Mme Akpan N̄kpọ Oro Ẹtode Mme Leta John ye Eke Jude
Ikọ Jehovah Enyene Uwem
Mme Akpan N̄kpọ Oro Ẹtode Mme Leta John ye Eke Jude
LETA apostle John ita emi ẹsịne ke otu mme akpatre n̄wed ke N̄wed Abasi oro ẹkedade odudu spirit Abasi ẹwet, ndien etie nte ẹkewet mmọ ke Ephesus ke isua 98 E.N. Akpa ye udiana leta ẹsịn udọn̄ ẹnọ mme Christian ẹte ẹka iso ẹsan̄a ke un̄wana ẹnyụn̄ ẹbiọn̄ọ mbon mfiakedem. John etịn̄ ke ọyọhọ leta ita aban̄a edisan̄a ke akpanikọ onyụn̄ esịn udọn̄ ọnọ mme Christian ete ẹdiana kiet.
Ke leta oro Jude eyeneka Jesus eketiede ke Palestine ewet, eyedi ke isua 65 E.N., enye ama odụri nditọete utọn̄ aban̄a mme idiọkowo oro ẹkedọn̄de ikpat ndịbe ndịbe ẹdụk ẹdi esop, onyụn̄ eteme nte ẹkpebiọn̄ọde ndiọi odudu. Ndinam etop oro odude ke leta John mbita ye eke Jude ekeme ndinam mbuọtidem nnyịn aka iso ọsọn̄ kpa ye mme n̄kpọ ubiọn̄ọ oro isobode.—Heb. 4:12.
KA ISO NDISAN̄A KE UN̄WANA YE KE IMA YE KE MBUỌTIDEM
Sia ẹkewetde akpa leta John ẹnọ ofụri otu mbon oro ẹnyenede ebuana ye Christ, enye ọdọn̄ọ nti item oro ẹnọde man ẹn̄wam mme Christian man mmọ ẹkeme ndibiọn̄ọ mbon mfiakedem nnyụn̄ n̄ka iso nsọn̄ọ nda nnọ akpanikọ ye edinen ido. Enye ọsọn̄ọ etịn̄ ufọn edika iso nsan̄a ke un̄wana ye ke ima ye ke mbuọtidem.
John ewet ete: “Edieke nnyịn isan̄ade ke un̄wana kpa nte [Abasi] ke idemesie odude ke un̄wana, nnyịn imenyene ebuana ye kiet eken.” Ndien sia ima otode Abasi, apostle oro aka iso ete: “Ẹyak nnyịn ika iso ima kiet eken.” Ke adan̄aemi “ndima Abasi” anamde nnyịn “inịm ibet esie,” nnyịn ida “mbuọtidem nnyịn” ke Jehovah Abasi, Ikọ esie, ye Eyen esie ikan ererimbot.—1 John 1:7; 4:7; 5:3, 4.
Mme Mbụme N̄wed Abasi Oro Ẹbọrọde:
2:2; 4:10—Jesus asan̄a didie edi “uwa usio-isop”? Ndisio isop ọwọrọ “ndikpe se ẹbierede ke ntak ibet oro ẹbiatde m̀mê idiọkn̄kpọ oro ẹnamde.” Jesus ọkọnọ uwem esie nte uwa usio-isop koro enye ama osio isop oro mfọnmma edinen ikpe ekebierede. Ke ntak uwa oro, Abasi ekeme nditua owo mbọm, onyụn̄ efen idiọkn̄kpọ mbon oro ẹbuọtde idem ye Jesus.—John 3:16; Rome 6:23.
2:7, 8—Ewe ibet ke John ọdọhọ ke edi “akani” onyụn̄ edi “obufa”? John etịn̄ aban̄a ibet oro aban̄ade ima n̄waidem nditọete. (John 13:34) Enye okot ibet emi “akani” koro Jesus ọkọnọ ibet emi ke se ibede isua 60 ko ke edem mbemiso John ekewetde akpa n̄wed esie eke odudu spirit. Ke ntre, mme andinịm ke akpanikọ ẹma ẹnyenyene enye “toto ke editọn̄ọ” ini oro mmọ ẹkedide mme Christian. Ibet oro edi “obufa” koro enye akan ‘owo ndima mbọhọidụn̄ esie nte idem esie’ onyụn̄ oyom ẹma ima n̄waidem.—Lev. 19:18; John 15:12, 13.
3:2—Nso ke ‘owo mîyarakede kan̄a’ inọ mme Christian oro ẹyetde aran, ndien anie ke mmọ ẹdikụt “kpa nte enye etiede”? Se owo mîyarakede kan̄a inọ mmọ edi nte mmọ ẹditiede ke ini ẹdinamde mmọ ẹset ke idem eke spirit ẹka heaven. (Phil. 3:20, 21) Edi se mmọ ẹfiọkde edi nte ‘ke adan̄aemi ẹdiyararede Abasi, mmọ ẹditie nte enye, koro mmọ ẹyekụt enye kpa nte enye etiede,’ oro edi, “spirit.”—2 Cor. 3:17, 18.
5:5-8—Didie ke mmọn̄, iyịp, ye spirit ẹtie ntiense ke “Jesus edi Eyen Abasi”? Mmọn̄ eketie ntiense koro ke ini Jesus akanade baptism ke mmọn̄, Jehovah ama ọdọhọ ke imọ imenyịme enye nte Eyen imọ. (Matt. 3:17) Iyịp, m̀mê uwem, Jesus oro enye ọnọde nte “n̄kemn̄kem ufak ke ibuot kpukpru owo” owụt n̄ko ke Jesus edi Eyen Abasi. (1 Tim. 2:5, 6) Ndien edisana spirit etie ntiense ke Jesus edi Eyen Abasi ke ini enye okosụhọrede edidoro Jesus ke ibuot ke ini enye akanade baptism, anam enye “asan̄a ke idụt oro anam se ifọnde onyụn̄ ọkọk kpukpru mmọ emi Devil efịkde.”—John 1:29-34; Utom 10:38.
Se Nnyịn Ikpepde:
2:9-11; 3:15. Edieke Christian ayakde n̄kpọ ekededi m̀mê owo ekededi abiat ima nditọete oro enye enyenede, enye asan̄a ke ekịm eke spirit, ifiọkke ebiet eke enye akade.
KA ISO ‘SAN̄A KE AKPANIKỌ’
John ọtọn̄ọ udiana leta esie ntem: “Ami ebiowo nnọ ẹsọk n̄wan emi ẹmekde ye nditọ esie.” Enye adat esịt ndikụt “ndusụk ke otu nditọ [n̄wan emi] ẹsan̄ade ke akpanikọ.”—2 John 1, 4.
Ke John ama ekesịn udọn̄ ọnọ mme owo ete ẹnyene ima, enye ewet ete: “Ima ọwọrọ ntem, ete nnyịn ika iso isan̄a nte ekemde ye ibet esie.” John odụri owo utọn̄ n̄ko aban̄a “andibian̄a ye andibiọn̄ọ Christ.”—2 John 5-7.
Mme Mbụme N̄wed Abasi Oro Ẹbọrọde:
1, 13—Anie edi “n̄wan emi ẹmekde”? Ekeme ndidi John eketịn̄ aban̄a n̄wan oro ẹkekotde Kyria, emi ọwọrọde “eyenan̄wan” ke usem Greek. Mîdịghe ekeme ndidi enye akada ndamban̄a ikọ etịn̄ aban̄a akpan esop kiet mbak mme andikọbọ ẹdifiọk. Edieke edide udiana emi, ọwọrọ ke nditọ esie ẹdi mme andibuana ke esop oro, ndien “nditọ eyenete [esie] an̄wan” ẹdi mme andibuana ke esop en̄wen.
7—Ewe ‘edidi’ Jesus ke John etịn̄ aban̄a, ndien didie ke mme andibian̄a “mînyịmeke” edidi emi? ‘Edidi’ oro idịghe edidi Jesus oro enyịn mîkwe ke ini iso. Utu ke oro, edi enye ndikedi ke obụkidem ye ediyet enye aran nte Christ. (1 John 4:2) Mme andibian̄a inyịmeke ke enye ama edi ke obụkidem. Eyedi mmọ inyịmeke ke akananam Jesus ama odu uwem m̀mê inyịmeke ke ẹma ẹyet enye aran ke edisana spirit.
Se Nnyịn Ikpepde:
2, 4. Oyom ifiọk “akpanikọ”—ofụri ukpepn̄kpọ Christian emi odude ke Bible—inyụn̄ isọn̄ọ iyịre ke akpanikọ oro, man ẹnyan̄a nnyịn.—3 John 3, 4.
8-11. Edieke nnyịn mîyomke nditaba “mfọnido oro owo mîdotke, mbọm ye emem, [emi ẹtode] Abasi Ete ye Jesus Christ,” ye ima ima ebuana nditọete, nnyịn ikpenyene ‘ndikpeme idem’ man isọn̄ọ ida ke n̄kan̄ eke spirit inyụn̄ ifep mbon oro “[mîdụhe] ke ukpepn̄kpọ Christ.”—2 John 3.
ẸKABADE ẸDI “NSAN̄AUTOM KE AKPANIKỌ”
John ewet ọyọhọ leta esie ita ọnọ Gaius ufan esie. Enye ewet ete: “Nnyeneke ntak eke okponde akan emi ndiwụt esịtekọm, nte ndikop ke nditọ mi ke ẹsasan̄a ke akpanikọ.”—3 John 4.
John otoro Gaius aban̄a “utom akpanikọ” oro enye anamde ndin̄wam nditọete oro ẹtode-to ẹdi. Apostle oro ọdọhọ ete: “Obiomo nnyịn nditat ubọk ndara utọ mbon emi, man nnyịn ikpakabade idi nsan̄autom ke akpanikọ.”—3 John 5-8.
Mme Mbụme N̄wed Abasi Oro Ẹbọrọde:
11—Ntak emi ndusụk owo ẹsinamde se idiọkde? Sia ndusụk owo mîsọn̄ke idem ke n̄kan̄ eke spirit, mmọ isidaha enyịn ikike mmọ ikụt Abasi. Sia mmọ mîkemeke ndida ata enyịn n̄kụt Abasi, mmọ ẹsinam n̄kpọ nte n̄kpọ eke enye mîkwe mmọ.—Ezek. 9:9.
14—Mmanie ke ẹkot “mme ufan”? Ikọ oro “mme ufan” ke ọtọ emi iwọrọke sụk mbon oro ẹnyenede n̄kpet n̄kpet itie ebuana ye kiet eken. John okokot kpukpru ekemmọ mme andinịm ke akpanikọ.
Se Nnyịn Ikpepde:
4. Nditọete oro ẹkọride ẹsịm ọyọhọ idaha ke esop ẹsinen̄ede ẹkop idatesịt ke ini mmọ ẹkụtde nte mbufa owo ‘ẹkade iso ẹsan̄a ke akpanikọ.’ Ndien mme ete ye eka ẹsinen̄ede ẹkop idatesịt ke ini mmọ ẹn̄wamde nditọ mmọ ẹkabade ẹdi mme asan̄autom Jehovah.
5-8. Mme esenyịn oro ẹsan̄ade-san̄a, mme isụn̄utom, mbon oro ẹnamde utom ke Bethel m̀mê ke n̄kọk itieutom, ye mme asiakusụn̄ ẹsịne ke otu mbon oro ẹnamde utom ọkpọsọn̄ ke ufọn nditọete mmọ ke ntak ima oro mmọ ẹmade mmọ ye Jehovah. Odot ikpebe mbuọtidem mmọ inyụn̄ ida ima in̄wam mmọ.
9-12. Ikpekpebe uwụtn̄kpọ anam-akpanikọ Demetrius utu ke akprakinua Diotrephes, emi ekedide ọdọk edidọk.
“ẸNỊM IDEM MBUFO KE IMA ABASI”
Jude okokot mbon oro ẹdọn̄de ikpat ndịbe ndịbe ẹdụk esop “mbon nsụkuyo, mbon oro ẹsemede ẹban̄a itie mmọ ke uwem, [emi] ẹsan̄ade nte ekemde ye udọn̄ idemmọ.” Mmọ “ẹtịn̄ mme ikọ iseri, ke adan̄aemi mmọ ẹmade mme ọwọrọiso owo.”—Jude 4, 16.
Didie ke mme Christian ẹkeme ndibiọn̄ọ ndiọi odudu? Jude ewet ete: “Ndima, ẹti mme ikọ emi mme apostle Ọbọn̄ nnyịn Jesus Christ ẹkebemde iso ẹtịn̄.” Enye adian do ete: “Ẹnịm idem mbufo ke ima Abasi.”—Jude 17-21.
Mme Mbụme N̄wed Abasi Oro Ẹbọrọde:
3, 4—Ntak emi Jude eketemede mme Christian ete “ẹn̄wana ọkpọsọn̄ en̄wan kaban̄a mbuọtidem”? Koro ‘mbon oro mîten̄eke Abasi ẹma ẹdọn̄ ikpat ndịbe ndịbe ẹdụk esop.’ Mmọ ẹma “ẹwọn̄ọrede mfọnido Abasi nnyịn oro owo mîdotke ẹsịn nte ntak ndinam obukpo ido.”
20, 21—Didie ke ikeme ‘ndinịm idem nnyịn ke ima Abasi’? Imekeme ndinam emi ke usụn̄ ita: (1) ebe ke ndibọp idem nnyịn ke “ata edisana mbuọtidem” nnyịn oto ke ndisịn ifịk n̄kpep Ikọ Abasi ye ke edibuana ifịk ifịk ke utom ukwọrọikọ; (2) ebe ke ndibọn̄ akam “ke edisana spirit,” m̀mê ke n̄kemuyo ye odudu edisana spirit; ye (3) ebe ke ndibuọt idem ke uwa ufak Jesus Christ emi anamde ikeme ndinyene nsinsi uwem.—John 3:16, 36.
Se Nnyịn Ikpepde:
5-7. Nte mme idiọkowo ẹkeme ndibọhọ ubiereikpe Jehovah? Nte uwụtn̄kpọ ita oro Jude ọnọde ẹwụtde, mmọ ikemeke ndibọhọ.
8-10. Ikpenyene nditiene uwụtn̄kpọ Michael etubom mme angel inyụn̄ ikpono odudu oro Abasi enịmde.
12. Ima abian̄a oro mbon mfiakedem ẹnyenede ekeme ndibiat mbuọtidem nnyịn ukem nte itiat oro ẹdịbede ke isọn̄ mmọn̄ ẹkemede ndisịp nsụn̄ikan̄ m̀mê ndinọ mme ọwọk ewọk unan. Ekeme nditie nte mme andikpep abian̄a ẹtat ubọk ẹnọ owo n̄kpọ, edi mmọ ẹtie nte idiọk enyọn̄ eke mîsion̄oke edịm sia mmọ inyeneke se ẹnọde owo ke n̄kan̄ eke spirit. Mme utọ owo emi ẹtie nte obukpo eto utịt ini idọk eke mînyeneke mfri. Ẹyesobo mmọ nte ẹsiwụberede mme eto ẹduọn̄ọ. Ọfọn didie ntem ndifep mbon mfiakedem!
22, 23. Ata mme Christian ẹsua se idiọkde. Man ẹnyan̄a “ndusụk mbon emi ẹnyenede eyịghe” ẹsio ke ikan̄ nsinsi nsobo, mbon oro ẹkọride ẹsịm ọyọhọ idaha ke esop—akpan akpan mme esenyịn—ẹn̄wam mmọ ke n̄kan̄ eke spirit.
[Mme ndise ke page 28]
Mmọn̄, spirit, ye iyịp ẹtie ntiense ẹte ke “Jesus edi Eyen Abasi”