Ndinam N̄kpọ Abasi ke “Esịt Kiet ye Ukpọn̄ Kiet”

MME Jew ye mme okpono Abasi ke ido mme Jew ẹkan mme mbet Jesus Christ ẹkụk. Edi Usọrọ Pentecost, ndien isenowo emi ẹto Rome ke edem usoputịn ye Parthia ke edem usiahautịn ẹdi Jerusalem. Otuowo emi ẹsem nsio nsio usem. Edi mbet Jesus oro ẹnyenede nneme ye mmọ ẹto Galilee. Ndusụk isenowo emi n̄kpọ emi ayan̄ade mmọ ifiọk ẹbụp ẹte: “Anam didie nnyịn owo kiet kiet ikopde nte mmọ ẹsemde usem emana nnyịn?”—Utom 2:8.

Apostle Peter adaha ada etịn̄ ntak utịben̄kpọ emi mmọ ẹkụtde mi. Otuowo ẹnyịme  se enye etịn̄de inikiet inikiet. Ediwak tọsịn mbufa owo ẹna baptism! (Utom 2:41) Okposụkedi emi esop ọkọkọride usọp usọp, mme owo ẹkesụk ẹdadiana kiet. Luke emi eketienede ewet Bible ọdọhọ ete: “Udịm owo emi ẹkenịmde ke akpanikọ ẹnyene esịt kiet ye ukpọn̄ kiet.”—Utom 4:32.

Ediwak tọsịn owo oro ẹkenade baptism ke usen Pentecost ke 33 E.N. ẹkeyom ndidu ke Jerusalem mbịghi man ẹkpep ekese n̄kpọ ẹban̄a obufa ido ukpono mmọ emi. Edi mmọ ikekereke ke mmimọ iyetie ibịghi. Ntem, ẹma ẹtịp okụk ke ibio ini. Ndusụk mme andinịm ke akpanikọ ẹma ẹnyam inyene mmọ ẹda okụk oro ẹsọk mme apostle ẹdeme ẹnọ mbon oro ẹdude ke unana. (Utom 2:42-47) Nso eti edu ima ye ntatubọk ke mmọ ẹkenyene ntem!

Ata mme Christian ẹsinyene utọ edu ima ye ntatubọk oro kpukpru ini. Mfịn, mme Christian emi ẹdude ke esop Abasi eka iso ẹdiana kiet ẹnam n̄kpọ Jehovah ke “esịt kiet ye ukpọn̄ kiet.” Christian kiet kiet ẹsitat ubọk ẹnọ ini, odudu, ye okụk mmọ ẹda ẹkwọrọ eti mbụk ẹnyụn̄ ẹnam n̄kpọ Obio Ubọn̄ Abasi ọkọri.—Se ekebe oro  “Mme Usụn̄ Emi Ndusụk Owo Ẹmekde Ndinọ Enọ.”

[Ekebe ke page 6]

 MME USỤN̄ EMI NDUSỤK OWO ẸMEKDE NDINỌ ENỌ

MME ETỊBE KABAN̄A UTOM OFỤRI ERERIMBOT

Ediwak owo ẹsinịm, mîdịghe ẹnam ndutịm ẹban̄a okụk oro mmọ ẹdisịnde ke mme ekebe etịbe oro ẹdiande idiọn̄ọ emi: “Worldwide Work.”

Ke ọfiọn̄ kiet kiet, mme esop ẹsinọ okụk emi aka ọfis Mme Ntiense Jehovah emi esede aban̄a idụt mmọ. Emekeme n̄ko ndinọ okụk imaesịt nnennen ẹsọk n̄kọk itieutom Mme Ntiense Jehovah oro esede aban̄a idụt mbufo. Ẹkpenyene ndiwet “Watch Tower” ke babru okụk ban̄k oro ẹnọde. Ẹkeme ndinọ n̄ko mme n̄kpọuto m̀mê mme ọsọn̄urua n̄kpọ eken. Mme utọ etịbe oro ẹkpenyene ndisan̄a ye ibio ibio leta oro owụtde in̄wan̄-in̄wan̄ nte ke emi edi enọ.

ENỌ EMI ẸDIOMIDE-DIOMI

Ke adianade ye edinọ okụk nte enọ, mme usụn̄ enọ efen ẹdu oro ẹkemede ndida nnam utom Obio Ubọn̄ oro ẹnamde ke ofụri ererimbot. Mmọ emi ẹsịne:

Insurance: Ẹkeme ndiwet enyịn̄ Watch Tower nte andibọ ufọn insurance m̀mê okụk ukpọn̄ utom.

Okụk Oro Ẹsịnde ke Itie Unịm Okụk: Ẹkeme ndinam okụk oro ẹsịnde ke itie unịm okụk, n̄wed oro ẹwetde okụk oro ẹsịnde ke itie unịm okụk ẹyom udori, m̀mê okụk ukpọn̄ utom owo odu ke enyịn̄ Watch Tower, mîdịghe ẹnam ẹkpe enye ẹnọ Watch Tower ke ini andinyene akpade, nte ekemde ye ndutịm itie unịm okụk n̄kann̄kụk.

Inyene ye Mbubehe: Ẹkeme ndinọ Watch Tower inyene ye mbubehe nte enọ.

Isọn̄ ye Ufọk: Ẹkeme ndinọ isọn̄ ye ufọk oro ẹkemede ndinyam, edide nte enọ m̀mê, edieke edide ufọk emi owo odụn̄de, man ẹmụm isọn̄ ye ufọk oro ẹkama ẹnọ andinọ, emi ekemede ndisụk n̄ka iso ndụn̄ do ke eyouwem esie. Tọt n̄kọk itieutom idụt mbufo mbemiso ayakde isọn̄ m̀mê ufọk ekededi ọnọ Watch Tower.

Unen N̄kpọ-Akpa ye Mme Ebuọt: Ẹkeme ndiyak inyene m̀mê okụk nnọ Watch Tower ke ndinọ enye unen oro ekemde ye ibet ndidia n̄kpọ-akpa, mîdịghe ẹkeme ndiwet enyịn̄ Watch Tower nte adia-ufọn ke n̄wed ebuọt.

Nte ikọ oro “enọ emi ẹdiomide-diomi” owụtde, oyom andinọ utọ enọ emi anam ndutịm.

Edieke oyomde ntọt efen efen, emekeme ndinyene nneme ye N̄kọk Itieutom Mme Ntiense Jehovah ke Nigeria, edide ke ndiwewet m̀mê ke ndikot ke urụk ukopikọ, ke adres emi ẹwetde ke idak emi mîdịghe emekeme ndinyene nneme ye n̄kọk itieutom emi esede aban̄a idụt mbufo.

Jehovah’s Witnesses

P.M.B. 1090,

Benin City 300001,

Edo State, Nigeria.

Telephone: (052) 202020