Jesus Christ—Akakan Isụn̄utom

“[Nto] ke enye nte andida ke ibuot esie, ndien Enye okonyụn̄ osio mi ọdọn̄.”—JOHN 7:29.

1, 2. Nso ke ẹkot isụn̄utom, ndien anie ke ẹkeme ndikot akakan Isụn̄utom?

 NSO ke esikere ke ini okopde ikọ oro “isụn̄utom”? Ndusụk owo ẹsikere ẹban̄a mme isụn̄utom Christendom emi ediwak ke otu mmọ ẹsisịnde idem ke mbre ukara ye ke ndutịm uforo idụt oro mmọ ẹdude. Nte ededi, nte kiet ke otu Mme Ntiense Jehovah, anaedi afo emesikere aban̄a mme isụn̄utom oro Otu Ukara ọdọn̄de ẹka ẹkekwọrọ eti mbụk ke nsio nsio idụt ke isọn̄. (Matt. 24:14) Mme isụn̄utom emi ẹsisịn ofụri ini ye ukeme mmọ ẹnam uku uku utom—oro edi, ndin̄wam mme owo ẹsan̄a ẹkpere Jehovah Abasi ẹnyụn̄ ẹnyene ọsọn̄urua itie ebuana ye enye.—Jas. 4:8.

² Ikọ oro “isụn̄utom” ye “mme isụn̄utom” idụhe ke N̄wed Abasi Christian Usem Greek Edikabade eke Obufa Ererimbot. Nte ededi, ke Ephesus 4:1, ẹkeme ndikabade ikọ Greek oro ọwọrọde “mme ọkwọrọ eti mbụk” n̄ko nte “mme isụn̄utom.” Jehovah edi akakan Ọkwọrọ Eti Mbụk, edi owo ikemeke ndikot enye akakan Isụn̄utom, koro akananam owo isioho enye idọn̄ utom. Edi Jesus Christ eketịn̄ ntem aban̄a Ete esie eke heaven: “[Nto] ke enye nte andida ke ibuot esie, ndien Enye okonyụn̄ osio mi ọdọn̄.” (John 7:29) Jehovah ama osio ikpọn̄-ikpọn̄ edibon Eyen esie ọdọn̄ edi isọn̄ ke ntak akwa ima oro enye amade ererimbot. (John 3:16) Ẹkeme ndikot Jesus akakan Isụn̄utom ye mfọnn̄kan Isụn̄utom, koro ntak kiet oro ẹkedọn̄de enye edi isọn̄ ekedi man ‘editie ntiense ọnọ akpanikọ.’ (John 18:37) Enye ama enen̄ede okụt unen ke nditan̄a eti mbụk Obio Ubọn̄, ndien nnyịn ke idia ufọn utom ukwọrọikọ esie. Ke uwụtn̄kpọ, edide ẹdọn̄ nnyịn ika ikanam utom nte mme isụn̄utom m̀mê owo idọn̄ke, nnyịn imekeme ndikpebe nte enye ọkọkwọrọde ikọ.

3. Mme mbụme ewe ke nnyịn idineme?

³ Sia Jesus edide anditan̄a Obio Ubọn̄, emi edemede mme utọ mbụme nte: N̄kpọ eketie didie ye Jesus ke isọn̄? Ntak emi mme ukpepn̄kpọ esie ẹkenyenede uforo? Ndien nso ikanam utom ukwọrọikọ esie okụt unen?

Edu Unyịmesịt ke Obufa N̄kann̄kụk

4-6. Mme ukpụhọde ewe ke Jesus akanam ke ini ẹkenọde enye edi isọn̄?

⁴ Mfịn, ekeme ndiyom mme isụn̄utom ye ndusụk Christian oro ẹkade ebiet oro ẹnen̄erede ẹyom mme ọkwọrọ Obio Ubọn̄ ẹmehe ye mme idaha oro mmọ ẹsobode okposụkedi emi mîmenke-men udomo ye se idude ke ebiet oro mmọ ẹtode ẹdi. Edi nnyịn ikemeke-keme ndimen se Jesus ọkọkpọn̄de ke heaven emi enye okodude ye Ete esie ke otu mme angel oro ẹnamde n̄kpọ Jehovah ke edisana esịt ndomo  ye mme idaha oro enye okosobode ke isọn̄. (Job 38:7) Emi okokpụhọde didie ntem ye edidu ke otu mme anamidiọk ke mbiara ererimbot! (Mark 7:20-23) Jesus akakam enyene ndikpan ọkpọsọn̄ eneni oro okodude ke otu n̄kpet n̄kpet mbet esie. (Luke 20:46; 22:24) Ke akpanikọ, enye ama ese aban̄a idaha ekededi oro enye okosobode ke isọn̄ ke mfọnn̄kan usụn̄.

⁵ Jesus ikọtọn̄ọke ndisem usem owo ke utịbe utịbe usụn̄; enye ekekpekpep usem emi ukem nte nsekeyen. Emi okokpụhọ didie ntem ye edinọ mme angel ndausụn̄! Ke ini Jesus okodude ke isọn̄, enye ama esem ke nsụhọde n̄kaha kiet ke otu “usem mme owo.” Emi ama enen̄ede okpụhọde ye ‘usem mme angel.’ (1 Cor. 13:1) Edi idụhe owo oro ekesitịn̄de ndinem ikọ nte Jesus.—Luke 4:22.

⁶ Kere ban̄a mme usụn̄ en̄wen oro n̄kpọ ẹkenen̄erede ẹkpụhọde ye Eyen Abasi ke ini enye ekedide isọn̄. Okposụkedi emi Jesus mîkadaha idiọkn̄kpọ Adam imana, Enye ama akabade etie nte owo, ukem nte mbon oro ẹdikabarede ẹdi “nditọete” esie m̀mê mbet esie oro ẹyetde aran. (Kot Mme Hebrew 2:17, 18.) Ke akpatre okoneyo oro Jesus okodude ke isọn̄, enye ikeben̄eke Ete esie eke heaven ite ọnọ imọ “se ikande udịm angel duopeba.” Edi kam kere ban̄a ofụri udịm mme angel oro enye nte Michael, kpa Etubom Mme Angel ekesinọde ndausụn̄! (Matt. 26:53; Jude 9) Edi akpanikọ ke Jesus ama esinam mme utịben̄kpọ, edi se enye akanamde ke isọn̄ ikekpetke-kpet se enye akpakanamde ke heaven.

7. Didie ke mme Jew ẹkese Ibet?

⁷ Ke ini Jesus okodude ke heaven nte “Ikọ,” ekeme ndidi enye ekedi Anditịn̄ ikọ ke Ibuot Abasi, kpa enye emi ọkọnọde nditọ Israel ndausụn̄ ke wilderness. (John 1:1; Ex. 23:20-23) Nte ededi, mmọ ẹma “[ẹbọ] Ibet emi ẹkedade mme angel ẹnọ edi [mîkenịmke].” (Utom 7:53; Heb. 2:2, 3) Ke nditịm ntịn̄, mme adaiso ido ukpono mme Jew eke akpa isua ikie, ikamaha ndifiọk ntak oro ẹkenọde Ibet. Kere ban̄a ibet Sabbath ke uwụtn̄kpọ. (Kot Mark 3:4-6.) Mme ewetn̄wed ye mme Pharisee ẹma “ẹfụmi ikpọ n̄kpọ ke Ibet, oro edi, unenikpe ye mbọm ye edinam akpanikọ.” (Matt. 23:23) Edi oro ikanamke Jesus etre ndikwọrọ akpanikọ.

8. Ntak emi Jesus ekemede ndin̄wam nnyịn?

⁸ Jesus ama esinyịme ndinam n̄kpọ nnọ mbon en̄wen. Enye ama ama mme owo onyụn̄ enen̄ede oyom ndin̄wam mmọ. Enye ikedehedei itre ndisikwọrọ ikọ. Ndien sia enye akanamde akpanikọ ọnọ Jehovah ke ini emi enye okodude ke isọn̄, Jesus ama “akabade edi ntak nsinsi edinyan̄a ọnọ kpukpru owo eke ẹkopde uyo esie.” Ke adianade do, sia “enye ama okokụt ndutụhọ ke ini ẹsịnde enye ke udomo, enye ekeme ndin̄wam mbon oro ẹsịnde ke udomo [nte nnyịn].”—Heb. 2:18; 5:8, 9.

Ẹnen̄ede Ẹnọ Ukpep nte Andikpep

9, 10. Nso ukpep ke Jesus ọkọbọ mbemiso ẹkenọde enye edi isọn̄?

⁹ Mfịn, Otu Ukara esinam ndutịm man ẹnọ mme Christian ukpep mbemiso ẹsiode mmọ ẹdọn̄ nte mme isụn̄utom. Ndi Jesus Christ ama ọbọ ukpep? Ih, edi enye ikakaha ufọkn̄wed mme rabbi mbemiso ẹyetde enye aran nte Messiah; enye ikonyụn̄ ibọhọ ukpep ke ukot mme adaiso ido ukpono oro ẹkedide mme ọwọrọiso owo. (John 7:15; men Utom 22:3 domo.) Nso ndien ikanam Jesus odot ndikpep owo n̄kpọ?

¹⁰ Jesus ọkọbọ ata akpan ukpep oro aban̄ade utom ukwọrọikọ oto Akakan Ọnọ-Ukpep, okposụkedi emi Mary eka esie, ye Joseph, kpa ete emi ekemende enye akama, ẹkekpepde enye ediwak n̄kpọ. Jesus eketịn̄ ntem aban̄a ukpep emi: “Ntịn̄ke n̄kpọ emi ke ekikere idemmi, edi Ete emi ọkọdọn̄de mi ọmọnọ mi ewụhọ aban̄a se ndọhọde ye se ntịn̄de.” (John 12:49) Tịm fiọk ete ke ẹma ẹnen̄ede ẹteme Eyen se enye edikpepde. Anaedi Jesus ama enen̄ede ada ini akpan̄ utọn̄ ọnọ mme item Ete esie mbemiso ekedide isọn̄. Mmọn̄ọ, ndi odu ebiet en̄wen oro enye ọkpọkọbọde ukpep?

11. Didie ke Jesus ekekpebe usụn̄ oro Ete esie esinamde n̄kpọ ye mme owo?

¹¹ Eyen ama enen̄ede emehe ye Ete esie toto ke ini oro ẹkebotde enye. Ke ini Jesus okodude ke heaven mbemiso edide isọn̄, enye ama ọfiọk nte Abasi esede mme owo ebe ke ndise nte enye  akanamde n̄kpọ ye mmọ. Eyen Abasi, emi ẹkekotde eti ibuot ama enen̄ede ama mme owo ukem nte Ete esie tutu enye ọdọhọ ete: “Idatesịt mi odu ke otu nditọ owo.”—N̄ke 8:22, 31.

12, 13. (a) Didie ke Jesus ekekpep n̄kpọ oto nte Ete esie akanamde n̄kpọ ye nditọ Israel? (b) Didie ke Jesus akada ukpep oro ẹkenọde enye esịn ke edinam?

¹² Ukpep oro Eyen ọkọbọde ama esịne edise nte Ete esie akanamde n̄kpọ ke n̄kpọsọn̄ idaha. Ke uwụtn̄kpọ, kere ban̄a nte Jehovah akanamde n̄kpọ ye mme otụtutọn̄ nditọ Israel. Nehemiah 9:28 ọdọhọ ete: “Ke adan̄aemi mmọ ẹkụtde nduọkodudu, mmọ ẹtọn̄ọ ntak ẹnam idiọk ke iso [Jehovah], ndien afo ọkpọn̄ mmọ ke ubọk mme asua mmọ eke ẹkarade mmọ. Edi adan̄aoro mmọ ẹtọn̄ọde ntak ẹseme ẹnọ fi, afo etie ke enyọn̄ okop, onyụn̄ anyan̄a mmọ ediwak ini ke mbọm fo.” Ndinam utom ye Jehovah nnyụn̄ n̄kụt nte enye anamde n̄kpọ ama anam Jesus n̄ko atua mbon oro ẹkedude ke efakutom esie mbọm.—John 5:19.

¹³ Jesus ama ada se enye ekekpepde esịn ke edinam ke emi enye akatuade mbet esie mbọm. Ke okoneyo oro ẹkeyomde ndiwot enye, kpukpru mme apostle esie oro enye ekenen̄erede ama ẹma “ẹkpọn̄ enye ẹfen̄e.” (Matt. 26:56; John 13:1) Apostle Peter ama akam akan̄ Christ utịm ikata! Nte ededi, Jesus ama anam n̄kpọ man mme apostle esie ẹkpefiak ẹtiene imọ. Enye ama asian Peter ete: “Mmanam n̄kpeubọk mban̄a fi nte mbuọtidem fo okûwụre; ndien afo n̄ko, ke ini editọn̄ọde ntak edi, sọn̄ọ nditọete fo idem.” (Luke 22:32) “Mme apostle ye mme prọfet” ẹnen̄ede ẹdi itiat idakisọn̄ Israel eke spirit, ndien itiat idakisọn̄ ibibene Obufa Jerusalem enyene enyịn̄ mme apostle 12, emi ẹdide mme anam-akpanikọ apostle Eyenerọn̄, Jesus Christ. Tutu emi, mme Christian oro ẹyetde aran, ọkọrọ ye nsan̄a mmọ oro ẹma ẹkeyak idem ẹnọ Abasi, kpa “mme erọn̄ en̄wen,” ke ẹnyene uforo nte esop mme ọkwọrọ Obio Ubọn̄ ke idak ọkpọsọn̄ ubọk Abasi ye ndausụn̄ edima Eyen esie.—Eph. 2:20; John 10:16; Edi. 21:14.

Nte Jesus Ekekpepde Mme Owo N̄kpọ

14, 15. Didie ke ukpepn̄kpọ Jesus okokpụhọde ye eke mme ewetn̄wed ye mme Pharisee?

¹⁴ Didie ke Jesus akada ukpep oro ẹkenọde enye esịn ke edinam, ke ini enye ekekpepde mme mbet esie n̄kpọ? Ke ini imende usụn̄ oro Jesus ọkọnọde ukpep idomo ye eke mme adaiso ido ukpono mme Jew, nnyịn iyokụt in̄wan̄-in̄wan̄ ke eke Jesus ama ọfọn akan eke mmọ. Mme ewetn̄wed ye mme Pharisee ‘ẹma ẹnam ikọ Abasi akabade edi ikpîkpu ke ntak ido eset mmọ.’ Edi Jesus iketịn̄ke ikọ ke ifiọk idemesie; se enye eketịn̄de ekedi ikọ m̀mê etop Abasi. (Matt. 15:6; John 14:10) Oyom nnyịn inam ntre n̄ko.

¹⁵ Odu n̄kpọ en̄wen oro akanamde Jesus enen̄ede okpụhọde ye mme adaiso ido ukpono. Enye eketịn̄ ntem aban̄a mme ewetn̄wed ye mme Pharisee: “Kpukpru n̄kpọ eke mmọ ẹdọhọde mbufo ẹnam, ẹnam ẹnyụn̄ ẹnịm, edi ẹkûnam nte mmọ ẹnamde, koro mmọ ẹdọdọhọ edi inamke-nam.” (Matt. 23:3) Jesus ama ada se enye ekekpepde esịn ke edinam. Yak ineme n̄kpọ kiet oro owụtde ke enye ama anam ntre.

16. Ntak emi afo ekemede ndidọhọ ke Jesus ama anam se enye eketemede ke Matthew 6:19-21?

¹⁶ Jesus ama eteme mme mbet esie ete “ẹbon n̄kpọuto . . . ke heaven.” (Kot Matthew 6:19-21.) Ndi Jesus ke idemesie ama anam item emi? Ih, koro enye ekenen̄ede etịn̄ aban̄a idemesie ke ini enye ọkọdọhọde ete: “Mme ebua ikọt ẹnyene ndudu, mme inuen enyọn̄ ẹnyụn̄ ẹnyene mme efọk, edi Eyen owo inyeneke ebiet eke enịmde ibuot esie.” (Luke 9:58) Jesus okodu mmemmem uwem. Se ikenen̄erede ibehe enye ekedi editan̄a eti mbụk Obio Ubọn̄, ndien enye ama  enịm uwụtn̄kpọ ke nte ẹkpetrede editịmede esịt mban̄a mme n̄kpọuto emi ẹdude ke isọn̄. Jesus ama owụt ke ndibon n̄kpọuto ke heaven, “ke ebiet emi utan̄kpọ m̀mê n̄karafan̄ mîbiatke, ye ke ebiet emi mme inọ mînyụn̄ ibụn̄ke idụk iyịp” enen̄ede ọfọn akan ndibon ke isọn̄. Nte afo ke anam item Jesus emi ọdọhọde ibon n̄kpọuto nnyịn ke heaven?

Mme Edu Oro Ẹkenamde Mme Owo Ẹma Jesus

17. Mme edu ewe ẹkenam Jesus edi n̄wọrọnda ọkwọrọikọ?

¹⁷ Mme edu ewe ẹkenam Jesus edi n̄wọrọnda ọkwọrọikọ? Kiet ke otu edu emi ekedi nte enye ekesede mbon oro enye akan̄wamde. Nsụhọdeidem, ima, ye mbọm ẹdi ndusụk ke otu nti edu Jehovah emi Jesus ekekpebede. Tịm fiọk nte mme edu emi ẹkenamde mme owo ẹma Jesus.

18. Ntak emi ẹkemede ndidọhọ ke Jesus ama osụhọde idem?

¹⁸ Jesus ama “asana [ofụri se enye ekenyenede] ayak onyụn̄ emen mbiet ofụn esịne onyụn̄ edidu ke mbiet owo” sia enye ama enyịme ndidi isọn̄ ndinam se ẹkedọn̄de enye. (Phil. 2:7) Oro okowụt nsụhọdeidem. Ke adianade do, Jesus ikesehe mme owo ke usụhọde. Enye ikọdọhọke ke imọ ikoto heaven idi, ntre ke akpana mme owo ẹkpan̄ utọn̄ ẹnọ imọ. Enye ikebietke abian̄a abian̄a mbon oro ẹkenamde inua ẹte idi messiah, ikonyụn̄ ifiorike n̄kpo idọhọ ke imọ ikam idi ata Messiah. Ndusụk ini, enye akakam akpakpan mme owo ete ẹkûtịn̄ owo emi imọ idide ẹkûnyụn̄ ẹtịn̄ se imọ ikanamde ẹnọ mbon en̄wen. (Matt. 12:15-21) Jesus okoyom mme owo ẹbiere nditiene imọ ke ntak mme n̄kpọ oro mmọ ẹkekụtde nte imọ inamde. Mbet esie ẹkekop inemesịt didie ntem ndifiọk ke Ọbọn̄ mmimọ iyomke mmimọ ifọn ima ukem nte mme angel emi enye ọkọkpọn̄de ke heaven!

19, 20. Didie ke ima ye mbọm ẹkenam Jesus an̄wam mme owo?

¹⁹ Jesus ama enyene ima n̄ko, kpa n̄wọrọnda edu Ete esie eke heaven. (1 John 4:8) Ima akanam Jesus ekpep otuowo esie n̄kpọ. Ke uwụtn̄kpọ, kere nte enye akamade akparawa emi ekedide andikara mi. (Kot Mark 10:17-22.) Jesus ama “ama enye” onyụn̄ oyom ndin̄wam enye, edi akparawa emi ikamaha ndisana ediwak inyene oro enye ekenyenede nyak man etiene Christ.

 ²⁰ Editua owo mbọm ekedi edu en̄wen oro akanamde mme owo ẹma Jesus. Mbon oro ẹkenamde se enye ekekpepde ẹma ẹnyene ata ediwak mfịna kpa nte kpukpru owo ẹnyenede. Oro akanam Jesus esitua mbon oro enye ekekpepde n̄kpọ, mbọm. Ke uwụtn̄kpọ: Isan̄ kiet, Jesus ye mme apostle esie ẹma ẹnen̄ede ẹnam utom tutu ikam inyeneke ini idia n̄kpọ. Edi, didie ke Jesus akanam n̄kpọ ke ini enye okokụtde nte akwa otuowo ẹsopde idem? Enye ama “atua mmọ mbọm, koro mmọ ẹbietde erọn̄ eke mînyeneke andikpeme. Ndien enye ọtọn̄ọ ndikpep mmọ ediwak n̄kpọ.” (Mark 6:34) Jesus ama okụt ke mbon oro ẹkedude ke efakutom imọ ẹnyene mbọm ndien enye ama esịn idem ekpep mmọ n̄kpọ onyụn̄ anam mme utịben̄kpọ ọnọ mmọ. Nti edu emi ẹma ẹnam ndusụk owo ẹma enye, ẹda ikọ esie ẹsịn ke edinam, ẹnyụn̄ ẹkabade ẹdi mme mbet esie.

21. Nso ke idineme ke ibuotikọ oro etienede?

²¹ Nte idikụtde ke ibuotikọ oro etienede, odu ata ediwak n̄kpọ en̄wen oro nnyịn ikemede ndikpep mban̄a utom ukwọrọikọ Jesus ke isọn̄. Nso idi mme usụn̄ efen oro ikemede ndikpebe Jesus Christ, kpa Akakan Isụn̄utom?

Didie ke Afo Ọkpọbọrọ?

• Nso ukpep ke Jesus ọkọbọ mbemiso ekedide isọn̄?

• Didie ke usụn̄ oro Jesus ọkọnọde ukpep ọkọfọn akan eke mme ewetn̄wed ye mme Pharisee?

• Mme edu ewe ẹkenam mme owo ẹma Jesus?

[Mme Mbụme Ukpepn̄kpọ]

[Ndise ke page 15]

Didie ke Jesus ekekpep otuowo n̄kpọ?