Ndikan Mme Mfịna Edikwọrọ Ikọ Ke Ufọk ke Ufọk
Ndikan Mme Mfịna Edikwọrọ Ikọ Ke Ufọk ke Ufọk
“[Nnyịn ikada] uko ke Abasi nnyịn itịn̄ eti mbụk Abasi inọ mbufo ye ọkpọsọn̄ en̄wan.”—1 THESS. 2:2.
1. Nso mfịna ke Jeremiah okosobo, ndien nso ikan̄wam enye akan mfịna oro?
JEREMIAH ekedi owo emi enyenede ntụk nte nnyịn. Ke ini Jehovah akasiande enye ke imemek enye edi “prophet [ọnọ] mme idụt,” Jeremiah ama ofiori ete: “Aha, Ọbọn̄ Jehovah! sese, mfiọkke nditịn̄ ikọ: koro ami ndide eyenọwọn̄.” Edi sia enye ọkọbuọtde idem ke Jehovah, enye ama ọbọ utom oro. (Jer. 1:4-10) Jeremiah ama ọyọ unana udọn̄, nsahi, usua, ye idem afai ke se ibede isua 40. (Jer. 20:1, 2) Ndusụk ini, ama esidọn̄ enye nditre ndinam utom oro. Edi enye ama aka iso atan̄a etop emi mme owo mîkamaha ọnọ idụt oro ata ediwak owo mîkamaha ndikop etop esie. Odudu Abasi ama anam Jeremiah anam utom oro enye mîkpekemeke ndinam ke idemesie tutu amama.—Kot Jeremiah 20:7-9.
2, 3. Didie ke mme asan̄autom Abasi mfịn ẹsobo mme mfịna oro ẹbietde eke Jeremiah?
2 Etie ediwak mme asan̄autom Abasi ke idem mfịn nte eketiede Jeremiah. Ke ini ikekerede nte idikwọrọde ikọ ke ufọk ke ufọk, ndusụk nnyịn ima ikere ini kiet ko ite, ‘N̄kpọ emi mmendinamke tutu amama edi oro.’ Edi ke ini ikedide idifiọk ke edi uduak Jehovah nnyịn nditan̄a eti mbụk, ima ikan editịmede esịt oro ikokopde inyụn̄ ika iso ikwọrọ ikọ. Kpa ye oro, ke nsụhọde n̄kaha, ke ndusụk ini, ediwak nnyịn ima isobo mme n̄kpọ oro ẹkenamde ọsọn̄ nnyịn ndika iso n̄kwọrọ ikọ. Edi akpanikọ ke imemke utom nditọn̄ọ ndikwọrọ ikọ ke ufọk ke ufọk nnyụn̄ n̄ka iso n̄kwọrọ tutu esịm utịt.—Matt. 24:13.
3 Nso ke akpanam edieke edide afo emekpep Bible ye Mme Ntiense Jehovah esinyụn̄ odụk mme mbono esop ebịghi esisịt idahaemi edi emen̄e nditọn̄ọ ndikwọrọ ikọ ke ufọk ke ufọk? Mîdịghe nso ke akpanam edieke edide Ntiense emi ama akana baptism edi esisọn̄ fi ndibuana ke utom eke enyịnusụn̄ ke enyịnusụn̄, idem okposụkedi emi afo enyenede ukeme ndinam ntre? Nen̄ede fiọk ete ke mme owo emi ẹdude ke kpukpru idaha ke ẹkan mme mfịna utom ukwọrọikọ eke ufọk ke ufọk. Jehovah ekeme ndin̄wam fi akan n̄ko.
Ndinyene Uko
4. Nso ikan̄wam apostle Paul ekeme nditịn̄ eti mbụk ye uko?
4 Afo emenen̄ede ọfiọk ke utom edikwọrọ ikọ ke ofụri ererimbot itoho ke odudu m̀mê ọniọn̄ owo, edi ke oto spirit Abasi. (Zech. 4:6) Kpa ntre ke edi ye utom ukwọrọikọ emi Christian kiet kiet anamde. (2 Cor. 4:7) Da apostle Paul ke uwụtn̄kpọ. Ke ini enye eketide nte ẹkenamde n̄kpọ ye enye ye nsan̄a isụn̄utom esie idiọk idiọk, enye ekewet ete: “Adan̄a nte nnyịn, ke ima ikebem iso ikụt ukụt inyụn̄ ibọ emiom . . . ke Philippi, [ida] uko ke Abasi nnyịn itịn̄ eti mbụk Abasi inọ mbufo ye ọkpọsọn̄ en̄wan.” (1 Thess. 2:2; Utom 16:22-24) Nnyịn ikpedehedei ikere ke ama esidu ini oro utọ ifịk ifịk ọkwọrọikọ nte Paul akan̄wanade-n̄wana ọkpọsọn̄ ndikwọrọ ikọ. Edi, ukem nte kpukpru nnyịn, Paul ekenyene ndibuọt idem ke Jehovah man etịn̄ eti mbụk ye uko. (Kot Ephesus 6:18-20.) Didie ke ikeme ndikpebe uwụtn̄kpọ Paul?
5. Nso idi n̄kpọ kiet emi ekemede ndinam inyene uko ndikwọrọ ikọ?
5 N̄kpọ kiet emi ekemede ndinam inyene uko ndikwọrọ ikọ edi akam. Asiakusụn̄ kiet ọkọdọhọ ete: “Mmesibọn̄ akam man n̄keme nditịn̄ ikọ ye uko, mbọn̄ man n̄keme ndisịm esịt mme owo, nnyụn̄ mbọn̄ man n̄keme ndikop idatesịt ke utom ukwọrọikọ. Idem utom, n̄kọ Jehovah enyene, idịghe nnyịn, ke ntre, nnyịn ikemeke ndinam baba n̄kpọ kiet ke ẹsiode un̄wam esie ẹfep.” (1 Thess. 5:17) Oyom kpukpru nnyịn isibọn̄ akam kpukpru ini iyom un̄wam edisana spirit Abasi man ikwọrọ ikọ ye uko.—Luke 11:9-13.
6, 7. (a) Nso ke Ezekiel okokụt ke n̄kukụt, ndien nso ke enye ọkọwọrọ? (b) Nso ke n̄kukụt Ezekiel ekpep mme asan̄autom Abasi mfịn?
6 N̄wed Ezekiel etịn̄ n̄kpọ en̄wen oro ekemede ndin̄wam nnyịn itịn̄ ikọ ye uko. Ke n̄kukụt, Jehovah ama ọnọ Ezekiel ikpan̄wed emi ẹwetde “eyet, ye ntuan̄a, ye eseme” ke edem mbiba onyụn̄ ọdọhọ enye adia ikpan̄wed oro, ete: “Eyen owo, nam idịbi fo adia ikpa-n̄wed emi ami nnọde fi, nyụn̄ sịn enye ke nsia fo yọhọ.” Nso ke n̄kukụt emi ọkọwọrọ? Etop emi Ezekiel ekenyenede nditan̄a ekenyene ndisụhọde ndụk enye esịt. Eketie nte n̄kpọ eke etop emi ekenyenede ndikabade ndi ubak idem esie, onyụn̄ enen̄ede akara uwem esie. Prọfet oro aka iso obụk ete: “Ndien ami ndia, ndien n̄wed akabade enịn̄e mi ke inua nte aran-ọkwọk.” Ezekiel nditan̄a etop Abasi ke eferife ekedi edinem n̄kpọ—ukem nte nditabi aranọkwọk. Enye akada nte ata akwa ukpono ndida ke ibuot Jehovah nnyụn̄ nnam utom oro Abasi ọkọnọde, idem okposụkedi oro ọkọwọrọde nditan̄a ọkpọsọn̄ etop nnọ mme owo oro mîkamaha ndikop.—Kot Ezekiel 2:8-10; 3:1-4, 7-9.
7 N̄kukụt emi ekpep mme asan̄autom Abasi mfịn akpan n̄kpọ. Nnyịn n̄ko imenyene ọkpọsọn̄ etop nditan̄a nnọ mme owo emi mîsiwakke ndida ukeme oro isịnde nte akpan n̄kpọ. Man ika iso ida utom ukwọrọikọ Christian nte ifetutom oro Abasi ọnọde, ana inen̄ede idia udia eke spirit. Edikpep n̄kpọ didie didie m̀mê ntomo ntomo idiyakke Ikọ Abasi enen̄ede osụhọde odụk nnyịn esịt. Ndi emekeme ndisinen̄ede n̄kot nnyụn̄ n̄kpep Bible m̀mê ndinam ntre kpukpru ini? Ndi emekeme ndisitie n̄kere se afo okotde kpukpru ini?—Ps. 1:2, 3.
Nditọn̄ọ Nneme Bible
8. Nso isin̄wam ndusụk mme asuanetop Obio Ubọn̄ ẹtọn̄ọ nneme a-Bible ke utom ukwọrọikọ eke ufọk ke ufọk?
8 N̄kpọ oro ọsọn̄de ediwak mme asuanetop akan ke utom ukwọrọikọ eke ufọk ke ufọk edi akpa ikọ oro ẹtịn̄de ye enyeneufọk. Edi akpanikọ ke idịghe ifia ubọk kiet nditọn̄ọ nneme ke ndusụk efakutom. Esinem ndusụk mme asuanetop ke ini ẹnyenede nneme ye owo ke enyịnusụn̄ edieke ẹtọn̄ọde nneme ke nditịn̄ ikọ ifan̄ emi ẹma ẹketịn̄ enyịn ẹmek, ndien ekem ẹnọ enyeneufọk tract, nte ẹwụtde ke ekebe. Ibuotikọ tract oro m̀mê ediye ndise esie ekeme ndidemede enyeneufọk udọn̄, onyụn̄ ọnọ nnyịn ifet nditịn̄ uduak oro ikawahade ibio ibio nnyụn̄ mbụp mbụme. Usụn̄ en̄wen edi ndiwụt enyeneufọk tract ita m̀mê inan̄ inyụn̄ idọhọ enye emek enye emi enye amade akan. Nte ededi, uduak nnyịn idịghe ikpîkpu edinịm tract m̀mê edida mmọ nnyene nneme ke kpukpru enyịnusụn̄, edi edi nditọn̄ọ nneme oro adade ekesịm ukpepn̄kpọ Bible.
9. Ntak emi eti ntịmidem edide akpan n̄kpọ?
9 Usụn̄ ekededi emi afo adade, eti ntịmidem ayanam fi enyene uko onyụn̄ okop nduaidem ke utom ukwọrọikọ eke ufọk ke ufọk. Asiakusụn̄ kiet ọkọdọhọ ete: “Mmesinen̄ede n̄kop idatesịt ke ini nnen̄erede ntịm idem. Emi esinam ọdọn̄ mi nditịn̄ se n̄ketịmde nnọ mme owo.” Asiakusụn̄ en̄wen ọkọdọhọ ete: “Ke ini nnen̄erede mmehe ye mme n̄wed oro ndinọde, mmesikop nduaidem ndinọ mmọ.” Ke adan̄aemi ọfọnde ndidodop uyo ndụn̄ọde se editịn̄de, ediwak owo ẹkụt ke enen̄ede ọfọn ndidomo nneme nnyịn nse uyo ọwọrọ. Ndinam ntre an̄wam mmọ ẹnọ Jehovah se ifọnde ikan.—Col. 3:23; 2 Tim. 2:15.
10. Nso ke ẹkeme ndinam man ẹneme se idotde onyụn̄ enyenede ufọn ke mbono an̄wautom?
10 Nti mbono an̄wautom ẹn̄wam nnyịn inyene uforo ye idatesịt ke utom ukwọrọikọ eke ufọk ke ufọk. Edieke itie N̄wed Abasi eke usen ke usen aban̄ade utom ukwọrọikọ, ẹkeme ndikot nnyụn̄ nneme enye ibio ibio. Nte ededi, eyenete emi enịmde mbono an̄wautom ekpenyene ndida ini oro ekemde nneme nnyụn̄ nnam ibio ibio nneme oro enen̄erede odot ye efakutom n̄wụt, mîdịghe eneme akpan n̄kpọ oro ẹkemede ndida nnam n̄kpọ ke utom ukwọrọikọ usen oro. Emi ayan̄wam mbon oro ẹdụkde ndinọ eti ikọ ntiense. Edieke mbiowo ye mbon eken oro ẹsinịmde mbono an̄wautom ẹnen̄erede ẹtịm idem mbemiso ẹdide, mmọ ẹkeme ndinam se ẹtịn̄de emi ẹnyụn̄ ẹkụre mbono emi ke ini oro ẹnọde.—Rome 12:8.
Se N̄kpan̄utọn̄ Ekemede Ndin̄wam Nnyịn Inam
11, 12. Didie ke ndida esịtmbọm n̄kpan̄ utọn̄ ekeme ndin̄wam nnyịn isịm esịt mme owo ke utom ukwọrọikọ? Nọ mme uwụtn̄kpọ.
11 Ke adianade ye eti ntịmidem, n̄kpọ en̄wen oro esin̄wamde nnyịn itọn̄ọ nneme Bible ke an̄wautom inyụn̄ isịm esịt mme owo edi ndinen̄ede nnyene udọn̄ ke idem mmọ. Usụn̄ kiet emi iwụtde ke imenyene utọ udọn̄ oro edi nte ikpan̄de utọn̄. Esenyịn kiet oro asan̄ade-san̄a ọkọdọhọ ete: “Ndinyene ime nnyụn̄ mma ndikpan̄ utọn̄ nnọ mme owo enen̄ede enyene odudu ndinam mme owo ẹma ndikpan̄ utọn̄, onyụn̄ edi utịbe utịbe usụn̄ ndiwụt ke imenen̄ede inyene udọn̄ ke idem mme owo.” Ndinen̄ede n̄kpan̄ utọn̄ nnọ mme owo nnyụn̄ nnyene esịtmbọm ẹkeme ndinam mme owo ẹtat esịt ẹnyịme nneme Bible, nte mme ifiọkutom oro ẹtienede mi ẹwụtde.
12 Ke leta mma kiet emi ẹkemịn̄de ke n̄wedmbụk n̄kpọntịbe kiet ke Saint-Étienne ke France, enye eketịn̄ aban̄a owo iba emi ẹkedide ufọk esie esisịt ini ke enye ama akataba ekpri eyenan̄wan esie emi ekedide ọfiọn̄ ita ke n̄kpa. Enye ekewet ete: “Mma nsọsọp mfiọk ke mmọ ẹkedi Mme Ntiense Jehovah. Ntre mma nduak ndibịn mmọ ediye ediye, edi ekem mma nda n̄kụt ediye uduot ekpri n̄wed oro mmọ ẹkenọde. Enye akaban̄a ntak emi Abasi ayakde ndutụhọ odu. Ntre mma mbiere ndikot mmọ ẹdụk ẹdi ye uduak ediwụt ke ekikere mmọ inenke. . . . Mme Ntiense oro ẹma ẹtie ẹbe hour kiet esisịt. Mmọ ẹma ẹnen̄ede ẹda esịtmbọm ẹkpan̄ utọn̄ ẹnọ mi, ndien ke ini mmọ ẹkeyomde ndinyọn̄, ama enen̄ede enem mi ke idem tutu nnyịme mmọ ẹfiak ẹdi.” (Rome 12:15) Nte ini akakade, n̄wan emi ama enyịme ukpepn̄kpọ Bible. Nnyịn imekeme ndikpep ekese ndifiọk ke se enye etide aban̄a akpa ini oro ẹkedide ẹdise enye idịghe se Mme Ntiense oro ẹketịn̄de, edi edi nte mmọ ẹkekpan̄de utọn̄.
13. Didie ke ikeme ndikpụhọ nte inemede eti mbụk man ekekem ye nsio nsio owo oro isobode?
13 Ke ini inen̄erede ikpan̄ utọn̄ inọ mme owo, ọwọrọ ke imayak mmọ ẹsian nnyịn ntak emi mmọ ẹyomde Obio Ubọn̄. Emi anam nnyịn inen̄ede ikeme ndibuana eti mbụk ye mmọ. Anaedi afo omokụt ke mme ọkwọrọ eti mbụk oro ẹnyenede uforo ẹdi nti mme andikpan̄ utọn̄. (N̄ke 20:5) Mmọ ẹsinen̄ede ẹnyene udọn̄ ke idem mme owo oro mmọ ẹsobode ke an̄wautom. Mmọ ẹsiwet enyịn̄, adres, se mbon oro mmọ ẹsobode ẹmade, ọkọrọ ye se mmọ ẹyomde. Ke ini owo etịn̄de akpan n̄kpọ oro afịnade enye, mmọ ẹsinam ndụn̄ọde ẹnyụn̄ ẹsọsọp ẹfiak ẹka man ẹkeneme se mmọ ẹkedụn̄ọrede ẹkụt ye mmọ. Ukem nte apostle Paul, mmọ ẹsikpụhọde nte mmọ ẹnemede etop Obio Ubọn̄ man ekekem ye nsio nsio owo oro mmọ ẹsobode. (Kot 1 Corinth 9:19-23.) Utọ udọn̄ ofụri esịt oro ẹnyenede ke idem mme owo do esinam mmọ ẹnyịme ndikop eti mbụk onyụn̄ owụt “esịt mbọm Abasi nnyịn” ke utịbe utịbe usụn̄.—Luke 1:78.
Ka Iso Nyene In̄wan̄-In̄wan̄ Esịt
14. Didie ke ikeme ndinyene mme edu Jehovah nte inamde utom ukwọrọikọ nnyịn?
14 Jehovah ọnọ nnyịn uku ke ndinọ nnyịn ifụre ndimek se imade. Okposụkedi emi enye edide Ata Ọkpọsọn̄ Abasi, enye inyịkke baba owo kiet anam n̄kpọ esie, edi ada ima ekpek mme owo, onyụn̄ ọdiọn̄ mbon oro ẹwụtde esịtekọm ẹban̄a mme utịbe utịbe enọ esie. (Rome 2:4) Sia idide mme asan̄autom Abasi, kpukpru ini oro inọde ikọ ntiense, ikpenyene ndidu ke mben̄eidem ndineme eti mbụk ke usụn̄ oro odotde ye Abasi nnyịn oro esituade owo mbọm. (2 Cor. 5:20, 21; 6:3-6) Ke ntem, oyom inyene in̄wan̄-in̄wan̄ esịt iban̄a mme owo oro ẹdude ke efakutom nnyịn. Nso ikeme ndin̄wam nnyịn inam ntre?
15. (a) Jesus eketeme mme apostle esie ete ẹnam nso edieke mme owo ẹsịnde etop mmọ? (b) Nso ikeme ndin̄wam nnyịn iwụk ntịn̄enyịn ke ndiyom mbon oro ẹdotde?
15 Jesus ama eteme mme anditiene enye ete ẹkûtịmede esịt ẹkaha edieke owo esịnde etop mmọ, edi yak ẹkam ẹwụk ntịn̄enyịn ke ndiyom mbon oro ẹdotde. (Kot Matthew 10:11-15.) Ndinịm n̄kpri utịtmbuba oro ikemede ndisịm ekeme ndin̄wam nnyịn inam emi. Eyenete kiet ọkọdọhọ ke imọ itie nte owo emi asan̄ade oyom n̄kpọuto ke esịt isọn̄. Enye ada edumbet emi odu uwem, “Mmodori enyịn ke nyokụt gold mfịn.” Eyenete en̄wen enịm utịtmbuba “edisobo ye owo kiet emi enyenede udọn̄ ke urua kiet kiet nnyụn̄ mfiak n̄ka n̄kanam udọn̄ oro ọkọri ke usen ifan̄ ẹbede.” Ndusụk asuanetop ẹdomo ndikot ke nsụhọde n̄kaha itie N̄wed Abasi kiet ye enyeneufọk kiet kiet oro mmọ ẹsobode. Ewe utịtmbuba emi ekemede ndisịm ke afo enịm ọnọ idemfo?
16. Nso ntak ke inyene ndika iso n̄kwọrọ ikọ?
16 Idịghe nte mme owo ẹnamde n̄kpọ ke efakutom nnyịn kpọt owụt ke imokụt unen ke utom ukwọrọikọ eke ufọk ke ufọk. Edi akpanikọ ke utom ukwọrọikọ enyene akpan udeme ke edinyan̄a mbon oro ẹnyenede esịt akpanikọ, edi enye anam mme akpan n̄kpọ en̄wen n̄ko. Utom ukwọrọikọ Christian ọnọ nnyịn ifet ndiwụt ima oro imade Jehovah. (1 John 5:3) Enye iyakke nnyịn ikama iyịp owo. (Utom 20:26, 27) Enye odụri mbon oro mînyeneke mbak Abasi utọn̄ ete ke “ini ikpe [Abasi] edisịm.” (Edi. 14:6, 7) Ke akande kpukpru, ke ẹtoro enyịn̄ Jehovah ke ofụri isọn̄ ebe ke ndikwọrọ eti mbụk. (Ps. 113:3) Ntem, edide mme owo ẹma ndikpan̄ utọn̄ m̀mê imaha, ana ika iso itan̄a etop Obio Ubọn̄. Ke akpanikọ, Jehovah amama kpukpru ukeme oro isịnde nditan̄a eti mbụk.—Rome 10:13-15.
17. Nso ke mme owo mîditreke ndifiọk ke mîbịghike?
17 Okposụkedi emi ediwak owo mfịn mîmaha utom ukwọrọikọ nnyịn, ibịghike mmọ ẹyedi ẹdikụt enye ke usụn̄ en̄wen. (Matt. 24:37-39) Jehovah ama ọn̄wọn̄ọ ọnọ Ezekiel ete ke ini ubiereikpe oro imọ ikatan̄ade ọwọrọde osu, ke ufọk nsọn̄ibuot Israel “iditreke ndifiọk ete ke prophet odu ke otu mmọ.” (Ezek. 2:5) Kpasụk ntre, ke ini Abasi edibierede ikpe ọnọ editịm n̄kpọ oro odude ke emi, mme owo iditreke ndifiọk ke etop oro Mme Ntiense Jehovah ẹketan̄ade ke mme an̄wan̄wa ebiet ye ke ufọk ke ufọk ekenen̄ede oto ata Abasi kierakiet, kpa Jehovah, ye nte ke Mme Ntiense ẹkenen̄ede ẹda ke ibuot esie. Nso akwa ifet ke inyene ntem ndikere enyịn̄ esie nnyụn̄ ntan̄a etop esie ke akpan ini emi! Ẹyak ida odudu Abasi ika iso ikan mme mfịna utom ukwọrọikọ eke ufọk ke ufọk.
Didie ke Afo Ọkpọbọrọ?
• Didie ke ikeme ndinyene uko ndikwọrọ ikọ?
• Nso ikeme ndin̄wam nnyịn itọn̄ọ nneme Bible ke utom ukwọrọikọ eke ufọk ke ufọk?
• Didie ke ikeme ndinen̄ede nnyene udọn̄ ke idem mme owo?
• Nso ikeme ndin̄wam nnyịn ika iso inyene in̄wan̄-in̄wan̄ esịt iban̄a mme owo ke efakutom nnyịn?
[Mme Mbụme Ukpepn̄kpọ]
[Ekebe/Ndise ke page 9]
Usụn̄ Kiet Nditọn̄ọ Nneme Bible
Ntọn̄ọ nneme:
◼ Ke ama ọkọkọm enyeneufọk, emekeme ndinọ enye tract onyụn̄ ọdọhọ ete, “N̄waha ndi mi mfịn man ndineme akpan ibuotikọ emi ọnọde nsịnudọn̄ mi.”
◼ Mîdịghe, emekeme ndinọ tract onyụn̄ ọdọhọ ete, “N̄waha mi mfịn esisịt sia ọdọn̄de mi ndifiọk ekikere fo ke ibuotikọ emi.”
Edieke ẹbọde tract:
◼ Kûbet ebịghe akaha, bụp m̀mê nso idi ekikere enyeneufọk ke ibuotikọ tract oro.
◼ Nen̄ede kpan̄ utọn̄, yom usụn̄ ndifiọk ekikere enyeneufọk. Kọm enye nyụn̄ nen̄ede kere ban̄a se enye etịn̄de.
Man aka iso ke nneme oro:
◼ Kot nyụn̄ nneme itie N̄wed Abasi kiet m̀mê iba, nyụn̄ nam nneme fo ekekem ye se owo oro amade onyụn̄ oyomde.
◼ Edieke ẹnyenede udọn̄, nọ n̄wed, ndien ke ekemede, nam wụt nte isikpepde Bible ye mme owo. Diomi ndifiak n̄ka.