Nte Emese Mbon En̄wen nte Jehovah Esede Mmọ?

‘Ubahade ikpanaha odu ke ikpọkidem, edi akpana mme ndido esie ẹkere ẹban̄a kiet eken ukem ukem.’—1 COR. 12:25.

1. Eketie fi didie ke idem ke akpa ini oro okodụkde paradise eke spirit?

 ANAEDI ima inen̄ede ima akwa ima ye edikere mban̄a oro ẹdude ke otu ikọt Jehovah ke akpa ini oro ikọkpọn̄de idiọk ererimbot inyụn̄ itọn̄ọ ndibuana ye ikọt Abasi. Emi okokpụhọrede didie ntem ye mbon oro Satan akarade, emi ẹtiede isa isa, usua usua, ye utọk utọk! Nnyịn ima itiene ididu ke paradise eke spirit oro emem ye edidianakiet ẹdude.—Isa. 48:17, 18; 60:18; 65:25.

2. (a) Nso ikeme ndinam ise mbon en̄wen ke idiọk usụn̄? (b) Nso ke ekeme ndiyom inam?

² Edi nte ini akade, unana mfọnmma ekeme ndinam itọn̄ọ ndise nditọete nnyịn ke idiọk usụn̄. Unana mfọnmma ekeme ndinam nnyịn inam ndudue mmọ ẹkponi utu ke ndise nti edu mmọ. Ke nditịn̄ ibio ibio, nnyịn imefre ndise mmọ nte Jehovah esede. Edieke emi etịbede ọnọ nnyịn, ini edi emi ndidụn̄ọde nte isede mbon en̄wen nnyụn̄ nse mmọ nte Jehovah esede.—Ex. 33:13.

Nte Jehovah Esede Nditọete Nnyịn

3. Bible ada esop Christian odomo ye nso?

³ Nte ẹwetde ke 1 Corinth 12:2-26, apostle Paul ekemen esop Christian oro ẹyetde aran odomo ye ikpọkidem oro enyenede “ediwak ndido.” Kpa nte ndido ikpọkidem ẹdide nsio  nsio, kpa ntre ke mme edu ye ukeme mbon oro ẹdude ke esop ẹkpụhọrede ye kiet eken. Edi Jehovah enyịme nsio nsio owo oro ẹdude ke esop. Enye ama mmọ onyụn̄ ada owo kiet kiet ke ọsọn̄urua. Kpasụk ntre n̄ko, Paul eteme nnyịn ete ke ana mme andibuana ke esop ‘ẹkere ẹban̄a kiet eken ukem ukem.’ Emi ekeme ndisọn̄ utom sia edu mmọ ẹkeme ndikpụhọde ye eke nnyịn.

4. Ntak emi oyomde inam ukpụhọde ke nte isede nditọete nnyịn?

⁴ Ekeme ndidi nnyịn imesinen̄ede ima ndikụt ndudue nditọete nnyịn. Ndinam ntre ọkpọwọrọ ke nnyịn ise ata esisịt ikpehe ke uwem mmọ. Edi Jehovah ese kpukpru ikpehe onyụn̄ okụt nte mmọ ẹtiede. Nnyịn imekeme ndiwụk enyịn nse itie oro nnyịn mîmaha, edi Jehovah ese nte owo etiede ofụri ofụri, esịnede kpukpru nti edu esie. Adan̄a nte idomode ndikpebe Jehovah, ntre n̄ko ke nnyịn idinam ima ye edidianakiet ẹdu ke esop.—Eph. 4:1-3; 5:1, 2.

5. Ntak emi mîdotke ndibiere ikpe nnọ mbon en̄wen?

⁵ Jesus ama enen̄ede ọfiọk ke anana-mfọnmma ubonowo ẹsima ndibiere ikpe nnọ mbon en̄wen. Enye eketeme ete: “Ẹtre ndibiere ikpe nnọ owo mbak owo edibiere ikpe ọnọ mbufo.” (Matt. 7:1) Tịm fiọk ete ke Jesus ikọdọhọke ite: “Ẹkûbiere ikpe;” edi ọkọdọhọ ete: “Ẹtre ndibiere ikpe.” Enye ama ọfiọk ke ediwak ke otu mbon oro ẹkekpan̄de utọn̄ ẹnọ imọ ẹma ẹnyenyene edu edibiere ikpe nnọ owo. Okûdi nnyịn imenyene edu emi? Edieke inyenede utọ edu oro, ana inen̄ede isịn ukeme man ikpụhọde edu emi mbak ẹdibiom nnyịn ikpe. Yak kan̄a ise, anie ọnọnọ nnyịn odudu ndibiere ikpe nnọ owo oro Jehovah emekde, mîdịghe anie ọnọ nnyịn odudu ndidọhọ ke owo oro ikpenyeneke ndisịne ke esop? Eyenete ekeme ndinyene ndusụk mmeme, edi edieke Jehovah osụk akade iso ndida enye nnam n̄kpọ, ndi okpodot nnyịn isịn enye? (John 6:44) Ndi imenen̄ede inịm ke Jehovah ada esop esie usụn̄, n̄ko ke edieke oyomde ẹnam ukpụhọde, ke enye ayanam oro ke edikem ini esie?—Kot Rome 14:1-4.

6. Jehovah ese mme asan̄autom esie didie?

⁶ Jehovah enyene n̄wọrọnda ukeme sia enye ekeme ndifiọk se Christian kiet kiet edikabarede edi ke ini ẹdinamde mme owo ẹfọn ẹma ke obufa ererimbot. Enye ọfiọk n̄ko adan̄a nte mmọ ẹnamde n̄kọri ke n̄kan̄ eke spirit. Mmọdo, ufọn idụhe enye ndiwụk ntịn̄enyịn ke ndudue kiet kiet oro owo anamde. Psalm 103:12 ọdọhọ ete: “Adan̄a nte edem usiaha-utịn oyomde ye edem usop, kpa ntre ke enye ọbọ nnyịn mme idiọk ido nnyịn enịm anyan ebiet.” Nnyịn ikpowụt esịtekọm didie ntem iban̄a emi!—Ps. 130:3.

7. Nso ke nnyịn ikpep ito nte Jehovah ekesede David?

⁷ N̄wed Abasi asian nnyịn ke Jehovah esinen̄ede ama ndikụt nti edu oro owo enyenede. Abasi ọkọdọhọ ke David edi ‘owo imọ, emi ekenịmde mbet imọ, onyụn̄ ebịnede imọ ke ofụri esịt esie, onyụn̄ anamde se inende  imọ ke enyịn ikpọn̄-ikpọn̄.’ (1 Ndi. 14:8) Ih, nnyịn imọfiọk ke David ama anam mme n̄kpọ oro mîkọfọnke. Edi Jehovah okowụk ntịn̄enyịn ke nti n̄kpọ oro David akanamde sia enye ama ọfiọk ke David enyene eti esịt.—1 Chron. 29:17.

Se Nditọete Fo nte Jehovah Esede Mmọ

8, 9. (a) Didie ke nnyịn ikeme ndikpebe Jehovah? (b) Ẹkeme ndida emi ndomo ye nso, ndien nso ke ikeme ndikpep nto emi?

⁸ Jehovah ọfiọk se owo ekerede, edi nnyịn ifiọkke. Emi ke idemesie akam edi ntak oro nnyịn mîkpebiereke ikpe inọ mbon en̄wen. Nnyịn inen̄ekede ifiọk ntak oro mme owo ẹnamde n̄kpọ. Oyom nnyịn idomo ndikpebe Jehovah inyụn̄ itre ndiwụk ntịn̄enyịn ke ndudue mbon en̄wen, koro emi eyebe efep. Ndi ikpọfọnke nnyịn idomo ndise mme owo nte Jehovah esede mmọ? Ndinam ntre ayanam nnyịn inen̄ede idu ke emem ye nditọete nnyịn.—Eph. 4:23, 24.

⁹ Ke uwụtn̄kpọ, kere ban̄a ufọk oro atahade—iso nnyarakọm ẹtaha, window ẹbiara, mmọn̄ onyụn̄ abiat dek ọkọm. Ata ediwak owo oro ẹkụtde ufọk oro ẹkeme ndikere ke akpana ẹwụri enye ẹduọk ke ntak emi enye mîyehe. Edi owo en̄wen oro okụtde ufọk oro ekeme ndinyene ata isio isio ekikere mban̄a enye. Enye ekeme ndifụmi mme n̄kpọ oro ẹbiarade, edi ese nte enye etiede ofụri ofụri onyụn̄ okụt ke ufọk oro osụk ọsọsọn̄ idem, n̄ko ke ẹkeme ndidiọn̄ enye. Enye edep ufọk oro, ọdiọn̄ mme n̄kpọ oro ẹbiarade, onyụn̄ anam enye eye. Nte ini akade, mme owo ẹkeme ndidọhọ ke ufọk oro eye ọsọn̄. Ndi imekeme ndibiet owo oro ọkọdiọn̄de ufọk oro? Utu ke ndiwụk ntịn̄enyịn ke mme ndudue nditọete nnyịn, ndi imekeme ndifiọk nti edu mmọ ye ukeme oro mmọ ẹnyenede ndinam n̄kọri ke n̄kan̄ eke spirit? Edieke inamde ntre, nnyịn iyedi idima nditọete nnyịn ke ntak nti edu eke spirit oro mmọ ẹnyenede, kpa nte Jehovah amade mmọ.—Kot Mme Hebrew 6:10.

10. Didie ke item oro ikụtde ke Philippi 2:3, 4 ekeme ndin̄wam nnyịn?

¹⁰ Apostle Paul ama ọnọ item oro ekemede ndin̄wam nnyịn inyene eti itie ebuana ye kpukpru owo ke esop. Enye eketeme mme Christian ete: “Ẹkûnam baba n̄kpọ kiet ke ndomoidem m̀mê ke n̄kụtidem, edi ẹda nsụhọdeidem ẹbat ẹte mbon efen ẹfọn ẹkan mbufo, ẹkûse ẹban̄a ọkpọkpọ mbubehe mbufo kpọt, edi ẹse ẹban̄a mbubehe mbon en̄wen n̄ko.” (Phil. 2:3, 4) Nsụhọdeidem ayanam ise mbon en̄wen ke nnennen usụn̄. Ndinyene udọn̄ ke idem mbon en̄wen nnyụn̄ n̄kụt eti n̄kpọ ke idem mmọ ẹyenam nnyịn ise mmọ nte Jehovah esede.

11. Nso ukpụhọde idu ke ndusụk esop?

¹¹ Nte n̄kpọ ẹtiede ke ndondo emi ke ererimbot anam mme owo ẹnen̄ede ẹwọrọ idụn̄. Mme owo oro ẹtode nsio nsio idụt ẹdụn̄ idahaemi ke ndusụk ikpọ obio. Ndusụk owo oro ẹwọrọde ẹdidụn̄ ke edem nnyịn ẹnyene udọn̄ ke akpanikọ Bible, ẹnyụn̄ ẹtiene nnyịn ẹtuak ibuot ẹnọ Jehovah. Mmọ ẹto “ke kpukpru idụt ye esien ye obio ye usem.” (Edi. 7:9) Emi anam mme owo oro ẹtode nsio nsio idụt ẹdu ke ediwak esop.

12. Didie ke ikpese kiet eken, ndien ntak emi ekemede ndisọn̄ ndusụk ini?

¹² Ekeme ndiyom inen̄ede inyene nnennen ekikere iban̄a kiet eken ke esop nnyịn. Emi oyom iti item apostle Peter emi ọdọhọde inyene “ima nditọete eke mîsan̄ake ye mbubịk” inyụn̄ inyene “ufiop ufiop ima emi otode esịt [inọ] kiet eken.” (1 Pet. 1:22) Ekeme ndisọn̄ ndinen̄ede mma nditọete nnyịn ke esop emi mme owo ẹtode nsio nsio idụt. Edu, ifiọkn̄wed, uforo, ye ido obio nditọete nnyịn ẹkeme ndinen̄ede n̄kpụhọde ye eke nnyịn. Ndi esisọn̄ fi ndifiọk ekikere ndusụk owo m̀mê nte mmọ ẹsinamde n̄kpọ? Ekeme ndidi afo onyụn̄ etie mmọ ntre. Kpa ye oro, ẹteme kpukpru nnyịn ẹte: “Ẹnyene ima ẹnọ ofụri otu nditọete.”—1 Pet. 2:17.

13. Nso ukpụhọde ke ekeme ndiyom inam ke nte isikerede n̄kpọ?

¹³ Ekeme ndiyom ikpụhọ nte isikerede  n̄kpọ man ikeme ndima kpukpru nditọete nnyịn. (Kot 2 Corinth 6:12, 13.) Ndi akanam nnyịn imetịn̄ n̄kpọ nte, “Ami nsarike asari, edi . . . ” ndien ekem ibat ndusụk ndiọi edu oro ẹdọhọde ke mbon ekpụk kiet ẹnyene? Utọ ekikere oro ekeme ndiwụt ke oyom nnyịn itre asari emi osụk odude nnyịn ke idem. Imekeme ndibụp idem nnyịn ite, ‘Ndi mmesisịn ukeme ndifiọk mbon oro ẹtode ebiet en̄wen?’ Ndidụn̄ọde idem nnyịn ntem ekeme ndinam inen̄ede idara inyụn̄ ima nditọete nnyịn oro ẹdude ke ofụri ererimbot.

14, 15. (a) Nọ uwụtn̄kpọ mbon oro ẹkekpụhọrede nte mmọ ẹkesede mbon en̄wen? (b) Didie ke nnyịn ikeme ndikpebe mmọ?

¹⁴ Bible ọnọ nnyịn nti uwụtn̄kpọ mbon oro ẹkenamde ukpụhọde, emi kiet ke otu mmọ edide apostle Peter. Peter ikpokodụkke ufọk owo Gentile sia enye ekedide Jew. Kere nte eketiede enye ke idem ke ini ẹkedọhọde enye aka ekese Cornelius emi ekedide owo Gentile emi mîkanaha mbobi! Peter ama anam ukpụhọde sia ọkọfiọkde ke ekedi uduak Abasi nte mme owo oro ẹtode kpukpru idụt ẹdụk esop Christian. (Utom 10:9-35) Saul, emi akakabarede edi apostle Paul nte ini akakade, ekenyene n̄ko ndinam mme ukpụhọde nnyụn̄ ntre asari. Enye ama enyịme ke imọ ima isua mme Christian tutu anam ‘ke ima ikọbọ esop Abasi ibe nde inyụn̄ isobo enye.’ Kpa ye oro, ke ini Ọbọn̄ Jesus ekenen̄ede Paul, enye ama anam ikpọ ukpụhọde onyụn̄ akam ọtọn̄ọ ndibọ ndausụn̄ nto mbon oro enye ekesikọbọde.—Gal. 1:13-20.

¹⁵ Eyịghe idụhe ke spirit Jehovah ekeme ndin̄wam nnyịn ikpụhọde edu nnyịn. Edieke ifiọkde ke imenyene ndịbe ndịbe edu asari, ẹyak isịn ukeme ndisio enye mfep nnyụn̄ “[n̄n̄wana] ndimụm edidianakiet eke spirit n̄kama ke mbọbọ emem edidianakiet.” (Eph. 4:3-6) Bible esịn udọn̄ ọnọ nnyịn ete “[isịne] ima, koro enye edi mfọnmma mbọbọ edidianakiet.”—Col. 3:14.

Ndikpebe Jehovah ke Utom Ukwọrọikọ

16. Nso idi uduak Abasi kaban̄a mme owo?

¹⁶ Apostle Paul ekewet ete, “Abasi inamke asari.” (Rome 2:11) Uduak Jehovah edi yak mme owo oro ẹtode kpukpru idụt ẹsịne ke otu mbon oro ẹtuakde ibuot ẹnọ imọ. (Kot 1 Timothy 2:3, 4.) Emi anam enye anam ndutịm man ẹtan̄a “nsinsi eti mbụk” ẹnọ “kpukpru idụt ye esien ye usem ye obio.” (Edi. 14:6) Jesus ọkọdọhọ ete: “In̄wan̄ edi ererimbot.” (Matt. 13:38) Nso ke oro ọwọrọ ọnọ fi ye ikọtufọk fo?

17. Didie ke ikeme ndin̄wam kpukpru orụk owo?

¹⁷ Idịghe kpukpru nnyịn ikeme ndika n̄kọkwọrọ etop Obio Ubọn̄ ke nsannsan ebiet.  Edi imekeme ndinen̄ede n̄kwọrọ ikọ nnọ mme owo emi ẹtode kpukpru idụt ke ererimbot, emi ẹdụn̄ọde ke efakutom nnyịn. Ndi imesidu ke edidemede iban̄a mme ifet oro inyenede ndinọ kpukpru orụk owo ikọ ntiense, idịghe sụk mbon oro isikwọrọde ikọ inọ ke ediwak isua? Ntak emi mûbiereke ndikwọrọ ikọ nnọ mbon oro owo mînen̄ekede inọ ikọ ntiense?—Rome 15:20, 21.

18. Didie ke Jesus ekekere aban̄a mme owo?

¹⁸ Jesus ama enyene ọkpọsọn̄ udọn̄ ndin̄wam kpukpru owo. Enye ikọkwọrọke ikọ ke ebiet kiet kpọt. Mbụk kiet ke Bible asian nnyịn ke enye ama “ọtọn̄ọ ndinam isan̄ n̄kanade kpukpru mme obio ye mme obio-in̄wan̄.” Ekem, “ke okụtde otuowo enye atua mmọ mbọm” onyụn̄ ọdọhọ ke oyom ẹn̄wam mmọ.—Matt. 9:35-37.

19, 20. Nso idi ndusụk usụn̄ oro nnyịn ikemede ndikpebe nte Jehovah ye Jesus ẹkerede ẹban̄a kpukpru orụk owo?

¹⁹ Nso idi ndusụk usụn̄ emi afo ekemede nditiene n̄wụt edikere mban̄a? Ndusụk owo ẹnen̄ede ẹsịn ukeme ndinọ ikọ ntiense ke mme ikpehe efakutom mmọ oro owo mîsiwakke ndinam utom. Emi ekeme ndisịne mme ebiet emi ẹsinamde mbubehe, itie unọ idem nduọkodudu, itie mbehe ubomisọn̄, m̀mê ke iso ufọkidụn̄ emi ẹsikọbide kpukpru ini. Mbon en̄wen ẹsịn ukeme ndikpep usem en̄wen man ẹkpekwọrọ ikọ ẹnọ mbon oro ẹtode ebiet en̄wen, emi ẹdụn̄de ke edem mmọ idahaemi, m̀mê mbon oro owo mîkesiwakke ndinọ ikọ ntiense ke ini edem. Ndikọm mme utọ owo oro ke usem emana mmọ ekeme ndiwụt ke afo emenen̄ede ekere aban̄a mmọ. Edieke nnyịn mîkemeke ndikpep usem en̄wen, ndi nnyịn ikemeke ndisịn udọn̄ nnọ mbon oro ẹnamde ntre? Ke akpanikọ, ikpọfọnke itie isa isa m̀mê ibụp ntak emi mbon en̄wen ẹsịnde utọ ukeme oro ndikwọrọ ikọ nnọ mbon oro ẹtode ebiet en̄wen. Uwem kpukpru owo ẹsọn̄ urua etieti ke enyịn Abasi, nnyịn inyụn̄ iyom ndise mmọ ntre n̄ko.—Col. 3:10, 11.

²⁰ Ndise mbon en̄wen nte Abasi esede mmọ esịne n̄ko ndikwọrọ ikọ nnọ kpukpru owo, inamke n̄kpọ m̀mê nso idi idaha mmọ. Ekeme ndidi ndusụk mmọ inyeneke ufọkidụn̄, ẹtie mbumịn mbumịn, mîdịghe ẹdu ata oburobụt uwem. Edieke ndusụk owo ẹsọn̄de ido ye nnyịn, ikpanaha oro anam inyene ntaha ntaha ekikere iban̄a kpukpru mbon emi ẹtode edem mmọ. Ndusụk owo ẹma ẹfiomo Paul, edi enye ikayakke oro akpan enye ndikwọrọ ikọ nnọ mbio-obio oro ẹkefiomode enye. (Utom 14:5-7, 19-22) Enye ama enịm ke ndusụk mmọ ẹkeme ndibọ etop emi idara idara.

21. Didie ke afo ndifiọk nte Jehovah esede mbon en̄wen edin̄wam fi?

²¹ Enen̄ede ana in̄wan̄-in̄wan̄ ke oyom inyene nnennen ekikere—oro edi, ekikere Jehovah—ke ini inamde n̄kpọ ye nditọete edem nnyịn, nditọete nnyịn emi ẹdude ke ofụri ererimbot, ye mbon oro isobode ke an̄wautom. Adan̄a nte ikpebede ndise n̄kpọ nte Jehovah esede, ntre ke idinen̄ede itie emem emem inyụn̄ idiana kiet. Do ke nnyịn ididu ke eti idaha ndin̄wam mbon en̄wen ẹma Jehovah, kpa Abasi emi ‘mîten̄eke owo enyịn,’ edi emi enyenede ima ima udọn̄ aban̄a kpukpru owo “koro edi ubọk esie akanam kpukpru” n̄kpọ.—Job 34:19.

Nte Afo Emekeme Ndibọrọ?

• Ntak emi nnyịn mîkpesehe nditọete nnyịn ke idiọk usụn̄?

• Didie ke ikpekpebe Jehovah ke nte isede nditọete nnyịn?

• Nso ke afo ekekpep aban̄a nte ekpesede nditọete nnyịn oro ẹdude ke ofụri ererimbot?

• Didie ke ikpekpebe usụn̄ oro Jehovah esede mme owo ke ini idude ke an̄wautom?

[Mme Mbụme Ukpepn̄kpọ]

[Ndise ke page 26]

Didie ke ekeme ndimehe ye mbon oro ẹtode ebiet en̄wen?

[Ndise ke page 28]

Didie ke ekeme ndikwọrọ eti mbụk nnọ ediwak owo?