andikụre ukpep emi, ẹfiọk ke ẹsitịm ẹkama mbufa isụn̄utom ke ebiet oro ẹnọde mmọ ẹka. Ekem, Izak Marais emi anamde utom ke Itieutom Esede Aban̄a Ukabade N̄wed ama anam ndụn̄ọde ye ndusụk mbon oro ẹma ẹkenam utom isụn̄utom ke anyan ini, ndien ifiọkutom mmọ ama anam otuowo ẹkụt idatesịt oro mme isụn̄utom emi ẹdinyenede.
Geoffrey Jackson, owo Otu Ukara, ọkọnọ akpan utịn̄ikọ ke ndutịm oro ke ibuotikọ emi: “Ke Ama Okokop Kpukpru Emi—Nso ke Edinam?” Brọda Jackson emi ekedide isụn̄utom ke se ikperede isua 25 ke Edem Usụk Pacific, ama etịn̄ se Jesus ekenemede ke utịt utịt Ukwọrọikọ Oro ke Obot. Jesus ama etịn̄ aban̄a owo iba emi ẹkebọpde ufọk, kiet edi ọniọn̄ enye eken edi ndisịme. Etịn̄ikọ emi ama owụt ke ekeme ndidi ufọk mbiba oro ẹkedu ke ukem n̄kann̄kụk. Edi, ndisịme owo ọkọbọp ufọk odori ke enyọn̄ utatan, ke adan̄aemi owo ọniọn̄ ekenen̄erede etịbi isọn̄ tutu okokụt itiat oro enye ekemede ndibọp ufọk esie ndori. Ke ini akwa oyobio ekedide, ufọk oro ẹkebọpde ke enyọn̄ akamba itiat ama ọsọn̄ọ ada, enye oro ẹkebọpde ke utatan ama owụre.—Matt. 7:24-27; Luke 6:48.
Jesus ọkọdọhọ ke ndisịme owo oro ekebiet mbon oro ẹkekpan̄de utọn̄ ẹnọ imọ edi mînamke se imọ itemede. Owo ọniọn̄ ekebiet mbon oro ẹkekpan̄de utọn̄ ẹnọ Jesus ẹnyụn̄ ẹnam se enye etemede. Brọda Jackson ama ọdọhọ mme andikụre ukpep ete: “Ke ini ẹdidade se mbufo ẹkpepde ke ini ukpepn̄kpọ Bible ẹsịn ke edinam ke efakutom oro ẹdinọde mbufo ẹka, ọwọrọ ke mbufo ẹdibiet owo ọniọn̄ oro.” Ke utịt ikọ esie, enye ama esịn udọn̄ ọnọ mme andikụre ukpep ete “ẹtọn̄ọ nditịbi isọn̄” ke efakutom oro ẹdinọde mmọ ẹka.
Ke akpatre, mme andikụre ukpep ẹma ẹbọ n̄weditoro ye mme efakutom, Brọda Morris onyụn̄ ọnọ mmọ item unyọn̄. Enye ama esịn udọn̄ ọnọ mmọ ete ẹka iso ẹtiene Jesus, ẹnyụn̄ ẹbuọt idem ye Jehovah kpukpru ini man enye ọkpọnọ mmọ ukeme. Ntem ke ẹkeda edinam ukụre ukpep oro ẹkeberi.
[Ikọ Idakisọn̄]
^ ikp. 5 Itieutom Emi Esede Aban̄a Mme Ufọkn̄wed Ukara Abasi, emi Kọmiti Unọ Ukpep esede enyịn, esise aban̄a Gilead, ufọkn̄wed mme andibuana ke Kọmiti N̄kọk Itieutom, ye ufọkn̄wed mme esenyịn oro ẹsan̄ade-san̄a.
[Ekebe ke page 31]
IDAHA OTU
Ibat idụt oro ẹtode: 10
Ibat idụt oro ẹnọde ẹka: 24
Ibat nditọ ufọkn̄wed: 56
Isua emana ke ẹbaharede ukem ukem: 33.5
Isua oro ẹdude ke akpanikọ ke ẹbaharede ukem ukem: 17.9
Isua oro ẹdude ke utom uyọhọ ini ke ẹbaharede ukem ukem: 13.8
[Ndise ke page 32]
Ọyọhọ Otu 123 Oro Ẹkụrede Ukpep ke Ufọkn̄wed Enyọn̄-Ukpeme Ukpep Bible eke Gilead
Ke udịm enyịn̄ oro ẹdude ke idak, ẹtọn̄ọ ke udịm iso ẹnọ nọmba ẹka edem, ẹnyụn̄ ẹtọn̄ọ ke ufien ẹwet enyịn̄ ẹka nnasia ke udịm kiet kiet.
(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T.(7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.