Nso ke Edidu Christ Ọwọrọ Ọnọ Fi?

“Nso idinyụn̄ idi idiọn̄ọ [edidu] fo, ye eke akpatre ini eyo emi?”—MATT. 24:3, Edisana Ŋwed Abasi Ibom.

1. Ewe akpan mbụme ke mme apostle Jesus ẹkebụp enye?

 KE SE ikperede ndisịm tọsịn isua iba emi ẹkebede, owo inan̄ ke otu mme apostle Jesus ẹma ẹdaha ke idemmọ ẹkebụp Eteufọk mmọ mbụme ke Obot Olive. Mmọ ẹkebụp ete: “Sian nnyịn ini eke mme n̄kpọ emi ẹdidide, nso idinyụn̄ idi idiọn̄ọ [edidu] fo, ye eke akpatre ini eyo emi?” (Matt. 24:3, Edisana Ŋwed Abasi Ibom) Ọkpọikọ iba oro ẹdude ke mbụme mme apostle emi ẹdi, ‘edidu fo’ ye “akpatre ini eyo emi.” Nso ke mme ikọ emi ẹwọrọ?

2. Nso ke ikọ oro “akpatre” enen̄ede ọwọrọ?

² Ẹyak ibem iso ineme ikọ oro “akpatre,” emi ẹkabarede ẹto ikọ Greek oro syn·teʹlei·a. Syn·teʹlei·a ọwọrọ “akpatre,” edi te’los, kpa mbiet ikọ Greek emi, ọwọrọ “utịt.” Ẹkeme ndida uwụtn̄kpọ oro aban̄ade utịn̄ikọ emi ẹnọde ke Ufọkmbono Obio Ubọn̄ nnam ukpụhọde oro odude ke ikọ iba emi an̄wan̄a. Akpatre ikpehe ke utịn̄ikọ esidi ikpehe oro etịn̄ikọ esidade esisịt ini afiak eti otuowo se enye ekenemede onyụn̄ owụt nte mmọ ẹkemede ndida utịn̄ikọ oro nsịn ke edinam. Edi utịn̄ikọ oro esisịm utịt ke ini etịn̄ikọ ọkpọn̄de mbot utịn̄ikọ. Kpasụk ntre, Bible owụt nte ke ikọ oro, “akpatre ini eyo emi” ada aban̄a ikpehe ini oro adade ekesịm utịt ye utịt oro ke idemesie.

3. Nso idi ndusụk n̄kpọ emi ẹtịbede ke ini edidu Jesus?

³ Nso kaban̄a “edidu” emi mme apostle ẹkekam ẹbụpde ẹban̄a? Pa·rou·siʹa * emi edide ikọ Greek ke ẹkabarede nte “edidu.” Pa·rou·siʹa m̀mê edidu Christ, ọkọtọn̄ọ ke ini emi ẹkeyaride Jesus anyanya ke heaven ke 1914 onyụn̄ aka iso tutu esịm ini “akwa ukụt” emi enye edidide edisobo mme idiọkowo. (Matt. 24:21) Nsio nsio n̄kpọ, esịnede “mme akpatre usen” eke idiọk editịm n̄kpọ emi, editan̄ mbon oro ẹmekde mbok, ye edinam mmọ ẹset ẹka heaven, ẹtịbe ke ini edidu Jesus emi.  (2 Tim. 3:1; 1 Cor. 15:23; 1 Thess. 4:15-17; 2 Thess. 2:1) Ẹkeme ndidọhọ ke ikpehe ini oro ẹkotde “akpatre ini eyo emi” (syn·teʹlei·a) edi ukem ye ini edidu Christ (pa·rou·siʹa).

Ikpehe Ini Oro Ọniọn̄de

4. Didie ke edidu Christ ebiet se iketịbede ke eyo Noah?

⁴ Se Jesus eketịn̄de aban̄a ini edidu esie owụt ke pa·rou·siʹa edi ikpehe ini oro ọniọn̄de. (Kot Matthew 24:37-39.) Tịm fiọk ete ke Jesus ikemenke edidu esie idomo ye ekpri ibio ini oro Ukwọ akadade itie ke eyo Noah. Utu ke oro, enye ekemen edidu esie odomo ye ata anyan ini oro akadade ekesịm Ukwọ oro. Oro ama abuana ini oro Noah akadade ọkọn̄ ubom onyụn̄ ọkwọrọ ikọ tutu esịm ini Ukwọ oro. Mme n̄kpọ emi ẹketịbe ke ediwak iduọk isua. Kpasụk ntre, edidu Christ esịne mme n̄kpọntịbe emi ẹdade ẹkesịm ini akwa ukụt ye akwa ukụt ke idemesie.—2 Thess. 1:6-9.

5. Didie ke Ediyarade ibuot 6 owụt ke ini edidu Jesus edi ikpehe ini oro ọniọn̄de?

⁵ Mme ntịn̄nnịm ikọ en̄wen ke Bible ẹwụt ke ini edidu Christ edi ikpehe ini oro ọniọn̄de utu ke ndidi sụk ini oro enye edidide edisobo mme idiọkowo. N̄wed Ediyarade owụt nte Jesus awatde afia enan̄-mbakara ye nte ẹnọde enye anyanya. (Kot Ediyarade 6:1-8.) Ke ẹma ẹkeyari enye anyanya ke isua 1914 nte Edidem, ẹwụt nte Jesus ‘ọwọrọde aka ndikan onyụn̄ okụrede edikan esie.’ Mbụk oro ndien owụt ke mme awat nsio nsio uduot enan̄-mbakara ẹwat ẹtiene enye. Emi ẹdi mme ntịn̄nnịm ikọ emi ẹban̄ade ekọn̄, unana udia, ye idiọk udọn̄ọ, ndien kpukpru emi ẹtịbe ke ikpehe ini oro ẹkotde “ukperedem ini.” Imokụt nte mme ntịn̄nnịm ikọ emi ẹsude ke eyo nnyịn.

6. Nso ke Ediyarade ibuot 12 an̄wam nnyịn ifiọk iban̄a edidu Christ?

⁶ Ediyarade ibuot 12 etịn̄ mme n̄kpọ efen efen oro ẹban̄ade nte Obio Ubọn̄ Abasi ọtọn̄ọde ndikara ke heaven. Do ke nnyịn ikot iban̄a ekọn̄ oro ẹn̄wanade ke heaven. Michael—oro edi, Jesus Christ ke ebekpo ubọn̄ esie ke heaven—ye mme angel esie ẹn̄wana ye Devil ye mme demon esie. Ntre, ẹsio Satan kpa Devil ye udịmekọn̄ esie ẹduọn̄ọ ke isọn̄. Do ndien ke mbụk oro asian nnyịn ete ke Devil asan̄a ye akwa iyatesịt sia “ọfiọkde ete ke ini imọ edi ibio.” (Kot Ediyarade 12:7-12.) Do, ana in̄wan̄-in̄wan̄ nte ke Obio Ubọn̄ Christ ama ọkọtọn̄ọ ndikara ke heaven, ikpehe ini oro isọn̄ ye mme andidụn̄ enye enen̄erede enyene “mbọm,” ekenyene ndibe.

7. Nso ke udiana Psalm etịn̄ aban̄a, ndien nso ifet ibererede?

⁷ Udiana psalm etịn̄ ntịn̄nnịm ikọ n̄ko aban̄a nte ẹnịmde Jesus nte Edidem ke Obot Zion eke heaven. (Kot Psalm 2:5-9; 110:1, 2.) Nte ededi, psalm emi owụt n̄ko ke ẹnọ ndidem isọn̄ ye mbon oro mmọ ẹkarade ini ndisụk ibuot nnọ ukara Christ. Ẹteme mmọ ẹte “ẹdi ọniọn̄” ẹnyụn̄ ẹyak “ẹnen̄ede ndudue,” (NW) mmọ. Ih, ke ini oro “ọfọfọn ọnọ kpukpru mmọ eke ẹbuọtde idem ye [Abasi]” ebe ke ndinam n̄kpọ Jehovah ye eke Edidem esie oro ẹmekde. Ntre ifet eberede ọnọ mmọ ndinam ukpụhọde ke ini edidu Jesus emi ẹnọde enye ubọn̄.—Ps. 2:10-12.

Ndifiọk Idiọn̄ọ Oro

8, 9. Mmanie ẹdifiọk idiọn̄ọ edidu Christ ye se enye adade aban̄a?

⁸ Ke ini mme Pharisee ẹkebụpde Jesus ẹban̄a ini emi Obio Ubọn̄ edidide, enye ama ọbọrọ mmọ ete ke enye ididịghe “nte ẹkụtde ke  enyịn” nte mmọ ẹkekerede. (Luke 17:20, 21) Mbon oro mînịmke ke akpanikọ idifiọkke. Mmọ ẹkpesasan̄a didie ẹfiọk? Mmọ ikakam idaha Jesus nte Edidem oro edikarade mmọ. Ntem, mmanie ẹdifiọk idiọn̄ọ edidu Christ ye se enye adade aban̄a?

⁹ Jesus ama aka iso ọdọhọ ke mbet imọ ẹyenen̄ede ẹkụt idiọn̄ọ emi ukem nte mmọ ẹsikụtde “emịnen̄mịnen̄ ọwọrọde ke n̄kan̄ ikpaenyọn̄ kiet, ayama esịm n̄kan̄ ikpaenyọn̄ eken.” (Kot Luke 17:24-29.) Kamse, Matthew 24:23-27 ẹtịn̄ ukem n̄kpọ emi aban̄a idiọn̄ọ edidu Christ!

Emana Emi Ẹkụtde Idiọn̄ọ Oro

10, 11. (a) Ẹkedọhọ ke “emana” oro ẹtịn̄de ẹban̄a ke Matthew 24:34 edi nso? (b) Anaedi mbet Jesus ẹkekere ke mmanie ẹtiene ẹbuana ke “ẹmana” oro?

¹⁰ Magazine emi ama ebebem iso etịn̄ ete ke akpa isua ikie, “emana emi,” oro ẹtịn̄de ẹban̄a ke Matthew 24:34 edi “emana iduọk ini eke mme Jew oro mîkonịmke ke akpanikọ.” * Etie nte se ẹtịn̄de emi esịne ifiọk koro Jesus esitịn̄ aban̄a “emana” ke idiọk usụn̄ ke kpukpru itie eken oro enye etịn̄de aban̄a emana emi, ndien ke ediwak idaha, enye esida utọ ikọ nte “emana eke ọdiọkde” etịn̄ aban̄a emana emi. (Matt. 12:39; 17:17; Mark 8:38) Ntem, ke nditịn̄ mban̄a emana nnyịn, magazine emi ama anam an̄wan̄a ke Jesus eketịn̄ aban̄a idiọk “emana” mbon oro mînịmke ke akpanikọ oro ẹdikụtde mme idiọn̄ọ oro ẹdidude ke “akpatre ini eyo emi” (syn·teʹlei·a) ye eke utịt eyo emi (teʹlos).

¹¹ Edi akpanikọ ke Jesus eketịn̄ ikọ ọnọ mme idiọkowo m̀mê aban̄a mme idiọkowo oro ẹkedude ke eyo esie ke ini enye eketịn̄de aban̄a “emana” ke idiọk usụn̄. Edi, ndi se enye okosụk etịn̄de aban̄a edi emi ke Matthew 24:34? Ti ete ke mbet Jesus mbinan̄ ẹkeka ẹbịne enye “ke idem mmọ.” (Matt. 24:3, Edisana Ŋwed Abasi Ibom) Sia Jesus mîkokotke mme apostle esie idiọk emana ke ini enye eketịn̄de aban̄a “emana emi,” eyedi ikọ Jesus ama an̄wan̄a mmọ nte ke mmimọ ye ekemmọ mbet eken idu ke “emana” oro mîdibehe ifep “tutu kpukpru n̄kpọ emi ẹwọrọ ẹsu.”

12. Udọn̄ikọ itien̄wed emi ọdọhọ ke mmanie ke Jesus okokot “emana” emi?

¹² Nso ikpanam ikere ke se ẹtịn̄de emi enen? Nditịm ndụn̄ọde udọn̄ikọ itien̄wed emi anam ikere ke enen. Nte ẹwetde ke Matthew 24:32, 33, Jesus ọkọdọhọ ete: “Edi ẹkpep n̄kpọ emi ẹto eto fig nte uwụtn̄kpọ: Ke ndondo oro nsek n̄kọk esie esehede onyụn̄ osion̄ode ikọn̄, mbufo ẹfiọk ẹte ndaeyo ke ekpere. Kpasụk ntre n̄ko mbufo, ke ini mbufo ẹkụtde kpukpru n̄kpọ emi, ẹfiọk ẹte enye ekpere, odu ke enyịnusụn̄.” (Men Mark 13:28-30; Luke 21:30-32 domo.) Ndien,  Matthew 24:34 okot ete: “Ke akpanikọ ke ndọhọ mbufo nte emana emi idibehe ifep tutu kpukpru n̄kpọ emi ẹwọrọ ẹsu.”

13, 14. Ntak emi nnyịn ikemede ndidọhọ ke anaedi “emana” oro Jesus eketịn̄de aban̄a ekedi eke mme mbet esie?

¹³ Nte ẹtịn̄de ke Matthew 24:33, Jesus ọkọdọhọ ke mbet imọ, emi ẹdiyetde aran ke edisana spirit ke mîbịghike, ẹkpenyene ndifiọk se mme idiọn̄ọ emi ẹdade ẹban̄a ke ini mmọ ẹkụtde nte “kpukpru n̄kpọ emi” ẹwọrọde ẹsu. Ntem, anaedi Jesus eketịn̄ aban̄a mme mbet esie ke ini enye ọkọdọhọde ete: “Emana emi idibehe ifep tutu kpukpru n̄kpọ emi ẹwọrọ ẹsu.”

¹⁴ Mme mbet Jesus ẹyekụt mme idiọn̄ọ emi ẹnyụn̄ ẹfiọk se mmọ ẹdade ẹban̄a sia mmọ itiehe nte mbon oro mînịmke ke akpanikọ. Mmọ ‘ẹyekpep’ n̄kpọ ẹto idiọn̄ọ emi ẹnyụn̄ ẹnen̄ede “ẹfiọk” se mmọ ẹwọrọde. Mmọ ẹyenen̄ede ẹfiọk “ẹte enye ekpere, odu ke enyịnusụn̄.” Okposụkedi emi mme Jew oro mînịmke ke akpanikọ ye mme anam-akpanikọ Christian oro ẹyetde aran ẹkekụtde nte ndusụk n̄kpọ oro Jesus eketịn̄de ẹsude ke akpa isua ikie, edi mbet esie oro ẹyetde aran emi ẹkedude ini oro kpọt ẹkekeme ndikpep n̄kpọ nto mme n̄kpọntịbe emi—ih, ẹkenen̄ede ẹfiọk se mme n̄kpọ oro mmọ ẹkụtde ẹkewọrọde.

15. (a) Mfịn, mmanie ẹnam “emana” oro Jesus eketịn̄de aban̄a? (b) Ntak emi nnyịn mîkemeke ndifiọk adan̄a nte “ẹmana emi” ediniọn̄de? (Se ekebe ke page 25.)

¹⁵ Mfịn, mbon oro mînyeneke ifiọk Abasi ẹkere ke idụhe ‘n̄kpọ oro ẹkụtde ke enyịn’ emi owụtde idiọn̄ọ edidu Jesus. Mmọ ẹkere ke kpukpru n̄kpọ ẹka iso ukem nte ẹketiede ke akpa. (2 Pet. 3:4) Ke n̄kan̄ eken, mme anam-akpanikọ nditọete Christ oro ẹyetde aran, kpa otu John eyomfịn, ẹnen̄ede ẹkụt mme idiọn̄ọ emi ukem nte mme owo ẹsikụtde emịnen̄mịnen̄, ndien mmọ ẹfiọk se mme idiọn̄ọ emi ẹwọrọde. Nte otu, mbon oro ẹyetde aran mi ẹnam “emana” eyomfịn emi mme andidu ke iduọk ini emi mîdibehe ifep “tutu kpukpru n̄kpọ emi ẹwọrọ ẹsu.” * Emi anam ikere ke ndusụk nditọete Christ oro ẹyetde aran ẹdisụk ẹdodu ke isọn̄ ke ini akwa ukụt oro ẹkebemde iso ẹtịn̄ ẹban̄a ọtọn̄ọde.

 “Ẹdu ke Ukpeme”

16. Nso ke ana kpukpru mbet Christ ẹnam?

¹⁶ Oyom inam se ikande ikpîkpu edifiọk idiọn̄ọ oro. Jesus ama aka iso ọdọhọ ete: “Se ndọhọde mbufo ke ndọhọ kpukpru owo nte, Ẹdu ke ukpeme.” (Mark 13:37) Emi enen̄ede edi akpan n̄kpọ ọnọ kpukpru nnyịn mfịn edide isịne ke otu mbon oro ẹyetde aran m̀mê akwa otuowo. Se ikande isua 90 ẹmebe tọn̄ọ ẹkeyari Jesus anyanya ke heaven nte Edidem ke 1914. Okposụkedi emi mîdịghe mmemmem n̄kpọ, oyom idu ke mben̄eidem inyụn̄ idu ke ukpeme. Ndifiọk ke Christ ke akara idahaemi ke Obio Ubọn̄ okposụkedi emi owo mîkwe enye, ayanam nnyịn idu ke ukpeme. Emi n̄ko ayanam nnyịn iti ke Christ ọyọsọp ndisobo mme asua esie ke “hour eke [nnyịn] mîdorike enyịn.”—Luke 12:40.

17. Ekpetie nnyịn didie ke idem ke emi ima ikọfiọk se edidu Christ ọwọrọde, ndien nso ke nnyịn ikpebiere ndinam?

¹⁷ Ndifiọk se edidu Christ ọwọrọde an̄wam nnyịn inen̄ede ifiọk ke utịt enen̄ede asan̄a ekpere. Nnyịn imọfiọk ke idu ke ini edidu Christ, ndien ke enye ama ọtọn̄ọ ndikara nte Edidem ke heaven toto ke 1914. Ke mîbịghike, enye oyosobo mme idiọkowo onyụn̄ anam ikpọ ukpụhọde. Mmọdo, nnyịn ikpenyene ndinen̄ede mbiere ndisịn idem nnam utom oro Jesus ekebemde iso etịn̄ aban̄a ke ini enye ọkọdọhọde ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt [teʹlos] eyedi.”—Matt. 24:14.

[Mme Ikọ Idakisọn̄]

Didie ke Afo Ọkpọbọrọ?

• Nnyịn isan̄a didie ifiọk ke ini edidu Jesus edi ikpehe ini oro ọniọn̄de?

• Mmanie ẹkụt ẹnyụn̄ ẹfiọk idiọn̄ọ edidu Jesus?

• Mfịn, mmanie ẹdi emana emi, oro ẹtịn̄de ke Matthew 24:34?

• Ntak emi nnyịn mîkemeke ndifiọk adan̄a nte “emana emi” ọniọn̄de?

[Mme Mbụme Ukpepn̄kpọ]

[Etebe ke page 25]

Nte Imekeme Ndifiọk Adan̄a Nte “Emana Emi” ediniọn̄de?

“Emana” esiwak ndida mban̄a mme owo emi ẹdude ke nsio nsio isua emana emi ẹdude ke akpan ini kiet. Ke uwụtn̄kpọ, Exodus 1:6 asian nnyịn ete: ‘Ekem Joseph akpa, ye kpukpru nditọ-ete esie, ye ofụri emana oro.’Joseph ikedịghe n̄ka ye nditọete esie, edi mmọ ẹkedu uwem ke ukem iduọk ini. Mbon oro ẹkedude ke ‘emana oro’ ẹma ẹsịne ndusụk nditọete Joseph emi ẹkebemde enye iso ẹmana. Ndusụk mmọ ẹma ẹka iso ẹdu uwem ke Joseph ama akakpa. (Gen. 50:24) Mbon eken emi ẹkenamde “emana oro,” utọ nte Benjamin, ẹkemana ke Joseph ama akamamana, ndien ekeme ndidi mmọ ẹma ẹka iso ẹdu uwem ke Joseph ama akakpa.

Ntre, ke ini ẹtịn̄de ẹban̄a mbon oro ẹdude ke akpan ini kiet nte “emana,” owo isifiọkke adan̄a nte emana oro ọniọn̄de, edi ẹsifiọk ke enye eyesịm utịt, n̄ko ke enye idiniọn̄ke ikaha. Ntre, ke ini Jesus eketịn̄de aban̄a “emana emi” ke Matthew 24:34, enye iketịn̄ke nte mbet esie ẹkpesan̄ade ẹfiọk ini oro “mme akpatre usen” ẹditrede. Utu ke oro, Jesus akakam ọdọhọ ke mmọ idifiọkke “usen ye hour oro.”—2 Tim. 3:1; Matt. 24:36.

[Ndise ke page 22, 23]

Ke ẹma ẹkeyari Jesus anyanya nte Edidem ke 1914, ẹma ẹwụt nte enye ‘akande’

[Ndise ke page 24]

“Emana emi idibehe ifep tutu kpukpru n̄kpọ emi ẹwọrọ ẹsu”