Ndọ ye Unyene Nditọ ke Utịt Ini Emi

“Ini emi osụhọde iniọn̄ke aba.”—1 COR. 7:29.

1. (a) Nso idi ndusụk ukpụhọde mfịn oro ẹsịnede ke otu mme n̄kpọ oro ẹnamde “ndiọkeyo”? (b) Ntak emi nte n̄kpọ ẹkpụhọrede ke ubon ẹbehede nnyịn?

 IKỌ Abasi ama etịn̄ ke ekọn̄, unyekisọn̄, akan̄, ye ndiọi udọn̄ọ ẹyedu ke “ekperedem ini.” (Dan. 8:17, 19; Luke 21:10, 11) Bible ama odụri owo utọn̄ n̄ko ete ke nte mme owo ẹdidude uwem oyokpụhọde ke akpan ini emi. Afanikọn̄ ke ubon eyesịne ke otu n̄kpọ oro ẹdinamde “mme akpatre usen” ẹdi “ndiọkeyo.” (2 Tim. 3:1-4) Ntak emi mme utọ ukpụhọde oro ẹbehede nnyịn? Koro mmọ ẹdu ke kpukpru ebiet ẹnyụn̄ ẹkop odudu tutu ẹkeme nditụk nte mme Christian ẹsede ndọ ye unyene nditọ. Didie?

2. Didie ke ererimbot ese ndọ ye usiondọ?

² Idahaemi usiondọ edi ọsọ n̄kpọ, ndien ibat usiondọ akaka iso ndikọri ke ediwak idụt. Nte ededi, oyom itịm ifiọk ke nte Jehovah Abasi esede ndọ ye usiondọ enen̄erede okpụhọde ye se ẹnyịmede ke ofụri ererimbot. Ke ntre, nso idi ekikere Jehovah?

3. Didie ke Jehovah ye Jesus Christ ẹse ndọ?

 ³ Jehovah Abasi oyom mme ọdọ ndọ ẹka iso ẹnam un̄wọn̄ọ ndọ mmọ. Ke ini Jehovah akadiande akpa eren ye n̄wan ke ndọ, enye ọkọdọhọ ke “owo . . . edinyụn̄ adiana ye n̄wan esiemmọ; ndien mmọ ẹyekabade obụk kiet.” Nte ini akakade, Jesus Christ ama afiak etịn̄ ikọ oro onyụn̄ adian do ete: “Ke ntre, se Abasi ama akadian yak baba owo kiet okûdianade.” Jesus ama aka iso etịn̄ ete: “Owo ekededi eke osiode n̄wan esie ndọ, ke mîtoho ke ntak use, onyụn̄ ọdọde efen esịn efịbe.” (Gen. 2:24; Matt. 19:3-6, 9) Ntem, Jehovah ye Jesus ẹse ndọ nte nsinsi mbọbọ. N̄kpa ikpọn̄ ekeme ndinam ebe m̀mê n̄wan atara ke mbọbọ emi. (1 Cor. 7:39) Sia ndọ edide ndutịm Abasi, usiondọ idịghe n̄kpọ mbubru. Ke nditịm ntịn̄, Ikọ Abasi ọdọhọ ke Jehovah asasua usiondọ oro mînyeneke ntak N̄wed Abasi. *—Kot Malachi 2:13-16; 3:6.

Ndọ Oro Enyenede Uku

4. Ntak emi ndusụk uyen Christian ẹsituade n̄kpọfiọk ke ndikabak ndọ ndọ?

⁴ Ererimbot unana uten̄e Abasi emi idude mi ama idan̄ akan n̄kpọ en̄wen. Imekeme ndikụt ata ediwak ndise idan̄ kpukpru usen. Nnyịn ikemeke ndifan̄a ke mmọ ẹkeme nditụk nnyịn, akpan akpan ndima n̄kpri owo nnyịn ke esop. Mme uyen Christian ẹkpenam n̄kpọ didie ẹban̄a utọ idiọk odudu emi, emi ekemede ndidemede mmọ udọn̄ idan̄ idem ke ini ekikere mmọ mîkahaka afan̄ oro? Ndusụk owo ẹdomo ndikan mfịna emi ke ndibabak ndọ ndọ. Mmọ ẹkere ke ndinam ntre idiyakke mmimọ inam oburobụt ido. Edi isibịghike ndusụk mmọ ẹsitua n̄kpọfiọk ndikabak ndọ ndọ ntre. Ntak-a? Ke ndondo oro nduaidem obufa ndọ oro okụrede, mmọ ẹsidi ẹdikụt ke mmimọ ikemke kiet ye eken. Nte an̄wan̄ade, emi esida esịm ikpọ mfịna.

5. Nso idin̄wam ebe ye n̄wan ẹka iso ẹnam un̄wọn̄ọ ndọ mmọ? (Se ikọ idakisọn̄ n̄ko.)

⁵ Ndidọ owo—ọkpọkọm eyenete—emi edide ata isio isio ye se ikekerede ekeme ndisọn̄ etieti. (1 Cor. 7:28) Kpa ye oro, inamke n̄kpọ m̀mê oro ọdiọk didie, ata mme Christian ẹfiọk ke ndisio ndọ nte mîkemke ye N̄wed Abasi idịghe eti usụn̄ ndikọk mme mfịna ndọ oro owo mîkopke inem. Ntem, odot esop ẹkpono ẹnyụn̄ ẹn̄wam mbon oro ẹkade iso ẹsịn ifịk ẹnam ndọ mmọ ọsọn̄ọ ada, ke ntak emi ẹyomde ndinam un̄wọn̄ọ ndọ mmọ. *

6. Didie ke mme uyen Christian ẹkpese idotenyịn udọ ndọ?

⁶ Ndi afo edi akparawa emi mûdọhọ kan̄a ndọ? Ke edide ntre, afo ekpese didie idotenyịn edidọ ndọ? Afo emekeme ndibọhọ ekese iduọesịt edieke ebetde tutu afo ọkọri esịm ọyọhọ idaha ke ikpọkidem, ekikere, ye ke n̄kan̄ eke spirit ndidọ ndọ mbemiso ọtọn̄ọde ndiyom ima owo isio uduot emi edide Christian. Edi akpanikọ ke N̄wed Abasi isiakke isua emi owo ekpedide mbemiso ọdọde ndọ. * Edi Bible ọdọhọ ke afo ekpenyene ndibet tutu ini oro udọn̄ idan̄ esinen̄erede ọsọn̄ ubọk ebe. (1 Cor. 7:36) Ntak-a?  Koro ọkpọsọn̄ udọn̄ idan̄ ekeme nditịmede fi ekikere inyụn̄ iyakke anam nti ubiere, ndien emi ekeme ndida n̄kesịm iduọesịt nte ini akade. Ti ete ke ọniọn̄ ọniọn̄ item oro Jehovah ọnọde aban̄a ndọ, emi ikụtde ke Bible edi ke ufọn fo man afo onyụn̄ okop inemesịt.—Kot Isaiah 48:17, 18.

Uku Uku Unyene Nditọ

7. Nso ke mme uyen oro ẹdọde ndọ ẹsobo, ndien ntak emi ekemede nditịmede ndọ?

⁷ Ndusụk owo oro ẹkebakde ẹdọ ndọ ẹsinyene nditọ ke ini mmọ ke idemmọ ẹsụk ẹdide n̄kpri nditọ. Mmọ inyeneke-nyene ini ifiọk idemmọ ọfọn mbemiso ẹnyenede eyen, emi ediyomde mmọ ẹnọ ntịn̄enyịn kpukpru ini. Ekpri ebe emi ekeme ndifịbe ufụp ke ini eka nte ido edide ọnọde obufa nsekeyen emi ofụri ntịn̄enyịn esie. Akan oro, ataba idap ke ntak eyen ekeme ndisịn utọk ke ufọt ebe ye n̄wan emi. Mmọ ẹkeme ndien ndidi ndikụt ke mmimọ inyeneke aba ifụre nte ikesinyenede. Idahaemi, mmọ ikemeke aba ndika nsio nsio ebiet nnyụn̄ nnam n̄kpọ ifụre ifụre nte ẹkesinamde mbemiso ẹnyenede nditọ. Mmọ ẹkpese ukpụhọde idaha mmọ didie?

8. Ẹkpeda unyene nditọ nte nso, ndien ntak-a?

⁸ Kpa nte emi ẹkpesede ndọ ke usụn̄ oro enyenede uku, ẹkpenyene ndise unyene nditọ n̄ko nte uku uku utom emi Abasi ọnọde. Ebe ye n̄wan Christian ẹkpenyene ndisịn ofụri ukeme mmọ nnam se ededi ukpụhọde oro edinyene obufa nsekeyen oyomde mmọ ẹnam ke usụn̄ oro enyenede uku. Sia edide Jehovah ọnọ owo ukeme ndinyene nditọ, oyom ete ye eka ẹse obufa nsekeyen nte “udeme Jehovah.” (Ps. 127:3) Ete ye eka emi ẹdide Christian ẹkpenyene ndisịn ukeme nnam utom mmọ nte “mme ete ye eka . . . ke ebuana ye Ọbọn̄.”—Eph. 6:1.

9. (a) Nso ibuana ke ndibọk nditọ? (b) Nso ke ebe ekeme ndinam man an̄wam n̄wan esie aka iso ọsọn̄ idem ke n̄kan̄ eke spirit?

⁹ Edibọk nditọ oyom ediwak isua n̄waidem. Oyom ekese ini ye ukeme. Oyom ebe emi edide Christian ọfiọk ke ediwak isua ke eyen ama akamana, ekeme ndidi eyen eyesitịmede n̄wan esie ke ini mbono esop onyụn̄ ekeme ndidi enye idinen̄ekede inyene ifet ndikpep Bible ke idemesie nnyụn̄ ntie n̄kere n̄kpọ. Emi ekeme ndinam enye emem ke n̄kan̄ eke spirit. Edinyene eyen ke usụn̄ oro enyenede uku oyom ebe anam ofụri se enye ekekeme man etiene ese aban̄a eyen. Enye ekeme ndidomo ndin̄wam n̄wan esie ke ini esịmde ufọk ke ndineme mme n̄kpọ oro n̄wan esie akatabade ke mbono esop ye enye. Enye ekeme nditiene nse eyen enyịn man n̄wan esie etiene enyene ifet ndinen̄ede  mbuana ke utom edikwọrọ Obio Ubọn̄.—Kot Philippi 2:3, 4.

10, 11. (a) Didie ke ẹbọk nditọ ke “usụn̄ ukere n̄kpọ” Jehovah? (b) Ntak emi odotde ẹtoro ediwak ete ye eka oro ẹdide Christian?

¹⁰ Edinyene nditọ ke usụn̄ oro enyenede uku idịghe ndinọ nditọ udia, ọfọn̄, ufọk, ye usọbọ kpọt. Akpan akpan ke idiọk utịt ini emi, oyom nditọ ẹkpep nti edumbet oro mmọ ẹdidade ẹdu uwem toto ke nsek. Ẹkpenyene ndikama nditọ ke “ntụnọ ye ke usụn̄ ukere n̄kpọ Jehovah.” (Eph. 6:4) “Usụn̄ ukere n̄kpọ” emi esịne edisịn ekikere Jehovah ke esịt nditọ toto ke nsek tutu esịm ini uyen emi esidide ini afanikọn̄.—2 Tim. 3:14, 15.

¹¹ Ke ini Jesus ọkọdọhọde mme mbet esie ete “ẹka ẹkenam mme owo ke kpukpru idụt ẹdi mbet,” emi ama enen̄ede ọwọrọ n̄ko ke mme ete ye eka ẹkpenyene ndin̄wam nditọ mmọ ẹkabade ẹdi mme mbet. (Matt. 28:19, 20) Emi idịghe ifia ubọk kiet koro ererimbot enen̄ede esịn̄erede mme uyen. Mmọdo, odot kpukpru owo ke esop ẹnen̄ede ẹtoro mme ete ye eka emi ẹbọkde nditọ mmọ tutu ẹkabade ẹdi mme Christian oro ẹyakde idem ẹnọ Abasi. Mmọ ẹda mbuọtidem mmọ “ẹkan” odudu ererimbot ẹnyụn̄ ẹsọn̄ọ ẹda nte mme ete ye eka oro ẹnyenede uku.—1 John 5:4.

Nditre Ndidọ Ndọ m̀mê Nditre Ndinyene Nditọ ke Eti Ntak

12. Ntak emi ndusụk Christian ẹmekde ndimana ntie kan̄a mbemiso ẹdọde ndọ?

¹² Sia “ini emi osụhọde [mîniọn̄ke] aba,” ‘idaha ererimbot emi onyụn̄ okpụhọrede,’ Ikọ Abasi esịn udọn̄ ọnọ nnyịn ete ikere iban̄a ufọn editre ndidọ ndọ. (1 Cor. 7:29-31) Ntem, ndusụk Christian ẹmek nditre ndidọ ndọ ke ofụri eyouwem mmọ m̀mê ndimana ntie kan̄a mbemiso ẹdọde ndọ. Odot ẹtoro mmọ sia mîdaha ifụre oro mmọ ẹnyenede ke ntak emi mîdọhọ ndọ inam se idọn̄de mmọ. Ediwak ẹtre ndidọ ndọ man ẹnam n̄kpọ Jehovah “ye unana ediwọn̄ọde ntịn̄enyịn.” (Kot 1 Corinth 7:32-35.) Ndusụk mme Christian oro mîdọhọ ndọ ẹnam utom nte mme asiakusụn̄ m̀mê mbonufọk Bethel. Ediwak mmọ ẹyom ndinam ekese ufọn nnọ esop Jehovah, ntre mmọ ẹnam se ẹyomde man ẹdot ndidụk Ufọkn̄wed Unọ Mme Asan̄autom Ukpep. Ke nditịm ntịn̄, mbon oro ẹkenamde utom uyọhọ ini ke ediwak isua mbemiso ẹdọde ndọ ẹsiwak ndidọhọ ke ukpep oro ikọbọde ke ini uyen an̄wam ndọ mmimọ.

13. Ntak emi ndusụk mme ọdọ ndọ emi ẹdide Christian ẹmekde nditre ndinyene nditọ?

¹³ Ukpụhọde en̄wen ke ada itie ke uwem ubon ke mme ebiet en̄wen ke ererimbot—oro edi ke ediwak mme ọdọ ndọ iyomke ndinyene nditọ. Ndusụk ẹtre ke ntak okụk; mbon en̄wen ẹtre man ẹnyene ifet ẹbịne uforo uforo  ubọkọkọ. Ndusụk mme Christian oro ẹma ẹkedọ ndọ n̄ko ẹtre ndinyene nditọ. Nte ededi, mmọ ẹsiwak ndinam ntre man ẹnen̄ede ẹnyene ifet ẹnam n̄kpọ Jehovah. Emi iwọrọke ke mmọ ikopke inem ndọ. Ke akpanikọ, mmọ ẹsikop inem ndọ. Edi mmọ ẹma mme ufọn n̄kpọ Obio Ubọn̄ ẹkan ndusụk ufọn oro ndọ esinamde ẹnyene. (1 Cor. 7:3-5) Ndusụk ebe ye n̄wan emi ẹnam n̄kpọ ẹnọ nditọete mmọ ke circuit, district, m̀mê ke Bethel. Mbon eken ẹdi mme asiakusụn̄ ye mme isụn̄utom. Jehovah idifreke utom ye ima eke mmọ ẹwụtde ẹban̄a enyịn̄ esie.—Heb. 6:10.

“Ukụt ke Obụkidem”

14, 15. Nso “ukụt ke obụkidem” ke mme ete ye eka oro ẹdide Christian ẹkeme ndikụt?

¹⁴ Apostle Paul ọkọdọhọ mme Christian oro ẹdọde ndọ ke mmọ “ẹyekụt ukụt ke obụkidem.” (1 Cor. 7:28) Emi ekeme ndisịne udọn̄ọ ebe ye n̄wan emi, eke nditọ mmọ, m̀mê eke ete ye eka mmọ oro ẹsọn̄de. Emi ekeme n̄ko ndibuana afanikọn̄ ye iduọesịt oro ẹsan̄ade ye edibọk nditọ. Nte ima iketetịn̄ ke ntọn̄ọ ntọn̄ọ ibuotikọ emi, Bible ama etịn̄ ke “ndiọkeyo” ẹyedu “ke mme akpatre usen.” Kiet ke otu n̄kpọ oro ẹdiwụtde ke idu ke ndiọkeyo edi nditọ ‘ndisọn̄ ibuot ye ete ye eka.’—2 Tim. 3:1-3.

¹⁵ Edi ata ọkpọsọn̄ n̄kpọ ọnọ mme ete ye eka oro ẹdide Christian ndibọk nditọ. Ndiọi utịp “ndiọkeyo” emi ẹkeme ndisịm nnyịn n̄ko. Ntem, mme ete ye eka oro ẹdide mme Christian ẹnyene ndikaka iso n̄n̄wana mbiọn̄ọ ndiọi odudu oro “editịm n̄kpọ ererimbot emi” ekemede ndinyene ke idem nditọ mmọ. (Eph. 2:2, 3) Ndien owo isikanke en̄wan emi kpukpru ini! Edieke eyen ke ubon Christian etrede ndinam n̄kpọ Jehovah, ke akpanikọ, emi edi “ukụt” ọnọ ete ye eka emi ẹdomode ndibọk enye ke akpanikọ.—N̄ke 17:25.

“Akwa Ukụt Oyodu”

16. Ewe “ukụt” ke Jesus eketịn̄ aban̄a?

¹⁶ Nte ededi, “ukụt” ekededi oro ndọ ye edinyene nditọ ẹdade ẹdi idifetke-fet nditie nte ukụt en̄wen oro akam okponde akan. Ke ntịn̄nnịm ikọ oro Jesus eketịn̄de aban̄a ini edidu esie ye eke utịt editịm n̄kpọ emi, enye ọkọdọhọ ete: “Akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba.” (Matt. 24:3, 21) Nte ini akakade, Jesus ama anam ẹfiọk ke akwa otuowo ẹyebọhọ “akwa ukụt” emi. Edi editịm n̄kpọ Satan ayaka iso ndisịn ofụri ukeme n̄n̄wana akpatre en̄wan ye Mme Ntiense Jehovah oro ẹsitiede emem emem. Eyịghe idụhe ke ini oro edidi ata ọkpọsọn̄ ini ọnọ kpukpru nnyịn—n̄kpri ye ikpọ.

17. (a) Ntak emi nnyịn ikemede ndisak iso nse ini iso ye mbuọtidem? (b) Nso ikpotụk nte isede ndọ ye unyene nditọ?

¹⁷ Kpa ye oro, ikpanaha inen̄ede ikop ndịk iban̄a ini iso. Mme ete ye eka oro ẹnamde akpanikọ ẹnọ Jehovah ẹkeme ndidori enyịn ke ẹyekpeme mmimọ ọkọrọ ye n̄kpri nditọ mmimọ. (Kot Isaiah 26:20, 21; Zeph. 2:2, 3; 1 Cor. 7:14) Edi amaedi idahaemi, yak ifiọk oro inyenede iban̄a nte ini oro idude ọdiọkde otụk nte ikerede iban̄a ndọ ye edinyene nditọ ke utịt ini emi. (2 Pet. 3:10-13) Ke inamde ntre—edide imọdọ ndọ m̀mê idọhọ, imenyene nditọ m̀mê inyeneke—uwem nnyịn ayada ubọn̄ ye itoro ọsọk Jehovah ye esop Christian.

[Mme Ikọ Idakisọn̄]

Ke Ndidụn̄ọde

• Ntak emi mme uyen Christian mîkpabakke-bak idọ ndọ?

• Nso ibuana ke edibọk nditọ?

• Ntak emi ndusụk Christian mîdọhọ ndọ, m̀mê mînyeneke eyen edieke ẹdọde ndọ?

• Nso “ukụt” ke mme ete ye eka oro ẹdide Christian ẹkeme ndinyene?

[Mme Mbụme Ukpepn̄kpọ]

[Ndise ke page 17]

Ntak emi ọfọnde mme uyen Christian ẹbet tutu ẹsịm ọyọhọ idaha mbemiso ẹdọde ndọ?

[Ndise ke page 18]

Ebe ekeme ndinam ekese man an̄wam n̄wan esie etiene enen̄ede abuana ke mme n̄kpọ eke spirit

[Ndise ke page 19]

Ntak emi ndusụk mme Christian oro ẹdọde ndọ ẹmekde nditre ndinyene nditọ?