Edinyan̄a Obio Ubọn̄ Abasi Emekpere!
Edinyan̄a Obio Ubọn̄ Abasi Emekpere!
“Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.”—MATT. 6:10.
1. Nso ikedi akpan ukpepn̄kpọ Jesus?
KE INI Jesus Christ ọkọkwọrọde ikọ ke obot, enye ama esịn uwụtn̄kpọ akam oro eketịn̄de akpan n̄kpọ oro enye ekekpepde ibio ibio. Enye ekekpep mbet esie ete ẹbọn̄ akam ẹnọ Abasi ntem: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matt. 6:9-13) Jesus “asan̄a ke kpukpru obio ye obio-in̄wan̄ ọkwọrọ onyụn̄ atan̄a eti mbụk obio ubọn̄ Abasi.” (Luke 8:1) Christ eketeme mme anditiene enye ete: ‘Ẹka iso ndibem iso nyom obio ubọn̄ ye edinen ido Abasi.’ (Matt. 6:33) Nte afo ekpepde ibuotikọ emi, yom mme usụn̄ oro ekemede ndida enye nnam n̄kpọ ke an̄wautom. Ke uwụtn̄kpọ, se nte ekemede ndibọrọ mme mbụme emi: Etop Obio Ubọn̄ edi akpan n̄kpọ adan̄a didie? Oyom ẹnyan̄a ubonowo ẹsio ke nso? Ndien, didie ke Obio Ubọn̄ Abasi edinyan̄a owo?
2. Etop Obio Ubọn̄ edi akpan n̄kpọ adan̄a didie?
2 Jesus eketịn̄ ntịn̄nnịm ikọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” (Matt. 24:14) Eti mbụk Obio Ubọn̄ Abasi edi akakan n̄kpọ. Ke nditịm ntịn̄, enye edi akakan etop ke ofụri ererimbot! Ke se ibede esop Mme Ntiense Jehovah 100,000, n̄kpọ nte mme asan̄autom Abasi miliọn itiaba ke ẹnam utom ukwọrọikọ oro akanam owo mînamke, ẹsian mbon en̄wen ke Obio Ubọn̄ ama ọtọtọn̄ọ ndikara. Enye nditọn̄ọ ndikara edi eti mbụk koro emi ọwọrọ ke Abasi ọmọtọn̄ọ ukara ke heaven man akpakara ofụri isọn̄. Ke ini ukara Obio Ubọn̄, ẹyenam uduak Jehovah ke isọn̄ kpa nte ẹnamde ke heaven.
3, 4. Nso iditịbe ke ini ẹnamde uduak Abasi ke isọn̄?
3 Nso iditịbe inọ ubonowo ke ini ẹnamde uduak Abasi ke isọn̄? Jehovah “ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.” (Edi. 21:4) Owo ididọn̄ọke aba inyụn̄ ikpa ke ntak ndammana idiọkn̄kpọ ye unana mfọnmma. Mme akpan̄kpa oro ẹdude ke ibuot uti n̄kpọ Abasi ẹyenyene ifet ndidu uwem ke nsinsi, koro Bible ọn̄wọn̄ọ ete: “Ndinen owo ye mme anam ukwan̄n̄kpọ ẹyeset ke n̄kpa.” (Utom 24:15) Ekọn̄, udọn̄ọ, m̀mê biọn̄ ididụhe aba, ndien ẹyenam isọn̄ akabade Paradise. Idem mme unam oro ẹnyenede ndịk idahaemi ẹdidu ke emem ye owo ẹnyụn̄ ẹdu ke emem ye kiet eken.—Ps. 46:9; 72:16; Isa. 11:6-9; 33:24; Luke 23:43.
4 Mme utọ utịbe utịbe edidiọn̄ ukara Obio Ubọn̄ emi ẹnam Bible etịn̄ inem inem ntem ke ntịn̄nnịm ikọ aban̄a uwem ke ini oro ete: “Edi mbon nsụkidem ẹyeda isọn̄ ẹnyene; ediwak emem ẹyenyụn̄ ẹnem mmọ esịt.” Edi nso kaban̄a mbon ntịme? N̄wed Abasi etịn̄ ntịn̄nnịm ikọ ete: “Osụk esisịt idiọk owo ididụhe.” Edi “mmọ eke ẹbetde Jehovah ẹyeda isọn̄ ẹnyene.”—Ps. 37:9-11.
5. Nso iditịbe inọ editịm n̄kpọ emi odude ke emi?
5 Man kpukpru emi ẹkeme nditịbe, ana ẹsobo editịm n̄kpọ emi odude ke emi ye ntịme ntịme ndutịm ukara, ido ukpono, ye unyamurua esie. Ndien se ukara eke heaven edinamde edi oro. Ẹma ẹnọ prọfet Daniel odudu spirit ẹte ewet ete: “Ke eyo ndidem oro [emi ẹdude idahaemi], Abasi enyọn̄ ayanam ubọn̄ eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi, ndien enye ayada ke nsinsi.” (Dan. 2:44) Ndien Obio Ubọn̄ Abasi—kpa obufa ukara eke heaven—ayakara obufa n̄kaowo. “Mbufa enyọn̄ ye obufa isọn̄” ẹyedu, “ndien edi mi ke edinen ido edidụn̄.”—2 Pet. 3:13.
Imenen̄ede Iyom Edinyan̄a Idahaemi
6. Bible ọdọhọ ke idiọk n̄kpọ idiọk ererimbot emi etie didie?
6 Afanikọn̄ ubonowo ọkọtọn̄ọ ke ini Satan, Adam, ye Eve ẹkesọn̄de ibuot ye Abasi, ẹyom ndibiere nnọ idemmọ se idide eti ye idiọk. Mbemiso Ukwọ ofụri ererimbot, emi eketịbede ke n̄kpọ nte isua 1,600 ẹma ẹkebe ọtọn̄ọde ke ini nsọn̄ibuot oro, ‘idiọk-n̄kpọ owo ama okpon ke isọn̄, kpukpru n̄kpọ ke ekikere esịt esie ẹnyụn̄ ẹsụk ẹdi idiọk kpukpru ini.’ (Gen. 6:5) N̄kpọ nte isua 1,300 ke oro ebede, n̄kpọ ẹma ẹdiọk tutu Solomon ewet ete: “Ami ntoro mme akpa-n̄kpa emi ẹma ẹkekpan̄a, n̄kan mme odu-uwem emi ẹdude tutu esịm emi. Ndien ama edi owo eke mîka-idụhe kan̄a, mînyụn̄ ikwe mme idiọk n̄kpọ emi ẹnamde ke idak utịn, ọfọn enye akan mmọ mbiba.” (Eccl. 4:2, 3) Toto ke ini oro esịm eyo nnyịn emi edi isua 3,000, kpa ini emi idiọk n̄kpọ ẹkade iso ndidu barasuene.
7. Ntak emi inen̄erede iyom edinyan̄a Abasi idahaemi?
7 Okposụkedi emi idiọk n̄kpọ odude ke ata anyan ini, idahaemi ke inen̄ede iyom edinyan̄a Obio Ubọn̄ Abasi ikan. N̄kpọ ẹmediọk ke isua 100 emi ẹbede ẹkan nte akanam ẹdiọkde, ndien ẹkaka iso ndidiọk. Ke uwụtn̄kpọ, itieutom kiet emi esinamde ndụn̄ọde ọkọdọhọ ete: “Mme owo oro ẹkekpan̄ade ke ekọn̄ [ke ọyọhọ isua ikie 20] ẹwak utịm ikata ẹkan mme owo oro ẹkekpan̄ade ke kpukpru ekọn̄ oro ẹken̄wanade toto ke akpa isua ikie E.N. tutu esịm isua 1899.” Se iwakde ibe owo miliọn 100 ẹmekpan̄a ke ekọn̄ ọtọn̄ọde ke 1914! N̄wed kiet ọdọhọ ke n̄kpọ nte owo miliọn 60 ẹkekpan̄a ke udiana ekọn̄ ererimbot. Mme owo ẹkeme ndisọhi ata ediwak ke otu ubonowo mfep sia ndusụk idụt ẹkam ẹnyene n̄kpọekọn̄ nuclear idahaemi. Ndien kpa ye n̄kọri oro ẹnamde ke ifiọk ntaifiọk ye ibọkusọbọ, biọn̄ osụk owowot n̄kpọ nte nditọwọn̄ miliọn ition kpukpru isua.—Se ibuot 9 ke n̄wed oro Nso ke Bible Enen̄ede Ekpep?
8. Nso ke ediwak tọsịn isua oro owo akarade ẹnen̄ede ẹsọn̄ọ?
8 Mme owo ikemeke nditre idiọkn̄kpọ. Akananam ndutịm ukaraidem, unyamurua, ye ido ukpono ererimbot emi inọhọ mme akpan n̄kpọ emi mme owo ẹyomde, emi edide emem, uforo, ye nsọn̄idem. Utu ke mmọ ndikọkọk mme mfịna ubonowo, mmọ ẹkam ẹtetịp ẹsịn. Ke akpanikọ, ediwak tọsịn isua emi mme owo ẹkarade ẹwụt ke ikọ emi edi akpanikọ: “Usụn̄ owo idụhe owo ke ubọk: owo eke asan̄ade inyụn̄ ikemeke ndinen̄ede ikpat esiemmọ.” (Jer. 10:23) Ih, owo amakara owo tutu ọnọ enye unan. (Eccl. 8:9) Akan oro, “ofụri ubonowo ke omụm mmụm ọtọkiet onyụn̄ odu ke ubiak ọtọkiet.”—Rome 8:22.
9. Nso ndiọi idaha ke ata mme Christian ẹfiọk ke ẹyedu ke “mme akpatre usen” emi?
9 Bible ekebem iso etịn̄ aban̄a eyo nnyịn ete: “Ndiọkeyo ẹyedu ke mme akpatre usen.” Ke ama eketịn̄ nte mme akpatre usen ẹditiede ke idak ukara owo, ntịn̄nnịm ikọ oro ọdọhọ ke “ndiọi owo ye mbon abian̄a ẹyedọdiọn̄ ẹdiọk ẹka iso.” (Kot 2 Tim. 3:1-5, 13.) Mme Christian ẹfiọk ke emi enyene nditịbe, koro “ofụri ererimbot esịne ke idak odudu andidiọk,” kpa Satan. (1 John 5:19) Nte ededi, eti mbụk emi odude edi ke Abasi ọyọsọp ndinyan̄a mbon oro ẹmade enye. Ẹyenyan̄a mmọ ẹsio ke ererimbot emi, emi ọdiọn̄de-diọn̄ ọdiọk usọp usọp mi.
N̄kukụre Ebiet Edinyan̄a Emi Enyenede Nsọn̄ọ
10. Ntak emi Jehovah edide n̄kukụre owo emi ẹkemede ndiberi edem ke edinyan̄a esie?
10 Ke ini ọkwọrọde eti mbụk, dọhọ mme owo ke Jehovah edi n̄kukụre owo emi ẹkemede ndiberi edem ke edinyan̄a esie. Enye ikpọn̄-ikpọn̄ enyene odudu ye ukeme ndinyan̄a mme asan̄autom esie nsio ke idiọk idaha ekededi. (Utom 4:24, 31; Edi. 4:11) Imekeme ndinen̄ede nnịm ke Jehovah ayanyan̄a ikọt esie kpukpru ini onyụn̄ osu mme uduak esie, koro enye ọn̄wọn̄ọ ete: “Iditreke ndiwọrọ kpa nte n̄kekerede.” Ikọ esie “idifiakke itiene [enye] ubọk-ubọk.”—Kot Isaiah 14:24, 25; 55:10, 11.
11, 12. Nso ke Abasi ọn̄wọn̄ọ ọnọ mme asan̄autom esie?
11 Jehovah ọmọn̄wọn̄ọ ke iyanyan̄a ikọt imọ ke ini imọ idisobode mme idiọkowo. Abasi ọkọdọhọ prọfet Jeremiah ete ‘okûfehe’ ke ini ọkọdọn̄de enye eketịn̄ ikọ uko uko ọnọ mme anamidiọk. Ntak-a? Abasi ọkọdọhọ ete: “Koro ami ndude ye afo ndinyan̄a fi.” (Jer. 1:8) Kpasụk ntre, ke ini Jehovah okoyomde ndisobo idiọk obio Sodom ye Gomorrah, enye ama ọdọn̄ angel iba ẹkenyan̄a Lot ye ubon esie ẹsio ke obio oro. “Ndien Jehovah anam brimstone ye ikan̄ . . . edep ke Sodom ye Gomorrah.”—Gen. 19:15, 24, 25.
12 Jehovah akam ekeme ndinyan̄a mbon oro ẹnamde uduak esie ke ofụri ererimbot. Ke ini enye akadade Ukwọ osobo idiọk ererimbot ke eset, enye ama “anyan̄a Noah, ọkwọrọ edinen ido, ye owo itiaba en̄wen.” (2 Pet. 2:5) Jehovah ayafiak anyan̄a ndinen owo ke ini enye edisobode idiọk ererimbot emi odude ke emi. Ntem, Ikọ esie ọdọhọ ete: “Mbufo kpukpru sụn̄-sụn̄ mbio isọn̄ . . . ẹyom Jehovah . . . ẹyom edinen ido, ẹyom sụn̄-sụn̄ ido: m̀mê mbufo ẹyedịbe ke usen iyatesịt Jehovah.” (Zeph. 2:3) Ke ntak nsobo ofụri ererimbot emi, ‘mbon edinen ido ẹdidụn̄ ke isọn̄ edi ẹyesobo mme idiọk owo ke isọn̄ ẹfep.’—N̄ke 2:21, 22.
13. Didie ke ẹdinyan̄a mme asan̄autom Jehovah oro ẹma ẹkekpan̄a?
13 Edi ediwak mme asan̄autom Abasi ẹmekpakpan̄a ke ntak udọn̄ọ, ukọbọ, ye mme ntak eken. (Matt. 24:9) Ẹdisan̄a didie, ndien, ẹnyan̄a mmọ emi? Nte ima ikokokụt, “ndinen owo . . . ẹyeset ke n̄kpa.” (Utom 24:15) Ndifiọk ke baba n̄kpọ kiet ikemeke ndibiọn̄ọ Jehovah ndinyan̄a mme asan̄autom esie ọdọn̄ nnyịn esịt didie ntem!
Edinen Ukara
14. Nso inam nnyịn inyene mbuọtidem ke Obio Ubọn̄ Abasi edi edinen ukara?
14 Ke ini ọkwọrọde ikọ ọnọ mme owo, afo emekeme ndinam mmọ ẹfiọk ke Obio Ubọn̄ Jehovah eke heaven edi edinen ukara. Emi edi ntre koro ukara emi enyene mme utọ nti edu Abasi nte edinen ikpe, edinen ido, ye ima. (Deut. 3:4; 1 John 4:8) Abasi ayak ukara Obio Ubọn̄ emi esịn Jesus Christ ke ubọk, kpa enye emi odotde akan ndikara isọn̄. Jehovah amaduak n̄ko ndinam Christian 144,000 oro ẹyetde aran mi ke isọn̄ ẹset ẹka heaven nte nsan̄a mme ada udeme nnyene ye Christ ẹkediana ye Christ ẹkara isọn̄.—Edi. 14:1-5.
15. Nso idi ukpụhọde ukara Obio Ubọn̄ Abasi ye ukara owo?
15 Ukara Jesus ye owo 144,000 edinen̄erede okpụhọde didie ntem ye eke mme anana-mfọnmma owo! Mme andikara editịm n̄kpọ emi ẹwak ndidi ibak ẹnyụn̄ ẹnam mbon oro mmọ ẹkarade ẹn̄wana ekọn̄ emi ẹwotde ata ediwak owo. Oro anam N̄wed Abasi etemede nnyịn ete ikûbuọt idem ye owo, “emi edinyan̄a mîdụhe enye ke idem.” (Ps. 146:3) Edi Christ edida ata eti edu akara. Jesus ọkọdọhọ ete: “Ẹtiene mi, kpukpru mbufo emi ẹkpade utom ẹnyụn̄ ẹbiomde ndodobi mbiomo, ndien nyọnọ mbufo nduọkodudu. Ẹmen ọkpọnọ mi ẹkọn̄ọ ke itọn̄ mbufo ẹnyụn̄ ẹkpebe mi, koro ami mmenyene ifụre ifụre ido nnyụn̄ nsụhọde esịt, ndien mbufo ẹyekụt nduọkodudu ẹnọ ukpọn̄ mbufo. Koro ọkpọnọ mi ememem, mbiomo mi onyụn̄ efefere.”—Matt. 11:28-30.
Mme Akpatre Usen Ẹyesọp Nditre!
16. Didie ke mme akpatre usen emi ẹdisịm utịt?
16 Ererimbot emi odu ke mme akpatre usen, m̀mê “utịt editịm n̄kpọ emi,” toto ke 1914. (Matt. 24:3) Ke ata n̄kpet n̄kpet ini iso, se Jesus okokotde “akwa ukụt” ọmọn̄ etịbe. (Kot Matthew 24:21.) Anana-mbiet ukụt emi ayada ofụri editịm n̄kpọ Satan ekesịm utịt. Edi akwa ukụt editọn̄ọ didie? Enye edinyụn̄ etre didie?
17. Bible ọdọhọ ke nso edidi ntọn̄ọ akwa ukụt?
17 Akwa ukụt editọn̄ọ ke mbuari. Ih, “usen Jehovah” edidi wap wap “ini ekededi emi mmọ ẹdọhọde: ‘Emem ye ifụre!’” (Kot 1 Thessalonica 5:2, 3.) Akwa ukụt oro ẹketịn̄de ẹban̄a editọn̄ọ ke ini emi mme idụt ẹkerede ke mmimọ imekpere ndikọk ndusụk ikpọ mfịna mmimọ. Mbabuat nsobo “Akwa Babylon,” kpa ukara ererimbot eke nsunsu ido ukpono, ayakpa ererimbot idem. Idem eyenen̄ede akpa ndidem ye mbon eken ke ini ẹsobode Akwa Babylon.—Edi. 17:1-6, 18; 18:9, 10, 15, 16, 19.
18. Jehovah edinam n̄kpọ didie aban̄a en̄wan oro Satan edin̄wanade ye mme asan̄autom Esie?
18 Ini ama enen̄ede ekpere, “idiọn̄ọ ẹyedu ke utịn ye ọfiọn̄ ye ntantaọfiọn̄,” ndien “idiọn̄ọ Eyen owo ọyọwọrọ owụt idem ke enyọn̄.” Do, imekeme ‘ndinen̄ede nda koro edinyan̄a nnyịn ke asan̄a ekpere.’ (Luke 21:25-28; Matt. 24:29, 30) Satan, m̀mê Gog, ayada udịmekọn̄ esie an̄wana ye ikọt Abasi. Edi Jehovah etịn̄ ntem aban̄a mbon oro ẹn̄wanade ye mme anam-akpanikọ ikọt esie: “Enye emi otụkde mbufo otụk eyen enyịn [mi].” (Zech. 2:8) Ke ntem, Satan idikemeke ndisobo mmọ mfep. Ntak-a? Koro Jehovah Ọbọn̄ Andikara ayanam n̄kpọ usọp usọp man anyan̄a mme asan̄autom esie.—Ezek. 38:9, 18.
19. Ntak emi ikemede ndinyene mbuọtidem ke udịmekọn̄ Abasi ẹyesobo editịm n̄kpọ Satan-a?
19 Ke ini Abasi edisobode mme idụt, ‘mmọ ẹyefiọk ẹte ke enye edi Jehovah.’ (Ezek. 36:23) Enye ọyọdọn̄ udịmekọn̄ esie—udịm mme angel emi Christ Jesus adade usụn̄—ẹdisobo editịm n̄kpọ Satan eken oro ẹsụhọde ke isọn̄. (Edi. 19:11-19) Ke ini itide ke isan̄ kiet, angel kiet kpọt akada okoneyo kiet kpọt owot mme asua Abasi “tọsịn, tọsịn owo ke itie ikie ye anan̄ ye ition,” nnyịn imekeme ndinyene mbuọtidem ke idisọn̄ke udịmekọn̄ eke heaven ndisobo kpukpru ikpehe editịm n̄kpọ Satan oro ẹsụk ẹdude ke isọn̄ ke ini akwa ukụt adade ekesịm Armageddon. (2 Ndi. 19:35; Edi. 16:14, 16) Ẹyesịn Satan ye mme demon esie ke editụn̄ọ ukpe ke tọsịn isua kiet. Amaekem, ẹyesobo mmọ.—Edi. 20:1-3.
20. Nso ke Jehovah edida Obio Ubọn̄ esie anam?
20 Ke ntem, ẹyesio idiọkido ke isọn̄ ẹfep, ndien ndinen owo ẹyedụn̄ ke isọn̄ ke nsinsi. Ẹyekụt ke Jehovah edi Akwa Andinyan̄a. (Ps. 145:20) Enye ayada Obio Ubọn̄ esie owụt ke ukara imọ enen, anam enyịn̄ esie asana, onyụn̄ osu akwa uduak esie ke isọn̄. Afo akpakam okop akwa idatesịt ke utom ukwọrọikọ fo nte afo atan̄ade eti mbụk onyụn̄ an̄wamde mbon oro “ẹnyenede eti esịt ndinyene nsinsi uwem” ẹfiọk ke edinyan̄a Obio Ubọn̄ Abasi emekpere!—Utom 13:48.
Nte Afo Emeti?
• Didie ke Jesus okowụt nte Obio Ubọn̄ edide akpan n̄kpọ?
• Ntak emi inen̄ede iyomde edinyan̄a idahaemi ikan nte akanam iyomde?
• Nso iditịbe ke akwa ukụt?
• Didie ke Jehovah owụt ke imọ idi Akwa Andinyan̄a?
[Mme Mbụme Ukpepn̄kpọ]
[Mme Ndise emi ẹdude ke page 12, 13]
Ikọ Abasi ama ebem iso etịn̄ aban̄a anana-mbiet utom ukwọrọikọ ke eyo nnyịn
[Ndise ke page 15]
Jehovah ekeme ndinyan̄a nnyịn nte akanyan̄ade Noah ye ubon esie
[Ndise ke page 16]
Jehovah “ọyọkwọhọde kpukpru mmọn̄eyet . . . efep, n̄kpa idinyụn̄ idụhe aba.”—Edi. 21:4