Ata Akpan Ediomi

M MA ndiomi ata akpan ediomi. Yak nsian fi se ikanamde mi, owo Spain, emi ndide eka nditọ, ndiomi ediomi emi.

Ete ye eka mi ikenyeneke emem ye edidianakiet. Mfụhọ ama ekpere ndimen ubon nnyịn mmen ke ini ekpri udọeka mi emi ekedide isua inan̄ akakpade ke mbabuat unọmọ. N̄ko-n̄ko, ndiọi edu ete mi ikayakke eka mi enen̄ede okop inemesịt ke ndọ. Edi emi ikakpanke Mama ndikpep mi ye akpaneka mi nti ido uwem.

Nte ini akakade, akpaneka mi ama ọdọ n̄wan, ami nnyụn̄ ndọ ebe. Esisịt ini ke oro ebede, ẹma ẹkụt ke eka mi enyene kansa, emi okowotde enye ke akpatre. Edi mbemiso enye akakpade, enye ama ọkpọn̄ ata ọsọn̄urua n̄kpọ ọnọ nnyịn.

Kiet ke otu mme ọdiọn̄ọ esie ama asian enye idotenyịn ediset ke n̄kpa emi odude ke N̄wed Abasi, ndien Mama ama enyịme enye ekpep imọ Bible. Ke utịt utịt ini uwem esie, etop idotenyịn emi odude ke Bible ama anam uwem esie enyene se ọwọrọde onyụn̄ anam enye okop inemesịt.

Ke ini ikokụtde nte etop Bible anamde uwem esie enyene se ọwọrọde, ami ye akpaneka mi ima itiene itọn̄ọ ndikpep Ikọ Abasi. Mma nna baptism nte kiet ke otu Mme Ntiense Jehovah ọfiọn̄ kiet mbemiso n̄kamande ọyọhọ eyen mi iba, kpa ediye eyenan̄wan oro ikosiode Lucía.

Usen oro n̄kanade baptism ekedi ata akpan usen ọnọ mi. Ntak kiet ekedi ke Jehovah ekenyene mi idahaemi, ke emi mma n̄kayak idem mi nnọ enye ndinam n̄kpọ esie ke nsinsi. Ntak en̄wen ekedi ke mma nsineme se n̄kenịmde ke akpanikọ nnọ ndima nditọ mi.

Nte ededi, udiana ntak inemesịt emi ikebịghike. Idịbi ama esinen̄ede abiak Lucía ke ini enye ekedide isua inan̄. Ke abiausọbọ ama ekese enye idem ediwak ini, enye ama asian nnyịn ke mbufụt oro okponde nte sokoro ofụt enye ke ekpa. Abiausọbọ oro ama asian nnyịn ke idiọk mbufụt emi atarade nte kansa ofụt Lucía. Ntem ke Lucía ọkọtọn̄ọ en̄wan emi enye akan̄wanade ye kansa ke isua itiaba, emi ekesịnede ndisidu ke ufọkibọk ke anyan ini.

Edu N̄waidem

Ke mme ini afanikọn̄ oro, Lucía ama esifat mi onyụn̄ etịm mi inua, ndien emi ama esisịn udọn̄ ọnọ mi. Nte enye ọkọyọde udọn̄ọ emi ama enem mme anamutom ke ufọkibọk n̄ko. Enye ama esikop nduaidem ndinam utom ye mme nurse, an̄wam mmọ emen yogurt, mmọn̄ mfri, ye mme n̄kpọ eken ọsọk n̄kpri nditọ oro ẹkedude ke mme ubet en̄wen. Mme nurse ẹma ẹkam ẹnọ Lucía afia ekụra ye kad mbenọfọn̄ emi akanamde mme owo ẹdiọn̄ọ enye nte “udiana nurse.”

Mma kiet oro akanamde utom ke ufọkibọk emi eti ete: “Nte Lucía akanamde n̄kpọ ama enen̄ede otụk mi. Enye ekedi eyenọwọn̄ emi enyenede ifịk ye mbufiọk, ama onyụn̄ ama ndisiwet ndise. Enye ama esima nditịn̄ nte etiede enye ke idem onyụn̄ anam n̄kpọ nte ata akwa owo.”

Ikọ Abasi ọkọsọn̄ọ Lucía idem onyụn̄ ọnọ enye ukeme. (Heb. 4:12) Enye ama enen̄ede enịm se Ikọ Abasi ọn̄wọn̄ọde ke edida itie ke obufa ererimbot, ete: “N̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.” (Edi. 21:4) Sia enye ekenyenede udọn̄ ke idem mbon en̄wen, enye ama esida ifet ekededi oro ebererede eneme etop Bible ọnọ mbon en̄wen. Ọkpọsọn̄ mbuọtidem oro Lucía ekenyenede ke ediset ke n̄kpa ama anam enye omụm idem akama onyụn̄ okop inemesịt  okposụkedi emi enye ọkọfiọkde ke idem idisọn̄ke imọ. (Isa. 25:8) Enye ama aka iso enyene mbuọtidem emi tutu esịm usen oro kansa okowotde enye.

Usen oro ke n̄kodiomi ata akpan ediomi. Lucía ikekemeke nditat enyịn. Ete esie ama omụm enye ubọk n̄kan̄ kiet, ami mmụm n̄kan̄ eken. Mma ndọhọ enye sụn̄sụn̄ nte, “Kûkere, ndikpọn̄ke fi. Kot ibifịk sụn̄sụn̄. Ama edemede, idem fo ọyọsọn̄. N̄kpọ ndomokiet idibiakke fi aba, ndien nyodu ye afo.”

Ana nnịm ediomi oro. Mmọfiọk ke idimemke utom ndibet tutu ini oro. Edi mmọfiọk n̄ko ke ami nyokụt enye ke ini enye esetde edieke mbuọtde idem ye Jehovah nnyụn̄ nsọn̄ọde nda ye enye.

Se Lucía Ekenịmde Ọnọ Nnyịn

Uwụtn̄kpọ uko oro Lucía ekenịmde, ọkọrọ ye utịbe utịbe un̄wam oro esop ẹkenọde, ẹma ẹnen̄ede ẹtụk ebe mi oro mîkedịghe Ntiense Jehovah. Usen oro Lucía akakpade, ebe mi ama ọdọhọ mi ke imọn̄ ise nte n̄kpọ editiede. Ke urua ifan̄ ẹma ẹkebe, enye ama ọdọhọ ebiowo kiet edikpep imọ Bible. Ikebịghike ebe mi ama ọtọn̄ọ ndidụk kpukpru mbono esop. Jehovah ama an̄wam enye etre ndin̄wọn̄ sika emi enye mîkekemeke nditre ke akpa.

Mfụhọ n̄kpa Lucía ikụreke ofụri ofụri, edi mmenen̄ede n̄kọm Jehovah mban̄a se Lucía ekenịmde ọnọ nnyịn. Ami ye ebe mi imesida utịbe utịbe idotenyịn ediset ke n̄kpa idọn̄ kiet eken esịt, inyụn̄ ikere iban̄a ini oro nnyịn idifiakde ikụt Lucía—nte enye enyenede nneme ye mme owo, ediye enyịn esie ye ediye mfụk imam esie.

Se Lucía okosobode ama enen̄ede otụk mbọhọidụn̄ nnyịn kiet. Ke usenubọk Saturday kiet oro edịm ekedepde, n̄wan kiet oro eyen esie ekedide eyen ufọkn̄wed mme Lucía ama edi ufọk nnyịn. Ukem udọn̄ọ emi ama owot eyen esie emi ekedide isua 11. Ke ini enye okokopde se iketịbede inọ Lucía, enye ama oyom ufọk nnyịn onyụn̄ edi edise nnyịn. Enye okoyom ndifiọk nte n̄kpọ etiede ye ami tọn̄ọ Lucía akakpa, onyụn̄ ọnọ ekikere ete idiana kiet itọn̄ọ otu oro ẹdisisan̄ade idọn̄ mme eka oro ukem n̄kpọ emi ọwọrọde, esịt.

Mma ndọhọ enye ke mma n̄kop ata ndọn̄esịt nto kiet ke otu un̄wọn̄ọ Bible, kpa enye oro akande se owo ekededi ekemede ndinọ. Enye ama enen̄ede enyene idotenyịn ke ini n̄kokotde ikọ Jesus ke John 5:28, 29 nnọ enye. Enye ama enyịme ukpepn̄kpọ Bible ndien ikebịghike, enye ama ọtọn̄ọ ndinyene “emem Abasi emi akande kpukpru ekikere.” (Phil. 4:7) Ediwak ini, ke ini ikpepde Bible ọtọkiet, imesituak ida ikere nte idude ke obufa ererimbot, ye nte idarade mbonubon nnyịn oro ẹsetde.

Ih, Lucía ama enịm nsinsi n̄kpọ ọnọ nnyịn ke esisịt ini oro enye okodude uwem. Mbuọtidem esie ama anam ubon nnyịn ẹdiana kiet ẹnam n̄kpọ Abasi, onyụn̄ anam mi ndọdiọn̄ mbiere ndisọn̄ọ nda ntre n̄ko ke mbuọtidem. Ke akpanikọ, kpukpru nnyịn oro itabade mbon oro imade ke n̄kpa, emi ẹkemede ndinam ẹset, imodiomi ata akpan ediomi.

[Ndise ke page 20]

Ndise Paradise oro Lucía ekewetde