Nte Ẹtịmde Otu Ukara

IREN oro ẹyakde idem ẹnọ, emi ẹdide mme asan̄autom Abasi oro ẹyetde aran, ẹnam Otu Ukara Mme Ntiense Jehovah. Mmọ ẹda ke ibuot otu ofụn emi anamde akpanikọ onyụn̄ enyenede ọniọn̄, emi enyenede utom edinọ udia eke spirit ye ndausụn̄ nnyụn̄ n̄kụt nte ke ẹnam utom edikwọrọ Obio Ubọn̄ ke ofụri ererimbot.—Matt. 24:14, 45-47.

Otu Ukara esinyene mbono mmọ kpukpru urua, ndien emi esidi ke Wednesday. Emi esinam nditọete emi ẹdiana kiet ẹnam utom. (Ps. 133:1) Mbon Otu Ukara ẹdu ke nsio nsio kọmiti n̄ko. Man ẹse ẹban̄a mme ufọn n̄kpọ Obio Ubọn̄, kọmiti kiet kiet enyene ikpehe oro mmọ ẹsede enyịn, nte ẹnemede mbio mbio mi.

◼ KỌMITI MME ANAM NDUTỊM: Mme anam ndutịm ke kọmiti Otu Ukara kiet kiet ẹnam kọmiti emi, ọkọrọ ye ewetn̄wed emi edide owo Otu Ukara n̄ko. Kọmiti emi okụt ete ke kpukpru kọmiti ẹnam utom mmọ ifụre ifụre ẹnyụn̄ ẹnam ntre uforo uforo. Enye n̄ko esise aban̄a ikpọ mbabuat n̄kpọntịbe, ukọbọ, afanikọn̄, ye mme usọp usọp n̄kpọ eken oro ẹbehede Mme Ntiense Jehovah ke ofụri ererimbot.

◼ KỌMITI MBONUTOM: Ẹnọ nditọete oro ẹdude ke kọmiti emi utom edise mban̄a ndutịm oro ẹnamde kaban̄a mfọnọn̄kpọ ye nsọn̄idem eke spirit mbonubon Bethel ke ofụri ererimbot. Kọmiti emi ese aban̄a edimek ye edikot mbufa mbonubon Bethel onyụn̄ ese aban̄a mme mfịna oro ẹban̄ade utom mmọ ke Bethel.

◼ KỌMITI USIO N̄WED: Kọmiti emi ese aban̄a edimịn̄, edisio, ye edinọ mme n̄wed Bible ẹwọrọ ke ofụri ererimbot. Enye ese aban̄a mme ufọk umịn̄n̄wed ye inyene mme n̄ka ido ukpono oro ibet enyịmede, emi Mme Ntiense Jehovah ẹdade ẹnam n̄kpọ. Kọmiti emi esinam ndutịm man ẹda okụk oro ẹtịpde ndida nnam utom Obio Ubọn̄ ke ofụri ererimbot, ẹnam n̄kpọ ke mfọnn̄kan usụn̄.

◼ KỌMITI UTOM: Mbon oro ẹdude ke kọmiti emi ẹse ẹban̄a utom ukwọrọikọ ye mme n̄kpọ oro ẹban̄ade mme esop, mme asiakusụn̄, mbiowo, ye mme esenyịn oro ẹsan̄ade-san̄a. Kọmiti emi ese aban̄a nte ẹtịmde Utom Obio Ubọn̄ Nnyịn, enye esikot nditọ Ufọkn̄wed Gilead ye Ufọkn̄wed Unọ Mme Asan̄autom Ukpep, onyụn̄ ọnọ mmọ efakutom ke ẹma ẹkekụre ukpep.

◼ KỌMITI UNỌ UKPEP: Kọmiti emi ese aban̄a ukpep oro ẹsinọde ke n̄kpri ye ikpọ mbono ye ke mme mbono esop. Enye esidiomi ndutịm n̄kpọ eke spirit ọnọ mbonubon Bethel, onyụn̄ ese aban̄a nsio nsio ufọkn̄wed, utọ nte Ufọkn̄wed Gilead ye Ufọkn̄wed Utom Usiakusụn̄, ọkọrọ ye editịm mme ọkpọ umụmikọ ye vidio.

◼ KỌMITI UWETN̄WED: Kọmiti emi ese aban̄a ediwet mme n̄wed nnyịn man ẹsio ẹnyụn̄ ẹnọ nditọete ye mbon an̄wa. Kọmiti emi esibọrọ mme mbụme emi ẹbụpde ẹban̄a Bible, ese aban̄a mme n̄wed edinam drama ye mme n̄wed utịn̄ikọ. Enye n̄ko ese aban̄a utom ukabade n̄wed oro ẹnamde ke ofụri ererimbot.

Apostle Paul ekemen esop mbon oro ẹyetde aran odomo ye ndido idem owo, ọsọn̄ọ etịn̄ ke kpukpru mmọ ẹnyene ufọn, onyụn̄ etịn̄ nte mmọ ẹwụtde ke idi idem kiet, ke imama, inyụn̄ idiana ye kiet eken man inam utom emi Abasi ọnọde mmimọ. (Rome 12:4, 5; 1 Cor. 12:12-31) Jesus Christ emi edide Ibuot, ọnọ mme andibuana ke idem emi se mmọ ẹyomde man ẹnen̄ede ẹdiana kiet, ẹnam eti ndutịm, ẹnyụn̄ ẹnọ nti udia eke spirit. (Eph. 4:15, 16; Col. 2:19) Ntem, Jehovah ada edisana spirit etịm Otu Ukara man ọnọ ndausụn̄.