‘Ẹbịne Mme N̄kpọ Eke Ẹnamde Emem Odu’

U SỤN̄ oro ẹsịnde itai obufa etie nte enen̄ede ọsọn̄ idem ke inyụn̄ ikemeke ndibiara. Edi nte ini akade, enye ekeme ndisiaha, mme ukpe ẹnyụn̄ ẹkeme ndidu. Oyoyom ẹsịri mme ebiet oro ẹsiahade ye ukpe oro mbak afanikọn̄, man usụn̄ oro onyụn̄ aka iso ọfọn.

Kpasụk ntre, itie ebuana nnyịn ye mbon en̄wen ekeme ndinyene mfịna ke ini ke ini, onyụn̄ akam ekeme ndibiara. Apostle Paul ama ọdọhọ ke mme Christian ke Rome ẹkekere n̄kpọ ke nsio nsio usụn̄. Enye eketeme nditọete ete: “Ẹyak nnyịn ibịne mme n̄kpọ eke ẹnamde emem odu ye mme n̄kpọ oro ẹbọpde-bọp kiet eken ẹnam ọkọri.” (Rome 14:13, 19) Ntak emi odotde “ibịne mme n̄kpọ eke ẹnamde emem odu”? Didie ke nnyịn ikeme ndinen̄ede nsịn idem mbịne emem?

Ntak Emi Ikpebịnede Emem?

Edieke owo mîdiọn̄ke n̄kpri itie oro ẹsiahade ke usụn̄, mmọ ẹkeme ndikabade enyene-ndịk ukpe. Nditre ndibiere ndutan̄uyo ekeme ndinyene ndịk ntre n̄ko. Apostle John ekewet ete: “Edieke owo ekededi ọdọhọde ete: ‘Mmama Abasi,’ edi enye asua eyenete esie, enye edi osu nsu. Koro owo eke mîmaha eyenete esie, emi enye okụtde, ikemeke ndima Abasi, emi enye mîkwe.” (1 John 4:20) Ndutan̄uyo oro owo mîbiereke ekeme ndinam Christian asua eyenete esie.

Jesus Christ ọkọdọhọ ke Jehovah inyịmeke utuakibuot nnyịn edieke nnyịn mînamke emem ye mbon en̄wen. Jesus eketeme mme mbet esie ete: “Ke ntre, edieke afo adade enọ fo edi ke itieuwa ndien afo eti do ete ke eyenete fo enyene ikọ ye afo, kpọn̄ enọ fo nịm do ke iso itieuwa, nyụn̄ nyọn̄; kebem iso nam emem ye eyenusọ, ndien ekem, ke ama akafiak edi, nọ enọ fo.” (Matt. 5:23, 24) Ih, akpan ntak oro anamde nnyịn ibịne emem edi ke iyom ndinem Jehovah Abasi esịt. *

Se iketịbede ke esop emi okodude ke Philippi owụt ntak en̄wen emi ikpebịnede emem. Etie nte mfịna emi owo mîsiakke ama odu ke ufọt nditọete iban iba, Euodia ye Syntyche,  ndien emi ama etịmede emem ofụri esop. (Phil. 4:2, 3) Ẹkeme ndisọsọp mfiọk ndutan̄uyo oro owo mîbiereke ke eferife. Edieke ọdọn̄de nnyịn ndinam ima ye edidianakiet ẹka iso ẹdu ke esop, emi ayanam idu ke emem ye nditọete nnyịn.

Jesus ọkọdọhọ ete: “Inemesịt edi eke mme anam emem.” (Matt. 5:9) Ndibịne emem anam nnyịn inen̄ede ikop idatesịt. N̄ko-n̄ko, emem anam owo okop nsọn̄idem, koro “sụn̄ sụn̄ esịt edi uwem obụkidem.” (N̄ke 14:30) Edi ndikama udu ekeme ndinam owo ọdọn̄ọ.

Okposụkedi emi ata ediwak Christian ẹnyịmede ke odot ẹbịne emem, afo emekeme ndikere m̀mê idisan̄a didie ibiere ndutan̄uyo. Ẹyak ineme mme edumbet N̄wed Abasi oro ẹkemede ndida nnyịn usụn̄.

Ndisụhọde Esịt Nneme Mfịna Ekeme Ndinam Ẹfiak Ẹnyene Emem

Ẹkeme ndidiọn̄ n̄kpri itie oro ẹsiahade ke usụn̄ ebe ke ndisịri mmọ. Ndi imekeme ndifen nnyụn̄ mfụk n̄kpri ndudue nditọete nnyịn? Ekeme ndidi emi ayanam ibiere ata ediwak ndutan̄uyo, koro apostle Peter ekewet ete ke “ima ofofụk ekese idiọkn̄kpọ.”—1 Pet. 4:8.

Nte ededi, ndusụk ini, mfịna ekeme ndinen̄ede n̄kpon idịghe se ofụkde ntre. Kere ban̄a se iketịbede inọ nditọ Israel ke ndondo oro mmọ ẹkedade Isọn̄ Un̄wọn̄ọ ẹnyene. Mbemiso “nditọ Reuben, ye nditọ Gad, ye ubak esien Manasseh” ẹkebede ẹka edem Akpa Jordan oko, mmọ ẹma ẹbọp “itie-uwa emi okponde ndise.” Mme esien Israel eken ẹkekere ke ẹkeda itieuwa emi ẹkpono ndem inyụn̄ ikemeke ndision̄o idem n̄kpọn̄ ntre. Mmọ ẹma ẹben̄e idem ekọn̄.—Josh. 22:9-12.

Ekeme ndidi ndusụk nditọ Israel ẹma ẹkere ke mmimọ imenyene ekese uyarade ndiwụt ke nditọete mmọ ẹma ẹnam akwa idiọkn̄kpọ ye nte ke ndidedịbe n̄ka ekọn̄ idiyakke mmimọ ikpan̄a iwak. Nte ededi, utu ke ndinam n̄kpọ itọk itọk, mme esien oro ẹkedude ke edem usoputịn Jordan ẹma ẹsio mme owo ẹdọn̄ ẹka ẹkeneme n̄kpọ emi ye nditọete mmọ. Mmọ ẹkebụp ẹte: “Nso orụk edidue edi emi mbufo ẹduede Abasi Israel, ke edifiak mfịn n̄kpọn̄ Jehovah?” Ke nditịm ntịn̄, mme esien oro ẹkebọpde itieuwa oro ikeduehe. Edi mmọ ẹkenam n̄kpọ didie ẹban̄a utọ ndoriuyo oro? Ndi mmọ ẹma ẹtọk nditọete mmọ m̀mê ẹdop mmọ uyo? Mme esien oro ẹkedoride uyo do ẹkebọrọ ke sụn̄sụn̄ uyo, ẹtịn̄ in̄wan̄-in̄wan̄ ke udọn̄ oro mmimọ ikenyenede ndinam n̄kpọ Jehovah akanam mmimọ inam se ikanamde. Sụn̄sụn̄ ibọrọ mmọ ama anam mmọ ẹka iso ẹnyene itie ebuana ye Abasi ẹnyụn̄ ẹnyan̄a uwem. Sụn̄sụn̄ nneme oro ama ọkọk mfịna oro onyụn̄ anam ẹfiak ẹnyene emem.—Josh. 22:13-34.

 Mbemiso ẹkenamde n̄kpọ, nditọ Israel eken ẹma ẹda ọniọn̄ ẹneme mfịna oro ye esien Reuben ye Gad ye ubak esien Manasseh. Ikọ Abasi ọdọhọ ete: “Kûyak spirit fo ọsọp iyatesịt: koro iyatesịt atakde ke ikpanesịt mbon ndisịme.” (Eccl. 7:9) Ndise mban̄a ikpọ mfịna nte ekemde ye N̄wed Abasi edi ndineme mfịna oro sụn̄sụn̄ ke ofụri esịt ye owo enye eken. Ndi imekeme ndinen̄ede ndori enyịn ke Jehovah ọyọdiọn̄ nnyịn edieke ikamade udu inyụn̄ ikpude ndika mbịne owo emi nnyịn ikerede ke edue nnyịn?

Nso ke ikpanam edieke eyenete edide edineme mfịna ye nnyịn, eyedi akam odori nnyịn ikọ? Bible ọdọhọ ete: “Sụn̄-sụn̄ ibọrọ akabade ifiopesịt efep.” (N̄ke 15:1) Esien Israel iba ye ubak oro ẹma ẹsụhọde idem ẹtịn̄ se mmọ ẹkenamde, ndien emi ama akpan utọk oro mmọ ẹkpeketọhọde ye nditọete mmọ. Edide nnyịn ika ibịne eyenete nnyịn m̀mê enye edi ebịne nnyịn editịn̄ aban̄a mfịna oro odude, ọkpọfọn ibụp idem nnyịn ite, ‘Nso ikọ, uyo ikọ, ye edu ẹdinen̄ede ẹnam emem aka iso odu?’

Da Edeme Nam N̄kpọ ke Ọniọn̄

Jehovah ọfiọk ke oyom itịn̄ se ifịnade nnyịn. Nte ededi, edieke nnyịn mîbiereke ndutan̄uyo oro inyenede ye owo, enen̄ede etie nte iyetịn̄ inọ owo en̄wen. Ndikama udu ekeme ndinam owo esisọp okụt ndudue ọnọ owo. Mme N̄ke 11:11 etịn̄ ntem aban̄a edida edeme ntịn̄ ikọ nte mîdotke: “[Obio] owụre ke inua mme idiọk owo.” Kpasụk ntre, idiọk ikọ emi owo etịn̄de aban̄a eyenete ekeme ndibiat emem esop emi etiede nte obio.

Nte ededi, ndibịne emem iwọrọke nditre nditịn̄ ikọ ekededi mban̄a nditọete nnyịn. Apostle Paul eketeme nditọete ete: “Ẹkûyak mbumbu ikọ ọwọrọ mbufo ke inua.” Edi enye ama adian n̄ko ete: “Ẹtịn̄ se ededi oro ọfọnde ndibọp owo nnam ọkọri nte oyomde. . . . Ẹfọn ido ye kiet eken, ẹtua owo mbọm, ẹfen kiet eken ke ofụri esịt.” (Eph. 4:29-32) Edieke eyenete emi se afo eketịn̄de m̀mê akanamde akabiakde enye ekpedide ebịne fi, ndi ikpememke fi utom ndikpe ubọk nnyụn̄ nnam emem edieke akanam enye mîtịn̄ke idiọk ikọ iban̄a fi inọ mbon en̄wen? Mmọdo, edieke isimade nditịn̄ nti ikọ mban̄a nditọete nnyịn emi ayanam emem utom ndifiak nnyene emem ke ini ndutan̄uyo odude.—Luke 6:31.

Ndinam N̄kpọ Abasi “ke Esịt Kiet”

Sia idade-da idiọkn̄kpọ imana, edi edu nnyịn ndidianade idem n̄kpọn̄ mbon oro ẹduede nnyịn. Edi utọ edinam oro iwụtke ọniọn̄. (N̄ke 18:1) Sia nnyịn idianade kiet ikot enyịn̄ Jehovah, imebiere ‘ndinam n̄kpọ nnọ Abasi ke esịt kiet.’—Zeph. 3:9.

Idiọk ikọ m̀mê edinam mbon en̄wen ikpedehedei inam nnyịn itek ke ifịk oro inyenede iban̄a utuakibuot akpanikọ. Usen ifan̄ mbemiso uwa Jesus akadade itie uwa oro ẹkesiwade ke temple ye esisịt ini ke Jesus ama ekenen̄ede asua ọnọ mme scribe, enye ama okụt nte ubuene ebeakpa ekesịnde “kpukpru se enye akpadade odu uwem” ke n̄kpọ udọn̄ okụk temple. Ndi Jesus ama odomo ndikpan enye? Baba, akakam ototoro enye aban̄a edisọn̄ọ nnọ esop Jehovah ini oro ibetedem. (Luke 21:1-4) Idiọk edinam mbon en̄wen ikakpanke enye ndinam utom esie ndinọ utuakibuot Jehovah ibetedem.

Okposụkedi emi nnyịn ikemede ndikere ke se eyenete anamde ifọnke, m̀mê ke ikam inenke, nnyịn idinam n̄kpọ didie? Ndi nnyịn iyayak emi afịna utom ofụri esịt oro inamde inọ Jehovah? Mîdịghe ndi nnyịn iyada uko inam n̄kpọ man ibiere ndutan̄uyo ekededi man emem aka iso odu ke esop Abasi mfịn?

N̄wed Abasi eteme nnyịn ete: “Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.” (Rome 12:18) Nnyịn ikpakam ibiere ndinam ntre ndien ke ntem ika iso idu ke usụn̄ oro adade esịm uwem!

[Ikọ Idakisọn̄]

[Ndise ke page 17]

Ama oyom Euodia ye Syntyche ẹbịne emem

[Ndise ke page 18]

Nso ikọ, uyo ikọ, ye edu ẹdinen̄ede ẹnam emem aka iso odu?