Yom Ndausụn̄ Abasi ke Kpukpru N̄kpọ
Yom Ndausụn̄ Abasi ke Kpukpru N̄kpọ
“Abasi emi [edi] Abasi nnyịn ke nsinsi: enye ayada nnyịn usụn̄ tutu esịm ke n̄kpa.”—PS. 48:14.
1, 2. Ntak emi ikpetienede ndausụn̄ Jehovah utu ke ndibuọt idem ke ọniọn̄ nnyịn, ndien mme mbụme ewe ẹdemerede?
ENEN̄EDE edi mmemmem n̄kpọ ndibian̄a idem nnyịn ke ini ikerede iban̄a ikpîkpu n̄kpọ m̀mê mme n̄kpọ oro ẹkemede ndinọ nnyịn unan. (N̄ke 12:11) Edieke inen̄ede iyom ndinam n̄kpọ oro mîfọnke Christian anam, esịt nnyịn esiwak ndinọ nnyịn mme ntak ndinam n̄kpọ oro. (Jer. 17:5, 9) Ntem, andiwet psalm ama owụt ke imenyene ọniọn̄ ke ini enye ọkọbọn̄de akam ọnọ Jehovah ete: “O dọn̄ un̄wana fo ye akpanikọ fo utom; mmọ ẹyeda mi usụn̄.” (Ps. 43:3) Enye ama ọbuọt idem ye Jehovah, idịghe ke esisịt ifiọk oro enye ekenyenede, inyụn̄ idụhe ebiet en̄wen oro enye ọkpọkọbọde ndausụn̄ oro ọfọnde akan oro. Ukem nte andiwet psalm, nnyịn ikpenyene ndidọhọ Abasi ada nnyịn usụn̄.
2 Edi ntak emi ikpọbuọtde idem ke ndausụn̄ Jehovah ikan n̄kpọ en̄wen ekededi? Ini ewe ke nnyịn ikpoyom ndausụn̄ emi? Mme edu ewe ke nnyịn ikpenyene man ibọ ufọn ito ndausụn̄ emi, ndien didie ke Jehovah ada nnyịn usụn̄ mfịn? Ibuotikọ emi ọyọbọrọ mme akpan mbụme emi.
Ntak Emi Ikpọbuọtde Idem ke Ndausụn̄ Jehovah?
3-5. Ntak emi nnyịn inen̄erede ibuọt idem ke ndausụn̄ Jehovah?
3 Jehovah edi Ete nnyịn eke heaven. (1 Cor. 8:6) Enye ọfiọk ofụri n̄kpọ aban̄a nnyịn owo kiet kiet onyụn̄ ekeme ndifiọk se nnyịn ikerede. (1 Sam. 16:7; N̄ke 21:2) Edidem David ọkọdọhọ Abasi ete: “Afo ọmọfiọk nte nsụhọrede ntie, ye nte ndahade nda; afo emetịm ọfiọk ekikere mi nsan-nsan. Koro baba ikọ kiet mîdụhe mi ke edeme; sese, Jehovah, afo ọmọfiọk mmọ kpukpru.” (Ps. 139:2, 4) Sia Jehovah etịmde ọfiọk nnyịn ntem, nnyịn ikpasasan̄a didie ikere ke enye ifiọkke se ifọnde ye nnyịn? Akan oro, Jehovah enyene ofụri ọniọn̄. Enye okụt kpukpru n̄kpọ, enen̄ede okụt n̄kpọ akan owo ekededi, onyụn̄ ọfiọk n̄kpọ ekededi oro owo ọtọn̄ọde ye se ididide utịp. (Isa. 46:9-11; Rome 11:33) Enye edi ‘ikpọn̄-ikpọn̄ Abasi emi enyenede ọniọn̄.’—Rome 16:27.
4 Ke adianade do, Jehovah ama nnyịn, esinyụn̄ oyom inyene se ifọnde ikan kpukpru ini. (John 3:16; 1 John 4:8) Nte edima Abasi, enye atat ubọk ọnọ nnyịn n̄kpọ. Mbet oro James ekewet ete: “Kpukpru nti enọ ye kpukpru enọ eke ẹfọnde ẹma ẹto ke enyọn̄, koro mmọ ẹto Ete mme un̄wana eke enyọn̄ ẹsụhọde ẹdi.” (Jas. 1:17) Abasi esitat ubọk ọnọ mbon oro ẹyakde enye ada mmọ usụn̄, n̄kpọ.
5 Ke akpatre, Jehovah edi ata ọkpọsọn̄ Abasi. Andiwet psalm eketịn̄ ntem aban̄a enye: “Owo eke etiede ke ndịbe ebiet Ata Edikon̄, ke odụn̄ ke mfụt Ata Ọkpọsọn̄. Nyọdọhọ Jehovah, nte, Ubọhọ mi, ye ọkpọsọn̄ ebiet mi; Abasi mi, nyọbuọt idem mi ye enye.” (Ps. 91:1, 2) Ke ini itienede ndausụn̄ Jehovah, emi ọwọrọ ke imoyom Abasi emi mîkemeke ndikpu nnyịn edi ebiet ubọhọ nnyịn. Jehovah ayan̄wam nnyịn idem ke ini ubiọn̄ọ. Enye idikpọn̄ke nnyịn. (Ps. 71:4, 5; kot Mme N̄ke 3:19-26.) Ih, Jehovah ọfiọk se ifọnde ye nnyịn, oyom nnyịn inyene se ifọnde, onyụn̄ enyene ukeme ndinọ nnyịn mme n̄kpọ emi. Ọkpọdiọk didie ntem ndifụmi ndausụn̄ esie! Edi ini ewe ke nnyịn iyom ndausụn̄ emi?
Ini Ewe ke Iyom Ndausụn̄?
6, 7. Ini ewe ke nnyịn iyom ndausụn̄ Jehovah?
6 Ke nditịm ntịn̄, nnyịn imoyom ndausụn̄ Abasi ke ofụri ini uwem nnyịn, ọtọn̄ọde ke uyen tutu esịm usọn̄. Andiwet psalm ọkọdọhọ ete: “Koro Abasi emi [edi] Abasi nnyịn ke nsinsi: enye ayada nnyịn usụn̄ tutu esịm ke n̄kpa.” (Ps. 48:14) Ukem nte andiwet psalm, mme Christian oro ẹnyenede ọniọn̄ ẹsiyom Abasi ada mmimọ usụn̄ kpukpru ini.
7 Nte ededi, odu mme ini oro isiyomde usọp usọp un̄wam. Ndusụk ini imesidu ke “itie-ukụt,” emi ekeme ndidi ukọbọ, ọkpọsọn̄ udọn̄ọ, m̀mê editaba utom ke unana idotenyịn. (Ps. 69:16, 17) Ke mme utọ ini emi, ndibọn̄ akam nnọ Jehovah ọyọdọn̄ nnyịn esịt, inyụn̄ ibuọt idem ke enye ọyọsọn̄ọ nnyịn idem man iyọ, onyụn̄ ada nnyịn usụn̄ man ikeme ndinam nti ubiere. (Kot Psalm 102:17.) Nte ededi, nnyịn imesiyom un̄wam esie ke mme ini en̄wen. Ke uwụtn̄kpọ, ke ini iyomde ndikwọrọ eti mbụk Obio Ubọn̄ nnọ mbọhọidụn̄ nnyịn, nnyịn imoyom ndausụn̄ Jehovah man ukwọrọikọ nnyịn enyene uforo. N̄ko, ke ini ekededi oro iyomde ndinam ubiere—edide aban̄a mme edinam ini nduọkodudu, ọfọn̄ ye ukamaidem, nsan̄a, utom, ubọ ukpep, m̀mê n̄kpọ en̄wen ekededi—nnyịn isinam ubiere oro owụtde ọniọn̄ edieke itienede ndausụn̄ Jehovah. Ke akpanikọ, idụhe idaha oro nnyịn mîyomke ndausụn̄.
Utịp Editre Ndiyom Ndausụn̄ Abasi
8. Nso ke Eve ndikadia mfri oro ẹkekpande ọkọwọrọ?
8 Ti ete ke oyom nnyịn inyịme nditiene ndausụn̄ Jehovah. Abasi idinyịkke nnyịn itiene ndausụn̄ esie edieke nnyịn mîyomke ndinam ntre. Eve ekedi akpa owo oro ekemekde nditre nditiene ndausụn̄ Jehovah, ndien uwụtn̄kpọ esie owụt adan̄a nte ọdiọkde ndinam utọ ubiere oro. Kere n̄ko ban̄a se edinam Eve ọkọwọrọde. Eve akadia mfri oro ẹkekpande sia enye okoyomde ‘nditie nte Abasi, mfiọk eti ye idiọk.’ (Gen. 3:5) Enye ndikanam emi owụt ke enye okoyom nditie nte Abasi, nnyụn̄ mbiere ke idemesie se ifọnde ye se idiọkde utu ke nditiene ndausụn̄ Jehovah. Ntem enye ama esịn ukara Jehovah. Enye okoyom nda-ke-idem. Adam ebe esie ama etiene enye ọsọn̄ ibuot.—Rome 5:12.
9. Nnyịn ndisịn ndausụn̄ Jehovah ọwọrọ nso, ndien ntak emi ndinam ntre mîwụtke eti ibuot?
9 Edieke nnyịn mîtieneke ndausụn̄ Jehovah mfịn, emi ọwọrọ ke nnyịn n̄ko iyomke Jehovah akara nnyịn. Ke uwụtn̄kpọ, kam se owo oro esimade n̄wed ye ndise idan̄. Edieke enye odude ke esop Christian, enye ọfiọk ndausụn̄ oro Jehovah ọnọde aban̄a n̄kpọ emi. Owo ikpakam itịn̄ke-tịn̄ iban̄a utọ ndek ndek n̄kpọ oro ke otu nnyịn, n̄wan̄wadise edisụhọde ntie nse enye nte inem inem n̄kpọ. (Eph. 5:3) Owo emi esịnde ndausụn̄ Jehovah iyomke Jehovah akara imọ, inyụn̄ iyomke Enye edi ibuot esie. (1 Cor. 11:3) Utọ edinam oro iwụtke eti ibuot sia nte Jeremiah ọdọhọde, “owo eke asan̄ade inyụn̄ ikemeke ndinen̄ede ikpat esiemmọ.”—Jer. 10:23.
10. Ntak emi ikpadade ifụre oro Abasi ọnọde nnyịn inam n̄kpọ ke eti usụn̄?
10 Ndusụk owo ẹkeme nditre ndinyịme ye se Jeremiah eketịn̄de, ẹte ke Jehovah ikpọduọhọke nnyịn ke mme ubiere oro inamde sia enye ọkọnọde nnyịn ifụre edimek se imade. Edi ẹkûfre ke ifụre edimek anam inyene mbiomo onyụn̄ edi enọ. Nnyịn iyanam ibat inọ Abasi iban̄a se imekde nditịn̄ nnyụn̄ nnam. (Rome 14:10) Jesus ọkọdọhọ ete: “Koro oto uyọhọ esịt inua osio etịn̄.” Enye ama ọdọhọ n̄ko ete: “Ndiọi ekikere, uwotowo, efịbe, use, inọ, ikọ ntiense nsu, ikọ isụn̄i, ẹto owo ke esịt ẹwọn̄ọ.” (Matt. 12:34; 15:19) Ntem, ikọ ye edinam nnyịn ẹsiyarade se idude nnyịn ke esịt. Mmọ ẹsiwụt se nnyịn inen̄erede idi. Oro esinam Christian oro enyenede ọniọn̄ oyom ndausụn̄ Jehovah ke kpukpru n̄kpọ. Ke usụn̄ emi, Jehovah oyokụt ke ‘esịt esie enen,’ oyonyụn̄ ‘ọfọn ido’ ye enye.—Ps. 125:4.
11. Nso ke mbụk nditọ Israel ekpep nnyịn?
11 Ti mbụk nditọ Israel. Jehovah ama ekpeme idụt oro ke ini mmọ ẹkemekde ndinam se ifọnde, ẹnyụn̄ ẹnamde ewụhọ Jehovah. (Josh. 24:15, 21, 31) Edi mmọ ẹma ẹsiwak ndida ifụre oro mmọ ẹkenyenede nnam n̄kpọ ke idiọk usụn̄. Jehovah ama ọdọhọ mbon eyo Jeremiah ete: “Mmọ ikopke, inyụn̄ ikpan̄ke utọn̄ mmọ, edi ẹsan̄a ke uduak ye ke itụn idiọk esịt mmọ, ẹnyụn̄ ẹfiak edem, ikaha iso.” (Jer. 7:24-26) Nso n̄kpọ mmọn̄eyet ke emi ekedi ntem! Ẹyak nnyịn ikûdedei iyak nsọn̄ibuot m̀mê edisịn idem n̄kaha ke mbubehe idem nnyịn anam nnyịn isịn ndausụn̄ Jehovah, inyụn̄ itiene uduakesịt nnyịn, ndien ke ntem ‘ifiak edem, ikaha iso’!
Ndinam Item Abasi Oyom Nso?
12, 13. (a) Nso edu isinam ima nditiene ndausụn̄ Jehovah? (b) Ntak emi oyomde inyene mbuọtidem?
12 Ima oro imade Jehovah anam nnyịn iyom nditiene ndausụn̄ esie. (1 John 5:3) Edi Paul ama etịn̄ aban̄a n̄kpọ en̄wen oro iyomde ke ini enye ọkọdọhọde ete: “Nnyịn isan̄a ke mbuọtidem, isan̄ake ke edikụt ke enyịn.” (2 Cor. 5:6, 7) Ntak emi mbuọtidem edide akpan n̄kpọ? Jehovah eteme nnyịn “usụn̄ eti ido,” edi usụn̄ emi inamke inyene inyene m̀mê ikpọ itie ke ererimbot emi. (Ps. 23:3) Ke ntak emi, oyom ika iso ibuọt idem ke iyenyene mme anana-mbiet edidiọn̄ eke spirit ke ntak emi inamde n̄kpọ Jehovah. (Kot 2 Corinth 4:17, 18.) N̄ko, mbuọtidem anam iyụhọ ye ukeuke n̄kpọ udu uwem oro inyenede.—1 Tim. 6:8.
13 Jesus ama owụt ke utuakibuot akpanikọ abuana n̄waidem, ndien oyom owo enyene mbuọtidem man anam emi. (Luke 9:23, 24) Ndusụk mme anam-akpanikọ Christian ẹma ẹnam ekese n̄waidem, ẹnyịme ndidi ubuene, ẹyọ ufịk, asari, ye ọkpọsọn̄ ukọbọ. (2 Cor. 11:23-27; Edi. 3:8-10) Ọkpọsọn̄ mbuọtidem akanam mmọ ẹnam oro ye idatesịt. (Jas. 1:2, 3) Ọkpọsọn̄ mbuọtidem anam nnyịn inen̄ede inịm ke nditiene ndausụn̄ Jehovah esidi mfọnn̄kan n̄kpọ kpukpru ini. Emi esidi ke ufọn nnyịn kpukpru ini. Nnyịn imenen̄ede inịm ke utịp oro ẹdinọde mbon oro ẹsọn̄ọde ẹda ẹyọ enen̄ede okpon akan ndutụhọ ibio ini ekededi oro isobode.—Heb. 11:6.
14. Ntak emi akanade Hagar osụhọde idem?
14 Oyom isụhọde idem n̄ko man ikeme nditiene ndausụn̄ Jehovah. Ke uwụtn̄kpọ, Hagar eyenufọk Sarah ama osụhọde idem. Sia Sarah mîkekemeke ndinyene eyen, enye ama ada Hagar ọnọ Abraham, ndien Hagar ama oyomo. Nte ini akakade, Hagar ikadaha aba ekaufọk esie emi ekedide ada ke n̄kpọ. Do ke Sarah ọkọtọn̄ọ ‘ndifịk enye,’ ndien Hagar ama efehe. Angel Jehovah ama osobo ye Hagar onyụn̄ ọdọhọ enye ete: “Fiak, tiene [ukaufọk], nyụn̄ sụk idem fo ke ubọk esie.” (Gen. 16:2, 6, 8, 9) Etie nte Hagar okpokoyom item en̄wen. Edi man enye anam se angel eketemede, enye ekenyene nditre n̄kohodeidem. Hagar ama osụhọde idem anam se angel oro eketemede enye, ndien Ishmael eyen esie akamana ke ufọk Abraham ete esie.
15. Siak ndusụk idaha oro ẹwụtde ke nditiene ndausụn̄ Jehovah ekeme ndiyom isụhọde idem mfịn.
15 Ekeme ndiyom isụhọde idem n̄ko man itiene ndausụn̄ Jehovah. Ekeme ndiyom ndusụk owo ẹnyịme ke orụk edinam ini nduọkodudu oro mmimọ isimade inemke Jehovah esịt. Ekeme ndiyom Christian oro eduede owo ekekpe owo oro enye eduede ubọk. Mîdịghe ekeme ndidi enye ama anam ndudue ndien oyom enye enyịme ndudue oro. Edi nso ke owo akpanam edieke enye anamde akwa idiọkn̄kpọ? Enye enyene ndisụhọde idem nyarade idiọkn̄kpọ esie nnọ mbiowo. Ẹkam ẹkeme ndisio owo mfep ke esop. Edi man ẹfiak ẹda owo oro, ana enye akabade esịt onyụn̄ ọwọn̄ọde ọkpọn̄ idiọkn̄kpọ oro. Ke utọ idaha emi ye mbon oro ẹtiede ntem, Mme N̄ke 29:23 ọdọn̄ owo esịt ete: “Iseri owo oyosụhọde enye: edi nsụkesịt [m̀mê nsụhọdeidem] ayada ukpono.”
Didie ke Jehovah Ada Nnyịn Usụn̄?
16, 17. Didie ke nnyịn ikeme ndinen̄ede mbọ ufọn nto Bible nte n̄wed emi Abasi adade ọnọ nnyịn ndausụn̄?
16 Akakan n̄kpọ oro Abasi adade ọnọ nnyịn ndausụn̄ edi Bible, emi edide Ikọ Abasi eke odudu spirit. (Kot 2 Timothy 3:16, 17.) Man inen̄ede ibọ ufọn ito Ikọ Abasi emi, idiwụtke ọniọn̄ edieke ibetde tutu isobo mfịna mbemiso iyomde se idin̄wamde nnyịn ke N̄wed Abasi. Utu ke oro, nnyịn idisikot Bible kpukpru usen. (Ps. 1:1-3) Ntem ke nnyịn idimehe ye ikọ Abasi, inyene ekikere Abasi, inyụn̄ idu ke mben̄eidem ndinam n̄kpọ nte ọfọnde, idem ke ini isobode mbabuat mfịna.
17 Ke adianade do, oyom itie ikere se nnyịn ikotde ke N̄wed Abasi inyụn̄ ibọn̄ akam iban̄a emi. Ke ini ikotde mme ufan̄ikọ Bible, nnyịn iyetie ikere nsio nsio idaha oro ikpadade se ikotde isịn ke edinam. (1 Tim. 4:15) Ke ini isobode ikpọ mfịna, nnyịn iyọbọn̄ akam inọ Jehovah, idọhọ enye ada nnyịn usụn̄ man ikeme ndise mban̄a mfịna oro. Spirit Jehovah ayan̄wam nnyịn iti mme edumbet N̄wed Abasi emi ẹnyenede ufọn oro nnyịn ikokotde ke Bible m̀mê ke mme n̄wed Bible.—Kot Psalm 25:4, 5.
18. Didie ke Jehovah ada nditọete nnyịn ọnọ nnyịn ndausụn̄?
18 Nditọete nnyịn ẹdi eti usụn̄ en̄wen oro Jehovah adade ọnọ nnyịn ndausụn̄. Akpan ikpehe otu nditọete nnyịn edi “ofụn emi anamde akpanikọ onyụn̄ enyenede ọniọn̄” ye Otu Ukara esie emi adade ke ibuot esie, emi ẹsidade mme n̄wed ye mme ndutịm mbono esop, n̄kpri ye ikpọ mbono, ẹnọ nnyịn udia eke spirit kpukpru ini. (Matt. 24:45-47; men Utom 15:6, 22-31 domo.) Ke adianade do, nnyịn imenyene mbon oro ẹkọride ẹsịm ọyọhọ idaha ke otu nditọete emi, akpan akpan mbiowo oro ẹdotde ndinọ nnyịn ọkpọkpọ un̄wam ye item N̄wed Abasi. (Isa. 32:1) Mme uyen oro ẹdude ke ubon Christian ẹnyene eti usụn̄ efen efen ndibọ ndausụn̄. Abasi emek mme ete ye eka mmọ, emi ẹdide Christian, ete ẹnọ mme uyen emi ndausụn̄, ndien ẹsịn udọn̄ ẹnọ mme uyen ndisika mbịne mmọ man ẹkebọ item.—Eph. 6:1-3.
19. Mme edidiọn̄ ewe ke nnyịn inyene ke ntak emi ikade iso iyom ndausụn̄ Jehovah?
19 Ih, Jehovah ọnọ ndausụn̄ ke ediwak usụn̄, ndien nnyịn ikpenyene ndinen̄ede ntiene mme ndausụn̄ emi. Edidem David eketịn̄ ntem aban̄a ini oro Israel ẹkenamde akpanikọ ẹnọ Abasi: “Mme ete nnyịn ẹkebuọt idem mmọ ye afo: mmọ ẹbuọt idem, ndien afo anyan̄a mmọ. Mmọ ẹfiori ẹkot fi, ndien ẹbọhọ: ẹbuọt idem ye afo, ndien ikwe bụt.” (Ps. 22:3-5) Edieke nnyịn ibuọtde idem ye Jehovah inyụn̄ itiene ndausụn̄ esie, nnyịn n̄ko ‘idikwe bụt.’ Idotenyịn nnyịn idikpụhu. Edieke ‘ikpatde usụn̄ nnyịn inọ Jehovah,’ utu ke ndiberi edem ke ifiọk nnyịn, nnyịn iyọbọ akwa edidiọn̄ idem idahaemi. (Ps. 37:5) Ndien edieke ikade iso inam mme n̄kpọ emi, mme edidiọn̄ oro ẹdidi ke nsinsi. Edidem David ekewet ete: “Jehovah [ama] edinen ikpe, ndien ikpọn̄ke mbon-ima esie; eyekpeme mmọ ke nsinsi: . . . Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Ps. 37:28, 29.
Nte Afo Emekeme Ndinam An̄wan̄a?
• Ntak emi ikpọbuọtde idem ke ndausụn̄ Jehovah?
• Nso ke ndisịn ndausụn̄ Jehovah ọwọrọ?
• Mme idaha ewe ke oyom mme Christian ẹsụhọde idem?
• Didie ke Jehovah ada nnyịn usụn̄ mfịn?
[Mme Mbụme Ukpepn̄kpọ]
[Ndise ke page 8]
Ndi omoyom Jehovah ada fi usụn̄ ke kpukpru ikpehe uwem fo?
[Ndise ke page 9]
Eve ama esịn ukara Jehovah
[Ndise ke page 10]
Nso edu ke okoyom Hagar enyene man anam se angel eketemede?