Nte Emeben̄e Idem Ndiwụt Se Afo Enịmde ke Akpanikọ?

NDI akanam afo omodu ke idaha emi akanamde enen̄ede ekere ke oyom imọ iwụt se imọ inịmde ke akpanikọ? Kere ban̄a se ikọwọrọde Susana, eyenete an̄wan emi edide isua 16 ke Paraguay. Ke ukpepn̄kpọ ido uwem ke ufọkn̄wed sekọndri mmọ, ẹma ẹdọhọ ke Mme Ntiense Jehovah inịmke “Akani Testament,” Jesus Christ, m̀mê Mary ke akpanikọ. Ẹma ẹdọhọ n̄ko ke Mme Ntiense Jehovah ẹdi mbon emi ẹsinyịmede n̄kpa utu ke ndibọ usọbọ. Afo akpakanam nso?

Susana ama ọbọn̄ akam ọnọ Jehovah onyụn̄ emenede ubọk. Ukpepn̄kpọ oro ama ekpere ndikụre, ntre enye ama eben̄e andikpep ọnọ imọ usen man itịn̄ n̄kpọ iban̄a se imọ inịmde ke akpanikọ sia idide kiet ke otu Mme Ntiense Jehovah. Andikpep ikabiatke ini ndinyịme. Ke ufan̄ urua iba, Susana ama ada ediye uduot ekpri n̄wed oro Mme Ntiense Jehovah—Mmanie ke Mmọ Ẹdi? Nso ke Mmọ Ẹnịm ke Akpanikọ? etịm idem ọnọ nneme oro.

Usen oro ama edikem. Susana ama etịn̄ ntak emi nnyịn ikerede Mme Ntiense Jehovah. Enye ama etịn̄ n̄ko aban̄a idotenyịn nnyịn kaban̄a ini iso ye ntak emi nnyịn mîsikịmke iyịp isịn ke idem. Ekem enye ama ọdọhọ otu nditọ ufọkn̄wed oro ẹbụp imọ mbụme. Ata ediwak nditọ ufọkn̄wed ẹma ẹmenede ubọk. Ama enen̄ede enem andikpep ndikop nte ekpri n̄kaiferi emi adade N̄wed Abasi ọbọrọ mme mbụme oro.

Eyen ufọkn̄wed kiet ama ọdọhọ ete: “Mma n̄ka Ufọkmbono Obio Ubọn̄ isan̄ kiet, edi baba edisọi mbiet kiet ikodụhe.” Andikpep ama oyom ndifiọk ntak. Susana ama okot Psalm 115:4-8 ye Exodus 20:4. Andikpep ama ọdọhọ ke n̄kpaidem ete: “Ntak emi ndisọi mbiet ẹyọhọde ufọkabasi nnyịn ke ini Bible akpande emi?”

Nneme mbụme ye ibọrọ emi ama ebịghi minit 40. Ke ini Susana okobụpde otu nditọ ufọkn̄wed oro m̀mê mmọ ẹkpema ndise vidio oro No Blood—Medicine Meets the Challenge, kpukpru mmọ ẹma ẹdọhọ ih. Ntre andikpep ama anam ndutịm man ẹfiak ẹsobo ke ndan̄nsiere. Ke ẹma ẹkese vidio oro, Susana ama eneme aban̄a ibọkusọbọ oro owo mîsịnke iyịp, emi ndusụk Mme Ntiense Jehovah ẹsibọde. Andikpep oro eketịn̄ ntem aban̄a oro: “N̄kọfiọkke ke ediwak ukpụhọ ibọkusọbọ ntre ẹdu, n̄konyụn̄ mfiọkke mme ufọn ibọkusọbọ oro owo mîsịnke iyịp. Edi ndi Mme Ntiense Jehovah kpọt ke ẹsinọ usọbọ emi?” Ke ini ẹkedọhọde enye ke idịghe mmọ kpọt, enye ama ọdọhọ ete, “Mme Ntiense Jehovah ẹma ẹwaha ufọk mi, nyenyene nneme ye mmọ.”

Nneme a-minit 20 oro Susana eketịmde ekebịghi hour ita. Ke urua kiet ama ekebe, nditọ ufọkn̄wed  en̄wen ẹma ẹtịn̄ se mmọ ẹnịmde ke akpanikọ nte mme aka ufọkabasi. Ke mmọ ẹma ẹkekụre nneme mmọ, ẹma ẹbụp ediwak mbụme, edi mme etịn̄ikọ ikekemeke ndisọn̄ọ se mmọ ẹnịmde ke akpanikọ. Andikpep ama obụp mmọ ete: “Ntak emi mbufo mîkemeke ndisọn̄ọ se mbufo ẹnịmde ke akpanikọ nte eyen ufọkn̄wed mbufo emi edide kiet ke otu Mme Ntiense Jehovah?”

Mmọ ẹma ẹbọrọ ẹte: “Mmọ ẹsinen̄ede ẹkpep Bible. Nnyịn isikpepke.”

Andikpep ama ọdọhọ Susana ete: “Mbufo ẹmenen̄ede ẹkpep Bible ẹnyụn̄ ẹsịn ukeme ndinam se enye etịn̄de. Mbufo ẹmenam etieti.”

Susana okpokodop uyo etie. Edi ke ini enye eketịn̄de ikọ, enye ekekpebe eti uwụtn̄kpọ ekpri eyenan̄wan Israel emi owo mîsiakke enyịn̄, oro mbon Syria ẹkedade ẹka ntan̄mfep. Eyen oro ekedi edidu ke ufọk Naaman, etubom ekọn̄ Syria, emi ekenyenede odoro-owo-ndidien udọn̄ọ ikpọkidem. Eyenan̄wan Israel oro ikodopke uyo, edi ama ọdọhọ ekaufọk esie ete: “Ete mi akpakam odu ke iso prophet emi odude ke Samaria! enye akpanam ndien akpa-mfia okụre enye.” Eyenan̄wan emi ikekemeke ndidop uyo, edi ama ọnọ ikọ ntiense aban̄a ata Abasi. Emi ama anam Naaman eteufọk esie akabade edi andituak nnọ Jehovah.—2 Ndi. 5:3, 17.

Kpasụk ntre, Susana ikekemeke ndidop uyo, edi ama ọnọ ikọ ntiense aban̄a Jehovah ye ikọt esie. Ke ini Susana eketịn̄de ikọ ndiwụt se enye enịmde ke akpanikọ, enye akanam ewụhọ N̄wed Abasi emi: “Ẹnam Christ asana ke esịt mbufo nte Ọbọn̄, ẹdu ke mben̄eidem kpukpru ini ndiwụt owo ekededi eke oyomde ntak idotenyịn emi mbufo ẹnyenede, edi ẹnam ntre ke ifụre ifụre ido ye ntotụn̄ọ ukpono.” (1 Pet. 3:15) Nte afo emeben̄e idem ndiwụt se afo enịmde ke akpanikọ onyụn̄ anam ntre ke ini ifet ebererede?

[Ndise ke page 17]

Ediye uduot ekpri n̄wed ye vidio emi ẹkeme ndin̄wam fi owụt se afo enịmde ke akpanikọ