Ka Iso Nyene “Ima Emi Afo Ekenyenede ke Akpa”
Ka Iso Nyene “Ima Emi Afo Ekenyenede ke Akpa”
“Ka iso sọn̄ọ mụm se afo enyenede kama.”—EDI. 3:11.
1, 2. Eketie fi didie ke idem ke ini ekedide edifiọk ke se ekpepde aban̄a Jehovah edi akpanikọ?
NDI emeti akpa ini oro okokopde aban̄a utịbe utịbe idotenyịn oro Jehovah ọnọde okopitem ubonowo? Edieke afo ekesikade ido ukpono en̄wen, eketie fi didie ke idem ke ini ẹkedade N̄wed Abasi ẹsian fi uduak Abasi m̀mê ke ini ẹkenamde ukpepn̄kpọ oro ọsọn̄de fi ndifiọk, an̄wan̄a fi? Eyedi afo ama edi edifiọk ke ẹma ẹbian̄a fi ke akani ido ukpono fo. Edi esịt adat fi didie ntem idahaemi ke emi ama ekedi edifiọk akpanikọ mi! Edieke ete ye eka fo ẹkebọkde fi ke akpanikọ, ndi emeti nte eketiede fi ke idem ke ini ọkọfiọkde ke se afo ekpepde aban̄a Jehovah edi akpanikọ, onyụn̄ ebierede ndidu uwem ekekem ye se ekpepde?—Rome 12:2.
2 Ediwak nditọete fo eke spirit ẹyesian fi ke esịt ama adat mmimọ etieti, ke ima isan̄a ikpere Jehovah, inyụn̄ ikop inemesịt ke emi enye okodụride mmimọ ada. (John 6:44) Emi ama anam mmọ ẹtiene ẹnam n̄kpọ Abasi. Mmọ ẹma ẹdat esịt tutu ọdọn̄ mmọ ndisian mbon en̄wen se inamde mmọ ẹkop idatesịt. Ndi ama etie fi ntre n̄ko?
3. Nso iketịbe ke esop ke Ephesus ke ini Jesus okotobode mmọ etop?
3 Jesus ama etịn̄ aban̄a “ima emi afo ekenyenede ke akpa” ke ini enye eketịn̄de ikọ ọnọ esop ke Ephesus akpa isua ikie. Mbon Ephesus ẹma ẹnyene ediwak nti edu, edi ima oro mmọ ẹkenyenede ẹnọ Jehovah ke akpa ama ebịt. Ntem, Jesus ama asian mmọ ete: “Mmọfiọk mme edinam fo, ye utom ye ime fo, ye nte ke afo ukemeke ndiyọ ndiọi owo, ye nte ke afo ama onyụn̄ odomo mmọ emi ẹdọhọde ẹte idi mme apostle ese, edi emi mîdịghe, ama onyụn̄ ayararede mmọ nte mme osu nsu. Afo n̄ko ke eme ime, omonyụn̄ ọyọ ke ntak enyịn̄ mi unyụn̄ ukpaha mba. Nte ededi, mmenyene emi ndida mbiom fi, nte ke ọmọkpọn̄ ima emi afo ekenyenede ke akpa.”—Edi. 2:2-4.
4. Ntak emi etop emi Jesus okotobode mbon Ephesus edide akpan n̄kpọ mfịn-e?
4 Item oro Jesus ọkọnọde mbon Ephesus ye mme esop eken ke n̄wed Ediyarade enen̄ede odot ke ini ikerede iban̄a mme idaha oro ẹkedude ini kiet ko ke otu mme Christian oro ẹyetde aran toto ke 1914 ka iso. (Edi. 1:10) Edi idem idahaemi, ndusụk Christian ẹsụk ẹkeme ndikpọn̄ ‘ima emi mmọ ẹkenyenede ke akpa’ ẹnọ Jehovah ye akpanikọ. Ye emi ke ekikere, ẹyak ise nte nditi nnyụn̄ ntie n̄kere kpukpru se Jehovah anamde ọnọ fi ẹkemede ndin̄wam fi aka iso enyene ima ye ifịk emi afo ekenyenede ke akpa ọnọ Abasi ye akpanikọ, onyụn̄ anam enye ọdọdiọn̄ okpon.
Nso Ikanam Fi Enịm ke Omokụt Akpanikọ?
5, 6. (a) Nso ke ana Christian kiet kiet odomo ọfiọk ke idemesie? (b) Nso ikanam fi enịm ke Mme Ntiense Jehovah ẹkpep akpanikọ? (c) Nso ikeme ndinam owo afiak edemede ima oro enye ekenyenede ke akpa?
5 Owo emi ayakde idem ọnọ Jehovah enyene ndibem kan̄a iso ‘ndomo mfiọk’ “uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:1, 2) Usụn̄ kiet oro ẹkemede ndinam emi edi ndikpep akpanikọ Bible. N̄kpọ emi anamde owo kiet enịm ke Mme Ntiense Jehovah ẹkpep akpanikọ ekeme ndikpụhọde ye se inamde owo en̄wen enịm. Ndusụk owo ẹti ke se ikanamde mmimọ ikabade esịt edi emi mmimọ ikokotde enyịn̄ Abasi ke Bible m̀mê ke ini mmimọ ikọfiọkde ata idaha mme akpan̄kpa. (Ps. 83:18; Eccl. 9:5, 10) Ima ke otu ikọt Jehovah ke mbon en̄wen ẹkema. (John 13:34, 35) Ndien mbon en̄wen ẹkenen̄ede ẹkere se nditre ndidi ubak ererimbot ọwọrọde. Mmọ ẹma ẹdifiọk ke inaha ata mme Christian ẹnyene ubọk ke mme mbubehe ukara m̀mê ke ekọn̄ idụt ekededi.—Isa. 2:4; John 6:15; 17:14-16.
6 Mme n̄kpọ emi ye mbon en̄wen ẹkenam ediwak owo ẹnyene akpa ima ẹnọ Abasi. Da ini tie kere se ikanamde fi enịm ke omokụt akpanikọ. Afo nte owo emenyene san̄asan̄a idaha ye edu, ntre anaedi se ikanamde fi ama Jehovah onyụn̄ enịm mme un̄wọn̄ọ esie ke akpanikọ ẹkpụhọde ye eke mbon en̄wen. Enen̄ede etie nte ke osụk amama se ikanamde ọbọ akpanikọ nte akamade ke akpa ini emi ọkọfiọkde akpanikọ. Akpanikọ ikpụhọkede. Ntem, ndidụn̄ọde mme n̄kpọ oro ye nte eketiede fi ke idem ẹkeme ndifiak ndemede akpa ima oro afo akamade akpanikọ.—Kot Psalm 119:151, 152; 143:5.
Nam Akpa Ima Okpon
7. Ntak emi oyomde inam akpa ima emi ikamade akpanikọ okpon-o, ndien didie ke ikeme ndinam ntre?
7 Ekeme ndidi ekese n̄kpọ ẹkpụhọde ke uwem fo tọn̄ọ nte afo akayak idem ọnọ Jehovah. Akpa ima oro afo akamade akpanikọ ekedi akpan n̄kpọ, edi nte ini akakade, ama oyom afo enyene ima emi etịmde okpon man ọyọ mbufa afanikọn̄ oro ẹdomode mbuọtidem fo. Nte ededi, Jehovah ama ọsọn̄ọ fi idem. (1 Cor. 10:13) Ntem, se afo okụtde ke ediwak isua emi ẹbede ẹdi n̄ko ọsọn̄urua n̄kpọ ẹnọ fi. Mmọ ẹn̄wam fi anam ima oro afo ekenyenede ke akpa okpon, ndien mmọ ẹdi usụn̄ en̄wen emi afo ekemede ndidomo mfiọk uduak Abasi eke edide eti onyụn̄ enemde enye esịt.—Josh. 23:14; Ps. 34:8.
8. Jehovah akayarade idemesie didie ọnọ Moses, ndien didie ke nditọ Israel ẹkenen̄ede ẹdifiọk Abasi?
8 Ke uwụtn̄kpọ, kere ban̄a idaha emi nditọ Israel ẹkedude ke ini Jehovah eketịn̄de uduak esie ndifak mmọ nsio ke ufụn Egypt. Abasi ama etịn̄ owo emi enye edide ọnọ Moses, ete: “Ami nyakabade ndi se ededi oro ndikabarede ndi.” (Ex. 3:7, 8, 13, 14, NW) Ke nditịm ntịn̄, Jehovah ọkọdọhọ ke imọ iyakabade idi n̄kpọ ekededi man ifak ikọt imọ. Ke mme n̄kpọntịbe oro ẹketienede ye nte mme idaha kiet kiet ẹketiede, nditọ Israel ẹma ẹkụt nte Jehovah okowụtde utọ owo emi imọ idide—Ata Ọkpọsọn̄, Ebiereikpe, Adausụn̄, Andinyan̄a, Owoekọn̄, ye Andinọ.—Ex. 12:12; 13:21; 14:24-31; 16:4; Neh. 9:9-15.
9, 10. Nso ikeme ndin̄wam owo edi edifiọk Abasi, ndien ntak emi ọfọnde nditi mme utọ n̄kpọ oro?
9 Idaha fo idịghe ukem ye eke nditọ Israel eset oro. Kpa ye oro, anaedi enyene mme n̄kpọ oro ẹketịbede ẹnọ fi emi ẹnamde fi enịm ke Abasi enyene udọn̄ ke idemfo san̄asan̄a, ndien emi ama ọsọn̄ọ mbuọtidem fo. Ekeme ndidi Jehovah ama owụt ke imọ idi Andinọ, Ọnọ-Ndọn̄esịt, m̀mê Andikpep. (Kot Isaiah 30:20b, 21.) Mîdịghe ekeme ndidi afo ama okụt in̄wan̄-in̄wan̄ ibọrọ akam fo. Ekeme ndidi afo ama osobo afanikọn̄, ndien eyenete an̄wam fi. Mîdịghe ekeme ndidi enyene itie N̄wed Abasi emi okokụtde ke ini ekekpepde n̄kpọ.
10 Edieke afo okpobụkde mme orụk n̄kpọ oro ọnọ mbon en̄wen, ekeme ndidi ndusụk owo ikpadaha mmọ ke akpan n̄kpọ. N̄kọm mmọ ikakam idịghe utịben̄kpọ. Edi mmọ ẹma ẹnen̄ede ẹnyene se ẹwọrọde ẹnọ fi. Ih, Jehovah ama akabade edi se enye ekenyenede ndikabarede ndi nnọ fi. Kere ban̄a ofụri isua oro odude ke akpanikọ. Ndi emekeme nditi se ikande idaha kiet oro okokụtde nte Jehovah esede aban̄a fi san̄asan̄a? Ke edide ntre, nditi mme n̄kpọ oro ye nte eketiede fi ke idem ẹkeme ndinam afiak enyene orụk ima oro ekenyenede ọnọ Jehovah ini oro. Da mme n̄kpọ oro ke ọsọn̄urua n̄kpọ. Tie kere ban̄a mmọ. Mmọ ẹdi uyarade ke Jehovah enyene udọn̄ ke idemfo san̄asan̄a, ndien idụhe owo oro ekemede ndinam fi etre ndinịm oro ke akpanikọ.
Dụn̄ọde Idemfo
11, 12. Nso ikeme ndinam ima oro Christian akamade akpanikọ ebịt, ndien nso item ke Jesus ọkọnọ?
11 Edieke mûnyeneke orụk ima oro ekenyenede ọnọ Abasi ye akpanikọ ke akpa, emi idịghe koro Abasi ke idem esiemmọ okpụhọde. Jehovah ikpụhọkede. (Mal. 3:6; Jas. 1:17) Enye osụk enyenyene udọn̄ ke idemfo nte ekenyenede ini oro. Ntre, edieke n̄kpọ okpụhọrede ke itie ebuana fo ye Jehovah, nso ke edi? Okûdi ekere ke n̄kpọ efịghe imọ akaha-o, onyụn̄ ekere akaha aban̄a editịmede esịt uwem-o? Ekeme ndidi afo ama esibọn̄ akam ke ofụri esịt, esikpep n̄kpọ ifịk ifịk, esitie ekere n̄kpọ ndien ndien. Ndi ama esinen̄ede esịn ifịk ke utom ukwọrọikọ onyụn̄ esidụk mbono esop kpukpru ini akan nte edide idahaemi?—2 Cor. 13:5.
12 Ekeme ndidi afo ke idemfo udukwe mme mfịna emi, edi edieke okụtde, nso ikada ukpụhọde emi idi? Ndi ata ata editịmede esịt nte edinọ se ubon fo oyomde, edise mban̄a nsọn̄idem fo, m̀mê n̄kpọ ntre, iyakke okụt aba ke usen Jehovah emenen̄ede ekpere? Jesus akasian mme apostle esie ete: “Ẹnọ ntịn̄enyịn ke idem mbufo mbak uyụhọ udia ye ọkpọsọn̄ un̄wọn̄ mmịn ye editịmede esịt uwem emi ẹdinam esịt mbufo ẹkabade ẹdobi, ndien usen oro edibuat mbufo nte ekpọ. Koro enye eyesịm kpukpru mbon oro ẹdụn̄de ke ofụri iso isọn̄. Ẹdu ke edidemede, ndien, kpukpru ini ẹnam n̄kpeubọk man mbufo ẹkpekeme ndibọhọ kpukpru n̄kpọ emi ẹditịbede.”—Luke 21:34-36.
13. James akada Ikọ Abasi odomo ye nso?
13 James emi ẹketienede ẹnọ odudu spirit ada ewet Bible ama eteme ekemmọ mme andinịm ke akpanikọ ete ẹda Ikọ Abasi ẹnen̄ede ẹdụn̄ọde idemmọ. Enye ekewet ete: “Ẹkabade ẹdi mme anam ikọ, ẹkûdi mme andikokop kpọt, ẹbian̄a idem ke nsunsu ekikere. Koro edieke owo ekededi edide andikokop ikọ, ndien mîdịghe andinanam, owo emi ebiet owo emi esede ndammana iso esie ke ukụtiso. Koro enye esede idemesie, ekem adaha ndien kpa idaha oro efre orụk owo eke enye edide. Edi owo eke owụkde enyịn ese mfọnmma ibet oro anamde owo ọwọrọ ufụn onyụn̄ ọsọn̄ọde eyịre ke enye, owo emi, sia enye mîdịghe andikokop eke efrede, edi edide andinanam, oyokop inemesịt ke ndinam enye.”—Jas. 1:22-25.
14, 15. (a) Didie ke Bible ekeme ndin̄wam fi ofori idaha eke spirit fo? (b) Mme mbụme ewe ke afo ekeme nditie n̄kere?
14 Owo ekeme ndida ukụtiso nse m̀mê imọ imeye. Ke uwụtn̄kpọ, edieke erenowo okụtde ke urụkitọn̄ imọ ana ukwan̄ ukwan̄, enye ekeme ndinen̄ede oro. Edieke n̄wan okụtde ke idet imọ asuahade, enye ekeme ndisari. N̄wed Abasi etie nte ukụtiso oro an̄wamde nnyịn idụn̄ọde ise nte nnyịn itiede. Ke ini idade idem nnyịn idomo ye se Bible ọdọhọde inam, do nnyịn ida enye nte ukụtiso. Edi nso idi ufọn edise ukụtiso edieke nnyịn mînen̄ekede ukwan̄ n̄kpọ oro ikụtde? Ọfọn inam n̄kpọ iban̄a se ikụtde ke “mfọnmma ibet” Abasi, ke ntem ikabarede idi ‘mme andinanam’ ikọ. Ntem, ọkpọfọn owo ekededi emi okụtde ke ima oro ikamade Jehovah ye akpanikọ ke akpa ebịt, ekere aban̄a mme mbụme emi: ‘Nso mfịghe ke ami nsobo ke uwem, ndien ami nnam n̄kpọ didie mban̄a mmọ? N̄kanam n̄kpọ didie mban̄a mmọ ke ini edem? Ndi enyene se ikpụhọrede?’ Edieke ndụn̄ọde emi ayararede mmeme ekededi oro afo enyenede, kûfụmi mmọ. Edieke oyomde anam ukpụhọde, nam ntre iwiwa.—Heb. 12:12, 13.
15 Utọ ndụn̄ọde emi ekeme n̄ko ndin̄wam fi enịm nti utịtmbuba oro ẹdin̄wamde fi anam n̄kọri ke n̄kan̄ eke spirit. Apostle Paul ama ọnọ Timothy nsan̄autom esie item eke odudu spirit man anam n̄kọri ke utom esie. Paul eketeme akparawa oro ete: “Tie kere mme n̄kpọ emi; sịn idem ke mmọ ofụri ofụri, man kpukpru owo ẹkpekụt n̄kọri fo.” Ọfọn nnyịn n̄ko ida Ikọ Abasi itie ikere n̄kọri oro ikemede ndinam.—1 Tim. 4:15.
16. Ewe idiọk ekikere ke ekpefep ke ini adade N̄wed Abasi odụn̄ọde idemfo?
16 Edinen̄ede ndụn̄ọde idem ke ofụri esịt ayayarade ndusụk mmeme fo. Oro ekeme ndinam idem emem fi, edi kûyak oro etịbe. Idem n̄kpọ, n̄kọ uduak edidụn̄ọde idem edi ndikụt ebiet emi oyomde ẹnam ukpụhọde. Edi akpanikọ ke Satan akpama ndinam Christian ekere ke imọ iwọrọke baba n̄kpọ kiet ke ntak unana mfọnmma imọ. Ke nditịm ntịn̄, owo ama akam ọdọhọ ke Abasi ibatke kpukpru ukeme oro isịnde ndinam n̄kpọ Esie ke baba n̄kpọ kiet. (Job 15:15, 16; 22:3) Nsu kiet emi Jesus ekenen̄erede afan̄a edi oro; Abasi ada kpukpru nnyịn ke ọsọn̄urua. (Kot Matthew 10:29-31.) Afo ndifiọk mme unana mfọnmma fo akpakam ananam fi osụhọde idem ebiere ndiyak Jehovah an̄wam fi anam n̄kọri. (2 Cor. 12:7-10) Edieke edide udọn̄ọ m̀mê usọn̄ mîyakke fi anam n̄kpọ Abasi nte akpanamde, do nịm mme utịtmbuba oro ekemede ndisịm, edi kûkpa mba kûnyụn̄ uyak ima fo ebịt.
Ekese Ntak Ndiwụt Esịtekọm
17, 18. Nso ufọn ke edinyene edieke anamde ima oro ekenyenede ke akpa okpon?
17 Eyenyene ekese ufọn edieke akade iso anam ima oro ekenyenede ke akpa okpon. Afo emekeme ndinen̄ede mfiọk Abasi nnyụn̄ nnen̄ede nnyene esịtekọm mban̄a ndausụn̄ esie oro asan̄ade ye ima. (Kot Mme N̄ke 2:1-9; 3:5, 6.) Andiwet psalm ọkọdọhọ ete: “Akamba udori oto ke edinịm [mme ewụhọ Jehovah].” “Item Jehovah edi akpanikọ, asian mme ọkọi.” Akan oro, “ọfọfọn ọnọ mmọ eke usụn̄ mmọ ọfọnde ama, eke ẹsan̄ade ke n̄wed ido Jehovah.”—Ps. 19:7, 11; 119:1.
18 Afo eyenen̄ede enyịme ke imọ imenyene ediwak nti n̄kpọ ndiwụt esịtekọm mban̄a. Ọmọfiọk ntak emi n̄kpọ ẹtiede ntem ke ererimbot. Afo emetiene ọbọ ufọn oto kpukpru n̄kpọ oro Abasi ọnọde ikọt esie mfịn. Eyịghe idụhe ke afo omowụt esịtekọm n̄ko aban̄a emi Jehovah okotde fi esịn ke esop ofụri ererimbot esie onyụn̄ ọnọde fi ifet ndidi kiet ke otu Mme Ntiense esie. Wụt esịtekọm ban̄a mme edidiọn̄ oro afo ọbọde! Ekeme ndidi mmọ ẹkpewak etieti edieke okpoyomde ndibat mmọ. Nte eyịghe mîdụhe, ndisibat mme edidiọn̄ fo kpukpru ini ayan̄wam fi anam item emi: “Ka iso sọn̄ọ mụm se afo enyenede kama.”—Edi. 3:11.
19. Ke ẹsiode editie n̄kere mban̄a itie ebuana fo ye Abasi ẹfep, nso idi akpan n̄kpọ oro ekemede ndinam fi ọsọn̄ idem ke n̄kan̄ eke spirit?
19 Nditie n̄kere nte mbuọtidem fo ọkọride ke ofụri isua emi ẹbede edi n̄kpọ kiet emi ekemede ndin̄wam fi ọsọn̄ọ omụm se afo enyenede akama. Magazine emi odụri ntịn̄enyịn nnyịn ediwak ini owụt mme akpan n̄kpọ oro ẹkemede ndinam nnyịn isọn̄ idem ke n̄kan̄ eke spirit. Ndusụk mmọ ẹdi akam, edidụk ye editiene mbuana ke mme mbono esop, ye edibuana ifịk ifịk ke an̄wan̄wa utom ukwọrọikọ. Mme n̄kpọ emi ẹkeme ndin̄wam fi aka iso enyene ima emi ekenyenede ke akpa, onyụn̄ anam enye ọdọdiọn̄ okpon.—Eph. 5:10; 1 Pet. 3:15; Jude 20, 21.
Didie ke Afo Ọkpọbọrọ?
• Didie ke mme n̄kpọ emi ẹkenamde fi edi edima Jehovah ẹkeme ndisịn udọn̄ nnọ fi idahaemi?
• Nditie n̄kere se afo okụtde ke ofụri isua emi ẹbede ẹkeme ndinam fi enịm nso ke akpanikọ?
• Ntak emi afo okpodụn̄ọrede ima emi afo amade Abasi-e?
[Mme Mbụme Ukpepn̄kpọ]
[Ndise ke page 23]
Nso ikanam fi enyene udọn̄ onyụn̄ ọbọ akpanikọ?
[Ndise ke page 25]
Ndi omokụt n̄kpọ oro oyomde anam ukpụhọde?