Nte Afo Emeti?

Nte afo ama ọbọ ufọn ndikot mme nsiondi Enyọn̄-Ukpeme eke ndondo emi? Ọfọn, se m̀mê emekeme ndibọrọ mme mbụme oro ẹtienede mi:

• Nso ikpọ mfịna ke ndusụk Christian ẹsobo ke ẹma ẹkedọ ndọ, ndien nso ke mmọ ẹkpedomo ndinam?

Ndusụk Christian ẹkeme ndikụt ke mmimọ ikemke kiet ye eken. Sia ẹfiọkde ke ndisio ndọ nte mîkemke ye N̄wed Abasi idịghe eti usụn̄ ndikọk mfịna oro, oyom mmọ ẹsịn ifịk ẹnam ndọ mmọ ọsọn̄ọ ada.—4/15, page 17.

• Nso mfịna ke eyenete oro odude ke ufọk ukpeme ekeme ndisobo?

Ekeme ndidi enye imeheke ye esop emi enyenede efakutom oro ufọk ukpeme oro odude. Ekeme ndidi ata ediwak owo ke ufọk ukpeme oro ẹka nsio nsio ido ukpono ẹnyụn̄ ẹkeme ndidomo ndisịn enye ke mme edinam ido ukpono. Mme iman emi ẹdide Christian ye mme andibuana ke esop n̄kann̄kụk ẹkpenyene ndifiọk mme mfịna emi, ẹnọ ibetedem, ẹnyụn̄ ẹse ẹban̄a.—4/15, page 25-27.

• Nso idi n̄kpọ inan̄ oro ẹkemede ndin̄wam ebe ye n̄wan ẹkọk mme mfịna?

Nịm ini oro ẹdinemede mfịna. (Eccl. 3:1, 7) Tịn̄ ofụri se idude fi ke esịt ukpono ukpono. (Eph. 4:25) Kpan̄ utọn̄ nọ nsan̄a ndọ fo nyụn̄ fiọk nte etiede enye ke idem. (Matt. 7:12) Ẹbiere nte ẹdikọkde mfịna, ẹnyụn̄ ẹnam n̄kpọ ọtọkiet ẹban̄a oro. (Eccl. 4:9, 10)—5/1, page 10-12.

• Ke ini Jesus eketemede nnyịn ete ibọn̄ ikam iben̄e ẹfen isọn eke nnyịn ikamade, ewe isọn ke enye eketịn̄ aban̄a?

Edieke imende Matthew 6:12 idomo ye Luke 11:4, ana in̄wan̄-in̄wan̄ ke idịghe isọn okụk ke Jesus eketịn̄ aban̄a. Enye eketịn̄ aban̄a idiọkn̄kpọ. Oyom nnyịn ikpebe Abasi ke ndinyịme ndifen nnọ mme owo.—5/15, page 9.

• Mme kọmiti ewe ke mbon Otu Ukara ẹnam?

Kọmiti Mme Anam Ndutịm; Kọmiti Mbonutom; Kọmiti Usio N̄wed; Kọmiti Utom; Kọmiti Unọ Ukpep; Kọmiti Uwetn̄wed.—5/15, page 29.

• Nnyịn ikeme ndisan̄a didie mfiọk ke Ukwọ eyo Noah ama ofụk ofụri isọn̄?

Jesus ama enịm ke Ukwọ oro ama etịbe ye nte ke enye ama ofụk ofụri isọn̄. Ntọt oro ẹnọde ke Bible enyene ufọn sia Ukwọ ofụri ererimbot ama enen̄ede etịbe.—6/1, page 8.

• Ndi mbubiam ido oro ẹtịn̄de ẹban̄a mi ẹkeban̄a mme Jew m̀mê mme Gentile?

Okposụkedi emi n̄kpọ emi ekemede ndiban̄a ekededi ke otu mbiba emi, apostle Paul eketịn̄ akpan akpan aban̄a Israel eset emi mîkenịmke Ibet ke ediwak isua ikie. Mmọ ẹma ẹfiọk ndinen ewụhọ Abasi, edi ikodụhe uwem nte ekemde ye ndinen ewụhọ emi.—6/15, page 29.

• Tel Arad odu m̀mọ̀n̄, ndien ntak emi enye edide akpan obio?

Ibombom emi ke Israel emi ẹdade ẹfiọk ebiet emi obio Arad eset okodude odu ke edem usoputịn Inyan̄ Inụn̄. Mme ọdọkisọn̄ nyom n̄kpọeset ẹkụt ediwak mbai usiọn̄ emi ẹkedide itiat n̄wed ke ibombom emi. Ẹkụt mme enyịn̄ oro ẹdude n̄ko ke Bible ke ndusụk mmọ, mmọ ẹnyụn̄ ẹwụt ke ẹma ẹsida ọkpọkpọ enyịn̄ Abasi ke mme n̄wed ererimbot.—7/1, page 23-24.

• Ntak emi ndinịm mme utịtmbuba oro ikemede ndisịm ekemede ndinam nnyịn inen̄ede ikop idatesịt?

Edieke idomode ndisịm mme utịtmbuba oro mîwụtke eti ibuot kpa ye se iditakde, nnyịn inọ idem nnyịn editịmede esịt nte mîdotke. Edi nnyịn ikponyụn̄ inịmke utịtmbuba oro ekpride akaha inọ idem nnyịn, ida mmeme oro ikerede nte inyenede nte isọn̄ nditehede ube ke utom ukwọrọikọ.—7/15, page 29.

• Nso ikeme ndinam ọsọn̄ ete ye eka ndinyene nneme ye eyen emi edide uyen?

Uyen ndikop bụt, ndiyom nda-ke-idem, ye ndiyom ndidu ikpọn̄ ẹkeme ndidi ubiọn̄ọ. Ete ye eka ẹkeme ndidomo ndisineme n̄kpọ ye uyen ke ido nneme ẹnyụn̄ ẹdomo ndifiọk se inamde uyen etịn̄ se enye etịn̄de.—8/1, page 10-11.