Ndi Jesus Eketịn̄ Aban̄a Ikan̄ Hell?
Ndi Jesus Eketịn̄ Aban̄a Ikan̄ Hell?
NDUSỤK mbon oro ẹnịmde ukpepn̄kpọ ikan̄ hell ke akpanikọ ẹsitịn̄ ẹban̄a ikọ Jesus oro odude ke Mark 9:48 (m̀mê ufan̄ikọ 44, 46). Jesus ama etịn̄ aban̄a ndọn̄ oro mîkpaha ye ikan̄ oro owo mînịmeke. Edieke owo okpobụpde fi se ikọ emi ọwọrọde, ọkpọbọrọ didie?
Edieke ufan̄ikọ 44, 46, m̀mê 48 ẹdude ke Bible owo oro, enye ekeme ndikot sia ufan̄ikọ emi ẹtịn̄ ukem n̄kpọ ke ndusụk Bible. * N̄wed Abasi Christian Usem Greek—Edikabade eke Obufa Ererimbot okot ete: “Edieke enyịn fo anamde fi atuak ukot ọduọ, top enye duọk; etịm ọfọn fi ndida enyịn kiet mbe ndụk obio ubọn̄ Abasi akan ndinyene enyịn iba ndien ẹtop fi ẹduọk ke Gehenna, ke ebiet eke ndọn̄ mmọ mîkpaha, owo mînyụn̄ inịmeke ikan̄.”—Mark 9:47, 48.
Ke nditịm ntịn̄, ndusụk owo ẹdọhọ ke se Jesus eketịn̄de ọwọrọ ke ukpọn̄ ndiọi owo ẹsibọ nsinsi ndutụhọ ke mmọ ẹma ẹkekpa. Ke uwụtn̄kpọ, Bible usem Spanish emi ẹkotde Sagrada Biblia eke University of Navarre ọdọhọ ete: “Ọbọn̄ nnyịn eketịn̄ [ikọ emi] ndiwụt ndutụhọ oro odude ke hell. Ẹsiwak ndidọhọ ke ‘ndọn̄ oro mîkemeke ndikpa’ ada aban̄a nsinsi mfụhọ emi mbon oro ẹkade hell ẹkopde; ndien ‘ikan̄ emi owo mînịmeke,’ ada aban̄a ubiak emi mmọ ẹkopde.”
Edi men ikọ Jesus emi domo ye akpatre ufan̄ikọ ke ntịn̄nnịm ikọ Isaiah. * Ndi inaha in̄wan̄-in̄wan̄ ke Jesus eketịn̄ aban̄a se idude ke Isaiah ibuot 66? An̄wan̄a ke prọfet emi eketịn̄ aban̄a ediwọrọ ke “Jerusalem n̄ka mbọhọ Itịghede Hinnom (Gehenna), emi ẹkesiwade mme owo ini kiet ko (Jer 7:31) emi okonyụn̄ akabarede edi ifụm mbio obio oro nte ini akakade.” (The Jerome Biblical Commentary) Ke nditịm ntịn̄, se Isaiah 66:24 etịn̄de aban̄a inyeneke n̄kpọ ndomokiet ndinam ye editụhọde mme owo; enye etịn̄ aban̄a mme okpo. Ndọn̄ ke ẹdọhọ nte mîkpaha idịghe mme odu-uwem owo m̀mê ukpọn̄ oro mîkemeke ndikpa. Do, nso ke ikọ Jesus ọkọwọrọ?
Kop se n̄wed Catholic oro ẹkotde El evangelio de Marcos. Análisis lingüístico y comentario exegético, Eboho II, etịn̄de aban̄a Mark 9:48: “Ẹda ikọ emi ẹto Isaiah (66,24). Prọfet oro owụt usụn̄ iba oro ẹkesiduọn̄ọde okpo: edinịm enye adiahade ye edifọfọp . . . Nditịn̄ mban̄a ndọn̄ ye ikan̄ ọtọkiet enen̄ede ọsọn̄ọ ekikere aban̄ade nsobo. . . . Ẹdọhọ ke n̄kpọ mbiba emi ẹkemede ndisobo n̄kpọ mi ẹdu ke nsinsi (‘owo inịmeke, mmọ inyụn̄ ikpaha’): owo ikemeke ndibọhọ mmọ. Nte ẹtịn̄de mi, ikan̄ ye ndọn̄ oro kpọt ke owo mîsoboke—idịghe owo—ikan̄ ye ndọn̄ ẹsobo n̄kpọ ekededi oro mmọ ẹsịmde taktak. Ntre, se ẹtịn̄de mi iban̄ake nsinsi ndutụhọ, edi aban̄a nsinsi nsobo, emi ediset ke n̄kpa mîdụhe, oro edi, nsinsi n̄kpa. Do, ọwọrọ ke [ikan̄] ada aban̄a nsinsi nsobo.”
Owo ekededi oro ọfiọkde ke ata Abasi ama ima onyụn̄ ama edinen ikpe ekpenyene ndikụt ke owụt ifiọk ndiyak se Jesus eketịn̄de an̄wan̄a imọ ntre. Enye ikọdọhọke ke ẹyetụhọde mme anamidiọk ke nsinsi. Utu ke oro, ikọ esie ọkọwọrọ ke ẹyesobo mmọ taktak, mmọ idinyụn̄ isetke.
[Mme Ikọ Idakisọn̄]
^ ikp. 3 Ufan̄ikọ 44 ye 46 isịneke ke n̄kani uwetn̄kpọ Bible oro ẹtịmde ẹberi edem. Nditọ ukpepn̄kpọ Bible ẹdọhọ ke etie nte ẹkedidian ufan̄ikọ mbiba emi nte ini akakade. Prọfesọ Archibald T. Robertson ewet ete: “Ufan̄ikọ iba emi isịneke ke ata n̄kani ye mfọnn̄kan uwetn̄kpọ. Mmọ ẹkesịne ke otu uwetn̄kpọ Edem Usoputịn ye eke Syria (Byzantine). Mmọ ẹfiak ẹtịn̄ se idude ke ufan̄ikọ 48. Oro anam nnyịn [isịnke] ufan̄ikọ 44 ye 46 sia mmọ mînenke.”
^ ikp. 5 “Mmọ ẹyewọn̄ọ, ẹkese okpo mmọ emi ẹkesọn̄de ibuot ye ami: koro ndọn̄ mmọ mîdikpaha, ikan̄ mmọ mîdinyụn̄ inịmeke; ndien mmọ ẹyedoro kpukpru obụkidem ndidien.”—Isa. 66:24.