Nditan̄a Eti Mbụk ke Ikpọ Obot Andes

NNYỊN owo 18 ikana ke isọn̄ ntan. Ekụriku ama ọtọrọde nnyịn ke idem nte ikanade ke n̄kpọnna ukaisan̄ nnyịn, inyụn̄ ikop nte ọkpọsọn̄ edịm ebrede ke ọkọm atian ufọk oro ikanade. Nte ataya oro eketiede ama anam ikere m̀mê nnyịn ikakam idi akpa mbon oro ẹkedan̄de do.

Nso ikpanam owo 18 ẹka utọ ebiet oro? Ibọrọ ọkọn̄ọ ke udọn̄ oro inyenede ndinam ewụhọ Jesus emi ọdọhọde ẹkwọrọ eti mbụk “tutu esịm ke ata utịt ikpehe isọn̄.” (Utom 1:8; Matt. 24:14) Nnyịn ikaka ndikwọrọ ikọ ke nsannsan efakutom ke Ikpọ Obot Andes ke Bolivia.

Nte Ẹsan̄ade Ẹkesịm Do

Akpa afanikọn̄ ekedi nte ẹkpesan̄ade ẹkesịm do. Ẹma ẹsian nnyịn ke n̄kpọisan̄ isinyeneke akpan ini emi ẹsikade mme utọ nsannsan ebiet oro. Ke ini bọs oro ididụkde ekedide edisịm, nnyịn ima ikụt ke enye ekpri akan nte ikekerede, ntre ndusụk nnyịn ikadada. Edi kpukpru nnyịn ima ika ikesịm.

Uduak nnyịn ekedi ndika n̄kọkwọrọ ikọ ke mme obio-in̄wan̄ emi ẹdude ke Ikpọ Obot Andes ke Bolivia. Ntre, ke ima ikọwọrọ ke bọs, kpukpru nnyịn ima itan̄ n̄kpoduoho nnyịn itịn̄ enyịn isan̄a ke anyan udịm kiet idọk n̄kokon̄ afan̄ obot oro.

 Okposụkedi emi eketiede nte mme obio-in̄wan̄ ikokponke, ufọk ẹkebono nsannsan, ntre ama ada ini ndika kpukpru obio. Inamke n̄kpọ m̀mê ikasan̄a oyom usụn̄ adan̄a didie, ekesitie nte ufọk en̄wen ko okodu nsannsan. Ima isiwak ndisop usụn̄ ke n̄wọn̄ọde n̄wọn̄ọde afan̄ in̄wan̄.

“Ntak Emi Mbufo Mîkedịghe Mbemiso Idahaemi?”

Esịt ama enen̄ede enem n̄wan kiet aban̄a anyan usụn̄ oro ikasan̄ade tutu enye ayak ida ifia ye itie utemudia esie item udia nnyịn. Ke eren kiet ama okokop se Bible etịn̄de aban̄a idaha mme akpan̄kpa, enye ama obụp ete, “Ntak emi mbufo mîkedịghe mbemiso idahaemi?” Enye ama enen̄ede enyene udọn̄ tutu ke ini ikọkpọn̄de obio mmọ, enye ama asan̄a ye nnyịn man okpobụp mme mbụme efen efen ke usụn̄. Eren en̄wen akananam ikopke iban̄a Mme Ntiense Jehovah, enye ama onyụn̄ enen̄ede enyene udọn̄ ke mme n̄wed nnyịn. Enye ama ọkọm nnyịn etieti ke ntak emi ikedide onyụn̄ ọnọ nnyịn ukpọhọde ataya kiet ete idan̄ do.

Ekịm ama okpon okoneyo kiet tutu nnyịn ikọfiọkke ke ikowụk tent nnyịn ke ufọt ntafiọn̄. Mmọ ẹma ẹtop nnyịn ntịme ntịme. Mba ikayakke nnyịn ikeme ndidaha nda, ndien ke mfọniso mmọ ẹma ẹsion̄o idem ẹkpọn̄ nnyịn.

Ke ntọn̄ọ ntọn̄ọ, edem ye ọkpọ n̄kan̄ ẹma ẹsibiak nnyịn ke ntak emi ikanade ke isọn̄, edi nte ini akakade, ke okoneyo mbiakidem oro ẹma ẹsụhọde ubọk. Ima ifre  mbiakidem ekededi ke usenubọk ke ini idade ise mme ebeden̄ oro akanam owo mîdụkke, nte ntọn̄enyọn̄ ẹsụhọrede sụn̄sụn̄ ke mben mmọ, ye snow ke etịn̄e ikpọ obot oro. Uyom mmọn̄ ke idịm ye ikwọ inuen ẹkedi n̄kukụre uyom oro ikokopde.

Ke ima ikeyere mmọn̄ ke idịm, ima ineme itien̄wed Bible ọtọkiet, idia udia usenubọk, inyụn̄ itọn̄ọ ndidọk n̄ka mme nsannsan obio-in̄wan̄ en̄wen. Ama odot isịn ukeme idọk ika. Ima isobo akanian̄wan kiet, ndien mmọn̄eyet ama asiaha enye ke ini ọkọfiọkde ke enyịn̄ Abasi, Jehovah, esịne ke Bible. Enye ama enen̄ede okop idatesịt! Idahaemi enye esikot Abasi enyịn̄ ke ini ọbọn̄de akam.

Akanieren kiet ọkọdọhọ ke anaedi Abasi emeti imọ, onyụn̄ ọtọn̄ọ ndikwọ nte ke mme angel ẹkedọn̄ nnyịn. Eren en̄wen, emi udọn̄ọ okụkde esịn ke ufọk ama asian nnyịn ke baba owo kiet ke obio mmimọ ikedehedei idomo ndidi ndise imọ. Idem ama akpa enye ndifiọk ke nnyịn ikoto usụn̄ usụn̄ ko ke La Paz idi. Eren en̄wen ama enen̄ede adat esịt n̄ko ke emi Mme Ntiense Jehovah ẹdide ufọk ẹdise mme owo, ke adan̄aemi mme ufọkabasi eken ẹdade n̄kanika ẹkot mme owo ẹdi ufọkabasi.

Ufọk ndomokiet ke n̄kan̄ oro inyeneke ikan̄ ilektrik, ntre mme owo ẹsidụk idap ke ndondo oro eyo okụtde ẹnyụn̄ ẹdemede ke utịn ama asiaha. Ke ntem, nnyịn ikesitọn̄ọ ukwọrọikọ ke n̄kanika itiokiet usenubọk man ikụt mme owo ke ufọk. Mîdịghe ntre ata ediwak owo ẹyeka in̄wan̄ mmọ. Nte ini akakade, ndusụk owo oro ẹma ẹketọtọn̄ọ utom ẹma ẹsitre utom ẹkpan̄ utọn̄ ẹkop etop Ikọ Abasi, iso-ọfọn ẹyak enan̄ oro odụride ufụn̄isọn̄ ọduọk odudu. Ediwak owo oro ikosobode ke ufọk ẹma ẹbri ikpa erọn̄ ke isọn̄ ẹnọ nnyịn itie ẹnyụn̄ ẹkot ofụri ubon ẹbon ọtọkiet man ẹkpan̄ utọn̄. Ndusụk mme ọtọin̄wan̄ ẹma ẹnọ nnyịn ikpọ ekpat ibokpot ke ntak emi ẹkewụtde esịtekọm ẹban̄a mme n̄wed Bible oro ikọnọde mmọ.

“Mbufo Ikefreke Mi”

Nte ededi, man mme owo ẹnam n̄kọri ke ifiọk Bible, idịghe ini kiet kpọt ke ana ẹka ẹkese mmọ. Ediwak owo ẹma ẹkpe nnyịn ubọk ẹte ifiak idi idikpep mmimọ n̄kpọ. Emi amanam nnyịn ika ikpehe Bolivia emi ediwak ini.

Isan̄ kiet ke ini ikafiakde ika, akanian̄wan kiet ama okop inemesịt ke emi nnyịn ikafiakde idi, onyụn̄ ọdọhọ ete: “Nda mbufo nte nditọ mi. Mbufo ikefreke mi.” Eren kiet ama ọkọm nnyịn ke utom oro inamde onyụn̄ ọdọhọ ima ifiak idi yak idan̄ ke ufọk imọ. Etie nte akakan utịp ukeme oro isịnde edi emi ikokopde ke mma kiet emi ikosobode isan̄ kiet ama ọwọrọ aka akwa obio ndien ke enye edi ọkwọrọikọ idahaemi.

Etisịm akpatre usen ke akpa ini oro ikakade, aranikan̄ nnyịn ama okụre ndida mbara mfiọk mbakara, udia nnyịn ama onyụn̄ ekpere ndikụre. Ima itan̄ade ifia ndida mbara ikan̄, ntem akpatre udia oro ikenyenede, nnyụn̄ nsan̄a ke ukot nnyọn̄. Nnyịn ima inen̄ede idu iyom usụn̄ ikpọn̄ obio oro idikemede ndikụt ubomisọn̄. Ima ikesịm ke ata okoneyo.

Ndifiak Nnyọn̄

Isan̄ unyọn̄ ikememke koro bọs ama abiara ke usụn̄. Nte ini akakade, ima idụk ubomisọn̄ mbiomo emi mme owo ẹkefahade etieti.

Emi ama ọnọ nnyịn ifet ndikwọrọ ikọ nnọ mbon eken ke ubomisọn̄ oro sia mmọ ẹkeyomde ndifiọk ntak emi nnyịn ikakade Andes. Okposụkedi emi mme owo emi ẹdide mbon o-bụt, mmọ ẹma ndidara owo ẹnyụn̄ ẹtie ufan ufan.

Ke ima ikawat hour usụkkiet ke ubomisọn̄ mbiomo oro, nnyịn ima idisịm ufọk—edịm ama ọbọn̄ nnyịn, idem onyụn̄ ebịt nnyịn nte ice. Edi isan̄ emi ikedịghe ke ikpîkpu. Ke usụn̄ unyọn̄, ima idiomi ukpepn̄kpọ Bible ye n̄wan kiet emi odụn̄de ke akwa obio.

Ke akpanikọ, ekedi akwa ifet nditan̄a eti mbụk nnọ mme owo ke utọ nsannsan ebiet oro. Ikọkwọrọ ikọ ke obio-in̄wan̄ inan̄ ye ata ediwak n̄kpri obio ọkọm ifan̄. Nnyịn ima ikere iban̄a ikọ emi: “Ukot owo eti mbụk eye didie ke enyọn̄ ikpọ obot! ukot owo eke ọkwọrọde emem, eke obụkde eti n̄kpọ, eke ọkwọrọde edinyan̄a.”—Isa. 52:7; Rome 10:15.

[Ndise ke page 17]

Imeben̄e idem ndikwọrọ eti mbụk