Kọri ke Nnennen Ifiọk ye “Ọkpọsọn̄ Udọn̄”

KPUKPRU mme asan̄autom Jehovah ẹyom Abasi ama mmimọ. Man Abasi ama nnyịn, ana inyene ọkpọsọn̄ udọn̄ ndinen̄ede nnyene mbuọtidem nnyụn̄ nsịn ifịk nnam edisana utom. Nte ededi, apostle Paul anam ifiọk mfịna kiet emi ikemede ndinyene, emi ndusụk mme Jew ke eyo esie ẹkenyenede; enye ọdọhọ ete: “Mmọ ẹnyene ifịk ẹban̄a Abasi; edi emi isan̄ake ikekem ye nnennen ifiọk.” (Rome 10:2) Nte an̄wan̄ade, nnyịn ikpenyeneke ndibuọt idem ye Jehovah nnyụn̄ ntuak ibuot nnọ enye sia etiede nnyịn ke idem nte akpana inam ntre. Imoyom nnennen ifiọk oro aban̄ade Andibot ye uduak esie.

Paul ama ada edu uwem oro Abasi amade akabuan ye ọkpọsọn̄ udọn̄ ndikọ ifiọk ke n̄wed en̄wen oro enye ekewetde. Enye ama eben̄e ete mme anditiene Christ “ẹkpekam ẹyọhọ ye nnennen ifiọk” uduak Abasi “man ẹsan̄a nte odotde Jehovah ẹnem enye esịt ọyọhọ ọyọhọ” nte mmọ “ẹkade iso ẹn̄wụm mfri ke kpukpru nti utom ẹnyụn̄ ẹkọride ke nnennen ifiọk Abasi.” (Col. 1:9, 10) Ntak emi nnyịn ndiyom “nnennen ifiọk” edide akpan n̄kpọ ntre? Ndien ntak emi ikpọkọride ke utọ ifiọk oro?

Se Inamde Ẹnyene Mbuọtidem

Ndinyene nnennen ifiọk Abasi ye eke uduak esie oro ẹdude ke Bible ẹnam nnyịn inyene mbuọtidem. Edieke nnyịn mînyeneke utọ ifiọk oro, mbuọtidem oro inyenede ke Jehovah ekpetie nte ufọk mbre nditọwọn̄, emi ata ekpri ofụm ekemede ndiberi nduọk. Paul esịn udọn̄ ọnọ nnyịn ete ida “ukeme ukere n̄kpọ” inam edisana utom inọ Abasi inyụn̄ ‘inam ekikere nnyịn edi obufa.’ (Rome 12:1, 2) Ndikpep Bible kpukpru ini ekeme ndin̄wam nnyịn inam emi.

Ewa emi edide asiakusụn̄ ofụri ini ke Poland ọdọhọ ete: “N̄kpenyeneke nnennen ifiọk oro aban̄ade Jehovah mîkpedịghe emi nsikpepde Ikọ Abasi kpukpru ini. Owo ikpọdiọn̄ọkke mi aba nte Christian, ndien mbuọtidem mi ekpemem—n̄kpataba itie ebuana mi ye Jehovah.” Nnyịn ikpedehedei iyak utọ n̄kpọ oro etịbe! Kere ban̄a uwụtn̄kpọ owo oro ekenyenede nnennen ifiọk aban̄a Jehovah emi Jehovah okonyụn̄ amade enye ke ntak oro.

“Mmama Ido Fo Didie!”

Edinem ikwọ oro edide Psalm 119 ke Bible nnyịn owụt nte andiwet psalm akadade ido, uyo, item, mbet, ye mme ikpe Jehovah. Andiwet psalm ekewet ete: “Mme ewụhọ fo ẹyedat mi esịt. Uyo fo n̄ko edi inemesịt mi.” Enye ama ewet n̄ko ete: “Mmama ido fo didie! Enye ke ntie n̄kere ofụri usen.”—Ps. 119:16, 24, 47, 48, 77, 97.

Ikọ oro ‘idatesịt’ ye ‘editie n̄kere’ ẹnọ ekikere editie n̄kere Ikọ Abasi, ke nditịm ntịn̄, ndima utọ editie n̄kere oro. Ikọ emi ẹwụt ata ima oro andiwet psalm akamade ndikpep mbet Abasi. Ima oro ikedịghe ikpîkpu udọn̄ emi andiwet psalm ekenyenede ndikpep mbet Abasi. Utu ke oro, enye ekenyene ọkpọsọn̄ udọn̄ ‘nditie n̄kere’ ibet, man enen̄ede ọfiọk ikọ Jehovah. Edu andiwet psalm emi owụt ke enye okoyom ndinyene nnennen ifiọk adan̄a nte ekekeme mban̄a Abasi ye uduak esie.

Ana in̄wan̄-in̄wan̄ ke andiwet psalm akada ofụri esịt esie ama Ikọ Abasi. Nnyịn imekeme ndibụp idem nnyịn ite: ‘Nte mmenen̄ede mma Ikọ Abasi ntre? Nte mmama ndikot  nnyụn̄ ndụn̄ọde itie Bible oro n̄kotde ke usen kiet kiet? Nte mmesitịn̄ enyịn n̄kot Ikọ Abasi nnyụn̄ mbọn̄ akam mbemiso ntọn̄ọde?’ Edieke ibọrọ nnyịn edide ih, oro ọwọrọ ke etie nte nnyịn ke ‘ikọri ke nnennen ifiọk Abasi.’

Ewa ọdọhọ ete: “Mmesidomo kpukpru ini ndifori ọkpọkpọ ukpepn̄kpọ mi. Tọn̄ọ n̄kọbọ ediye uduot ekpri n̄wed ‘Kụt Eti Isọn̄,’ mmesikama enye kpukpru ini oro n̄kpepde n̄kpọ. Mmesidomo etieti ndinam ndụn̄ọde ke Insight on the Scriptures ye mme n̄wed ndụn̄ọde eken.”

Kere n̄ko ban̄a uwụtn̄kpọ Wojciech ye Małgorzata oro ẹnyenede ediwak mbiomo ubon. Mmọ ẹsan̄a didie ẹkeme ndisikpep Bible ke idemmọ. “Nnyịn owo kiet kiet imesifak ifet ikpep Ikọ Abasi adan̄a nte ikekeme. Ekem, ke ini ukpepn̄kpọ ubon ye ke nneme ofụri ini, imesibuana ndinem n̄kpọ m̀mê mme n̄kpọ oro ẹsịnde udọn̄ ẹnọ owo, oro ikokotde.” Ntotụn̄ọ ukpepn̄kpọ idem owo esinam inen̄ede ikop idatesịt onyụn̄ an̄wam nnyịn ‘ikọri ke nnennen ifiọk.’

Kpep N̄kpọ ye In̄wan̄-In̄wan̄ Esịt

Sia idide mme Christian, imenịm ke edi uduak Abasi “nte kpukpru orụk owo ẹkpenyene edinyan̄a ẹnyụn̄ ẹsịm nnennen ifiọk akpanikọ.” (1 Tim. 2:3, 4) Emi owụt ufọn edikot Bible nnyụn̄ ndomo ‘ndifiọk se enye ọwọrọde.’ (Matt. 15:10) N̄kpọ kiet oro edin̄wamde nnyịn edi ndikpep n̄kpọ ye in̄wan̄-in̄wan̄ esịt. Emi edi edu oro mbon Beroea eset ẹkenyenede ke ini Paul ọkọkwọrọde eti mbụk ọnọ mmọ: “Mmọ [ẹkebọ] ikọ ye ata ọkpọsọn̄ udọn̄, ẹnen̄ede ẹdụn̄ọde N̄wed Abasi ke usen ke usen ẹte ise m̀mê mme n̄kpọ emi ẹdi ntre.”—Utom 17:11.

Nte afo emekpebe uwụtn̄kpọ mbon Beroea ke ndinyene ọkpọsọn̄ udọn̄ ye in̄wan̄-in̄wan̄ esịt, unyụn̄ uyakke mme n̄kpọ oro mîdịghe akpan n̄kpọ ẹwọn̄ọrede ntịn̄enyịn fo ke adan̄a emi ekpepde Bible? Idem ọkpọkọm eyenete ikesidaha ukpepn̄kpọ idemowo nte inen inem n̄kpọ, enye ekeme ndidomo ndikpebe mbon Beroea. N̄ko-n̄ko, nte mme owo ẹdụkde idem akani owo, mmọ isikotde aba n̄wed inyụn̄ ikpep n̄kpọ nte ẹkesinamde, edi ikpedịghe ntre ye mme Christian. Inamke n̄kpọ m̀mê owo edi isua ifan̄, enye ekeme nditre mme n̄kpọ oro ẹsiwọn̄ọrede owo ntịn̄enyịn. Ndien nte afo okotde n̄wed, emekeme ndiyom mme n̄kpọ oro ekemede ndibuana ye mbon en̄wen. Ke uwụtn̄kpọ, nte emekeme nditịn̄ se okokotde m̀mê ekekpepde ke ini ukpepn̄kpọ idemfo nnọ nsan̄a ndọ fo m̀mê eyenete fo? Ndinam ntre ekeme ndinen̄ede nnam mme n̄kpọ oro ẹsọn̄ọ ẹdu fi ke ekikere ye esịt ke adan̄aemi anamde ufọn ọnọ mbon en̄wen.

Ke ini ekpepde n̄kpọ, kpebe uwụtn̄kpọ Ezra, asan̄autom Abasi eset oro ‘eketịmde esịt esie ndidụn̄ọde n̄wed ibet Jehovah.’ (Ezra 7:10, NW) Didie ke ekeme ndinam ntre? Emekeme ndiyom ebiet oro etịmde ọfọn nditie n̄kpep n̄kpọ. Ekem, sụhọde tie bọn̄ akam ben̄e Jehovah ndausụn̄ ye ifiọk esie. (Jas. 1:5) Bụp idemfo ete, ‘Nso ke ndikpep ke ukpepn̄kpọ emi?’ Nte okotde n̄wed, yom mme akpan n̄kpọ. Emekeme ndiwet n̄kpọ mbio mbio m̀mê ndinịm idiọn̄ọ ke ebiet oro mûdehedei uyom ndifre. Kere nte ekemede ndida mme n̄kpọ  emi nnam n̄kpọ ke ini ọkwọrọde ikọ, ke ini anamde mme ubiere, m̀mê ke ini esịnde udọn̄ ọnọ ekemmọ eyenete. Ke ekperede utịt ukpepn̄kpọ, dụn̄ọde se ekekpepde ibio ibio. Emi ayanam fi eti se ekekpepde.

Ewa etịn̄ nte imọ isikpepde n̄kpọ ete: “Ke ini n̄kotde Bible, mmesida mme itien̄wed efen oro ẹtịn̄de ukem n̄kpọ, Watch Tower Publications Index, ye Watchtower Library ke usan umụm ntọt kọmputa nnam ndụn̄ọde. Mmesiwet mme n̄kpọ nnịm man n̄kpada nnam n̄kpọ ke utom ukwọrọikọ.”

Ndusụk owo ẹnen̄ede ẹkpep n̄kpọ idahaemi ke ediwak isua, ẹnyụn̄ ẹnen̄ede ẹnyene ifiọk Abasi. (N̄ke 2:1-5) Kpa ye oro, mmọ ẹnyene ediwak mbiomo onyụn̄ esisọn̄ mmọ ndifak ifet nda n̄kpep ukpepn̄kpọ idemowo. Edieke idaha fo etiede ntre, nso ukpụhọde ke akpanam ke ndutịm fo?

Nda M̀mọ̀n̄ Ini?

Anaedi eyenyịme ke esinen̄ede emem utom ndifak ifet nnọ mme n̄kpọ oro owo amade ndinam. Ediwak owo ẹfiọk ke ndinịm mme utịtmbuba emi ẹkemede ndisịm, utọ nte edikot ofụri Bible, anam owo enen̄ede esịn idem ke ukpepn̄kpọ idemowo. Edi akpanikọ, ekeme ndinen̄ede nsọn̄ ndikot nnyan mbụk oro ẹban̄ade udịm ubon mme owo, temple eset, m̀mê mme awak-n̄kukọhọ ntịn̄nnịm ikọ oro ẹtiede nte inyeneke n̄kpọ ndinam ye uwem ofụri usen. Domo ndinam mme n̄kpọ oro ẹdin̄wamde fi esịm utịtmbuba fo. Ke uwụtn̄kpọ, mbemiso okotde mme itie Bible oro ẹsọn̄de ndifiọk, emekeme ndikot mban̄a se ikanamde ẹwet enye m̀mê nte ẹkemede ndida enye nsịn ke edinam. Emekeme ndikụt utọ ntọt oro ke “All Scripture Is Inspired of God and Beneficial,” emi odude ke n̄kpọ nte usem 50.

Ndida enyịn ikike n̄kụt n̄kpọ ke ini okotde Bible ayanam enen̄ede enem fi. Emi ekeme ndinam ada enyịn ikike okụt mme owo ye se itịbede ke mbụk oro. Enen̄ede etie nte ndida ekikere ifan̄ emi nsịn ke edinam ayanam enen̄ede okop inem onyụn̄ ọbọ ufọn ke ini ekpepde n̄kpọ. Emi ayanam fi enyene ọkpọsọn̄ udọn̄ ndifak ifet nnọ ukpepn̄kpọ. Eyenen̄ede emem utom ndisika iso n̄kot Bible kpukpru usen.

Ke adan̄aemi mme ekikere oro ẹnọde mi  ẹkemede ndin̄wam owo kiet kiet, nso ke mme ubon oro mîsinyeneke ini ẹkpenam? Ntak emi mbufo mîsụhọkede itie ineme mme ufọn oro ẹkemede ndinyene nto ukpepn̄kpọ ubon? Ke ini nneme emi, mbufo ẹmekeme ndinọ nti ekikere, utọ nte ndibabak ndemede kpukpru usen m̀mê ndusụk usen man ẹda ini oro ẹkot Bible. Mîdịghe, nneme mbufo ekeme ndiwụt ke oyom ẹnam ukpụhọde ke ndutịm ubon. Ke uwụtn̄kpọ, ndusụk ubon ẹsikụt ke ọfọn ndisineme itie N̄wed Abasi eke usen m̀mê ndikot itie kiet ke Bible ke ubon ẹma ẹkedia udia. Mbemiso owo ekededi ọtọn̄ọ nditan̄ n̄kpọ ke okpokoro m̀mê adaha ndikanam n̄kpọ en̄wen, ubon oro esibiat minit 10 m̀mê 15 ndida nneme N̄wed Abasi m̀mê ndikot itien̄wed Bible oro ẹkediomide ndikot. Ke ntọn̄ọ ntọn̄ọ, emi ekeme nditie nte ọkpọsọn̄ n̄kpọ, edi ke mîbịghike, enye ekeme ndidi ubak ndutịm ubon onyụn̄ enen̄ede enem.

Wojciech ye Małgorzata ẹtịn̄ se ikan̄wamde ubon mmọ ẹte: “Ke ini edem, n̄kpri n̄kpọ oro mîdịghe akpan n̄kpọ ẹkesida ini nnyịn. Ima ibiere ndisịbe ini oro isidade iwet mme owo leta ke kọmputa. Ima isịbe n̄ko ini oro ikesidade inọ idem nduọkodudu inyụn̄ isio akpan usen ye ini inịm ndida nnen̄ede n̄kpep Bible.” Ke akpanikọ, ubon emi ituaha n̄kpọfiọk iban̄a mme ukpụhọde oro mmọ ẹkenamde, ndien ubon fo n̄ko idituaha n̄kpọfiọk ke baba usụn̄ kiet.

Ndikọri ke Nnennen Ifiọk Enen̄ede Enyene Ufọn!

Ndinen̄ede n̄kpep Ikọ Abasi ekeme ndin̄wụm “mfri ke kpukpru nti utom.” (Col. 1:10) Edieke emi edide ntre ke uwem fo, kpukpru owo ẹyekụt n̄kọri fo. Afo edidi ata owo Abasi emi enyenede ọyọhọ ifiọk akpanikọ Bible. Afo eyesinam nti ubiere onyụn̄ enen̄ede an̄wam mbon en̄wen ediye ediye, unamke n̄kpọ ube ubọk nte mme ọkọi. Ke akande kpukpru, afo ayasan̄a ekpere Jehovah. Eyenen̄ede ama mme edu esie, ndien ẹyekụt emi nte afo ọkwọrọde ikọ ọnọ mbon en̄wen aban̄a enye.—1 Tim. 4:15; Jas. 4:8.

Inamke n̄kpọ m̀mê afo edi isua ifan̄ m̀mê enyene mbufiọk adan̄a didie, sịn ofụri ukeme ndima Ikọ Abasi ndinyụn̄ nnen̄ede n̄kpep n̄kpọ ye in̄wan̄-in̄wan̄ esịt. Afo emekeme ndinịm ke Jehovah idifreke ukeme oro afo esịnde. (Heb. 6:10) Enye ọyọdiọn̄ fi uwak uwak.

[Ekebe ke page 13]

KE INI ‘IKỌRIDE KE NNENNEN IFIỌK’ . . .

Nnyịn inam mbuọtidem oro inyenede ke Abasi ọsọn̄ inyụn̄ isan̄a nte odotde Jehovah.—Col. 1:9, 10

Nnyịn inyene ọniọn̄, ikeme ndida mbufiọk nnam n̄kpọ nnyụn̄ nnam nti ubiere.—Ps. 119:99

Nnyịn idọdiọn̄ ikop idatesịt ndin̄wam mbon en̄wen ẹsan̄a ẹkpere Jehovah.—Matt. 28:19, 20

[Mme ndise ke page 14]

Ekeme ndisọn̄ ndikụt ebiet oro etịmde ọfọn nditie n̄kpep n̄kpọ, edi odot ẹyom

[Ndise ke page 15]

Ndusụk ubon ẹsikot Bible ke ẹma ẹkedia udia