Nso Orụk Owo ke Afo Oyom Ndidi?

AKWA owo bodisi ke obio kiet ke Philippines ama obụp asiakusụn̄ ete, “Ada nso anam ọbọn̄ oro okpụhọde edu esie?” Anyan ubọk ke eboho babru ke okpokoro esie onyụn̄ adian do ete: “Ndi ama ọfiọk ke kpukpru emi ẹdi n̄wed ikpe esie emi ẹkekpede? Afo aman̄wam nnyịn ke emi anamde owo kiet emi ekesinọde nnyịn n̄kọn̄ibuot ke obio emi okpụhọrede edu esie.” Owo emi ẹtịn̄de ẹban̄a mi ekedi n̄wọn̄-kpa emi ekesisịnde ntịme kpukpru ini. Nso ikanam enye enen̄ede okpụhọde ntem? Ekedi etop Ikọ Abasi eke odudu spirit, kpa Bible.

Ediwak owo ẹnam item apostle Paul emi ọdọhọde ‘ẹsio akani owo ẹduọk emi asan̄ade ekekem ye akani ido uwem mmọ ẹnyụn̄ ẹmen obufa owo ẹsịne emi ẹkebotde nte ekemde ye uduak Abasi.’ (Eph. 4:22-24) Edide ukpụhọde oro anade inam edi akamba m̀mê ekpri, ndimen obufa owo nsịne edi ubak edikabade ndi Christian.

Nte ededi, nnyịn ndinam mme ukpụhọde nnyụn̄ nnam n̄kọri tutu idot ndina baptism, akam edi ntọn̄ọ. Ke ini baptism nnyịn, nnyịn itie nte ekpri eto emi ẹsọide. Owo eke okụtde ọfiọk se ẹsọide, edi ekese utom ke ososụhọ ndinam. Andisọi enyene ndidiọn̄ se enye ọsọide oro man uyai esie ọwọrọ ada. Ke ini baptism nnyịn, nnyịn imenyene mme akpan edu oro ẹyomde man idi mme asan̄autom Abasi. Edi ikam itọtọn̄ọ ndimen obufa owo nsịne. Inyene ndikaka iso nnam n̄kọri ebe ke ndinam mme ukpụhọde.

Akam edi Paul ama okụt ke oyom imọ inam n̄kọri. Enye ọkọdọhọ ete: “Ke ini nyomde ndinam se inende, se idiọkde odu ye ami.” (Rome 7:21) Paul ama enen̄ede ọfiọk orụk owo oro imọ ikedide ye orụk owo oro imọ ikoyomde ndidi. Nso kaban̄a nnyịn? Oyom ibụp idem nnyịn n̄ko ite: ‘Nso idu ye ami? Nso orụk owo ke ami ndi? Ndien nso orụk owo ke ami nyom ndidi?’

Nso ‘Idu ye Ami’?

Ke ini idiọn̄de akani ufọk, iyomke iyet ndom mbakara ke an̄wa kpọt edieke n̄kakat ẹtade ndori ọkọmufọk oro. Edieke mîdiọn̄ke  mme akpan n̄kpọ oro ẹbiarade, ọwọrọ ke ikot edịm ibọn̄ idem. Kpasụk ntre, ndinyene enyọn̄ enyọn̄ edinen ido ikemke. Ana idụn̄ọrede owo emi nnyịn inen̄erede idi inyụn̄ ifiọk mme mfịna oro anade ikọk. Mîdịghe ntre, imekeme ndifiak nnyene edu akani owo. Mmọdo, ana idụn̄ọrede idem nnyịn. (2 Cor. 13:5) Oyom ifiọk ndiọi edu inyụn̄ itre mmọ. Jehovah ọnọ nnyịn un̄wam man inam oro.

Paul ekewet ete: “Ikọ Abasi enyene uwem onyụn̄ enyene odudu onyụn̄ ọsọp akan ofụt iso iba onyụn̄ ekịm abahade ukpọn̄ ye spirit, ye ikek ye ndia esie, onyụn̄ ekeme ndifiọk mme uduak ye ekikere esịt owo.” (Heb. 4:12) Etop Ikọ Abasi, kpa Bible, ekeme ndinen̄ede nnyene odudu ke idem nnyịn. Enye esinen̄ede osụhọde odụk nnyịn esịt—ke ndamban̄a usụn̄, odụk ndia emi esịnede ke esịt ọkpọ. Enye ayararede mme ekikere ye uduak nnyịn, ayararede se nnyịn inen̄erede idi ke esịtidem ke ẹmende ẹdomo ye se nnyịn iwụtde nte idide ke enyọn̄ idem m̀mê se ikerede nte idide. Ikọ Abasi an̄wam nnyịn didie ntem ke emi anamde nnyịn ifiọk mme mfịna nnyịn!

Ke ini idiọn̄de akani ufọk, ekeme ndidi idịghe n̄kpọ oro ẹbiarade kpọt ke idikpụhọ. Ndifiọk se ikanamde mme n̄kpọ oro ẹbiara ayan̄wam nnyịn ikpeme mbak mmọ ẹdifiak ẹbiara. Kpasụk ntre n̄ko, ndifiọk ndiọi edu nnyịn nnyụn̄ mfiọk se ikanamde inyene mmọ ekeme ndin̄wam nnyịn ikan mme mmeme nnyịn. Ediwak n̄kpọ ẹsinam nnyịn inyene edu oro inyenede. Ndusụk ke otu mmọ ẹdi idaha nnyịn ke obio ye adan̄a nte iforode, ebiet emi idụn̄de, ido obio nnyịn, ete ye eka nnyịn, mme nsan̄a nnyịn, ye ido ukpono nnyịn. Idem mme n̄kpọ oro isede ke ekebe ndise, ke senima, ye orụk unọ idem inemesịt eken, ẹnyene ubọk n̄ko. Ndifiọk mme n̄kpọ oro ẹnamde nnyịn inyene ndiọi edu anam nnyịn ikeme nditre mmọ.

Ke ima ikodụn̄ọde idem nnyịn, nnyịn imekeme ndidọhọ ite, ‘Nte ntiede edi oro.’ Idiọk ekikere edi emi. Ke ini Paul eketịn̄de aban̄a mbon oro ẹkedude ke esop Corinth emi ke akpa ẹkedide mbon use, irenowo emi ẹdan̄de ye irenowo, mme akpammịn, ye ntre ntre, enye ọkọdọhọ ete: “Ndusụk mbufo ẹketie ntem. Edi ẹmeyet mbufo . . . ẹsana . . . ke spirit Abasi nnyịn.” (1 Cor. 6:9-11) Edisana spirit Jehovah ekeme ndin̄wam nnyịn n̄ko inam mme ukpụhọde oro oyomde.

Kere ban̄a eren kiet emi ekerede Marcos, * emi odụn̄de ke Philippines. Enye etịn̄ ntem aban̄a uwem esie: “Ete ye eka mi ẹkesitọhọ kpukpru ini. Ntak edi oro n̄kọsọn̄de ibuot ke ini n̄kedide isua 19.” Marcos ama ọwọrọ etop ke mbre mfọniso, inọ, ye edikama ikan̄ n̄wo mme owo. Enye ye ndusụk owo en̄wen ẹma ẹkam ẹyom ndibọ ubomofụm ke odudu n̄wat n̄ka ebiet en̄wen, edi mmọ ikekemeke. Marcos ama aka iso ke ndiọi edinam esie ke ama ọkọdọ ndọ. Ke akpatre, enye ama ataba kpukpru n̄kpọ oro enye ekenyenede ke ntak mbre mfọniso. Esisịt ini ke oro ebede, Marcos ama etiene n̄wan esie ekpep ukpepn̄kpọ Bible oro Mme Ntiense Jehovah ẹkesikpepde n̄wan esie. Ke akpa, enye ekekere ke imọ idotke ndidi Ntiense. Edi Marcos ndida se enye ekekpepde nsịn ke edinam nnyụn̄ ndụk mme  mbono esop ẹma ẹn̄wam enye ọkpọn̄ akani usụn̄ uwem esie. Idahaemi enye edi Christian emi ama akana baptism, emi esinyụn̄ abuanade kpukpru ini ke ndikpep mbon en̄wen nte mmọ n̄ko ẹkemede ndinam ukpụhọde.

Afo Oyom Ndidi Nso?

Nso ukpụhọde ke ikpanam man ifori mme edu Christian nnyịn? Paul eteme mme Christian ete: “Ẹkam ẹsion̄o kpukpru iyatesịt, ifụtesịt, idiọkn̄kpọ, ikọ isụn̄i, ye mbubiam ikọ ke inua mbufo ẹfep. Ẹkûsu nsu ẹnọ kiet eken. Ẹsio akani owo ye mme edinam esie ẹduọk.” Apostle oro ọdọhọ n̄ko ete: “Ẹmen obufa owo ẹsịne, emi ẹnamde edi obufa ebe ke nnennen ifiọk nte asan̄ade ekekem ye mbiet Owo oro okobotde enye.”—Col. 3:8-10.

Do, akpan utịtmbuba nnyịn edi ndisio akani owo mfep nnyụn̄ mmen obufa owo nsịne. Oyom nnyịn inyene mme edu ewe man ikeme ndinam oro? Paul ọdọhọ ete: “Ẹsịne esịt ima emi asan̄ade ye mbọm, mfọnido, nsụhọdeidem, ifụre ifụre ido, ye anyanime. Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye kiet eken. Kpa nte Jehovah ekefende mbufo ke ofụri esịt, ẹfen kpasụk ntre n̄ko. Edi, ke ẹsiode kpukpru n̄kpọ emi ẹfep, ẹsịne ima, koro enye edi mfọnmma mbọbọ edidianakiet.” (Col. 3:12-14) Ndisịn ukeme ofụri esịt man inyene mme edu emi ayanam ‘Jehovah ye owo ẹdọdiọn̄ ẹma nnyịn.’ (1 Sam. 2:26) Jesus ama enyene mme edu Abasi ke n̄wọrọnda usụn̄ ke ini enye okodude ke isọn̄. Edieke ikpepde inyụn̄ ikpebede uwụtn̄kpọ esie, nnyịn imekeme ndinen̄ede mbiet Christ nte “mme andikpebe Abasi.”—Eph. 5:1, 2.

Usụn̄ en̄wen oro ikemede ndifiọk mme ukpụhọde oro ekemede ndiyom inam edi ndikpep mban̄a mme edu mbon oro ẹsiakde ke Bible inyụn̄ ikere iban̄a nti ye ndiọi edu mmọ. Ke uwụtn̄kpọ, kere ban̄a Joseph eyen Jacob. Kpa ye oro ẹkefịkde enye, enye ama aka iso enyene eti edu ye eti ido uwem. (Gen. 45:1-15) Edi Absalom eyen Edidem David ama anam nte imenen̄ede ima mme owo; enye ama onyụn̄ enen̄ede eye. Nte ededi, enye ekedi owo mbia ye owotowo. (2 Sam. 13:28, 29; 14:25; 15:1-12) Edinanam nte idi eti owo ye uyai inamke owo edi eti owo.

Imekeme Ndifori Edu Nnyịn

Man ifori mme edu nnyịn inyụn̄ iye ke enyịn Abasi, ana ikere iban̄a owo emi nnyịn idide ke esịtidem. (1 Pet. 3:3, 4) Ndikpụhọde mme edu nnyịn oyom ifiọk ndiọi edu oro inyenede ye mme n̄kpọ oro ẹnamde nnyịn inyene ndiọi edu emi, inyụn̄ inyene mme edu owo Abasi. Ndi imekeme ndinịm ke edieke isịnde orụk ukeme oro ke iyekeme ndikpụhọde edu nnyịn?

Ih, Jehovah ekeme ndin̄wam nnyịn inam mme ukpụhọde oro oyomde. Nnyịn imekeme ndibọn̄ akam ukem nte andiwet psalm ite: “Bot edisana esịt nọ mi, O Abasi; nyụn̄ nam obufa spirit eke ọsọn̄ọde ada, sịn mi ke idem.” (Ps. 51:10) Nnyịn imekeme ndiben̄e ite spirit Abasi anam utom ke idem nnyịn, anam nnyịn inen̄ede inyene udọn̄ ndidu uwem ekekem ye uduak Abasi. Ke akpanikọ, imekeme ndinen̄ede nye ke enyịn Jehovah!

[Ikọ Idakisọn̄]

[Ndise ke page 4]

Ndi ekem ndiyet ndom mbakara kpọt ke an̄wa ufọk emi oyobio abiatde?

[Ndise ke page 5]

Ndi edu fo ebiet eke Christ?