Jehovah Esinen̄ede Ese Aban̄a Mme Asan̄autom Esie Oro Ẹsọn̄de

“Abasi ikwan̄ake nte efrede utom ye ima eke mbufo ẹwụtde ẹban̄a enyịn̄ esie.”—HEB. 6:10.

1, 2. (a) Nso ke ndikụt owo emi enyenede iwat ekeme ndinam fi eti? (b) Jehovah ese mme Christian oro ẹsọn̄de didie?

 KE INI afo okụtde akani owo emi enyenede iwat ke esop mbufo, ndi emesiti mbụk Bible oro odude ke n̄wed Daniel? Jehovah Abasi okowụt idemesie nte owo emi enyenede iwat ke n̄kukụt oro enye okowụtde Daniel. Daniel ekewet ete: “N̄kụt tutu ebekpo ẹdiọhọ, Andisọn̄ọ usen onyụn̄ etie, edisịne-n̄kpọ esie edi afia nte snow, idet ibuot esie onyụn̄ ebiet edisana idet erọn̄.”—Dan. 7:9.

² Idet erọn̄ esiwak ndidi ata afia. Ntem, iwat ye udorienyịn̄ oro “Andisọn̄ọ usen” anam nnyịn iti akpakịp isua ye ọniọn̄ Abasi, emi ẹdotde inen̄ede ikpono. Edi didie ke Andisọn̄ọ Usen, kpa Jehovah, ke idem esiemmọ ese mme anam-akpanikọ n̄kani iren ye iban? Ikọ Abasi ọdọhọ ke “iwat edi anyanya ubọn̄, ke usụn̄ eti ido ke ẹdikụt enye.” (N̄ke 16:31) Ih, edieke anam-akpanikọ Christian ọsọn̄de tutu enyene iwat, utọ owo oro eye Abasi ọsọn̄! Nte afo emese nditọete fo oro ẹsọn̄de nte Jehovah esede mmọ?

Ntak Emi Ẹmade Mmọ Ntre?

3. Ntak emi nnyịn imade nditọete oro ẹsọn̄de ntre?

³ Ndusụk ke otu ndima asan̄autom Abasi emi ẹdi mbon Otu Ukara Mme Ntiense Jehovah, mbon oro ẹkenamde utom nte esenyịn oro ẹsan̄ade-san̄a ye mbon oro ẹsụk ẹnamde utom oro idahaemi, mme ifịk ifịk asiakusụn̄, ye mme asuanetop oro ẹdụkde idem akwa owo—iren ye iban emi ẹsọn̄ọde ẹda ẹnam akpanikọ ke esop nnyịn. Ekeme ndidi afo ọmọfiọk owo emi esịnde ifịk ọkwọrọ eti mbụk ke ata ediwak isua, emi eti uwụtn̄kpọ esie esịnde udọn̄ ọnọ n̄kparawa owo ẹdu eti uwem. Ndusụk nditọete oro ẹsọn̄de ẹmekama ikpọ ifetutom ẹnyụn̄ ẹyọ ukọbọ ke ntak eti mbụk. Jehovah ye “ofụn emi anamde akpanikọ onyụn̄ enyenede ọniọn̄” ẹnen̄ede ẹwụt esịtekọm ẹban̄a utom Obio Ubọn̄ oro mmọ ẹkenamde ke edem ẹnyụn̄ ẹnamde idahaemi.—Matt. 24:45.

4. Ntak emi ikpokponode mme Christian oro ẹsọn̄de, ndien ntak emi ikpesịnde mmọ ke akam?

⁴ Utọ n̄kani owo oro ẹnamde akpanikọ do ẹdot ekọm ye ukpono mme asan̄autom Jehovah Abasi eken. Ke akpanikọ, Ibet Abasi oro ẹkedade Moses ẹnọ owụt ke edikere mban̄a ye edikpono n̄kani owo asan̄a ye mbak Jehovah. (Lev. 19:32) Nnyịn ikpenyene ndisịn mme anam-akpanikọ asan̄autom Abasi emi ke akam inyụn̄ ikọm Abasi iban̄a utom ima mmọ. Apostle Paul ama ọbọn̄ akam aban̄a ndima nsan̄autom esie, n̄kani owo ye n̄kparawa.—Kot 1 Thessalonica 1:2, 3.

5. Didie ke ikeme ndidia ufọn nto edidụk nsan̄a ye nditọete oro ẹsọn̄de?

⁵ N̄ko-n̄ko, kpukpru owo ke esop ẹkeme ndibọ ufọn nto edidụk nsan̄a ye mme Christian oro ẹsọn̄de. Mme anam-akpanikọ andituak ibuot nnọ Jehovah oro ẹsọn̄de ẹmekọ akpakịp ifiọk ke ndikpep n̄kpọ, ndikụt n̄kpọ, ye ndisobo n̄kpọ. Mmọ ẹmekpep ndime ime nnyụn̄ ntua owo mbọm, ndien ndikpep emana en̄wen se mmọ ẹkekpepde ọnọ mmọ akwa  idatesịt ye uyụhọ. (Ps. 71:18) N̄kparawa owo, ẹwụt ke imenyene ọniọn̄ ebe ke ndikọ ifiọk nto mmọ nte emi owo okotde mmọn̄ osio ke editụn̄ọ obube mmọn̄.—N̄ke 20:5.

6. Didie ke afo ekeme ndiwụt n̄kani owo ke imọ imenen̄ede ima mmọ?

⁶ Ndi afo emesisian n̄kani owo ke amama mmọ nte Jehovah amade mmọ? Usụn̄ kiet emi afo ekemede ndinam ntre edi ndisian mmọ adan̄a nte afo amade mmọ ke ntak emi mmọ ẹsọn̄ọde ẹda ẹnam akpanikọ ye nte afo amade ekikere oro mmọ ẹsinọde. Akan oro, edieke anamde se mmọ ẹtemede, afo owụt ke omokpono mmọ ke ofụri esịt. Ediwak Christian oro ẹsọn̄de ẹkeme nditi item emi mme anam-akpanikọ nditọete oro ẹsọn̄de ẹkenọde mmimọ ye nte mmimọ ndikanam item oro ọfọnde ye mmimọ ke ofụri eyouwem. *

Nam N̄kpọ Emi Ẹwụtde ke Emekere Aban̄a

7. Mmanie ke Jehovah ọdọhọ ẹse ẹban̄a n̄kani owo?

⁷ Abasi ọdọhọ mbonubon n̄kani owo ẹse ẹban̄a mmọ. (Kot 1 Timothy 5:4, 8.) Esịt esinem Jehovah ke ini mbonubon ẹsede ẹban̄a mbonubon mmọ oro ẹsọn̄de ndien ke ntem ẹwụt ke mmimọ imese iban̄a n̄kani owo nte Abasi ke idem esiemmọ esede aban̄a. Abasi esibere ye mme ubon emi onyụn̄ ọdiọn̄ mmọ ke ukeme oro mmọ ẹsịnde ye kaban̄a ofụri n̄waidem mmọ. *

8. Ntak emi esop ẹkpewụtde ke imekere iban̄a mme Christian oro ẹsọn̄de?

⁸ Kpasụk ntre, esịt esinem Jehovah ke ini esop n̄kann̄kụk ẹn̄wamde n̄kani owo emi ẹdude ke unana edi emi mînyeneke mbonubon oro ẹnịmde ke akpanikọ m̀mê emi ẹmade ndise mban̄a mmọ. (1 Tim. 5:3, 5, 9, 10) Ntre ke esop ẹwụt ke mmimọ ‘imekere iban̄a, inyene ima nditọete inọ, inyụn̄ itua n̄kani owo mbọm.’ (1 Pet. 3:8) Paul ọnọ ata eti uwụtn̄kpọ aban̄a nte esop ẹsede ẹban̄a n̄kani owo ke ini enye ọdọhọde ke ini ndido kiet ke idem owo okụtde ukụt, ke “kpukpru ndido eken ẹtiene  enye ẹkụt.” (1 Cor. 12:26) Ndin̄wam nnyụn̄ ntua n̄kani owo mbọm ẹwụt ke imanam item Paul emi: “Ẹka iso ẹbiom mfịghe kiet eken, ndien ntem ke ẹnịm ibet Christ.”—Gal. 6:2.

9. Nso mfịghe ke usọn̄ ekeme ndinam ẹsịm owo?

⁹ Nso mfịghe ẹsisịm n̄kani owo? Ediwak mmọ ẹsisọp ẹkpa mba. Mmọ ẹkeme ndikere ke mmimọ ikemeke ndinam mme utọ edinam ofụri ini nte edika n̄kese abiausọbọ, ediwet n̄kpọ, edikpọri ufọk, ye edinam udia. Sia owo mîsinen̄ekede ikop aba biọn̄ ye nsatitọn̄ nte enye odụkde idem akwa owo, mmọ ẹkeme ndikere ke iyomke mmimọ idia udia nte akpanade idia. Ekeme ndidi ntre n̄ko ye udia eke spirit. Mfịna enyịn ye utọn̄ ekeme ndinam ọsọn̄ ndikot n̄wed nnyụn̄ n̄kpan̄ utọn̄ nnọ mme mbono esop Christian, ndien edikam n̄ka mbono esop ekeme ndidi mfịghe. Ntre, nso ke ikeme ndinam nnọ n̄kani owo?

Nte Ẹkemede Ndin̄wam

10. Nso ke mbiowo ẹkeme ndinam man ẹkụt ẹte ke ẹnọ n̄kani owo se mmọ ẹyomde?

¹⁰ Ẹse ẹban̄a n̄kani owo ke ata eti usụn̄ ke ediwak esop. Ndima nditọete ẹsin̄wam mmọ ẹka urua, etem udia, ẹnyụn̄ ẹnam ebiet asana. Mmọ ẹsin̄wam n̄kani owo man ẹkpep n̄kpọ, ẹtịm idem ẹnọ mbono esop, ẹnyụn̄ ẹwọrọ an̄wautom kpukpru ini. Nditọete oro mîsọn̄ke ẹsisan̄a ye mmọ ẹnyụn̄ ẹmen mmọ ke n̄kpọisan̄. Edieke n̄kani owo mîkemeke ndiwọrọ n̄kpọn̄ ufọk, ẹkeme ndinam mmọ ẹkpan̄ utọn̄ ẹnọ mbono esop ke urụk ukopikọ mîdịghe ẹmụm ke ọkpọ umụmikọ ẹda ẹsọk mmọ. Ke ini ekededi oro ẹkemede, mbiowo ẹsikụt ẹte ke ẹnam nti ndutịm man ẹse ẹban̄a n̄kani owo ke esop. *

11. Bụk nte ubon kiet ẹken̄wamde eyenete oro ọkọsọn̄de.

¹¹ Christian kiet kiet n̄ko ẹkeme ndifọn ido nnyụn̄ ntat ubọk nnọ n̄kani owo n̄kpọ. Ke n̄wan eyenete kiet oro ọsọn̄de ama akakpa, enye ikekemeke aba ndikpe okụk ufọk sia mîkọbọhọ aba okụk ukpọn̄utom n̄wan esie. Enye ye n̄wan esie ẹma ẹkpep ubon kiet Bible—ete, eka, ye nditọiban iba—emi ẹkenyenede akamba ufọk. Mmọ ẹma ẹnọ enye ubet iba ẹte odụn̄. Mmọ ẹma ẹsidia udia ẹnyụn̄ ẹsak imam ọtọkiet ẹnyụn̄ ẹma kiet eken ima nditọete ke isua 15. N̄kparawa emi ẹma ẹbọ ekese ufọn ẹto mbuọtidem ye mbufiọk esie, enye onyụn̄ adara inem inem nsan̄a. Eyenete emi ama odụn̄ ye mmọ tutu akpa ke ini ekedide isua 89. Ubon oro ẹsụk ẹkọkọm Abasi tutu emi ẹban̄a ediwak edidiọn̄ oro mmọ ẹkebọde ke ntak ebuana oro mmọ ẹkenyenede. Mmọ itabake ‘utịp mmọ’ ke emi ẹken̄wamde ekemmọ mbet Jesus Christ.—Matt. 10:42. *

12. Nso ke afo ekeme ndinam ndiwụt ke emenen̄ede ekere aban̄a nditọete oro ẹsọn̄de?

¹² Ekeme ndidi afo udukemeke ndin̄wam akani owo nte ubon emi, edi emekeme ndin̄wam enye aka mbono esop onyụn̄ ọwọrọ an̄wautom. Emekeme ndikot mmọ ufọk onyụn̄ etiene ada mmọ ke ini oyomde ndiwọrọ an̄wa. Emekeme ndika n̄kese mmọ, akpan akpan ke ini mmọ ẹdọn̄ọde m̀mê mîkemeke ndiwọrọ n̄kpọn̄ ufọk. Akan oro, afo emekeme ndinam n̄kpọ ye mmọ nte mbon oro ẹdiọn̄ọde idem, okponyụn̄ enyene ndinam ntre. Adan̄a nte n̄kani owo ẹkemede ndikere n̄kpọ ọfọn, ẹkpenyene ndisịn mmọ ke kpukpru ubiere oro ẹnamde ẹban̄a mmọ. Idem mbon oro mîtịmke ifiọk n̄kpọ ẹkeme ndifiọk m̀mê ẹda mmimọ ke n̄kpọ m̀mê owo idaha.

Jehovah Idifreke Utom Mbufo

13. Ntak emi odotde ikere iban̄a nte etiede n̄kani owo ke idem?

¹³ Odot ẹkere ẹban̄a nte etiede n̄kani owo ke idem. N̄kani owo ẹsiwak ndikop idiọkesịt ke ntak emi mmọ mîkemeke aba ndinam se mmọ ẹkesinamde ke ini emi ẹkedide n̄kparawa. Ke uwụtn̄kpọ, eyenete an̄wan emi ama akanam  n̄kpọ Jehovah ifịk ifịk ke n̄kpọ nte isua 50, emi okonyụn̄ edide asiakusụn̄ ama ọdọn̄ọ udọn̄ọ emi ememde enye idem onyụn̄ anam ọsọn̄ enye ndisika mbono esop. Ke ini enye ekemende se enye ekesinamde odomo ye idahaemi idem mîsọn̄ke enye mi, enye ama ọtọn̄ọ nditua. Enye ama osụk ibuot ke isọn̄ onyụn̄ etịn̄ ye eyet ete, “N̄kemeke aba ndinam baba n̄kpọ kiet.”

14. Didie ke mme psalm ẹkeme ndisịn udọn̄ nnọ mme asan̄autom Jehovah oro ẹsọn̄de?

¹⁴ Edieke afo edide akani owo, ndi akanam etie fi ntre ke idem? Mîdịghe, ndi odu ini oro afo esikerede ke ekeme ndidi Jehovah ọkpọn̄ fi? Ekeme ndidi andiwet psalm ama enyene mme utọ ekikere oro ke eyo usọn̄, koro enye ama ekpe Jehovah ubọk ete: “Kûmen mi ke ini usọn̄ uduọk; kûkpọn̄ mi ke ini odudu eyemerede mi. . . . O Abasi, kûkpọn̄ mi tutu nsịm usọn̄ ye iwat.” (Ps. 71:9, 18) Ke akpanikọ, Jehovah ikọkpọn̄ke andiwet psalm oro, Enye idinyụn̄ ikpọn̄ke fi. Ke psalm en̄wen, David ama owụt ke imọ imenen̄ede inịm ke Abasi eyebere ye imọ. (Kot Psalm 68:19.) Emekeme ndinyene mbuọtidem ke edieke afo edide anam-akpanikọ eyenete oro ọsọn̄de, ke Jehovah odu ye afo, ke oyonyụn̄ aka iso ọsọn̄ọ fi idem ke usen ke usen.

15. Nso ikeme ndin̄wam n̄kani owo ẹnyene idotenyịn?

¹⁵ Jehovah idehedei ifre kpukpru se mbufo Mme Ntiense esie oro ẹsọn̄de ẹma ẹkenam ẹnyụn̄ ẹka iso ẹnam ndinọ enye ubọn̄. Bible ọdọhọ ete: “Abasi ikwan̄ake nte efrede utom ye ima eke mbufo ẹwụtde ẹban̄a enyịn̄ esie.” (Heb. 6:10) Mmọdo, ẹkûnyene idiọk ekikere ẹdue ẹkere ke mmimọ inyeneke aba ufọn inọ Jehovah ke ntak emi isọn̄de. Ẹdomo ndinyene nti ekikere utu ke ndikere idiọk ekikere unana idotenyịn. Ẹdat esịt ẹban̄a mme edidiọn̄ ye idotenyịn ini iso oro mbufo ẹnyenede! Nnyịn imenyene mfọnn̄kan “utịt [m̀mê, ini iso] ye idotenyịn,” ndien Andibot nnyịn ọn̄wọn̄ọ emi. (Jer. 29:11, 12; Utom 17:31; 1 Tim. 6:19) Ẹtie ẹkere ẹban̄a idotenyịn mbufo, ẹsịn ukeme ndikere n̄kpọ nte mbon oro mîsọn̄ke, ẹkûnyụn̄ ẹdedei ẹda ufọn oro mbufo ẹnyenede ndidụk mbono esop ke ekpri n̄kpọ! *

16. Ntak emi eyenete kiet emi ọsọn̄de ekekerede ke ikpanaha imọ idi aba ebiowo, edi didie ke otu mbiowo ẹkesịn udọn̄ ẹnọ enye?

¹⁶ Kere ban̄a Johan, emi edide isua 80 onyụn̄ esede kpukpru ini aban̄a Sannie, anam-akpanikọ n̄wan esie emi mîkemeke aba ndinam baba n̄kpọ kiet. * Nditọete iban ẹsika ẹketie ye Sannie man Johan akpaka mbono esop ye an̄wautom. Nte ededi, ke ndondo emi, Johan ama ekere ke imọ ikemeke aba ndiyọ onyụn̄ ọtọn̄ọ ndikere ke imọ ididịghe aba ebiowo. Enye ama obụp ye mmọn̄eyet ke enyịn ete: “Ufọn emi ndidi ebiowo? Nsinamke aba se akpana nnam ke esop.” Otu mbiowo ẹma ẹsian enye ke mmimọ ida mbufiọk ye ubiere esie ke ata akpan n̄kpọ. Mmọ ẹma ẹkpek enye ẹte aka iso anam utom nte ebiowo, idem edieke enye mîsịnke idem nte ekpesịnde. Emi ama enen̄ede esịn udọn̄ ọnọ Johan, enye onyụn̄ aka iso anam utom nte ebiowo onyụn̄ ọnọ esop ufọn.

Jehovah Enen̄ede Ekere Aban̄a

17. Nso ke Bible ọn̄wọn̄ọ ọnọ mme Christian oro ẹsọn̄de?

¹⁷ N̄wed Abasi anam an̄wan̄a ke n̄kani owo ẹkeme ndika iso n̄kọri ke n̄kan̄ eke spirit kpa ye  mme mfịna usọn̄. Andiwet psalm akatan̄a ete: “Mmọ [eke ẹtọde] ke ufọk Jehovah . . . ẹyesụk ẹkọri ke usọn̄, ẹyesehe ẹnyụn̄ ẹsiak ikọn̄.” (Ps. 92:13, 14) Apostle Paul, emi etiede nte ama ọyọ udọn̄ọ, ‘ikakpaha mba, idem edieke owo emi enye ekedide ke enyọn̄ idem akataharede.’—Kot 2 Corinth 4:16-18.

18. Ntak emi oyomde mbon en̄wen ẹn̄wam n̄kani owo ye mbon oro ẹsede ẹban̄a mmọ?

¹⁸ Ediwak uwụtn̄kpọ eyomfịn ẹwụt ke n̄kani owo ẹkeme ‘ndika iso n̄kọri.’ Edi mme mfịna udọn̄ọ ye usọn̄ ẹkeme ndinam esịt etịmede owo, idem ye mbon oro ẹnyenede ata eti mbonubon oro ẹn̄wamde mmọ. Mbon oro ẹsede ẹban̄a n̄kani owo ẹkeme n̄ko ndikpa mba. Esop enyene ifet ye mbiomo ndiwụt ke imama n̄kani owo ye mbon oro ẹsede ẹban̄a mmọ. (Gal. 6:10) Ke nditịm ntịn̄, utọ ima oro owụt ke nnyịn idọhọke mmọ san̄a sụn̄, “kop ufiop nyụn̄ dia yụhọ,” edi inọhọ mmọ n̄kpọ.—Jas. 2:15-17.

19. Ntak emi mme anam-akpanikọ Christian oro ẹsọn̄de ẹkemede ndinyene mbuọtidem ke ini iso?

¹⁹ Ndidụk idem akwa owo ekeme ndikpụhọde mme edinam Christian, edi ini oro ebede isụhọkede ima oro Jehovah amade mme anam-akpanikọ asan̄autom esie. Utu ke oro, kpukpru mme anam-akpanikọ Christian emi ẹsọn̄ urua ke enyịn esie, ndien tutu amama enye idikpọn̄ke mmọ. (Ps. 37:28; Isa. 46:4) Jehovah eyekpeme onyụn̄ ada mmọ usụn̄ ke ofụri eyo usọn̄.—Ps. 48:14.

[Mme Ikọ Idakisọn̄]

Didie ke Afo Ọkpọbọrọ?

• Ntak emi afo enen̄erede ama mme anam-akpanikọ Christian oro ẹsọn̄de?

• Didie ke ikeme ndiwụt ke imenen̄ede ima nditọete oro ẹsọn̄de?

• Nso ikeme ndinam mme asan̄autom Jehovah oro ẹsọn̄de ẹnyene idotenyịn?

[Mme Mbụme Ukpepn̄kpọ]

[Mme ndise ke page 18]

Mbon esop ẹsinen̄ede ẹkpono n̄kani owo