Mme Edu Oro Anade Ibịne
Mme Edu Oro Anade Ibịne
“Bịne edinen ido, uten̄e Abasi, mbuọtidem, ima, ime, [ye] nsụhọde esịt.”—1 TIM. 6:11.
1. Tịn̄ se ikọ oro “bịne” ọwọrọde.
NSO ke afo esikere ke ini okopde ikọ oro “bịne”? Ekeme ndidi emesiti se iketịbede ke eyo Moses, ke ini udịmekọn̄ Egypt ‘ẹkebịnede’ nditọ Israel, tutu ẹkpan̄a ke Ididuot Inyan̄. (Ex. 14:23) Mîdịghe, ekeme ndidi emesiti afanikọn̄ oro owo emi okowotde owo ke ndudue okosobode ke Israel eset. Enye ekenyene ndisọsọp mfehe n̄ka kiet ke otu obio ubọhọ itiokiet oro ẹkenịmde. Akana enye efehe mbak “osio-usiene iyịp edibịne owot-owo oro, koro esịt ofiopde enye, onyụn̄ esịm enye. . . ndien ọtọ enye owot.”—Deut. 19:6.
2. (a) Nso utịp ke Abasi ọdọhọ ndusụk Christian ẹbịne? (b) Nso idotenyịn ke Jehovah ọnọ ata ediwak Christian mfịn?
2 Ke ẹsiode mme uwụtn̄kpọ Bible oro ẹsiakde mi ẹfep, kere ban̄a idotenyịn oro apostle Paul ekenyenede mi: “Mbebịne utịtmbuba oro man mbọ utịp ikot eke heaven oro Abasi okokotde ebe ke Christ Jesus.” (Phil. 3:14) Bible owụt ke mme Christian 144,000 oro ẹyetde aran, esịnede Paul, ẹdibọ utịp uwem eke heaven. Mmọ ẹyetiene Jesus Christ ẹkara isọn̄ ke ini Ukara Tọsịn Isua esie. Nso utịbe utịbe utịtmbuba ke Abasi ọdọhọ mmọ ẹbịne ntem! Edi ata ediwak mme Christian mfịn ẹnyene isio isio idotenyịn, m̀mê utịtmbuba. Ima anam Jehovah ọnọ mmọ se Adam ye Eve ẹketabade, oro edi, idotenyịn nsinsi uwem ye mfọnmma nsọn̄idem ke Paradise isọn̄.—Edi. 7:4, 9; 21:1-4.
3. Didie ke ikeme ndiwụt esịtekọm mban̄a mfọnido Abasi oro owo mîdotke?
3 Ukeme oro mme anana-mfọnmma ubonowo ẹsịnde ndinam eti n̄kpọ kpọt ikemeke ndinam mmọ ẹnyene nsinsi uwem. (Isa. 64:6) Nnyịn idinyene nsinsi uwem n̄kukụre edieke ibuọtde idem ke ima ima ndutịm oro Abasi adade Jesus Christ anam man anyan̄a owo. Nso ke ikeme ndinam man owụt ke imowụt esịtekọm iban̄a mfọnido Abasi oro owo mîdotke mi? N̄kpọ kiet edi ndinam ewụhọ emi: “Bịne edinen ido, uten̄e Abasi, mbuọtidem, ima, ime, [ye] nsụhọde esịt.” (1 Tim. 6:11) Ndineme mban̄a mme edu emi ekeme ndinam nnyịn owo kiet kiet inen̄ede ibiere ndika iso mbịne mmọ “ata ọyọhọ ọyọhọ.”—1 Thess. 4:1.
“Bịne Edinen Ido”
4. Nso inam inịm ke ndibịne “edinen ido” edi akpan n̄kpọ, ndien nso idi akpa n̄kpọ oro anade owo anam?
4 Ke leta iba oro apostle Paul ekewetde ọnọ ẹsọk Timothy, enye ama asiak mme edu oro anade ẹbịne, ndien ke leta mbiba emi, enye ekebem iso asiak “edinen ido.” (1 Tim. 6:11; 2 Tim. 2:22) Akan oro, Bible esịn udọn̄ ọnọ nnyịn ediwak ini ke mme itien̄wed en̄wen ete ibịne m̀mê itiene edinen ido. (N̄ke 15:9; 21:21; Isa. 51:1) Usụn̄ kiet nditọn̄ọ ndinam emi edi “ndinyene ifiọk mban̄a . . . ata Abasi kierakiet, ye enye emi [enye] okosiode ọdọn̄, kpa Jesus Christ.” (John 17:3) Ndibịne edinen ido ayanam owo akabade esịt onyụn̄ ‘ọwọn̄ọde ọkpọn̄’ idiọkn̄kpọ oro enye ekesinamde man anam uduak Abasi.—Utom 3:19.
5. Nso ke ana inam man ika iso inen ke enyịn Abasi?
5 Ata ediwak owo oro ẹbịnede edinen ido ke ofụri esịt ẹmeyak uwem mmọ ẹnọ Jehovah ẹnyụn̄ ẹyarade uyakidem mmọ ke baptism mmọn̄. Edieke afo edide Christian oro ama akana baptism, ndi ọmọfiọk ke edu fo ekpenyene ndiwụt ke afo ke aka iso ebịne edinen ido, ye nte ke ekeme ndidi edu fo ke owụt emi? Usụn̄ kiet oro ekemede ndifiọk emi edi nte afo adade Bible ebiere se “inende ye se idiọkde” ke ini oyomde ndinam akpan ubiere. (Kot Mme Hebrew 5:14.) Ke uwụtn̄kpọ, edieke edide Christian oro ekemde ndidọ ndọ, edi mûdọhọ kan̄a, nte emenen̄ede ebiere nditre ndiyom ima nto owo oro mînaha baptism? Emi edidi ntre edieke ebịnede edinen ido.—1 Cor. 7:39.
6. Ndinen̄ede mbịne edinen ido abuana nso?
6 Ndidu edinen uwem idịghe ukem ye edida idem ke edinen m̀mê ‘edinịm idem ke eti owo n̄kaha.’ (Eccl. 7:16) Jesus ama eteme ete ikûnam utọ edinen ido oro ke iso owo mbak editie nte imọfọn ikan mbon en̄wen. (Matt. 6:1) Ndinen̄ede mbịne edinen ido abuana esịt—ndikpụhọde idiọk ekikere, edu, uduakesịt, ye udọn̄. Edieke ikade iso ndinam emi, eyedi nnyịn idinamke ikpọ idiọkn̄kpọ. (Kot Mme ; men N̄ke 4:23James 1:14, 15 domo.) Ndien, Jehovah ọyọdiọn̄ nnyịn onyụn̄ an̄wam nnyịn ika iso inyene mme akpan edu Christian eken.
“Bịne . . . Uten̄e Abasi”
7. Nso idi “uten̄e Abasi”?
7 N̄wed ukabadeikọ Bible kiet ọdọhọ ke ikọ Greek oro ẹkabarede “uten̄e Abasi” ọwọrọ “eti edu oro anamde ikpeme mbak n̄kpọ ekededi edinam itre ndibak Abasi.” Enye n̄ko abuana edinen̄ede nyak idem nnọ n̄kpọ nnyụn̄ nsọn̄ọ nda. Nditọ Israel ndikọsọn̄ ibuot ye Abasi idem ke Enye ama akafak mmọ osio ke ubọk mbon Egypt owụt ke mmọ ikesiten̄eke Abasi nte itịn̄de ke enyọn̄ emi.
8. (a) Nso mbụme ke idiọkn̄kpọ Adam ekedemede? (b) Didie ke ẹkebọrọ mbụme oro ekedide “edisana ndịben̄kpọ”?
8 Mbụme oro edemerede ke ediwak tọsịn isua ẹma ẹkebe tọn̄ọ nte mfọnmma owo oro, Adam, akanam idiọkn̄kpọ edi, “Nte owo ekededi ekeme nditen̄e Abasi ke mfọnmma usụn̄?” Idụhe owo ndomokiet oro ekekemede nditen̄e Abasi ke mfọnmma usụn̄ ke ofụri ediwak isua oro ẹkebede. Edi Jehovah ama ọbọrọ mbụme oro ekedide “edisana ndịben̄kpọ” mi ke edikem ini esie. Enye ama osio uwem ikpọn̄-ikpọn̄ edibon Eyen esie eke heaven edisịn ke idịbi Mary man enye edimana nte mfọnmma owo. Ke ofụri ini oro Jesus okodude ke isọn̄, tutu esịm ini oro enye akakpade esuene esuene n̄kpa, enye ama owụt nte ẹkpenen̄erede ẹyak idem ẹnọ ye nte ẹkpesọn̄ọde ẹda ẹnam n̄kpọ ata Abasi ọyọhọ ọyọhọ. Akam oro enye ekesibọn̄de ama owụt ke enye eten̄e edima Ete esie eke heaven. (Matt. 11:25; John 12:27, 28) Ntem, Jehovah ama ọnọ Paul odudu spirit nditịn̄ nte ikpekpebede edu “uten̄e Abasi” oro Jesus ekenyenede.—Kot 1 Timothy 3:16.
9. Didie ke ikeme nditen̄e Abasi?
9 Nnyịn ikemeke nditen̄e Abasi ke mfọnmma usụn̄ sia isụk idide mme anamidiọk. Edi imekeme ndinyene uten̄e Abasi. Emi oyom itiene uwụtn̄kpọ Christ ketket nte ikekeme. (1 Pet. 2:21) Emi idiyakke ibiet mbon mbubịk emi ‘ẹnyenede enyọn̄ enyọn̄ ido uten̄e Abasi edi idụhe uwem ekekem ye odudu esie.’ (2 Tim. 3:5) Emi iwọrọke ke uten̄e Abasi inyeneke n̄kpọ ndomokiet ndinam ye nte nnyịn itiede ke enyọn̄ idem. Enye abuana emi n̄ko. Ke uwụtn̄kpọ, edide iyom ndimek ọfọn̄ ndọ m̀mê enye oro idisịnede ikedep n̄kpọ, nte ikamade idem ekpenyene ndiwụt kpukpru ini ke ‘imokpono Abasi.’ (1 Tim. 2:9, 10) Ih, nditen̄e Abasi oyom idu uwem ekekem ye ndinen edumbet esie.
“Bịne . . . Mbuọtidem”
10. Nso ke ana inam man mbuọtidem nnyịn aka iso ọsọn̄?
10 Kot n̄wed Mbon Rome 10:17. Man Christian ọtọn̄ọ onyụn̄ aka iso enyene ọkpọsọn̄ mbuọtidem, ana enye aka iso etie ekere ọsọn̄urua akpanikọ oro odude ke N̄wed Abasi. “Ofụn emi anamde akpanikọ onyụn̄ enyenede ọniọn̄” ọmọnọ nnyịn ediwak nti n̄wed. N̄wọrọnda n̄wed ita oro inyenede ẹdi Akakan Owo Oro Akanam Odude Uwem, Kpep N̄kpọ to Akwa Andikpep, ye “Come Be My Follower,” emi ẹwetde man ẹn̄wam nnyịn inen̄ede ifiọk Christ inyụn̄ ikpebe enye. (Matt. 24:45-47) Otu ofụn emi n̄ko esidiomi mme mbono esop ye n̄kpri ye ikpọ mbono, emi ediwak ke otu mmọ ẹsinemede “ikọ aban̄ade Christ.” Nte ‘etịmde akpan̄ utọn̄’ ọnọ mme n̄kpọ emi Abasi ọnọde, nte ọmọfiọk mme usụn̄ oro ekemede ndida mmọ nsịn ke edinam?—Heb. 2:1.
11. Didie ke akam ye n̄kopitem ẹkeme ndinam inyene mbuọtidem?
11 N̄kpọ en̄wen oro ikemede ndida nsọn̄ọ mbuọtidem nnyịn edi akam. Mme anditiene Jesus ẹma ẹben̄e Jesus isan̄ kiet ẹte: “Nam mbuọtidem nnyịn etetịm okpon.” Imekeme ndisụhọde idem mben̄e Abasi anam kpasụk ntre ọnọ nnyịn. (Luke 17:5) Man mbuọtidem nnyịn etetịm okpon, ikpenyene ndiben̄e Abasi ada edisana spirit esie an̄wam nnyịn sia mbuọtidem edide ubak “mbun̄wụm spirit” oro. (Gal. 5:22) N̄ko, ndikop item Abasi esisọn̄ọ mbuọtidem nnyịn. Ke uwụtn̄kpọ, imekeme ndinam ekese ke utom ukwọrọikọ. Oro ayanam inen̄ede ikop inemesịt. Ndien iyenen̄ede inyene mbuọtidem ke itiede ikere mme edidiọn̄ oro ẹsan̄ade ye “ndibem iso nyom obio ubọn̄ ye edinen ido [Abasi].”—Matt. 6:33.
“Bịne . . . Ima”
12, 13. (a) Nso idi obufa ibet Jesus? (b) Mme akpan usụn̄ ewe ke ana ibịne ima nte Christ?
12 Kot 1 Timothy 5:1, 2. Paul ama eteme mme Christian nte ẹkpemade kiet eken. Ana uten̄e Abasi oro inyenede esịne edinam obufa ibet Jesus oro ọdọhọde “ima kiet eken” nte enye akamade nnyịn. (John 13:34) Apostle John ọkọdọhọ ete: “Owo ekededi eke enyenede n̄kpọ ndida ndu uwem ke ererimbot emi onyụn̄ okụtde eyenete esie odude ke unana ndien enye eberi usụn̄ mbọm esie abaha enye, ke usụn̄ ewe ke ima Abasi odu enye ke esịt?” (1 John 3:17) Ndi emekeme nditi mme idaha oro afo akamade owo ntre?
13 Usụn̄ en̄wen ndiwụt ke imenyene ima edi ndifen nnọ owo, isịnke nditọete nnyịn ke esịt. (Kot 1 John 4:20.) Ikam iyom ndinam item eke odudu spirit emi ọdọhọde ete: “Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye kiet eken. Kpa nte Jehovah ekefende mbufo ke ofụri esịt, ẹfen kpasụk ntre n̄ko.” (Col. 3:13) Ndi odu owo ke esop mbufo emi oyomde afo efen ọnọ ke ofụri esịt kpa nte Abasi efende ọnọ kpukpru nnyịn? Nte eyefen ọnọ enye?
“Bịne . . . Ime”
14. Nso ke ikeme ndikpep nto esop ke Philadelphia?
14 Ndisịn idem nnam se ikemede man isịm utịtmbuba ibio ini idịghe ukem ye ndisịm utịtmbuba oro ọsọn̄de m̀mê oro ebịghide akan nte ikodoride enyịn. An̄wan̄a ndien ntak emi edibịne utịtmbuba nsinsi uwem oyomde ime. Ọbọn̄ Jesus ọkọdọhọ esop ke Philadelphia ete: “Sia afo ama ọkọsọn̄ọ omụm ikọ eke aban̄ade ime mi akama, ami n̄ko nyekpeme fi nsio ke hour idomo.” (Edi. 3:10) Ke akpanikọ, Jesus ekekpep mme owo ke ọfọn ẹnyene ime, emi edide edu oro an̄wamde nnyịn isọn̄ọ ida ke ini idomo. Anaedi nditọete akpa isua ikie oro ẹkedude ke Philadelphia ẹma ẹnịm eti uwụtn̄kpọ ẹnọ nnyịn ndikpebe ke ini isobode ediwak idomo mbuọtidem. Ntem, Jesus ọkọn̄wọn̄ọ ke iyaka iso in̄wam mmọ ke ini mmọ ẹdisobode ata akamba idomo.—Luke 16:10.
15. Nso ke Jesus ekekpep aban̄a ime?
15 Jesus ama ọfiọk ke mme iman oro mînịmke ke akpanikọ ye ererimbot ẹyesua mbet imọ, ndien enye ama esịn udọn̄ ọnọ mmọ ikaba ke nsụhọde n̄kaha ete: “Ẹyenyan̄a owo eke ediyọde tutu esịm utịt.” (Matt. 10:22; 24:13) Jesus ama owụt n̄ko ke ẹkeme ndinọ mbet imọ ukeme man ẹyọ ke utọ ini oro. Ke uwụtn̄kpọ kiet, enye ama emen mme owo oro ‘ẹkebọde ikọ Abasi ke idatesịt’ ẹdi oro mîkọsọn̄ọke ida ke ini ẹsobode idomo mbuọtidem odomo ye isọn̄ itiat. Edi, emen mme anam-akpanikọ mbet esie odomo ye eti isọn̄ koro mmọ ‘ẹkemụmde ikọ Abasi ẹkama’ ẹnyụn̄ “ẹn̄wụm mfri ke ime.”—Luke 8:13, 15.
16. Ewe eti enọ an̄wam ata ediwak owo ẹme ime?
16 Ndi ama okụt se inamde owo eme ime ke n̄ke oro? Ana ‘imụm ikọ Abasi ikama,’ iyak enye osụhọde odụk nnyịn esịt ye ekikere. Ndinyene New World Translation of the Holy Scriptures—kpa nnennen edikabade Bible oro ememde ndikot—emi odude ke ediwak usem anam emem utom ndimụm ikọ Abasi n̄kama. Nnyịn nditie n̄kere itie kiet ke N̄wed Abasi kpukpru usen ayan̄wam nnyịn ika iso in̄wụm mfri “ke ime.”—Ps. 1:1, 2.
“Bịne . . . Nsụhọde Esịt” ye Emem
17. (a) Ntak emi “nsụhọde esịt” enen̄erede edi akpan n̄kpọ ntre? (b) Didie ke Jesus okowụt ke imọ ima isụhọde esịt?
17 Idụhe owo oro amade ẹdori enye ikọ ke se enye mînamke. Ke ini ẹsụkde nnyịn uyo, imesiwak ndiyat esịt mfan̄a ke nnyịn ikanamke n̄kpọ oro. Ọfọn didie ntem ‘ndisụhọde esịt’! (Kot Mme N̄ke 15:1.) Enen̄ede oyom ukeme man isụhọde esịt ke ini ẹsụkde nnyịn uyo. Jesus Christ ama enịm mfọnmma uwụtn̄kpọ ke afan̄ emi. “Ke ini ẹkesụn̄ide enye, enye ikosụn̄ike usiene. Ke ini enye okokụtde ukụt, enye ikesịnke owo ndịk ke idem, edi aka iso ayak idemesie ọnọ enye emi ekpede edinen ikpe.” (1 Pet. 2:23) Nnyịn idikemeke ndinen̄ede nsụhọde esịt nte Jesus okosụhọrede, edi nte imekeme ndikpekpep?
18. (a) Nso eti n̄kpọ ke nsụhọde esịt ekeme ndinam? (b) Ewe edu en̄wen ke ẹsịn udọn̄ ẹnọ nnyịn ẹte ibịne?
18 Ukem nte Jesus, nnyịn ikpakam idu “ke mben̄eidem kpukpru ini” ndinam mme owo ẹfiọk se inịmde ke akpanikọ, edi “[inam] ntre ke ifụre ifụre ido ye ntotụn̄ọ ukpono.” (1 Pet. 3:15) Ih, edieke isụhọrede esịt, ndinyene nsio nsio ekikere idinamke nnyịn ineni ọkpọsọn̄ eneni ye mme owo ke an̄wautom m̀mê ye nditọete nnyịn. (2 Tim. 2:24, 25) Nsụhọde esịt esinam inyene emem. Ekeme ndidi oro akanam Paul asiak “emem” esịn ke otu mme edu oro ẹkpebịnede ke udiana leta oro enye ekewetde ọnọ ẹsọk Timothy. (2 Tim. 2:22; men 1 Timothy 6:11 domo.) Ih, “emem” edi edu en̄wen oro N̄wed Abasi esịnde udọn̄ ọnọ nnyịn ete ibịne.—Ps. 34:14; Heb. 12:14.
19. Ke ima ikeneme nti edu mbitiaba emi, nso ke afo ebiere ndinam, ndien ntak-a?
19 Imeneme nti edu itiaba oro ẹsịnde udọn̄ ẹnọ nnyịn ẹte ibịne—edinen ido, uten̄e Abasi, mbuọtidem, ima, ime, nsụhọde esịt, ye emem. Nso edidiọn̄ ke emi edidi ntem ke kpukpru esop ke ini nditọete ẹnen̄erede ẹsịn ukeme ndinyene nti edu emi! Emi ọyọnọ Jehovah ukpono onyụn̄ anam nnyịn idi se enye ekpepde n̄kpọ man ikeme ndinọ enye itoro.
Mme N̄kpọ Ndikere Mban̄a
• Ndinyene edinen ido ye uten̄e Abasi abuana nso?
• Nso idin̄wam nnyịn inyene mbuọtidem ye ime?
• Ima akpanam inam n̄kpọ didie ye kiet eken?
• Ntak emi ikposụhọrede esịt inyụn̄ iyom emem-e?
[Mme Mbụme Ukpepn̄kpọ]
[Ndise ke page 12]
Jesus ama eteme ete ikûnam edinen ido ke iso owo man inem mmọ esịt
[Ndise ke page 13]
Imekeme ndinyene mbuọtidem ebe ke nditie n̄kere akpanikọ oro ẹdude ke Ikọ Abasi
[Ndise ke page 15]
Imekeme ndinyene ima inyụn̄ isụhọde esịt