“Ẹbiọn̄ọ Devil” nte Jesus Ọkọbiọn̄ọde
“Ẹbiọn̄ọ Devil” nte Jesus Ọkọbiọn̄ọde
“Ẹbiọn̄ọ Devil, ndien enye eyefehe ọkpọn̄ mbufo.”—JAS. 4:7.
1. Jesus ọkọfiọk ke nso ubiọn̄ọ ke imọ ikenyene ndisobo ke isọn̄, ndien nso ikedi utịp?
JESUS CHRIST ama ọfiọk ke Devil ọyọbiọn̄ọ imọ. Ẹma ẹkụt emi ke ikọ oro Abasi eketịn̄de ọnọ urụkikọt, emi ke nditịm ntịn̄ eketịn̄de ọnọ idiọk ọsọn̄ibuot angel oro ete: “Nyonyụn̄ nsịn usua ke ufọt fo ye n̄wan [ikpehe esop Jehovah ke heaven], ye ke ufọt ubon fo ye ubon esie: enye [Jesus Christ] ayanuak fi ibuot, afo oyonyụn̄ anuak enye nditịn̄-ikpat.” (Gen. 3:14, 15; Edi. 12:9) Ndinuak Jesus nditịn̄-ikpat ọkọwọrọ ke se ẹkenamde enye ekedi ke ibio ini ke ndiwot enye ke ini emi enye okodude ke isọn̄, koro Jehovah ama anam enye eset akada ubọn̄ ke heaven. Edi ndinuak urụkikọt ke ibuot ọwọrọ ke ẹyesobo Devil ke nsinsi.—Kot Utom 2:31, 32; Mme Hebrew 2:14.
2. Ntak emi Jehovah ekenyenede mbuọtidem ke Jesus ọyọbiọn̄ọ Devil uforo uforo?
2 Jehovah ama enyene mbuọtidem ke Jesus ayanam se ẹkedọn̄de enye uforo uforo onyụn̄ ọbiọn̄ọ Devil ke ini emi okodude ke isọn̄. Ntak emi Jehovah ekenyenede orụk mbuọtidem oro? Koro enye okobot Jesus ke heaven ke anana-ibat isua mbemiso ini oro, okụt nte enye anamde n̄kpọ, onyụn̄ ọfiọk ke “etubom anamutom” emi, oro onyụn̄ edide “akpan ke otu kpukpru edibotn̄kpọ” ama okop uyo onyụn̄ anam akpanikọ. (N̄ke 8:22-31, NW; Col. 1:15) Ntre, ke ini ẹkenọde Jesus edi isọn̄ ẹnyụn̄ ẹyakde Devil odomo enye tutu esịm n̄kpa, Abasi ama enyene mbuọtidem ke ikpọn̄-ikpọn̄ edibon Eyen imọ ayakan.—John 3:16.
Jehovah Ekpeme Mme Asan̄autom Esie
3. Nso edu ke Devil enyene aban̄a mme asan̄autom Jehovah?
3 Jesus okokot Devil “andikara ererimbot emi” onyụn̄ odụri mme mbet Esie utọn̄ ete ke ẹyekọbọ mmọ, kpa nte ẹkekọbọde imọ. (John 12:31; 15:20) Ererimbot, emi esịnede ke idak odudu Satan kpa Devil, asua ata mme Christian sia mmọ ẹnamde n̄kpọ Jehovah ẹnyụn̄ ẹdide mme ọkwọrọ edinen ido. (Matt. 24:9; 1 John 5:19) Akpan iso en̄wan Devil edi nsụhọ mbon oro ẹyetde aran, emi ẹdikarade ye Christ ke Obio Ubọn̄ eke heaven. Satan an̄wana n̄ko ye ediwak Mme Ntiense Jehovah emi enyenede idotenyịn ndidu uwem nsinsi ke Paradise isọn̄. Ikọ Abasi odụri nnyịn utọn̄ ete: “Asua mbufo, kpa Devil, ke oyoyo asan̄a nte ekpe eke okụnide, oyom owo eke enye editade.”—1 Pet. 5:8.
4. Nso iwụt ke ikọt Abasi ẹbiọn̄ọ Devil uforo uforo ke eyo nnyịn?
4 Sia idide esop oro Jehovah Abasi ekpemede, nnyịn imọbiọn̄ọ Devil uforo uforo. Kere ban̄a emi: Ke isua 100 emi ẹbede, ndusụk ke otu ndiọkn̄kan mme akara ukara ufịk ẹma ẹdomo ndisobo Mme Ntiense Jehovah mfep ofụri ofụri. Edi ibat Mme Ntiene aka iso ndikọkọri ndien idahaemi ayak ata ekpri ndisịm 7,000,000 ke se ibede esop 100,000 ke ofụri ererimbot. Mme akara ukara ufịk emi ẹdide ibak, oro ẹkekọbọde ikọt Jehovah ikam idụhe aba!
5. Didie ke Isaiah 54:17 osu mme asan̄autom Jehovah ke idem?
5 Ke ini Abasi eketịn̄de ikọ ọnọ esop Israel eset nte “n̄wan” esie (NW), Abasi ama ọn̄wọn̄ọ ete: “Baba n̄kpọ ekọn̄ kiet eke ẹbotde ẹban̄a fi idikwe unen; afo oyonyụn̄ anam ikọ etịp kpukpru edeme eke ẹdahade ẹda ẹnam ikọ ye afo. . . . Emi edi udeme ikọt Jehovah, edinen ido mmọ onyụn̄ oto ye ami.” (Isa. 54:11, 17) Ke “mme akpatre usen” emi, un̄wọn̄ọ emi osu ikọt Jehovah ke ofụri isọn̄ ke idem. (2 Tim. 3:1-5, 13) Imaka iso ndibiọn̄ọ Devil, inyụn̄ idụhe n̄kpọekọn̄ oro enye odomode ndida nsobo ikọt Abasi mfep oro edikụtde unen, sia Jehovah odu ye nnyịn.—Ps. 118:6, 7.
6. Nso ke ntịn̄nnịm ikọ Daniel asian nnyịn aban̄a se iditịbede inọ ukara Devil ke ini iso?
6 Ke utịt ofụri idiọk editịm n̄kpọ emi asan̄ade ekpere usọp usọp mi, ẹyesobo kpukpru ikpehe ukara Satan ẹfep ofụri ofụri. Prọfet Daniel ekewet ke ndausụn̄ edisana spirit Abasi ete: “Ke eyo ndidem oro [eyo emi idude mi], Abasi enyọn̄ ayanam ubọn̄ [eke heaven] eke mîdisoboke ke nsinsi, adaha ada: ndien idikpọn̄ke ubọn̄ emi inọ mbio efen: enye ayanuak onyụn̄ ama kpukpru mme idụt emi [ẹdude idahaemi], ndien enye ayada ke nsinsi.” (Dan. 2:44) Ke ini oro etịbede, ukara Satan ye ukara mme anana-mfọnmma owo ididụhe aba. Ẹyesobo ofụri editịm n̄kpọ Devil ẹfep ke nsinsi, ndien Obio Ubọn̄ Abasi ayakara ofụri isọn̄ ye unana ubiọn̄ọ.—Kot 2 Peter 3:7, 13.
7. Nnyịn isan̄a didie ifiọk ke mme asan̄autom Jehovah kiet kiet ẹkeme ndibiọn̄ọ Devil uforo uforo?
7 Eyịghe ndomokiet idụhe ke ẹyenyan̄a esop Jehovah ndien ke enye oyoforo ke n̄kan̄ eke spirit. (Kot Psalm 125:1, 2.) Nso kaban̄a nnyịn? Bible asian nnyịn ke imekeme ndibiọn̄ọ Devil, idem kpa nte Jesus ọkọbiọn̄ọde. Ke nditịm ntịn̄, ntịn̄nnịm ikọ oro Christ akadade apostle John etịn̄ owụt ke kpa ye ubiọn̄ọ Satan, ke “akwa otuowo” oro ẹnyenede idotenyịn ndidu ke isọn̄, ẹyebọhọ utịt editịm n̄kpọ emi. N̄wed Abasi ọdọhọ ke mmọ ẹfiori ẹte: “Edinyan̄a nnyịn oto Abasi nnyịn, emi etiede ke ebekpo, onyụn̄ oto Eyenerọn̄ [Jesus Christ].” (Edi. 7:9-14) Ẹdọhọ ke mbon oro ẹyetde aran ẹkan Satan, ye nte ke mme nsan̄a mmọ, “mme erọn̄ en̄wen,” ẹtiene ẹbiọn̄ọ enye uforo uforo. (John 10:16; Edi. 12:10, 11) Edi ndinam emi oyom isịn ukeme inyụn̄ ibọn̄ akam ofụri esịt ite ‘ẹnyan̄a nnyịn ẹsio ke ubọk andidiọk.’—Matt. 6:13.
Mfọnmma Uwụtn̄kpọ Owo Emi Ọkọbiọn̄ọde Devil
8. Nso ikedi akpa idomo emi Devil okodomode Jesus ke wilderness, ndien Christ akanam n̄kpọ didie aban̄a oro?
8 Devil ama odomo ndibiat nsọn̄ọnda Jesus. Ke wilderness, Satan ama ada mme idomo esịn ukeme ndinam Jesus okûkop uyo ọnọ Jehovah. Edi Jesus ama enịm mfọnmma uwụtn̄kpọ ke ndibiọn̄ọ Satan. Anaedi biọn̄ ama enen̄ede ọdọn̄ Jesus ke enye ama eketie utreudia uwemeyo 40 ye okoneyo 40. Satan ọkọdọhọ ete: “Edieke afo edide eyen Abasi, dọhọ mme itiat emi ẹkabade mme ebok uyo.” Edi Jesus ama esịn ndida odudu oro Abasi ọkọnọde enye nnam ufọn nnọ idemesie. Utu ke oro, Jesus mbon ọkọdọhọ ete: “Ẹwet ẹte, ‘Idịghe uyo ikpọn̄ ke ana owo ada odu uwem, edi edida kpukpru ikọ eke ẹwọrọde Jehovah ke inua odu.’”—Matt. 4:1-4; Deut. 8:3.
9. Ntak emi ikpọbiọn̄ọde ukeme oro Devil esịnde ndida ndammana udọn̄ obụkidem nnam nnyịn iduọ?
9 Mfịn, Devil odomo ndida ndammana udọn̄ obụkidem mme asan̄autom Jehovah nnam mmọ ẹduọ. Mmọdo, ana ibiere ndibiọn̄ọ idomo oburobụt ido idan̄, emi edide ọsọ n̄kpọ, akpan akpan ke oburobụt ererimbot emi. Ikọ Abasi etịn̄ in̄wan̄-in̄wan̄ ete: “Kamse! Nte mbufo ifiọkke ite mme anam ukwan̄ido ididaha obio ubọn̄ Abasi inyene? Ẹkûyak ẹtụn mbufo usụn̄. Mbon use, mme okpono ndem, mme esịn efịbe, iren oro ẹnịmde ndida nyụhọ oburobụt udọn̄ idan̄, irenowo emi ẹdan̄de ye irenowo . . . ididaha obio ubọn̄ Abasi inyene.” (1 Cor. 6:9, 10) Do, ana in̄wan̄-in̄wan̄ ke owo idiyakke mbon oro ẹdude oburobụt uwem mînyụn̄ imaha ndikpụhọde ẹdụn̄ ke obufa ererimbot Abasi.
10. Matthew 4:5, 6 ọdọhọ ke nso ikedi idomo en̄wen oro Satan akadade odomo ndibiat nsọn̄ọnda Jesus?
10 N̄wed Abasi etịn̄ ntem aban̄a kiet ke otu idomo oro ẹkedomode Jesus ke wilderness: “Devil ada enye odụk ke edisana obio, onyụn̄ anam enye ada ke enyọn̄ ibibene temple onyụn̄ ọdọhọ enye ete: ‘Edieke afo edide eyen Abasi, sio idemfo duọk ke isọn̄; koro ẹwet ẹte, “Enye ọyọnọ mme angel esie uyo aban̄a fi, ndien mmọ ẹyekama fi ke ubọk mmọ, mbak afo udutuak ukot fo ke itiat.”’” (Matt. 4:5, 6) Ikọ Satan ọkọwọrọ ke edieke Jesus anamde emi, kpukpru owo ẹyefiọk ke enye edi Messiah. Edi ke nditịm ntịn̄, oro ekpekedi idiọk edinam ntan̄idem emi Abasi mîkpọkọnọhọ ibetedem ye unyịme. Jesus ama afiak ọsọn̄ọ ada ye Jehovah onyụn̄ ada N̄wed Abasi ọnọ enye ibọrọ. Enye ọkọdọhọ ete: “Ẹwet n̄ko ẹte, ‘Kûdomo Jehovah Abasi fo.’”—Matt. 4:7; Deut. 6:16.
11. Didie ke Satan ekeme ndidomo nnyịn, ndien nso ikeme ndidi utịp?
11 Satan ekeme ndidomo nnyịn man iyom ubọn̄ ke nsio nsio usụn̄. Enye ekeme ndinam nnyịn ikpebe n̄kon̄ine ererimbot ke usịnen̄kpọ ye ukamaidem m̀mê man itiene ibuana ke idiọk unọ idem inemesịt. Edi edieke ikpesịnde item Bible inyụn̄ ikpebe ererimbot, ndi ikpodori enyịn ke mme angel eyekpeme nnyịn ẹbiọn̄ọ mme utịp utọ idiọk usụn̄ uwem oro? Okposụkedi emi Edidem David akakabarede esịt ke idiọkn̄kpọ oro enye akanamde ye Bath-sheba, owo ikekpemeke enye ibiọn̄ọ utịp ndiọi edinam. (2 Sam. 12:9-12) Ẹyak nnyịn ikûdomo Jehovah, ke ndinam ufan ye ererimbot.—Kot James 4:4; 1 John 2:15-17.
12. Nso ikedi idomo oro ẹtịn̄de ẹban̄a ke Matthew 4:8, 9, ndien nso ke Eyen Abasi akanam?
12 Idomo en̄wen emi Devil okodomode Jesus ke wilderness ekedi ndinọ enye ukara ererimbot. Satan ama owụt Jesus kpukpru obio ubọn̄ ererimbot ye ubọn̄ mmọ onyụn̄ ọdọhọ ete: “Nyọnọ fi kpukpru mme n̄kpọ emi edieke afo ọduọde ke isọn̄ atuak ibuot ọnọ mi.” (Matt. 4:8, 9) Nso oburobụt usụn̄ ndibọ utuakibuot emi enyenede Jehovah nnyụn̄ ntap Jesus etre ndisọn̄ọ nda ye Abasi ke emi ekedi ntem! Nditie n̄kere nte ẹkpekponode imọ ama anam angel oro akanamde akpanikọ ini kiet ko akabade Satan kpa Devil emi abakde-ibak, odomo idomo, onyụn̄ ọdiọk itọn̄. (Jas. 1:14, 15) Edi Jesus ekedi ata isio onyụn̄ ebiere ndisọn̄ọ nda nnam akpanikọ nnọ Ete esie eke heaven, ndien ke ntre ama ọdọhọ ete: “Daha mi, Satan! Koro ẹwet ẹte, ‘Edi Jehovah Abasi fo ke ana afo atuak ibuot ọnọ, onyụn̄ edi enye ikpọn̄ ke ana afo anam edisana utom ọnọ.’” Ntem, Jesus ama afiak ada ata in̄wan̄-in̄wan̄ ikọ ọbiọn̄ọ Devil. Eyen Abasi ikoyomke ikpehe ererimbot Satan ekededi ikponyụn̄ idehedei ituak ibuot inọ idiọkowo oro!—Matt. 4:10; Deut. 6:13; 10:20.
“Ẹbiọn̄ọ Devil, Ndien Enye Eyefehe Ọkpọn̄ Mbufo”
13, 14. (a) Nso ke Devil ọkọnọ Jesus ke ndiwụt enye kpukpru obio ubọn̄ ererimbot? (b) Didie ke Satan odomo ndibiat nnyịn?
13 Devil ndiwụt Jesus kpukpru obio ubọn̄ ererimbot ọkọwọrọ ke enye ọkọnọ Jesus ubọn̄ oro akanam owo ndomokiet mînyeneke. Satan ekekere ke Jesus ayama se enye okokụtde, onyụn̄ ọdọhọ enye ke imọ imekeme ndikabade ndi akakan andikara ke isọn̄. Mfịn, Devil inọhọ nnyịn mme obio ubọn̄, enye odomo ndida se ikụtde, se ikopde, ye se ikerede mbiat esịt nnyịn.
14 Devil akara ererimbot emi. Ntem, enye akara ndutịm usuanetop ererimbot emi. Mmọdo, ikpaha owo idem nte ke oburobụt ido ye afai ẹyọyọhọ se mme owo ẹsede, ẹkpan̄de utọn̄ ẹnọ, ẹnyụn̄ ẹkotde-kot ke ererimbot emi. Ndutịm usuanetop n̄kpọurua ererimbot emi ẹdomo ndinam nnyịn inyene udọn̄ ndidep akpakịp n̄kpọ oro nnyịn mîyomke. Ntem ke Devil esida mme n̄kpọ obụkidem oro isimade ndise, ndikpan utọn̄ nnọ, ye mme n̄kpọ oro isikerede, odomo nnyịn kpukpru ini. Edi ke ini itrede ndise, ndikpan̄ utọn̄ nnọ, ndinyụn̄ n̄kot n̄kpọ oro mîkemke ye N̄wed Abasi, ọwọrọ ke nnyịn idọhọ ite: “Daha mi, Satan!” Ntem ke nnyịn idikpebe Jesus ke ndisọn̄ọ nsịn ndedehe ererimbot Satan. Ẹkụt n̄ko ke nnyịn idịghe ubak ererimbot Satan ke nte inyenede uko ndinam ẹfiọk nnyịn nte Mme Ntiense Jehovah ye mme anditiene Christ, ke itieutom, ke ufọkn̄wed, ke mbọhọ, ye ke ini idude ye mme iman nnyịn.—Kot Mark 8:38.
15. Ntak emi oyomde idu ke edidemede kpukpru ini man ibiọn̄ọ Satan?
15 Ke Devil ama okodomo ikata ndinam Jesus abiat nsọn̄ọnda esie ye Abasi edi ikwe unen, “Devil [ama] adaha ọkpọn̄ enye.” (Matt. 4:11) Edi Satan okosụk adaduak ndidomo Jesus, koro N̄wed Abasi ọdọhọ ete: “Ntre ke Devil ama okokụre kpukpru idomo emi [ke wilderness], adaha ọkpọn̄ enye tutu ini efen eke ọfọnde.” (Luke 4:13) Ikpenyene ndikọm Jehovah ke ini ibiọn̄ọde Devil. Edi ikpenyene ndika iso nyom un̄wam Abasi, koro Devil ayafiak edi ndidomo nnyịn ke ini efen eke ọfọnde ye enye—inyụn̄ idịghe ke ini oro ikemede ndidori enyịn ke ẹyedomo nnyịn. Ntem, ana idu ke edidemede kpukpru ini, iben̄e idem ndika iso nnam edisana utom nnọ Jehovah kpa ye mme idomo ekededi oro ikemede ndisobo.
16. Ewe akakan odudu ke Jehovah ọnọ nnyịn, ndien ntak emi ikpọbọn̄de akam iben̄e enye?
16 Ikpenyene ndibọn̄ akam mben̄e edisana spirit Abasi kpa, akakan odudu ke ofụri ekondo—ndien iyọbọ spirit emi man an̄wam nnyịn ke ukeme oro isịnde ndibiọn̄ọ Devil. Enye ayanam nnyịn inam n̄kpọ oro nnyịn mîkpekemeke ndinam ke odudu idem nnyịn. Jesus ama ọn̄wọn̄ọ ọnọ mme anditiene enye ke edisana spirit odu ke ndidọhọ ete: “Edieke mbufo, emi ẹdiọkde [ke ntak emi ẹdide mme anana mfọnmma], ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!” (Luke 11:13) Ẹyak ika iso ibọn̄ akam inọ Jehovah iben̄e edisana spirit esie. Ke ini akakan odudu esie emi eberede ye nnyịn ke ubiere oro inamde ndibiọn̄ọ Devil, iyọbiọn̄ọ Devil uforo uforo. Ke adianade ye edibọn̄ akam ke ofụri esịt kpukpru ini, oyom imen ofụri n̄kpọekọn̄ Abasi eke spirit isịne man “[ikpekeme] ndisọn̄ọ nda n̄n̄wana ye n̄kari Devil.”—Eph. 6:11-18.
17. Nso idatesịt akanam Jesus ọbiọn̄ọ Devil?
17 Enyene n̄kpọ en̄wen emi akan̄wamde Jesus ọbiọn̄ọ Devil, ndien n̄kpọ oro ekeme ndin̄wam nnyịn n̄ko. Bible ọdọhọ ete: “Koro ke ntak idatesịt oro ẹkenịmde [Jesus] ke iso enye ama ọyọ ndutụhọ ke eto, ibatke esuene ke n̄kpọ, onyụn̄ osụhọde etetie ke ubọk nnasia ebekpo Abasi.” (Heb. 12:2) Nnyịn imekeme ndikop orụk idatesịt oro ke ndisọn̄ọ nda nnọ ukara Jehovah, n̄kpono enyịn̄ esie, nnyụn̄ n̄kere mban̄a nsinsi uwem oro ẹdinọde nnyịn. Nso idatesịt ke idikop ntem ke ini ẹdisobode Satan ye kpukpru utom esie ẹfep ofụri ofụri ndien ‘mbon nsụkidem ẹda isọn̄ ẹnyene; ediwak emem ẹnyụn̄ ẹnem mmọ esịt’! (Ps. 37:11) Mmọdo, ẹka iso ẹbiọn̄ọ Devil nte Jesus ọkọbiọn̄ọde.—Kot James 4:7, 8.
Didie ke Afo Ọkpọbọrọ?
• Nso iwụt ke Jehovah esikpeme ikọt esie?
• Didie ke Jesus ekenịm uwụtn̄kpọ ke ndibiọn̄ọ Satan?
• Siak mme usụn̄ oro afo ekemede ndibiọn̄ọ Devil?
[Mme Mbụme Ukpepn̄kpọ]
[Ndise ke page 29]
Ndinam ufan ye ererimbot anam nnyịn idi asua Abasi
[Ndise ke page 31]
Jesus ama esịn kpukpru obio ubọn̄ ererimbot oro Satan ọkọnọde enye