Ẹmek Ndinam N̄kpọ Jehovah ke Ini Ẹdide N̄kparawa
Ẹmek Ndinam N̄kpọ Jehovah ke Ini Ẹdide N̄kparawa
“Ka iso ke se afo ekekpepde, ẹkenyụn̄ ẹkpekde fi ẹte enịm ke akpanikọ.”—2 TIM. 3:14.
1. Didie ke Jehovah ese utom oro n̄kparawa Ntiense ẹnamde?
EDISANA utom oro n̄kparawa owo ẹnamde edi ata akpan n̄kpọ ọnọ Jehovah tutu enye ọdọhọ ẹtịn̄ ntịn̄nnịm ikọ ẹban̄a mmọ. Andiwet psalm ọkọkwọ ete: “Ikọt fo ẹdi enọ ima-esịt ke usen odudu fo, ke edisana mbana—oto ke idịbi usiere—afo emenyene mbara uyen fo.” (Ps. 110:3) Ih, Jehovah ada mme uyen oro ẹnyịmede ndinam n̄kpọ esie ke ọsọn̄urua.
2. Nso n̄kpọ-ata ke n̄kparawa owo mfịn ẹsobo kaban̄a ini iso mmọ?
2 Ndi mbufo n̄kparawa owo emi ẹdude ke esop Christian ẹmeyak idem mbufo ẹnọ Jehovah? Ekeme ndisọn̄ ediwak n̄kparawa owo ndimek ndinam n̄kpọ ata Abasi. Ikpọ mme anam mbubehe, mme ekpepn̄wed, ye ndusụk ini mbonubon ye mme ufan ẹsisịn udọn̄ ẹnọ n̄kparawa owo ẹbịne mme utịtmbuba uma-inyene. Ke ini n̄kparawa owo ẹbịnede mme utịtmbuba eke spirit, ererimbot ẹsiwak ndisak mmọ. Edi se idude edi nte ke ndinam n̄kpọ ata Abasi edi mfọnn̄kan usụn̄ uwem. (Ps. 27:4) Kere ban̄a mbụme ita emi ẹban̄ade n̄kpọ emi: Ntak emi mbufo ẹkpenamde n̄kpọ Abasi? Didie ke mbufo ẹkeme ndikụt unen nte mbon oro ẹyakde idem ẹnọ Abasi kpa ye se mbon en̄wen ẹkemede nditịn̄ m̀mê ndinam? Mme utịbe utịbe ifet ewe ndinam utom Abasi ke mbufo ẹkeme ndinyene?
Ndinam N̄kpọ Jehovah Edi Nnennen N̄kpọ
3. Didie ke mme edibotn̄kpọ Jehovah ẹkpetụk nnyịn?
3 Ntak emi mbufo ẹkpenamde n̄kpọ ata Abasi? Ediyarade 4:11 ọnọ akpan ntak ete: “Jehovah, kpa Abasi nnyịn, afo omodot ndibọ ubọn̄ ye ukpono ye odudu, koro afo okobotde kpukpru n̄kpọ, ndien oto uduak fo ke mmọ ẹkedu, ẹkenyụn̄ ẹbot mmọ.” Jehovah edi utịbe utịbe Andibot kpukpru n̄kpọ. Isọn̄ eye didie ntem! Eto, flawa, unam, inyan̄ibom, ikpọ obot, aya—Jehovah okobot mmọ kpukpru. Psalm 104:24 ọdọhọ ete: “Inyene [Abasi] ọyọhọ ke ererimbot.” Nnyịn ikpowụt esịtekọm didie ntem ke ima anam Jehovah ọnọ nnyịn idem ye ekikere emi ẹnamde nnyịn ikeme ndidara isọn̄ ye nti n̄kpọ oro ẹdude ke esịt! Ndi ata esịtekọm emi inyenede iban̄a mme utịbe utịbe n̄kpọ obot emi ikpanamke ọdọn̄ nnyịn ndinam n̄kpọ esie?
4, 5. Nso ke Jehovah akanam oro akanamde Joshua asan̄a ekpere enye?
4 Imokụt ntak en̄wen oro ikpanamde n̄kpọ Jehovah ke ikọ oro Joshua, adausụn̄ nditọ Israel, eketịn̄de. Joshua ọkọdọhọ ikọt Abasi ntem ke ini ekekperede ndikpa: “Mbufo ẹmefiọk ke ofụri esịt mbufo, ye ke ofụri ukpọn̄ mbufo, ẹte ke baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo.” Nso ikanam Joshua etịn̄ ikọ emi?—Josh. 23:14.
5 Anaedi ke ini Joshua ekedide eyenọwọn̄ ke Egypt, enye ama ọfiọk un̄wọn̄ọ oro Jehovah ọkọn̄wọn̄ọde ndinọ nditọ Israel isọn̄ ẹda ẹnyene. (Gen. 12:7; 50:24, 25; Ex. 3:8) Ekem Joshua ama ese nte Jehovah ọkọtọn̄ọde ndisu un̄wọn̄ọ esie ebe ke ndimia Egypt Ufen Duop onyụn̄ enyịk Pharaoh itụn asana nditọ Israel ayak ẹnyọn̄ọ. Joshua ekesịne ke otu mbon oro ẹkenyan̄ade ke Ididuot Inyan̄, ekem, enye ama ese nte inyan̄ oro adade Pharaoh ye udịmekọn̄ esie. Joshua ama okụt nte Jehovah ọkọnọde kpukpru n̄kpọ oro nditọ Israel ẹkeyomde ke ini mmọ ẹkesan̄ade anyan isan̄ ke “akwa ye akpakịp wilderness” ke Desat Sinai. Baba owo mmọ kiet ikakpaha ke ntak nsatitọn̄ m̀mê o-biọn̄. (Deut. 8:3-5, 14-16; Josh. 24:5-7) Ke ama ekesịm ini nditọ Israel ndikan mme okopodudu idụt Canaan nnyụn̄ nda Isọn̄ Un̄wọn̄ọ nnyene, Joshua ama okụt nte Abasi emi enye ye nditọ Israel eken ẹketuakde ibuot ẹnọ ekeberede ye mmọ ke utom emi.—Josh. 10:14, 42.
6. Nso idin̄wam fi enyene udọn̄ ndinam n̄kpọ Abasi?
6 Joshua ama ọfiọk ke Jehovah ama anam mme un̄wọn̄ọ Esie. Ntem, Joshua ama atan̄a ete: “Ama edi ami ye ufọk mi, nnyịn iyanam n̄kpọ Jehovah.” (Josh. 24:15) Nso kaban̄a fi? Ke ini ekerede aban̄a mme un̄wọn̄ọ oro ata Abasi ama okososu ye mbon oro enye edisude, ndi ọdọn̄ fi ndinam n̄kpọ Abasi nte Joshua?
7. Ntak emi edina baptism mmọn̄ edide akpan usio-ukot?
7 Nditie n̄kere mme edibotn̄kpọ Jehovah ye mme utịbe utịbe un̄wọn̄ọ esie oro ẹkemede ndinen̄ede mberi edem ẹkpenyene ndinam nnyịn iyak idem inọ Jehovah inyụn̄ iyararede uyakidem oro ke baptism mmọn̄. Baptism edi akpan usio-ukot ọnọ mbon oro ẹyomde ndinam n̄kpọ Abasi. Uwụtn̄kpọ nnyịn, Jesus, ama anam emi an̄wan̄a. Esisịt ini mbemiso enye ọkọtọn̄ọde utom esie nte Messiah, enye ama aka ebịne John Andinịm Owo Baptism enịm imọ baptism. Ntak emi Jesus akanade baptism? Nte ini akakade, enye ama ọdọhọ ete: “Koro n̄kotoho ke heaven nsụhọde ndi ndinam uduak idemmi, edi ndinam uduak enye emi ọkọdọn̄de mi.” (John 6:38) Jesus akana baptism ndiwụt ke imọ ima iyak idem inọ ndinam uduak Ete imọ.—Matt. 3:13-17.
8. Ntak emi Timothy ekemekde ndinam n̄kpọ Abasi, ndien nso ke ekeme ndiyom fi anam?
8 Kere n̄ko ban̄a Timothy, akparawa Christian, emi Jehovah ọkọnọde ekese utom ye ediwak ifetutom nte ini akakade. Ntak emi Timothy ekebierede ndituak ibuot nnọ ata Abasi? Bible asian nnyịn ete ke ‘enye ama ekpep n̄kpọ, ẹnyụn̄ ẹkpek enye enịm ke akpanikọ.’ (2 Tim. 3:14) Edieke edide afo emekpep Ikọ Abasi, ẹnyụn̄ ẹkpek fi enịm ke mme ukpepn̄kpọ esie ẹdi akpanikọ, idaha fo ebiet eke Timothy. Oyom fi anam ubiere idahaemi. Nyene nneme ye ete ye eka fo ban̄a se afo aduakde ndinam. Mmọ ẹkeme ndidiana ye mbiowo esop n̄n̄wam fi ọfiọk se N̄wed Abasi oyomde oto fi man ana baptism.—Kot Utom 8:12.
9. Didie ke afo ndina baptism ekeme ndibehe mbon en̄wen?
9 Edieke afo anade baptism, emi edidi ata eti ntọn̄ọ ndinam n̄kpọ ata Abasi. Edieke afo anamde usio-ukot emi, afo omodụk mbuba anyan usụn̄ emi utịp edide nsinsi uwem ye idatesịt emi ẹnyenede idahaemi ke ndinam uduak Abasi. (Heb. 12:2, 3) Afo ayanam mbonubon mbufo ye mme ufan fo ke esop Christian emi ẹma ẹkedodụk mbuba emi ẹkop idatesịt n̄ko. Ke akam edide akpan n̄kpọ akan, afo ayanam esịt Jehovah adat. (Kot Mme N̄ke 23:15.) Edi akpanikọ ke idin̄wan̄ake ndusụk owo ntak emi afo emekde ndituak ibuot nnọ Jehovah, ndien mmọ ẹkeme ndikere ke ubiere fo ifọnke. Mmọ ẹkam ẹkeme ndibiọn̄ọ fi. Edi afo emekeme ndikan mme idomo emi uforo uforo.
Ke Ini Mbon En̄wen Ẹkerede ke Se Anamde Ifọnke m̀mê Ẹbiọn̄ọde Fi
10, 11. (a) Nso ke mme owo ẹkeme ndibụp fi mban̄a ubiere fo ndinam n̄kpọ Abasi? (b) Nso ke afo ekeme ndikpep nto nte Jesus ọkọbọrọde mbụme aban̄a utuakibuot akpanikọ?
10 Afo ndimek ndinam n̄kpọ Jehovah ekeme ndiyan̄a nsan̄a ufọkn̄wed, mme mbọhọidụn̄, ye mme iman ifiọk. Mmọ ẹkeme ndibụp fi ntak emi afo emekde ndidu uwem ntre ẹnyụn̄ ẹbụp fi ẹban̄a se afo enịmde ke akpanikọ. Afo ọkpọbọrọ didie? Nte ededi, afo enyene ndidụn̄ọde nte ekerede n̄kpọ man ekeme nditịn̄ mme ntak emi afo emekde ndinam n̄kpọ Abasi. Ndien uwụtn̄kpọ Jesus edi akakan uwụtn̄kpọ emi afo ekemede ndikpebe ke ndibọrọ mme mbụme oro ẹban̄ade se afo enịmde ke akpanikọ.
11 Ke ini mme adaiso Ido Ukpono Mme Jew ẹkebụpde Jesus mbụme ẹban̄a ediset ke n̄kpa, enye ama anam mmọ ẹti itie N̄wed Abasi emi mmọ mîkekereke iban̄a. (Ex. 3:6; Matt. 22:23, 31-33) Ke ini scribe kiet okobụpde Jesus m̀mê ewe edi n̄kponn̄kan ibet, enye ama okot ufan̄ikọ Bible oro odotde ọnọ scribe oro. Eren oro ama adat esịt etieti aban̄a ibọrọ oro Jesus ọkọnọde enye. (Lev. 19:18; Deut. 6:5; Mark 12:28-34) Jesus ndisikot nto N̄wed Abasi ye nte enye ekesitịn̄de ikọ ama esịn “ubahade ke otuowo . . . aban̄a enye,” ndien mme andibiọn̄ọ enye ikekemeke ndinam enye idiọk. (John 7:32-46) Ke ini ọbọrọde mbụme emi ẹban̄ade ido ukpono fo, da Bible bọrọ nyụn̄ bọrọ “ke ifụre ifụre ido ye ntotụn̄ọ ukpono.” (1 Pet. 3:15) Edieke mûfiọkke ibọrọ mbụme, nyịme ke imọ ifiọkke nyụn̄ dọhọ ke iyanam ndụn̄ọde. Ekem, da Watch Tower Publications Index m̀mê Watchtower Library on CD-ROM nam ndụn̄ọde ban̄a n̄kpọ oro. Edieke etịmde idem ọfọn, afo ọyọfiọk ‘nte ọkpọnọde ibọrọ.’—Col. 4:6.
12. Ntak emi mûkpayakke ukọbọ anam idem emem fi?
12 Afo amakam ekeme ndisobo se ikande edibụp mbụme mban̄a ubiere fo ndinam n̄kpọ Abasi ye se afo enịmde ke akpanikọ. Mmọn̄ọ, n̄kọ Satan kpa Devil emi edide asua Abasi akara ererimbot. (Kot 1 John 5:19.) Idiwụtke ifiọk ndidori enyịn ke kpukpru owo ẹyetoro fi, ndien ẹkam ẹkeme ndibiọn̄ọ fi. Ndusụk owo ẹkeme ‘ndisụn̄i fi,’ ẹnyụn̄ ẹka iso ẹnam ntre. (1 Pet. 4:4) Edi ti ke idịghe afo ikpọn̄. Ẹma ẹkọbọ Jesus Christ n̄ko. Ẹma ẹkọbọ apostle Peter n̄ko, ndien enye ekewet ete: “Ndima, ẹkûtịmede esịt ẹban̄a ikan̄ [ikan̄ ndutụhọ] eke asakde ke otu mbufo, emi ọwọrọde ọnọ mbufo nte idomo, nte n̄kpọ eke edide esen esen n̄kpọ ọwọrọ mbufo. Utu ke oro, ẹka iso ẹdara adan̄a nte mbufo ẹdide mme andibuana ke mme ukụt Christ.”—1 Pet. 4:12, 13.
13. Ntak emi mme Christian ẹkpedatde esịt ke ini ẹkọbọde mmọ?
13 Ndiyọ ukọbọ m̀mê ubiọn̄ọ ke ntak emi edide Christian edi ntak idatesịt. Ntak-a? Koro edieke ererimbot ẹmade fi ọwọrọ ke afo odu uwem nte ekemde ye edumbet Satan—idịghe eke Abasi. Jesus okodụri nnyịn utọn̄ ete: “Mbọm, ke ini kpukpru owo ẹtịn̄de se ifọnde ẹban̄a mbufo, koro mme ete ete mmọ ẹkesinam kpa ntre ye mme prọfet nsu.” (Luke 6:26) Ndikọbọ fi ọwọrọ ke Satan ye ererimbot esie ẹyat esịt ye afo ke ntak emi anamde n̄kpọ Jehovah. (Kot Matthew 5:11, 12.) Ndien ‘ndisuene fi kaban̄a enyịn̄ Christ’ edi ntak idatesịt.—1 Pet. 4:14.
14. Nti utịp ewe ke owo ekeme ndinyene ke ini enye ọsọn̄ọde ada ye Jehovah kpa ye ukọbọ?
14 Ke ini ọsọn̄ọde ada ye Jehovah kpa ye ubiọn̄ọ, afo eyenyene nti utịp inan̄ ke nsụhọde n̄kaha. Afo ọmọnọ ikọ ntiense aban̄a Abasi ye Eyen esie. Nsọn̄ọnda fo esịn udọn̄ ọnọ nditọete fo. Ekeme ndisịn udọn̄ nnọ ndusụk ndanse oro mîfiọkke Jehovah ẹyom enye. (Kot Philippi 1:12-14.) Ndien ke ini okụtde nte Jehovah ọnọde fi odudu ndiyọ idomo, afo ọyọdọdiọn̄ ama enye.
“Akwa Usụn̄ Emeberede” Ọnọ Mbufo
15. Nso “akwa usụn̄” ekebererede ọnọ apostle Paul?
15 Apostle Paul ekewet ntem aban̄a utom ukwọrọikọ esie ke Ephesus: “Akwa usụn̄ emeberede ọnọ mi ndinam utom.” (1 Cor. 16:8, 9) Emi ekedi usụn̄ oro adade esịm akwa utom edikwọrọ eti mbụk nnyụn̄ nnam mme mbet ke obio oro. Paul ama an̄wam ediwak owo ẹfiọk Jehovah ẹnyụn̄ ẹtuak ibuot ẹnọ Enye ke ndidụk usụn̄ oro.
16. Didie ke nsụhọ mbon oro ẹyetde aran ẹkedụk “ana-in̄wan̄ usụn̄” ke 1919?
16 Jesus Christ oro ẹnọde ubọn̄ ama enịm nsụhọ mbon oro ẹyetde aran “ana-in̄wan̄ usụn̄” ke iso ke 1919. (Edi. 3:8) Mmọ ẹma ẹdụk usụn̄ oro ẹnyụn̄ ẹtọn̄ọ ndikwọrọ eti mbụk nnyụn̄ n̄kpep mme owo akpanikọ Bible n̄kan nte akanam ẹkpepde. Nso idi utịp utom ukwọrọikọ mmọ? Eti mbụk emesịm utịt isọn̄ idahaemi, ndien n̄kpọ nte owo miliọn itiaba ẹnyene idotenyịn ndidu uwem ke nsinsi ke obufa ererimbot Abasi.
17. Didie ke mbufo ẹkeme ndidụk “akwa usụn̄” emi ‘ebererede ọnọ mbufo ndinam utom’?
17 ‘Akwa usụn̄ ndinam utom’ osụk ebebererede ọnọ kpukpru mme asan̄autom Jehovah. Mbon oro ẹdụkde enye ẹkop idatesịt ye uyụhọ nte mmọ ẹnen̄erede ẹsịn idem ẹkwọrọ eti mbụk. N̄kparawa mme asan̄autom Jehovah, mbufo ẹse didie utọ anana-mbiet ifet emi ẹnyenede ndin̄wam mbon en̄wen “ẹnyene mbuọtidem ke eti mbụk” mi? (Mark 1:14, 15) Nte mbufo ẹmekere ẹban̄a ndinam utom nte mme asiakusụn̄ ofụri ini m̀mê mme asiakusụn̄ unọ un̄wam? Usụn̄ en̄wen emi ẹkemede ndiberede nnọ ediwak mbufo ẹdi edibọp Ufọkmbono Obio Ubọn̄, utom Bethel, ye utom isụn̄utom. Sia ini emi osụhọde ọnọ idiọk ererimbot Satan emi mîniọn̄ke aba, enen̄ede edi usọp usọp n̄kpọ ndidụk mme ikpehe utom Obio Ubọn̄ emi. Ndi mbufo ẹyedụk “akwa usụn̄” emi ke adan̄aemi ini osụk odude?
“Ẹtabi, Ẹnyụn̄ Ẹse nte Jehovah Ọfọnde”
18, 19. (a) Nso ikanam David enyene ọkpọsọn̄ udọn̄ ndinam n̄kpọ Jehovah? (b) Nso iwụt ke David ikedehedei itua n̄kpọfiọk iban̄a ndinam n̄kpọ Abasi?
18 Andiwet psalm eke odudu spirit ama esịn udọn̄ ọnọ mbon en̄wen ete “ẹtabi, ẹnyụn̄ ẹse nte Jehovah ọfọnde.” (Ps. 34:8) Ke ini Edidem David eke Israel eset ekesikpemede erọn̄ nte ekpri akparawa, Jehovah ama anyan̄a enye osio ndiọi unam ke ubọk. Abasi ama ebere ye enye ke ini enye akan̄wanade ye Goliath onyụn̄ anyan̄a enye osio ke ediwak afanikọn̄. (1 Sam. 17:32-51; Ps. 18, ikọ enyọn̄ ibuotn̄wed) Akwa ima-mfọnido Abasi akanam David ewet ete: “Afo, O Jehovah Abasi mi, amanam utịbe ido fo, ye ekikere fo eke ekerede nnyịn, ẹwak: [“idụhe owo eke ebietde,” NW] fi.”—Ps. 40:5.
19 David ama edi edima Jehovah etieti onyụn̄ oyom nditoro enye ke ofụri esịt ye ekikere esie. (Kot Psalm 40:8-10.) Nte mme isua ẹkebede, David ikedehedei itua n̄kpọfiọk iban̄a nte enye akadade uwem esie atuak ibuot ọnọ ata Abasi. Ndidu uwem uten̄e Abasi ekedi ata ọsọn̄urua n̄kpọ ọnọ enye—kpa n̄kpọ oro ọnọde enye anana-mbiet inemesịt. David ọkọdọhọ ntem ke eyo usọn̄: “Afo, O Ọbọn̄ Jehovah, [edi] idori-enyịn mi; ye iberedem mi, ọtọn̄ọde ke ini uyen mi. Ndien n̄ko, O Abasi, kûkpọn̄ mi tutu nsịm usọn̄ ye iwat.” (Ps. 71:5, 18) Mbuọtidem oro David ekenyenede ke Jehovah ye mbọbọ ufan esie ye enye ẹketetịm ẹsọn̄, idem okposụkedi emi idem ekememde enye ke ntak usọn̄.
20. Ntak emi ndinam n̄kpọ Abasi edide mfọnn̄kan usụn̄ uwem?
20 Uwem Joshua, David, ye Timothy ẹsọn̄ọ n̄ko ke ndinam n̄kpọ Jehovah edi mfọnn̄kan usụn̄ uwem. Mme n̄kpọ obụkidem ibio ini oro ẹkemede ndinyene ke ndibịne ubọkọkọ ke ererimbot emi ifetke-fet ndimen udomo ye mme utịp oro ẹbịghide, emi ẹdibọde ke ‘ndinam n̄kpọ Jehovah ke ofụri esịt mbufo, ye ke ofụri ukpọn̄ mbufo.’ (Josh. 22:5) Edieke mûyakke kan̄a idem unọ Jehovah, bụp idemfo ete, ‘Nso ikpan mi ndidi kiet ke otu Mme Ntiense Jehovah?’ Edieke edide afo amanana baptism, nte akpama ndinen̄ede n̄kop idatesịt ke uwem fo? Ke edide ntre, tat utom fo nyụn̄ nam n̄kaiso n̄kọri eke spirit. Ibuotikọ oro etienede oyowụt fi nte ekemede ndikọri ke n̄kan̄ eke spirit ebe ke ndikpebe uwụtn̄kpọ apostle Paul.
Didie ke Afo Ọkpọbọrọ?
• Siak ntak iba emi nnyịn ikpanamde n̄kpọ Abasi.
• Nso ikan̄wam Timothy emek ndinam n̄kpọ Abasi?
• Ntak emi ọkpọsọn̄ọde ada ke ini ukọbọ?
• Mme ifet ewe ndinam utom ẹkeme ndibererede nnọ fi?
[Mme Mbụme Ukpepn̄kpọ]
[Ndise ke page 18]
Ndinam n̄kpọ Jehovah edi mfọnn̄kan usụn̄ uwem
[Ndise ke page 19]
Nte emekeme ndibọrọ mbụme oro ẹbụpde fi ẹban̄a ido ukpono fo?